Dej Dag Nyab Ntiajteb

COV tibneeg uas nyob sab nraum lub nkoj, lawv tseem ua lub neej zoo ib yam li qub. Lawv tsis ntseeg tias dej yuav los nyab tiag. Tej zaum lawv tseem luag heev dua qhov qub. Tiamsis tsis ntev xwb lawv yuav tsis luag ntxiv lawm.

Tamsim ntawd nag txawm pib los. Nag los saum ntuj los ib yam li koj laub dej tawm hauv lub thoob. Nau-a hais yog lawm tiag! Tiamsis lig dhau rau lwm tus mus rau hauv lub nkoj. Yehauvas twb muab lub qhov rooj nkoj kaw ruaj ruaj lawm.

Tib pliag xwb dej nyab tag nrho tej tiaj nrag. Dej hlob zuj zus tuaj mus nyab tej ntoo thiab tej pob zeb, nrov vig voog. Cov tibneeg ntshai heev. Lawv nce mus rau saum tej roob siab. Au, zaum no lawv xav txog lig tias ua cas tsis mloog Nau-a hais es mus rau hauv nkoj thaum lub qhov rooj tseem qheb!

Dej nyab siab zuj zus ntxiv. Nag laub lug saum ntuj los tau 40 hnub thiab 40 hmo. Dej nyab mus puv tej hauv roob siab siab ploj tag nrho. Yog li ntawd, muaj tseeb li Vajtswv tau hais, tag nrho cov tibneeg thiab cov tsiaj txhu sab nraum lub nkoj tuag huv tibsi. Tiamsis cov uas nyob hauv lub nkoj thiaj dim xwb.

Nau-a thiab nws cov tub ua tau lub nkoj zoo heev. Thaum dej los nyab ces lub nkoj thiaj ntab plaws rau saum nplaim dej. Muaj ib hnub, tom qab nag tu lawm, lub hnub tawm tuaj ci ntsa iab. Ua cas yuav txawv ua luaj li! Pom dej hiavtxwv nyob txhua qhov. Thiab tsuas pom tib lub nkoj ntab saum nplaim dej xwb.

Cov neeg loj thiab siab tuag tas. Lawv ua phem tsis tau rau tibneeg lawm. Lawv txhua tus nrog lawv niam thiab cov neeg phem tuag tas huvsi. Tiamsis ua li cas rau lawv txiv lawd?

Cov neeg loj thiab siab ntawd txiv tsis yog tibneeg zoo li peb. Lawv yog cov tubtxib saum ntuj uas tau nqes los nrog tibneeg nyob hauv ntiajteb. Yog li ntawd, thaum dej los nyab, lawv tsis nrog tibneeg tuag. Lawv tso lub cev tibneeg tseg, thiab hloov ua lub cev plig rov mus saum ntuj. Tiamsis Vajtswv tsis pub lawv koom nrog nws cov tubtxib saum ntuj lawm. Yog li ntawd, lawv thiaj mus ua Xatas cov tubtxib. Phau Vajlugkub muab lawv hu ua cov dab.

Vajtswv ua cua ntsawj, ces dej thiaj pib nqeg zuj zus mus. Tsib lub hlis tom qab ntawd lub nkoj thiaj los khuam rau saum ib lub roob. Ces 2 hlis ntau tom qab ntawd, cov uas nyob hauv lub nkoj ntsia pom tej hauv roob tshwm tuaj. Dej pheej nqeg zuj zus ntxiv.

Ces Nau-a thiaj tso ib tug noog dub hu ua uab lag tawm hauv lub nkoj mus. Nws ya mus ntev loo ces nws ya rov los, rau qhov nws nrhiav tsis tau chaw tsaws. Nws pheej ua li no thiab txhua zaus nws los tsaws saum lub nkoj.

Nau-a xav paub saib dej nqeg lawm los tsis tau. Yog li ntawd, zaum no nws thiaj tso ib tug nquab ya tawm mus xyuas. Tiamsis tus nquab kuj rov qab los rau qhov nws nrhiav tsis tau chaw tsaws. Nau-a thiaj tso tus nquab mus zaum 2, ces nws kwv tau ib re nplooj txiv ntoo roj los. Yog li ntawd, Nau-a thiaj paub tias dej nqeg lawm. Nau-a tso tus nquab mus zaum 3, ces zaum no tus nquab nrhiav tau ib qho chaw tsaws lawm.

Zaum no Vajtswv hais lus rau Nau-a. Nws hais tias: ‘Tawm hauv lub nkoj mus. Coj koj tsev neeg thiab cov tsiaj txhu nrog koj mus.’ Lawv nyob hauv lub nkoj tau 1 xyoos ntau. Yog li ntawd, xav saib lawv zoo siab npaum li cas thaum lawv tawm hauv lub nkoj los es lawv tseem muaj txojsia nyob!