Nrhiav Kev Los Ua Timkhawv Rau Cov Txivneej
1. Cheem tsum leejtwg los pab saib xyuas Yehauvas cov neeg?
1 Nyob rau lub caij kawg no muaj neeg los teev tiam Yehauvas coob zuj zus, yog li ntawd yuav tsum tau cov txivneej uas muaj kev ntseeg khov kho los mus saib xyuas. (Mk. 4:30-32; Ttx. 20:28; 1Tmt. 3:1-13) Tiamsis nyob rau tej qho chaw cov pojniam yog cov los teev tiam Yehauvas coob tshaj cov txivneej. Muaj tej hom neeg cov txiv cia cov pojniam ua cov saib xyuas tsev neeg txojkev ntseeg thiab cob qhia tej menyuam txog tej kevcai ntawm lawv txojkev ntseeg. Yog li, peb yuav ua li cas thiaj txhawb tau coob leej txivneej ras txog txojkev ntseeg Vajtswv es los nrog peb teev tiam Yehauvas?
2. Qhov uas Povlauj thiab Petus nkawd siv zog ua timkhawv rau cov txivneej, thaum kawg zoo li cas?
2 Mus Nrhiav Cov Txivneej: Thaum tus txiv tsev los paub qhov tseeb lawd, ces feem ntau nws yuav coj tau lwm tus hauv nws tsev neeg los thiab. Piv txwv, lub sijhawm Povlauj thiab Xila raug kaw vim qhov nkawd qhia txoj xov zoo, nkawd tau ua timkhawv rau tus uas saib lub tsev loj cuj. Tus txivneej ntawd thiab tag nrho nws tsev neeg thiaj los ua kevcai raus dej lawm. (Ttx. 16:25-34) Povlauj tau tshaj tawm hauv lub moos Khaulee pab tau “Khipa uas ua tus thawj saib lub tsev sablaj thiab nws tsev neeg sawvdaws los ntseeg tus Tswv.” (Ttx. 18:8) Yehauvas tau siv Petus los ua timkhawv rau Khaunelia uas yog ib tug thawj rog uas “coj Vajtswv txojkev cai nruj thiab paub ntshai Vajtswv.” Yog li, Khaunelia, nws cov kwvtij, thiab nws cov phoojywg thiaj los ua kevcai raus dej huvsi.—Ttx. 10:1-48.
3. Raws li Fili tus qauv, koj ua tau timkhawv rau cov “nom tswv” twg?
3 Ua timkhawv rau cov “nom tswv” pab tau coob leej. (1Tmt. 2:1, 2) Piv txwv, Yehauvas ib tug tub txib saum ntuj tau los hais rau Fili kom nws mus ntsib “tus tim xyoob” uas saib xyuas tus poj vaj Ethi-aupia txhab nyiaj. Thaum Fili mus txog, nws hnov tus txivneej ntawd tabtom nyeem “xibhwb Yaxaya uas cev Vajtswv lus phau ntawv.” Yog li, Fili thiaj piav txoj xov zoo txog Yexus rau nws. Tus txivneej no thiaj tau los ua ib tug thwjtim lawm, thiab tej zaum thaum nws rov mus tsev nws kuj tau qhia txoj xov zoo taug kev mus. Thiab thaum nws mus txog tsev lawm, tej zaum nws kuj qhia txoj xov zoo rau tus poj vaj thiab cov uas nyob hauv tus poj vaj tsev, tsis yog li ntawd ntshe lawv yuav tsis tau hnov txoj xov zoo ib zaug li.—Ttx. 8:26-39.
4. Peb yuav ua li cas thiaj nrhiav tau cov txivneej?
4 Mus Cuag Kom Tau Cov Txivneej: Vim cov txivneej nyob tom haujlwm rau thaum nruab hnub ntau xwb, koj puas hloov tau koj lub sijhawm mus qhia Vajlugkub rau yav tsaus ntuj, rau hnub 6 thiab hnub 7, lossis rau tej hnub so? Yog koj nquag mus qhia Vajlugkub rau tom tej tsev haujlwm lossis tej kiab tej khw, koj yuav ntsib ntau tus txivneej uas tsis khoom nyob tsev. Cov kwvtij kuj yuav tau tshwj sijhawm los qhia Vajlugkub rau cov txivneej uas nrog lawv ua haujlwm ua ke thiab. Thaum mus qhia Vajlugkub rau tej thaj chaw uas twb qhia ntau zaus lawm, zoo rau cov kwvtij nug seb tus txiv tsev puas nyob tsev es nrog nws tham.
5. Yog tus muam ntsib ib tug txivneej uas nyiam Vajlugkub, zoo rau nws ua li cas?
5 Tus muam uas ntsib ib tug txivneej nyiam Vajlugkub tsis txhob rov mus xyuas tus txivneej ntawd ib leeg xwb. Zoo rau nws coj nws tus txiv lossis lwm tus nrog nws mus. Thaum paub tias tus txivneej ntawd txaus siab kawm Vajlugkub lawm, zoo rau tus muam ntawd muab hloov rau ib tug kwvtij paub tab mus qhia.
