Tsis Txhob Tuaj Ib Tug Nom Tswv Twg Tog

Yexus hais kom nws cov thwj tim tsis txhob “ua raws li neeg ntiajteb ua.” (Yauhas 15:19) Qhov no kuj yog hais txog kev nom kev tswv thiab kev tsov kev rog thiab. Twb yog vim li ntawd, peb thiaj tsis tuaj ib tug nom tswv twg tog li. Yeej tsis yooj yim rau peb ua li no, rau qhov yuav muaj neeg thuam peb. Peb yuav ua li cas peb thiaj muab siab npuab rawv rau Vajtswv Yehauvas thiab nws txoj kev kav xwb?

1. Cov tseem Khixatias xav li cas txog tej nom tswv?

Cov tseem Khixatias hwm nom tswv tej kev cai. Yexus kuj hais kom nws cov thwj tim “them Xixas li rau Xixas,” yog li peb thiaj them se li nom tswv hais. (Malakaus 12:17) Phau Vajlugkub qhia tias Yehauvas tso cai rau nom tswv kav, lawv thiaj tau kav xwb. (Loos 13:1) Lawv yeej tsis muaj hwj chim npaum li Vajtswv thiab lawv daws tsis tau txhua yam teeb meem. Tsuas yog Vajtswv thiab nws txoj kev kav nkaus xwb, thiaj yuav kho tau tag nrho tej teeb meem hauv lub qab ntuj no.

2. Peb yuav ua li cas thiaj yog peb tsis tuaj ib tug nom tswv twg tog?

Peb tsis koom kev nom kev tswv ib yam li Yexus. Muaj ib zaug, Yexus paub tias muaj neeg yuav muab nws tsa ua vaj ntxwv tiam sis nws tsis cia lawv ua li ntawd. (Yauhas 6:15) Yexus hais tias nws lub Nceeg Vaj tsis yog nyob hauv ntiaj teb no. (Yauhas 18:36) Peb yog Yexus cov thwj tim, peb thiaj li tsis tuaj ib tug nom tswv twg tog los sis ib roog nom tswv twg tog. Thiab peb tsis mus nrog luag ua tsov ua rog. (Nyeem Mikhas 4:3.) Txawm peb saib taus tus chij los peb tsis pe hawm ib lub teb chaws twg tus chij. (1 Yauhas 5:21) Peb ua li no los twb yog vim peb tso siab plhuav rau Vajtswv txoj kev kav.

KAWM NTXIV

3. Cov tseem Khixatias tsis tuaj ib tug nom tswv twg tog

Yexus thiab nws cov thwj tim ua tau qauv zoo rau peb xyaum. Nyeem Loos 13:1, 5-7 thiab 1 Petus 2:13, 14. Ces saib zaj YEEB YAJ KIAB thiab tham txog ob lo lus no:

YEEB YAJ KIAB: Cov Tseem Khixatias Tsis Tuaj Ib Tug Nom Tswv Twg Tog​—Ntu 1 (4:28)

• Vim li cas peb yuav tsum hwm nom tswv?

• Puas muaj tej yam uas peb ua tau los qhia tias peb hwm nom tswv?

Thaum muaj tsov rog, muaj tej lub teb chaws hais tias lawv tsis tuaj leej twg tog tiam sis lawv yeej tseem pab ob tog thiab. Yog peb tsis tuaj leej twg tog tiag ces peb yuav ua li cas? Nyeem Yauhas 17:16 thiab saib zaj YEEB YAJ KIAB ces tham txog lo lus no:

YEEB YAJ KIAB: Cov Tseem Khixatias Tsis Tuaj Ib Tug Nom Tswv Twg Tog​—Ntu 2 (3:11)

• Tus neeg uas tsis tuaj leej twg tog coj li cas?

