Kausa hais tias: “Xia wb sib yuav tau 39 xyoos ntau. Xia mob ntev heev nws mam tag sim neej. Wb cov phoojywg yeej txhawb kuv zog kawg li, thiab kuv niaj hnub nrhiav haujlwm ua kom kuv tsis xav txog tej kev nyuaj siab. Tom qab 1 xyoos lawm los, cuag li kuv lub siab tseem phua ob sab. Muaj tej zaus kuv zoo siab tiamsis nyob nyob ces kuv txawm rov nyuaj siab tuaj. Nimno kuv pojniam twb tuag tau 3 xyoos lawm los, tej lub sijhawm tseem mob kuv siab heev.”

Koj puas tau raug li no dua? Tej zaum koj kuj xav ib yam li Kaus thiab. Cov neeg tshawb fawb txog kev quaj ntsuag pom tias thaum yus tus txij nkawm, tus nruab ze lossis tus phoojywg zoo tuag lawm yog ib yam uas mob siab tshaj plaws li. Ib phau ntawv uas qhia txog tibneeg txojkev xav hais tias kev tuag dua siab tshaj plaws, rau qhov yus nrhiav tsis tau yus tus neeg qhovtwg li lawm, thiab yus tsa tsis tau nws sawv rov los li lawm. (The American Journal of Psychiatry) Vim mob siab npaum li ntawd, ib txhia thiaj xav tias: ‘Kuv yuav nyuaj siab mus txog thaum twg? Puas yuav muaj ib hnub kuv rov kaj siab dua? Dabtsi yuav nplig tau kuv siab?’

Phau Tsim Dheev! no yuav tham txog qhov ntawd. Zaj tom ntej yuav piav tias cov uas tabtom quaj ntsuag raug kev nyuaj siab li cas. Yuav muaj lus qhia ntxiv kom yus nyiaj dhau thiab kom yus lub siab nqeg.

Thov kom phau ntawv no nplig tau cov uas quaj ntsuag siab kom lawv muaj kev vam rau yav tom hauv ntej.

Cov neeg tshawb fawb hais tias thaum yus tus neeg tuag lawd, yus ntsuas tau kev quaj ntsuag zoo li yus nqes ib theem ntaiv zuj zus mus txog thaum yus lub siab nqeg. Tiamsis qhov tseeb tiag, tibneeg ib tug quaj ntsuag txawv ib tug. Tej tug quaj heev, tej tug ho tsis quaj li. Puas yog ib tug mob siab dua ib tug? Puas yog nws tauv kua muag xwb? Kuj tsis yog li ntawd thiab. Tej zaum ib haiv neeg quaj ntsuag txawv ntawm ib haiv. Qhov uas yus quaj ntsuag nyob ntawm yus kua muag tob los ntiav, seb yus lub neej zoo li cas, thiab seb yus tus neeg tuag li cas.

YUAV NYUAJ SIAB NPAUM LI CAS?

Thaum yus tus neeg tas sim neej lawd, tej zaum yus tsis paub tias xyov yuav nyuaj siab npaum li cas. Tiamsis coob tus kuj raug li nram no:

Nyuaj siab dhau lawm. Ib txhia nyob nyob cia li quaj vim nco lawv tus neeg heev. Ib txhia ho xav txog thaum lawv tus neeg tseem nyob lossis lawv ua npau suav pom ces ua rau lawv quaj. Tej zaud thaum lawv tus neeg nyuam qhuav tuag, lawv twb ntseeg tsis tau tias nws tuag lawm tiag. Ib tug hu ua Maiv tau raug li no thaum nws tus txiv tuag. Thaiv cia li mob nthawv nthav tuag xwb. Maiv hais tias: “Thaum ntej kuv ib ce loog tas. Kuv twb quaj tsis taus li. Muaj tej lub sijhawm kuv cia li ua tsis taus pa. Kuv ntseeg tsis tau tias nws tuag lawm tiag.”