6. Peb yuav xyaum tus tubtxib Povlauj li cas es “thiaj coj tau neeg los ntseeg coob zuj zus”?
6 Xaiv Tej Lub Ntsiab Uas Ntxim Cov Txivneej Siab: Tus tubtxib Povlauj paub xav txog cov neeg uas nws nrog tham es hloov nws cov lus los phim lawv kom “thiaj coj tau neeg los ntseeg coob zuj zus.” (1Khl. 9:19-23) Tib yam li ntawd, peb yuav tsum ua tib zoo xav seb tej yam twg cov txivneej nyiam es npaj tej ntawd mus qhia lawv. Piv txwv, cov txivneej feem ntau txhawj txog kev noj kev haus, kev nom kev tswv, thiab kev nyab xeeb rau lub cuab lub yig. Tej zaum lawv kuj xav paub seb lub ntsiab uas tsim neeg yog li cas tiag, yav tom ntej lub ntiajteb yuav zoo li cas, thiab vim li cas Vajtswv thiaj cia muaj kev txom nyem. Yog peb ua tib zoo npaj yuav pab tau cov txivneej txais yuav txoj xov zoo uas peb qhia.—P.L. 16:23.
7. Cov nyob hauv lub koom txoos yuav ua li cas los pab cov txiv uas tsis tau ntseeg uas tuaj kev sib txoos?
7 Pab Cov Txiv Uas Tsis Ntseeg: Txawm cov muam yog cov uas muaj cuab kav pab tau lawv cov txiv los paub Yehauvas tshaj los, peb sawvdaws hauv lub koom txoos kuj muaj feem pab tau thiab. (1Pt. 3:1-4) Thaum tus txiv uas tsis ntseeg nrog nws tus pojniam tuaj tej kev sib txoos, es pom sawvdaws tos txais nws luag ntxhi yuav ua tau ib qho timkhawv zoo heev rau nws. Qhov nws tuaj tej kev sib txoos li no qhia tau tias nws yeej nyiam qhov tseeb mentsis, tej zaum nws kuj yuav kam kawm Vajlugkub thiab.
8. Cov kwvtij yuav pab cov txiv uas tsis tshua muaj kev ntseeg li cas?
8 Thiab muaj ib txhia txiv thaum xub thawj kuj tsis tshua nyiam Vajlugkub tiamsis ntev mus lawv kuj kam tham Vajlugkub nrog tus kwvtij uas lawv tsis txaj muag ua ke nrog. Muaj ib co kwvtij nyob rau ib lub koom txoos tau txiav txim siab mus xyuas tsis so ib tse neeg uas leej txiv tsis ntseeg Yehauvas, es mus nrog nws tham txog tej yam uas ntxim nws siab. Ntev mus ntev tuaj nws cia li kam tham txog Vajlugkub, ces tamsim no nws kuj tau ua kevcai raus dej lawm thiab. Muaj ib zaj ntxiv uas ib tug kwvtij tau mus pab ib leej txiv uas tsis ntseeg xov vaj ncig nws lub tsev. Qhov tus kwvtij tau ua no pab tau leej txiv ntawd kam kawm Vajlugkub. (Klt. 6:10; Flp. 2:4) Yog tias koj yog ib tug kwvtij, koj puas yuav kam pab cov txiv uas tsis ntseeg?
9. Cov txivneej Khixatia uas tau txais kev cob qhia lawm ho zoo li cas?
9 Cob Rau Yav Tom Hau Ntej: Cov txivneej uas los teev tiam Yehauvas es tuav haujlwm hauv lub koom txoos zoo li tej “qhov txhia chaw” uas pub rau neeg. Tej qhov txhia chaw no yog cov txwj laus uas siv lawv lub peev xwm thiab lub dag lub zog los pab Yehauvas cov tibneeg hauv cov koom txoos. (Efx. 4:8; Nt.Nk. 68:18) Cov txivneej ntawd yog cov uas zoo siab hlo thiab kub siab lug saib xyuas lub koom txoos. (1Pt. 5:2, 3) Lawv yog tej koob hmoov uas Yehauvas tau pub rau nws cov neeg!
10. Qhov Anania tau pab Povlauj pab tau coob leej li cas?
10 Piv txwv, Xolau tau ua “ib tug tubtxib rau lwm haiv neeg” txawm tias yav tas los nws yog ib tug tsim txom cov Khixatia. (Loos 11:13) Vim li no Anania thiaj tsis kam mus qhia txoj xov zoo rau Xolau thaum Yexus txib kom nws mus. Txawm li ntawd los, Anania mloog Yexus lus es ua ib siab mus qhia Xolau uas tom qab no hu ua tus tubtxib Povlauj. Txij thaum ntawd los, Povlauj tes haujlwm tshaj tawm txoj xov zoo pab tau txhiab txhiab leej uas tau hnov nws thiab pab tau plhom plhom leej uas tau nyeem cov ntawv uas nws tau sau hauv phau Vajlugkub.—Ttx. 9:3-19; 2Tmt. 3:16, 17.
11. Vim li cas peb yuav tsum ua txhua yam li peb ua tau los ua timkhawv rau cov txivneej?
11 Cia peb ua txhua yam li peb ua tau los ua timkhawv rau cov txivneej. Thaum peb ua li no, peb tso siab tias Yehauvas yuav foom koob hmoov rau peb vim peb siv peb lub dag lub zog los ua nws tes haujlwm.