Yog nom tswv hais kom peb ua tej yam uas txhaum Vajtswv txoj cai, peb yuav ua li cas? Nyeem Tes Haujlwm 5:28, 29 thiab saib zaj YEEB YAJ KIAB ces tham txog ob lo lus no:

YEEB YAJ KIAB: Cov Tseem Khixatias Tsis Tuaj Ib Tug Nom Tswv Twg Tog​—Ntu 3 (1:18)

• Thaum nom tswv txoj cai cov nyom nrog Vajtswv txoj, peb yuav taug txoj twg?

• Koj sim xav seb, thaum twg cov tseem Khixatias yuav tsis ua li nom tswv hais?

4. Tej peb xav thiab tej peb ua yuav tsum qhia tias peb tsis tuaj ib tog twg

Nyeem 1 Yauhas 5:21. Saib zaj YEEB YAJ KIAB thiab tham txog ob lo lus no:

YEEB YAJ KIAB: Cov Tseem Khixatias Yuav Tsum Ua Siab Tuab​—Tsis Koom Kev Nom Kev Tswv (2:49)

• Hauv zaj yeeb yaj kiab no, ua cas Ayenkes (Ayenge) thiaj tsis kam txhawb ib roog nom tswv twg thiab tsis nrog lawv hawm tus chij?

• Koj xav, qhov uas nws txiav txim siab ua ntawd puas zoo?

Thaum twg thiaj yuav ua nyuaj rau peb tsis tuaj ib tog nom tswv twg tog? Saib zaj YEEB YAJ KIAB thiab tham txog cov lus no:

YEEB YAJ KIAB: Phau Tsom Faj Pab Tau Peb Li Cas?​—Peb Tsis Tuaj Ib Roog Nom Tswv Twg Tog (5:16)

• Thaum muaj ntau lub teb chaws tuaj sib tw ntaus pob los sis ncaws pob, peb yuav ua li cas peb thiaj tsis tuaj leej twg tog?

• Thaum tej uas nom tswv txiav txim siab ua yuav raug peb, peb yuav ua li cas peb thiaj li muab siab npuab rawv tau rau Yehauvas?

• Tej xov xwm uas peb mloog thiab tej neeg uas peb nrog ua ke yuav ua nyuaj rau peb muab siab npuab Yehauvas li cas?

KOJ KAWM TAU DAB TSI

Tej uas cov tseem Khixatias xav, tej lawv hais, thiab tej lawv ua huv tib si qhia tias lawv tuaj Yehauvas tog xwb.

Rov Tham Dua

• Vim li cas peb yuav tsum mloog nom tswv lus?

• Vim li cas peb thiaj tsis tuaj ib tug nom tswv twg tog li?

• Thaum twg yuav ua nyuaj rau peb tsis tuaj tej nom tswv leej twg tog?

TSHAWB NTXIV

Muaj tej yam twg peb yuav ua tsis tau los sis yuav tau muab tso tseg kom peb thiaj li tuaj tau Yehauvas tog?

Yehauvas Yeej Tsis Tau Tso Peb Tseg Ib Zaug Li (3:14)

Peb yuav npaj peb tsev neeg li cas peb thiaj li yuav tsis tuaj ib roog nom tswv twg tog?

Txhob Tuaj Ib Roog Nom Tswv Twg Tog Thaum Tawm Mus Sab Nraud (4:25)

Vim li cas lub meej mom uas yus tiv thaiv yus lub teb chaws tsis yog lub meej mom uas zoo tshaj plaws?

“Vajtswv Ua Tau Txhua Yam” (5:19)

Thaum koj mus nrhiav hauj lwm ua, ua zoo xav seb tej hauj lwm twg yuav ua nyuaj rau koj muab siab npuab Yehauvas.

“Nyias Yuav Tsum Ris Nyias Lub Nra” (Phau Tsom Faj lub 3 Hlis tim 15 xyoo 2006)

Yav tom hauv ntej, txhua tus Khixatias yuav raug luag tawm tsam thiab tsim txom. Tiam sis puas tsim nyog peb ntshai?