Coob tus ntxhov siab, npau taws, thiab tu siab. Ib leej txiv hu ua Vaj hais tias, “Wb tus tub Lis muaj 24 xyoos xwb nws cia li tas sim neej lawm. Tom qab nws tuag tau ib ntus lawm los, Zuag wb tseem npau taws heev. Wb xav tsis thoob rau qhov wb ib txwm tsis ua neeg npau nco li ntawd. Wb kuj tu siab tias ua cas wb pab tsis tau wb tus tub tshaj ntawd.” Muaj dua ib tug hu ua Nruas uas nws tus pojniam mob ntev loo mam tuag. Nws kuj tu siab heev thiab. Nws hais tias: “Thaum ntej kuv xav tias ntshe yog tim kuv phem, Vajtswv thiaj cia kuv raug txom nyem li no. Tiamsis qhov uas kuv xav li ntawd ho nkaug kuv lub siab tias kuv liam txim rau Vajtswv lawm thiab.” Tus txiv neej hu ua Kaus uas peb nyeem tag lawm hais tias, “Muaj zaum puav kuv tseem chim rau kuv pojniam tias ua cas nws muab kuv tso tseg. Tiamsis kuj ua rau kuv tu siab tias ua cas kuv ho xav phem li ntawd. Twb tsis yog tim nws.”

Xav tsis tau tom ntej tom qab. Muaj tej lub caij cov uas quaj ntsuag ntxhov siab heev, lawv cia li xav tsis tau tom ntej tom qab lawm. Tej zaum ib txhia xav tias lawv hnov zoo li lawv tus neeg nyob ze ze lawv, kuj zoo li lawv hnov nws lub suab, lossis cuag li lawv pom nws nyob ntawm tej. Ib txhia ho xav txog ntau yam ces lawv cim tsis tau ub tau no lawm. Maiv hais tias: “Tej thaud kuv tabtom nrog lwm tus tham pem los kuv tsis nco qab tej uas kuv nyuam qhuav hais vim kuv xav kuv lwm yam lawm. Kuv lub siab nyob tsis tswm li, xav mus xav los txog hnub uas kuv tus txiv tuag, kuv thiaj ntxhov siab heev.”

Xav ua twm zeej. Thaum ib tug neeg quaj ntsuag, tej zaum nws tsis xav poo npoj lossis yuav meem txom rau tus ub tus no. Kaus hais tias: “Thaum kuv nrog cov muaj txij nkawm ua ke los kuv tsis phim lawv, nrog cov tsis muaj los kuj tsis phim lawv thiab.” Niam Vaj ho hais tias: “Meem txom kuv heev thaum kuv hnov luag tej yws. Lawv tej kev nyuaj siab twb tsis npaum li wb! Ib txhia niam txiv tseem qhuas lawv tej menyuam lub neej rau wb thiab. Kuv pab lawv zoo siab tiamsis kuv tsis xav mloog li. Kuv tus txiv wb paub tias wb yuav tsum ua ib siab nrog luag ua neej mus ntxiv, tiamsis lub caij ntawd wb siab tsis ntev rau leejtwg kiag li.”

Xeeb mob xeeb nkeeg. Lub caij quaj ntsuag ib txhia yuag tas tsis qab los noj mov, ib txhia noj ntau dhau lawm ces ho puv tuaj. Ib txhia pw tsis tsaug zog li, muaj dua ib txhia ho pw tas hnub. Muaj ib tug hu ua Looj uas nws txiv tau tas sim neej lawm. Tau ib xyoos nkaus tom qab nws txiv tuag nws pw tsis tsaug zog li. Nws hais tias: “Txhua hmo kuv tsim tib lub sijhawm, nyuaj siab tias kuv txiv tsis nyob lawm tiag.”

Lub caij uas Nruas quaj ntsuag nws txawm mob txawv heev. Nws hais tias: “Kuv mus cuag kws kho mob ob peb zaug, tiamsis kws kho mob hais tias ntshe kuv nyuaj siab thiaj mob li ntawd xwb.” Ntev mus ntev tuaj, Nruas txawm zoo zuj zus lawm tiag. Qhov uas Nruas mus cuag kws kho mob yog ib qho zoo. Thaum yus tabtom quaj ntsuag ua tau rau yus lub cev tsis muaj zog tiv kab mob npaum li thaum yus kaj siab. Kev quaj ntsuag ua tau rau yus lub cev xeeb lwm yam mob. Yog yus twb muaj ib tug mob lawd ces kuj ua tau kom tus mob ntawd huam tuaj thiab.

