Coob leej ntau tus tsis xav mloog tej xibhwb thiab tej thawj coj qhia lawm. Lawv pom tias txawm lawv mus koom los, cov thawj coj ntawd yeej teb tsis tau lawv tej lus nug, thiab nplig tsis tau lawv lub siab. Tiamsis, vim li cas ho zoo rau koj tuaj koom Yehauvas Cov Timkhawv tej kev sib txoos? Tej kev sib txoos ntawd yuav pab tau koj li cas?

Yuav pab koj muaj kev xyiv fab vim sawvdaws txawj sib hlub sib pab. Nyob rau thawj 100 xyoo, cov Khixatia yeej muaj ntau lub koom txoos los pe hawm Vajtswv. Lawv sib txoos los kawm Vajtswv Txojlus thiab ib leeg txhawb ib leeg lub zog. (Henplais 10:24, 25) Lawv thiaj suav tias cov ntseeg hauv lub koom txoos yog lawv cov kwvtij nkauj muam. (2 Thexalaunika 1:3; 3 Yauhas 14) Niaj hnub no, peb xyaum tus qauv ntawd, peb thiaj muaj kev xyiv fab tib yam nkaus li thaum ub thiab.

Yuav txawj siv phau Vajlugkub tej hauv paus ntsiab lus. Peb xyaum tus qauv uas teev tseg hauv phau Vajlugkub, uas qhia kom cov txivneej, thiab tej pojniam menyuam sawvdaws tuaj sib sau ua ke mloog Vajtswv Txojlus. Yuav muaj cov uas txawj qhuab qhia, kom peb thiaj paub siv phau Vajlugkub tej hauv paus ntsiab lus, los pab peb lub neej. (Kevcai 31:12; Nehemi 8:8) Txhua tus puavleej muaj feem teb thiab hu nkauj qhuas Yehauvas. Tej no qhia tias peb muaj kev cia siab rau Yehauvas.​—Henplais 10:23.

Yuav txhawb koj txojkev ntseeg rau Vajtswv ntxiv. Yav thaum ub tus tubtxib Povlauj tau hais rau ib lub koom txoos tias: “Rau qhov kuv xav xav pom nej, xwv . . . ib leeg yuav txhawb ib leeg lub zog ntawm kuv thiab nej txojkev ntseeg.” (Loos 1:11, 12) Thaum peb mus kev sib txoos tsis tu ncua, peb cov kwvtij nkauj muam yeej txhawb tau peb txojkev ntseeg kawg li tiag. Lawv pab kom peb coj lub neej dawb huv li phau Vajlugkub tej hauv paus ntsiab lus.

Thov tuaj koom peb txojkev sib txoos, xwv koj thiaj li tau txais tej koob hmoov no. Peb zoo siab tos txais koj. Peb yeej tsis sau nyiaj tom peb tej kev sib txoos.

• Niaj hnub no, peb coj peb tej kev sib txoos raws li tus qauv twg?

• Yog tias peb mus koom tej kev sib txoos, yuav pab tau peb li cas?

Yehauvas Cov Timkhawv thoob ntiajteb mus koom lawv tej kev sib txoos tsis tu ncua. Txawm yog muaj ib lub hav zoov tsaus nti lossis ib kob nag xob nag cua hlob heev los, peb yuav ua siab tawv qhawv mus koom kom tau. Muaj dua lwm cov, ua ib hnub haujlwm sab kawg los, lawv yeej npaj siab mus koom kom tau thiab. Vim li cas Yehauvas Cov Timkhawv yuav mob siab ua luaj mus koom nrog cov ntseeg?

Yuav pab peb nyiaj dhau kev nyuaj siab. Povlauj sau li no rau cov ntseeg hauv lub koom txoos: “Ua tib zoo saib yuav ua li cas ib leeg thiaj txhawb tau ib leeg lub zog.” (Henplais 10:24) Povlauj tus nru lus yog kom cov ntseeg sib nug moo thiaj sib raug zoo. Nws xav kom peb ib leeg mob siab txog ib leeg. Yog tias peb siv sijhawm nrog cov kwvtij hauv lub koom txoos ua ke, peb yuav pom tias lawv kuj tau ntsib tej kev nyuaj siab uas peb raug lawm thiab. Tej zaum lawv yuav pab tswvyim rau peb, xwv peb thiaj tiv dhau.