1. Ua cas peb thiaj paub tias yuav muaj neeg tawm tsam peb?

Phau Vajlugkub qhia tias ‘cov ntseeg Yexus Khetos txhua tus uas xav ua lub neej kom Vajtswv tau ntsej muag, lawv yeej raug kev tsim txom.’ (2 Timautes 3:12) Yexus raug luag tsim txom vim nws tsis yog ntiaj teb li thiab nws tsis ua li cov neeg uas nyob hauv Xatas lub qab ntuj ua. Peb los kuj tsis yog ntiaj teb li thiab, peb thiaj paub tias muaj ib hnub twg peb yeej yuav raug kev tsim txom ntawm tej nom tswv thiab tej kev ntseeg cuav ib yam li Yexus.​—Yauhas 15:18, 19.

2. Peb yuav npaj li cas peb thiaj tsis ntshai thaum peb raug kev tsim txom?

Peb txoj kev ntseeg rau Yehauvas yuav tsum ruaj khov tam sim no. Yog li, peb yuav tau lauj sij hawm txhua txhua hnub los thov Vajtswv, nyeem Nws Txoj Lus, thiab mus koom tej kev sib txoos tsis tu ncua. Yog peb ua li no, yuav pab tau peb ua siab loj siab tawv thiab tsis ntshai raug kev tsim txom, txawm yog hais tias tej kev tsim txom ntawd los ntawm peb tsev neeg kiag. Tus tub txib Povlauj kuj raug tsim txom ntau kawg li tiam sis nws hais tias: ‘Yehauvas yog tus uas pab kuv, kuv yuav tsis ntshai.’​—Henplais 13:6.

Yog peb tshaj tawm txoj xov zoo tsis tu ncua, yuav pab kom peb tso siab tau rau Yehauvas thiab muaj lub siab loj siab tawv tsis ntshai tib neeg. (Pajlug 29:25) Yog koj ua siab tawv tsis ntshai mus tshaj tawm txoj xov zoo ces txawm yog lwm hnub tej nom tswv txwv peb tes hauj lwm los koj yeej yuav tsis ntshai mus tshaj tawm qees.​—1 Thexalaunikes 2:2.

3. Qhov uas peb npuab siab rawv rau Yehauvas thaum peb raug kev tsim txom pab tau peb li cas?

Peb yeej tsis nyiam thaum peb raug luag tsim txom, tiam sis thaum peb thev taus tej kev tsim txom ntawd, peb txoj kev ntseeg yuav ruaj khov tuaj. Thiab peb yuav haj yam muaj kev sib raug zoo nrog Yehauvas thaum peb pom nws pab peb ua tau siab ntev thev. (Nyeem Yakaunpaus 1:2-4.) Yeej mob Yehauvas siab thaum nws pom peb raug kev txom nyem tiam sis kuj ua rau nws zoo siab kawg thaum nws pom peb ua siab ntev nyiaj. Phau Vajlugkub hais tias: ‘Yog nej raug tsim txom vim nej ua zoo, thiab nej ua siab ntev nyiaj, Vajtswv yuav foom koob hmoov rau nej.’ (1 Petus 2:20) Cov ua siab ntev thev kev tsim txom yuav tau txoj sia ntev dhawv nyob mus ib txhis hauv lub qab ntuj tshiab uas tsis muaj neeg tawm tsam txoj kev pe hawm tseeb.​—Mathais 24:13.

KAWM NTXIV

4. Koj yeej thev taus thaum koj tsev neeg tawm tsam koj

Yexus paub zoo tias muaj ib txhia hauv peb tsev neeg yuav tsis xav kom peb teev tiam Yehauvas. Nyeem Mathais 10:34-36 thiab tham txog lo lus no:

• Thaum muaj ib tug teev tiam Yehauvas, tej zaum nws tsev neeg yuav ua li cas?

YEEB YAJ KIAB: Yehauvas Qaws Wb Cia (5:13)

• Koj yuav ua li cas yog hais tias koj ib tug txheeb ze los sis ib tug phooj ywg txwv tsis pub koj teev tiam Yehauvas?