Nyuaj leg tej haujlwm tseem ceeb. Vaj hais tias: “Tom qab Lis tuag lawd, tsis yog wb xa xov mus qhia tej nruab ze thiab tej phoojywg xwb. Tiamsis wb tseem xa xov mus rau Lis tus lospav tom haujlwm, thiab nws tus tswv tsev tibsi. Muaj ntaub ntawv ntau heev rau wb lis. Wb tseem mus tu nws tej khoom ub khoom no thiab. Thaum ntawd nyuaj siab kawg li, wb qaug zog zis, mob hlwb kawg kiag li. Txawm li ntawd los wb rau siab ntso lis, tes haujlwm thiaj tiav.”

Muaj ib txhia twb tau ntev loo lawm, lawv mam nyuaj siab. Thaum txog caij lis tej haujlwm uas lawv tus neeg ib txwm saib xyuas mas nyuaj siab kawg li. Maiv tau raug li no. Nws hais tias: “Thaiv yog tus tuav wb tej ntaub ntawv tseem ceeb ntsig txog nyiaj txiag thiab haujlwm. Nimno kuv yuav tau leg. Qhov no tseem tsub ib lub nra hnyav rau kuv ntxiv. Kuv thiaj xav tias xyov yuav ua li cas leg tej haujlwm no kom tiav.”

Tej qauv no pab kom peb pom tias thaum yus tus neeg tas sim neej lawd, tsis yog mob siab xwb, tiamsis mob hlwb thiab ua rau yus qaug zog zis. Kev ploj kev tuag yeej dua rhe yus lub siab tiag tiag li. Thaum tsis tau muaj xwm es yus twb paub txog tej no lawd, ces yuav pab tau kom yus thev taus dua. Nco ntsoov tias tsis yog txhua tus yuav nyuaj siab ib yam li tau hais los saum no. Tiamsis yog peb ho ntsib kev nyuaj siab li no los, tsis yog raug yus ib leeg xwb. Coob tus kuj raug li no dua lawm thiab.

PUAS YUAV MUAJ HNUB UAS KUV ROV ZOO SIAB DUA?

Yuav nyuaj siab npaum li cas? Ntev zuj zus ces yus ua taus ib siab lawm. Tsis yog yus yuav nyuaj siab mus tas lub neej. Yus yeej nco ntsoov yus tus neeg tiamsis yus tsis mob siab npaum li thaum xub thawj lawm. Thaum rov txog hnub uas nws tuag, lossis tej hnub tseem ceeb xws li thaum yus ua tshoob, ces tej zaum yuav ua rau yus nco nws heev. Tiamsis feem coob pom tias ib xyoos tas ib xyoos tuaj ces lawv tseg taus zuj zus lawm. Lawv mam ua taus neej mus ntxiv ib yam li luag tej. Yog muaj tej phoojywg nruab ze txhawb, thiab yog tus quaj ntsuag nrhiav kev pab, ces nws yuav nyiaj taus dua.

Yuav nyuaj siab mus txog tav twg? Muaj ib txhia mas, thawj ob peb lub hlis tom qab lawv tus neeg tuag, yog lub caij lawv nyuaj siab tshaj. Coob tus ho piav tias ib ob xyoos tom qab ntawd, lawv mam rov kaj siab tuaj. Ib txhia tseem quaj ntsuag ntev tshaj ntawd thiab.a Nruas hais tias: “Kuv ces, kuv quaj ntsuag thiab nyuaj siab heev tau 3 lub xyoos nkaus.”

Ib tug neeg txawv ntawm ib tug, yog li ntawd ua siab ntev peem ib hnub dhau ib hnub. Ua siab loj rau qhov tsis yog yus yuav nyuaj siab li no mus li. Ua li, puas muaj tej yam uas yuav nplig tau yus siab tamsim no thiab pab kom yus lub siab nqeg? Thov nyeem ntxiv.

Tibneeg muaj ntau lub tswvyim los pab cov quaj ntsuag. Tej lub tswvyim yuav pab tau koj tiamsis tej lub yuav pab tsis tau, rau qhov ib tug quaj ntsuag txawv ntawm ib tug. Yog li ntawd, yam uas pab tau koj tej zaum ho pab tsis tau lwm tus.

