Zaj 5: Xyaum Qhia Kom Tus Kawm Vajlugkub Loj Hlob
Yuav Kawm Ntau Npaum Li Cas
1 Thaum Yexus qhia nws cov thwjtim, nws ua zoo ntsuas seb lawv paub npaum li cas, ces nws qhia “raws li uas lawv muaj peevxwm mloog tau” xwb. (Mk. 4:33; Yh. 16:12) Tib yam li ntawd, niaj hnub no cov uas qhia Vajtswv txojlus yuav tsum ua tib zoo ntsuas seb yuav qhia ntau npaum li cas rau tus kawm. Qhov yuav qhia ntau lossis qhia tsawg yog nyob ntawm tus kawm lub peevxwm thiab lub sijhawm nkawd muaj los kawm Vajlugkub.
2 Pab Kom Kev Ntseeg Ruaj Khov: Muaj tej tug kawm tib lwm xwb ces twb paub lawm, tiamsis muaj tej txhia yuav tau kawm ob peb lwm mam li nkag siab. Yog li ntawd, peb tsis txhob kawm nrawm nroos kom tas sai, tsam ces tus kawm tsis nkag siab. Txhua tus kawm yuav tsum paub Vajtswv Txojlus kom zoo nws txojkev ntseeg thiaj ruaj khov.—P.L. 4:7; Loos 12:2.
3 Txhua zaus koj qhia tus kawm Vajlugkub nrog koj, siv sijhawm ntau li ntau tau los pab kom nws to taub thiab txais yuav tej nws kawm hauv Vajtswv Txojlus. Tsis txhob kawm ceev dhau tsam tus koj qhia khaws tsis tau lub ntsiab. Yuav tsum siv sijhawm los kawm cov ntsiab lus thiab nyeem tej nqe Vajlugkub uas nyob rau zaj ntawd.—2Tmt. 3:16, 17.
4 Rau Siab Ntso Kawm: Tsis zoo rau peb kawm ceev nrooj thiab tsis zoo rau peb muab lwm yam los tham txuam rau tej peb tabtom kawm. Yog tus kawm pheej muaj ntau yam tham txog nws lub neej, ces zoo rau peb teem sijhawm los tham txog tej ntawd tom qab kawm Vajlugkub tas.—L.Tsy. 3:1.
5 Tsis tas li ntawd xwb, txawm peb paub ntau yam txog qhov tseeb los, peb yuav tau tswj peb tus kheej tsis txhob piav ntau ntau txog tej ntawd. (Nt.Nk. 145:6, 7) Thaum zoo caij zoo nyoog mam li siv tej piv txwv los pab kom tus kawm nkag siab txog tej uas tabtom kawm, tiamsis tsis txhob tham ntev tham ntau txog tej piv txwv ntawd tsam yuav ua rau tus peb qhia kawm tsis tau tej yam tseem ceeb hauv phau Vajlugkub.
6 Yog peb txawj yoog raws li tus peb qhia txhua zaus peb kawm Vajlugkub nrog nws, ces yog peb pab nws “taug [Yehauvas] txojkev kaj.”—Yxy. 2:5.