Nyeem Phau Ntawv Nkauj 27:10 thiab Malakaus 10:29, 30. Thaum nyeem ib nqe tag ces tham txog lo lus no:

• Lo lus cog tseg ntawm nqe Vajlugkub no pab tau koj li cas thaum koj tsev neeg los sis koj cov phooj ywg tawm tsam koj?

5. Txawm koj yuav raug kev tsim txom li cas los kav tsij rau siab ntso teev tiam Yehauvas

YEEB YAJ KIAB: Txawm Raug Tsim Txom Los Yeej Tsis Ntshai (6:27)

• Cov qauv hauv zaj yeeb yaj kiab no cuab tau koj lub zog li cas?

Nyeem Tes Haujlwm 5:27-29 thiab Henplais 10:24, 25. Thaum nyeem ib nqe tag ces tham txog lo lus no:

• Vim li cas tseem ceeb rau peb pe hawm Yehauvas tsis tseg txawm hais tias tej nom tswv txwv tsis pub peb mus tshaj tawm txoj xov zoo los sis mus kev sib txoos?

6. Yehauvas yuav pab kom koj thev taus

YEEB YAJ KIAB: Vajtswv Yehauvas Yog Tus Cuab Kuv Lub Zog (3:40)

• Ua li cas cov Tim Khawv hauv zaj yeeb yaj kiab no thiaj nyiaj taus tej uas lawv raug?

Nyeem Loos 8:35, 37-39 thiab Filipis 4:13. Thaum nyeem ib nqe tag ces tham txog lo lus no:

• Ua li cas nqe Vajlugkub no thiaj pab tau koj tso siab tias txawm koj yuav raug kev sim siab li cas los koj yeej yuav thev taus?

Nyeem Mathais 5:10-12 thiab tham txog lo lus no:

• Vim li cas thaum koj raug tsim txom los koj yeej tseem muaj tau kev zoo siab?

KOJ KAWM TAU DAB TSI

Qhov uas peb siv zog ntsos teev tiam Yehauvas txawm peb raug kev tsim txom los xij, muaj nuj nqis heev rau Nws. Thiab yog peb muaj Yehauvas pab peb ces peb yeej yuav thev taus.

Rov Tham Dua

• Ua li cas cov Khixatias ho paub tias lawv yuav raug kev tsim txom?

• Koj yuav npaj li cas tam sim no kom koj thiaj li thev taus thaum koj raug kev tsim txom?

• Ua li cas koj thiaj tso siab tau tias txawm koj yuav raug kev sim siab li cas los koj yeej yuav teev tiam Yehauvas?

TSHAWB NTXIV

Saib ib tug tub hluas piav seb Yehauvas pab nws li cas nws thiaj li muaj lub siab ntev thev thaum nws raug kaw vim nws tsis kam tuaj ib roog nom tswv twg tog.

Muaj Lub Siab Thev Taus Kev Tsim Txom (2:34)

Muaj ob niam txiv raug kev tawm tsam tau ntau ntau xyoo los nkawd yeej teev tiam Yehauvas tsis tseg. Saib seb ua cas nkawd thiaj ua tau li ntawd.

Teev Tiam Yehauvas Rau Lub Caij Uas Ntau Yam Hloov (7:11)

Kawm seb yuav ua li cas koj thiaj ua tau siab tawv thaum raug kev tsim txom.

“Npaj Tam Sim No Rau Kev Tsim Txom” (Phau Tsom Faj lub 7 Hli xyoo 2019)

Peb xav li cas xwb thaum peb tsev neeg tawm tsam peb? Thiab peb yuav ua li cas peb thiaj teev tiam tau Yehauvas thiab muaj kev sib haum xeeb nrog peb tsev neeg?

“Qhov Tseeb ‘Tsis Yog Coj Kev Sib Haum Xeeb Los Yog Coj Ntaj Los’” (Phau Tsom Faj lub 10 Hli xyoo 2017)