Txawm tibneeg nyias txawv nyias los muaj tej ntsiab lus uas twb pab tau coob leej ntau tus lawm. Cov neeg ua haujlwm pab cov quaj ntsuag niaj hnub siv tej ntsiab lus no los txhawb lwm tus. Cov ntsiab lus no twb muaj nyob hauv ib phau ntawv uas sau ntev heev los lawm, yog phau Vajlugkub. Phau ntawv no pab tau txhua tiam neeg.

1: YUAV TSUM CIA TEJ PHOOJYWG NRUAB ZE TXHAWB

• 

  Cov neeg tshawb fawb pom tias thaum muaj kev quaj ntsuag, qhov uas pab tau zoo tshaj yog cia tej phoojywg nruab ze txhawb yus. Tiamsis yog tej thaud yus ho xav nyob ib leeg los kuj tsis ua cas. Ib txhia kuj meem txom thaum luag tej xav pab lawv. Yog koj ho xav li no, tsis yog koj ib leeg xwb.

• Yus tsis tas nrog tibneeg ua ke txhua lub sijhawm. Tiamsis txhob ua neeg twm zeej es tsis pub leejtwg pab yus li. Cia luag tej pab rau qhov yus tseem yuav sib vam lawm yav tom ntej. Txhob txaj muag qhia lawv txog tej uas koj xav tau tamsim no. Yog muaj tej yam uas koj tsis xav kom luag pab koj, los ua tib zoo qhia lawv paub.

• Luj koj lub sijhawm kom txaus rau koj thiab rau lwm leej lwm tus.

HAUV PAUS NTSIAB LUS: “Ob leeg zoo dua ib leeg . . . Rau qhov yog ib tug ntog yuav muaj ib tug tsa kom nws sawv.”​—Laj Lim Tswvyim 4:9, 10.

2: Xaiv Zaub Mov Zoo Thiab Siv Sijhawm Mus Dhia Ua Si

• Yog koj xaiv tej zaub mov zoo ces yuav pab koj nyiaj taus kev nyuaj siab dua. Noj tej yam xws li txiv hmab txiv ntoo, tej zaub, tej txiv qab rog thiab tej nqaij ntshiv ntshiv.

• Haus dej thiab haus tej kua txiv uas zoo rau koj lub cev kom ntau.

• Yog tsis qab los noj mov ces muab ib pluag faib ua ob peb pluag noj los tau. Tej zaum kuj zoo mus cuag kws kho mob seb nws puas paub tej tshuaj qab los uas yuav pab tau koj.a

• Yog siv sijhawm mus taug kev dhia ua si ces yuav pab tau kom yus dim pa, thiab xav txog lwm yam. Tej tug kuj siv lub sijhawm ntawd los xav txog nws tus neeg kom nws ua taus ib siab.

HAUV PAUS NTSIAB LUS: “Rau qhov tsis muaj leejtwg yuav ntxub nws lub cev tsuas muaj uas yug thiab tu kom zoo xwb.”​—Efexau 5:29.

3: PW KOM TXAUS

• 

  Peb txhua tus yuav tsum pw kom txaus. Tiamsis hajyam tseem ceeb rau cov quaj ntsuag pw kom txaus txaus. Vim li cas? Vim tias kev quaj ntsuag ua rau nws lub zog ntaug tas.

• Nco ntsoov tias yog haus tej dej uas muaj tshuaj khafees (caffeine) lossis haus cawv, ces yuav tsum haus kom hauj sim xwb, vim ob yam no kheev ua rau yus pw tsis tsaug zog.

HAUV PAUS NTSIAB LUS: “Ib taus tes kev siab tus tseem zoo dua ob taus tes puv nkaus tej haujlwm uas siv siav siv zog ua thiab haus cua.”​—Laj Lim Tswvyim 4:6.

4: PAUB NTSUAS

• 

  Nco ntsoov tias ib tug quaj ntsuag txawv ib tug, koj yuav tsum ntsuas seb lub tswvyim twg pab tau koj zoo dua.

• Coob tus pom tias yog lawv tham lawv tej kev nyuaj siab rau lwm tus ces pab tau lawv siab nqeg. Tiamsis lwm cov ho tsis nyiam tham txog lawv tej kev nyuaj siab. Cov neeg tshawb fawb txog kev quaj ntsuag tsis qhia meej tias lub tswvyim twg zoo dua. Yog koj ntsuas koj tus kheej es pom tias zoo rau koj tham rau lwm tus, tiamsis koj ho txaj muag ces xub qhia mentsis rau ib tug phoojywg uas koj tso siab tau tso. Qhov ntawd yuav pab tau koj tsis ntshai tham txog koj tej kev nyuaj siab rau lwm tus.