Pab kom peb muaj kev sib raug zoo. Tom tej kev sib txoos, tsis yog peb lam mus li tus qhua xwb. Tiamsis peb yeej zoo li ib tse neeg ntag. Peb kuj siv sijhawm ua ke mus ua si thiab. Thaum peb siv sijhawm ua ke li no, peb hajyam muaj kev sib hlub sib pab, vim peb pom tej yam zoo uas peb cov kwvtij nkauj muam tau ua. Thaum lawv muaj kev ntxhov siab peb yuav mob siab txog lawv, thiab nqes tes pab lawv tamsid. (Paj Lug 17:17) Qhov uas peb nrog txhua tus hauv lub koom txoos ua ke, qhia tias peb “mob siab” lawv tib yam.​—1 Khaulee 12:25, 26.

Yehauvas Cov Timkhawv yog cov uas nrhiav kev los ua li Vajtswv lub siab nyiam. Peb txhawb kom koj nrog peb sib cog phoojywg. Tsis txhob cia ib yam dabtsi txwv tau koj.

• Vim li cas ho zoo rau peb nrog cov uas mus tom kev sib txoos, sib cog phoojywg?

• Ua li koj puas xav mus ntsib cov kwvtij nkauj muam hauv lub koom txoos thiab?

Nyob rau thawj 100 xyoo, thaum cov Khixatia sib txoos ua ke, lawv hu nkauj, thov Vajtswv thiab kawm Vajtswv Txojlus. Lawv tsis ua kevcai dabtsi. (1 Khaulee 14:26) Thaum koj tuaj koom peb tej kev sib txoos, peb kuj coj ib yam li ntawd thiab.

Muaj lus qhuab qhia los ntawm phau Vajlugkub uas pab tau peb niaj hnub no. Hnub 6 (Saturday) los yog Hnub 7 (Sunday), lub koom txoos tuaj sib sau ua ke mloog ib zaj lus qhuab qhia los ntawm phau Vajlugkub, uas ntev li 30 feeb. Cov lus qhuab qhia ntawd, yuav qhia seb Vajtswv Txojlus pab tau peb lub neej li cas niaj hnub no. Zoo rau peb nqa peb phau Vajlugkub mus, peb thiaj nthuav tau cov nqe Vajlugkub los nyeem. Tom qab zaj lus qhuab qhia, yuav muaj lus nug lus teb los ntawm Phau Tsom Faj, kawm ntev li 1 txoos teev. Phau Tsom Faj yuav pab kom peb paub coj lub neej raws li phau Vajlugkub qhia. Yehauvas Cov Timkhawv muaj 110,000 tawm lub koom txoos nyob thoob qab ntuj, lawv puavleej kawm tib yam nkaus.

Muaj kev kawm kom peb txawj qhia Vajlugkub. Txhua lub lim tiam, peb kuj muaj kev sib txoos los xyaum qhia Vajlugkub thiab. Hmo ntawd yuav muab ua 3 ntus kawm. Txojkev sib txoos no hu ua Lub Neej Thiab Tes Haujlwm Khixatia thiab peb yuav siv phau Lub Neej Thiab Tes Haujlwm Khixatia Phau Kawm los kawm. Ntu 1 hu ua Vajtswv Tej Lus Nyiaj Lus Kub thiab yuav kawm tej yam tseem ceeb hauv cov nqe Vajlugkub uas nyeem rau lub lim tiam ntawd. Ntu 2 hu ua Rau Siab Ua Vajtswv Tes Haujlwm thiab yuav muaj tej yeeb yam seb yuav hais li cas thaum nrog lwm tus tham txog phau Vajlugkub. Muaj ib tug kwvtij yuav ua tus saib xyuas, thiab qhia seb sawvdaws yuav tau xyaum li cas lawv thiaj txawj nyeem ntawv thiab qhia Vajlugkub. (1 Timaute 4:13) Ntu 3 hu ua Lub Neej Khixatia thiab yuav qhia txog phau Vajlugkub tej hauv paus ntsiab lus, seb yuav siv ua neej li cas. Kuj muaj lus nug lus teb, kom peb yimhuab nkag siab tej tob tob hauv phau Vajlugkub.

Thaum koj tuaj koom peb tej kev sib txoos, koj yeej yuav nyiam rau qhov tej kev sib txoos yuav pab koj paub txog phau Vajlugkub tiag.​—Yaxaya 54:13.

• Koj yuav kawm tau dabtsi thaum koj tuaj koom Yehauvas Cov Timkhawv?

• Koj xav tuaj koom txojkev sib txoos twg?