• Ib txhia pom tias thaum lawv quaj pab tau lawv lub siab nqeg. Muaj dua lwm cov ho pom tias txawm lawv tsis tshua quaj los kuj pab tau lawv siab nqeg thiab.

HAUV PAUS NTSIAB LUS: “Nyias lub siab paub nyias txojkev lwj siab.”​—Paj Lug 14:10.

5: TSIS TXHOB UA TEJ YAM TSIS ZOO RAU KOJ TUS KHEEJ

• 

  Ib txhia haus dej haus cawv, haus yeeb haus tshuaj, kom lawv txhob nco lawv tus neeg. Tiamsis tej ntawd tsuas ua rau lawv tsis nco tej kev nyuaj siab ib vuag xwb, pab tsis tau lawv tiag. Tseem ua rau yus raug mob thiab. Nrhiav tej kev pab uas yuav tsis ua mob rau koj xwb.

HAUV PAUS NTSIAB LUS: “Cia peb ntxuav peb tus kheej kom dawb huv.”​—2 Khaulee 7:1.

6: LUJ KOJ LUB SIJHAWM KOM ZOO

• Coob tus pom tias thaum yus muaj kev quaj ntsuag, zoo rau yus luj sijhawm mus ua lwm yam thiab, yus thiaj tsis xav ntsoov rau tej kev nyuaj siab xwb.

• Siv sijhawm mus nrog tej phoojywg ua ke, mus kawm ua tej yam tshiab, lossis mus ua si lwm qhov. Tej no yuav pab kom yus dim pa.

• Ntev mus ntev tuaj koj lub siab yuav nqeg, ces koj mam li muaj siab mus ua lwm yam ntau dua. Thaum ntawd qhia tias koj ua taus ib siab zuj zus lawm.

HAUV PAUS NTSIAB LUS: “Muaj caij muaj nyoog rau txhua yam, . . . Muaj caij quaj thiab muaj caij luag, muaj caij quaj ntsuag thiab muaj caij seev cev.”​—Laj Lim Tswvyim 3:1, 4.

7: TEEM SIJHAWM UA UB UA NO

• 

  Cia li rov qab mus ua tej haujlwm uas koj txeev ua yav tas los.

• Yog koj teem sijhawm mus ua haujlwm, lossis ua lwm yam, nrhiav caij so, pw kom txaus, ces ntev zuj zus mus koj yuav muaj siab nrog luag ua neej li qub.

• Tau hau ntsoov ua tej haujlwm zoo uas yuav pab kom koj kaj siab, ces yuav tsis mob koj siab npaum li yav tas los.

HAUV PAUS NTSIAB LUS: “Nws thiaj tsis tshua txhawj txog lub caij lub nyoog uas nws muaj txojsia nyob, rau qhov Vajtswv pub kom nws lub siab tsuas xav txog qhov uas zoo siab xyiv fab.”​—Laj Lim Tswvyim 5:20.

8: TXHOB MAJ TXIAV TXIM RAU TEJ YAM TSEEM CEEB

• Tsis ntev tom qab yus tus neeg tas sim neej lawd, txhob maj txiav txim rau tej yam tseem ceeb. Coob tus uas tau ua li ntawd xav txog lig lawm.

• Yog ua tau ces tos ib ntus mam txiav txim siab seb puas khiav mus nyob lwm qhov lossis hloov haujlwm li ub li no. Tsis tas maj muab yus tus neeg tej khoom ub khoom no pov tseg.

HAUV PAUS NTSIAB LUS: “Tus neeg nquag tej hom phiaj yeej coj kom nws muaj nplua mias, tiamsis txhua tus uas maj ua dog ua dig yeej tu pluas xwb.”​—Paj Lug 21:5.

9: NCO TXOG YUS TUS NEEG

• 

  Coob tus pom tias thaum lawv ua tej yam kom lawv nco txog lawv tus neeg, kuj nplig tau lawv siab thiab.

• Tej zaum zoo rau yus muab nws tej duab khaws cia saib, xav txog tej lub sijhawm uas yus nrog nws ua ke es muab sau cia ua chaw nco.

• Khaws tej yam uas ua rau yus nco txog tej yam zoo ntawm yus tus neeg. Thaum yus siab nqeg lawd rov muab thau los saib dua.

HAUV PAUS NTSIAB LUS: “Cia li nco txog yav thaum ub.”​—Kevcai 32:7.

10: MUS UA SI LWM QHOV

• Tej zaum zoo rau koj npaj mus ua si lwm qhov thiab.

• Yog mus tsis tau ntev los, tsuas siv li ib ob hnub mus so kom los siav xwb. Tej zaum mus nce roob ua si, mus ua si tom hav dej, lossis tsav tsheb mus nuam zoov xwb.

• Txawm yus hloov qho yam xwb los twb pab tau yus lawm ntau.

HAUV PAUS NTSIAB LUS: “Nej cia li nrog kuv mus rau ib qho chaw uas tsis muaj neeg es so kom los siav mentsis.”​—Malakau 6:31.

11: PAB LWM TUS

• 

  Nco ntsoov tias thaum koj lauj sijhawm los pab lwm tus, kuj pab tau koj thiab.

• Zoo rau koj txhawb cov phoojywg nruab ze uas nrog koj quaj ntsuag koj tus neeg, vim lawv kuj nrog koj hlub tshua nws thiab.

• Thaum yus txhawb thiab nplig luag lwm tus, kuj pab kom yus lub neej muaj qabhau ntxiv.

HAUV PAUS NTSIAB LUS: “Qhov uas pub rau luag ua rau yus kaj siab dua li txais luag li los.”​—Tubtxib Tes Haujlwm 20:35.

12: LUJ SEB YAM TWG TSEEM CEEB RAU KOJ

• Thaum yus quaj ntsuag yus yuav pom tias yam twg tseem ceeb dua ntais rau yus tiag.

• Ua zoo xav seb koj puas siv koj lub neej los ua tej yam uas tseem ceeb rau koj.

• Yog tias tsim nyog hloov li cas, ces cia li hloov koj lub neej los ua tej yam uas tseem ceeb ntawd.

HAUV PAUS NTSIAB LUS: ‘Mus rau hauv lub tsev uas quaj ntsuag zoo dua mus rau hauv lub tsev noj nqaig noj hno, vim tias qhov no yog qhov kawg rau neeg txhua tus huvsi, mas cov uas tseem ua neej nyob yuav khaws tej no rau hauv lub siab.’​—Laj Lim Tswvyim 7:2.

Tsis muaj ib yam dabtsi yuav tshem tau qhov uas yus nco yus tus neeg. Tiamsis cov uas quaj ntsuag dua lawd, yeej hais tias qhov uas lawv xyaum ua tej yam zoo li peb tau kawm tas no, pab tau lawv lub siab nqeg. Phau ntawv no tsis qhia txhij qhia txhua txog tej kev pab rau cov quaj ntsuag. Tiamsis yog koj xyaum raws li cov ntsiab lus no, tso siab tias yuav nplig tau koj lub siab.

NIAJ HNUB NO MUAJ COOB LEEJ NTAU TUS TSHAWB NRHIAV TXOG KEV QUAJ NTSUAG. Tiamsis zoo li peb tau kawm, tej tswvyim uas zoo tshaj yog qhia raws li phau Vajlugkub. Qhov no ua pov thawj tias phau Vajlugkub yeej pab tau txhua tiam neeg. Peb tso siab tau rau tej lus hauv phau Vajlugkub. Tsuas yog phau Vajlugkub xwb, thiaj muaj tej lus cog tseg uas yuav nplig tau cov quaj ntsuag siab tiag tiag.

• Txawm yus tus neeg tsis nyob lawm los, nws tsis raug kev txom nyem lawm

  Nqe Vajlugkub hauv Laj Lim Tswvyim 9:5 hais tias: “Cov uas tuag lawm tsis paub dabtsi li lawm.” Muaj dua ib nqes hais tias: “Lawv tej tswvyim yuav kawg rau hnub ntawd.” (Ntawv Nkauj 146:4, TMZ) Phau Vajlugkub thiaj muab cov tuag piv ib yam li tsaug zog xwb.​—Yauhas 11:11.

• Muaj kev ntseeg rau Vajtswv yuav nplig tau yus lub siab

  Nqe Vajlugkub hauv Ntawv Nkauj 34:15 hais tias: “[Yehauvas]a tsa qhov muag ntsia ntsoov cov uas ncaj ncees, thiab tig ntsej mloog lawv tej lus quaj thov.” Yog li ntawd, thaum peb thov Vajtswv tsis yog peb lam thov kom peb siab nqeg xwb. Kev thov Vajtswv pab kom peb pom tias muaj Vajtswv tiag thiab peb nrog tau nws sib raug zoo. Nws yog tus tsim peb, tus pub dag zog rau peb thiab nplig tau peb lub siab.

• Muaj lus cog tseg zoo heev txog yav tom hauv ntej

  Phau Vajlugkub cog lus tias muaj ib hnub yav tom hauv ntej Vajtswv yuav tsa cov tuag sawv rov qab los nyob hauv ntiajteb no tiag tiag! Phau Vajlugkub hais tias thaum ntawd Vajtswv “yuav so txhua ncos kua muag ntawm lawv qhov muag, txojkev tuag yuav tsis muaj dua li lawm, txojkev quaj ntsuag txojkev quaj thiab kev mob yuav tsis muaj dua li lawm, vim tej qub twb dua tag lawm.”​—Qhia Tshwm 21:3, 4.

Muaj coob leej ntau tus tau los ntseeg tus Vajtswv hauv phau Vajlugkub hu ua Yehauvas. Lawv tso siab tias muaj ib hnub Vajtswv Yehauvas yuav tsa lawv tus neeg sawv rov qab los. Xav txog ib tug niam tais hu ua Iab. Nws thiab nws tus txiv sib yuav tau 65 xyoos, nws tus txiv mam tas sim neej. Iab hais tias: “Phau Vajlugkub cog lus tias cov tuag tsis raug kev txom nyem lawm, thiab Vajtswv tseem nco ntsoov lawv. Lub caij no nyuaj kuv siab tshaj plaws li. Thaum kuv nco kuv tus txiv kuv xav txog tej lus cog tseg no, kuv thiaj nyiaj dhau xwb.”

Tus pojniam hu ua Maiv uas peb twb kawm txog lawd hais tias: “Txij hnub uas Thaiv tag sim neej lawd, kuv yeej pom Yehauvas tuav rawv kuv txhais tes rau lub caij nyuaj siab ntawd. Ua rau kuv yimhuab ntseeg phau Vajlugkub tej lus cog tseg tias cov tuag yuav sawv rov los tiag. Tej lus ntawd yuav txhawb kuv lub zog mus txog thaum kuv rov pom Thaiv dua.”

Muaj ntau plhom leej thoob ntiajteb uas tso siab plhuav rau phau Vajlugkub. Txawm koj xav tias tej uas phau Vajlugkub qhia tsis txaus ntseeg lossis yog npau suav xwb los, tsim nyog koj lauj sijhawm los kawm seb puas muaj tau tiag. Yog koj kawm, koj yuav pom tias phau Vajlugkub qhia tau muaj chaw txawb chaw rau. Tsis muaj ib yam yuav nplig tau cov quaj ntsuag siab npaum li phau Vajlugkub.

KAWM NTXIV SEB MUAJ KEV VAM LI CAS RAU COV TUAG

Mus saib ib zaj yeeb yaj kiab uas qhia txog lub ntsiab no hauv peb lub vej xaij, jw.org/hmn

COV TUAG ZOO LI CAS LAWD?

Thaum tibneeg tuag, lawv mus dua twg lawm? Phau Vajlugkub qhia meej txog qhov no kom peb muaj kev cia siab rau yav tom ntej

Mus rau PEB TEJ NTAUB NTAWV > YEEB YAJ KIAB (Xaiv Lub Ntsiab: PHAU VAJLUGKUB)

KOJ PUAS XAV HNOV XOV ZOO?

Tsuas hnov txog xov xwm phem nkaus xwb. Puas yuav hnov xov xwm zoo ib zaug li?

Mus rau VAJLUGKUB TEJ LUS QHIA > KEV KAJ SIAB