Tej Lus Nug Uas Peb Muaj
◼ Yog peb xav kom peb tej qub txeeg qub teg poob rau Yehauvas lub koom haum thaum tsis muaj peb lawm, peb yuav tau npaj li cas ua ntej?
Tom qab tsis muaj yus lawd, yus yeej faib tsis tau yus tej qub txeeg qub teg rau lwm tus lawm. (L.Tsy. 9:5, 6) Twb yog vim li ntawd, ntau tus thiaj sau tseg ua ntej tias lawv xav faib lawv tej qub txeeg qub teg li cas. Hmoob ib txwm tsis ua li ntawd, tiamsis zoo rau peb npaj li no thiaj tsis muaj teeb meem rau peb tej tub ki. (2Vntx. 20:1) Cov ntaub ntawv yuav tsum qhia meej tias leejtwg yuav tuav txoj haujlwm ua tus faib yus tej qub txeeg qub teg. Nyob rau ntau lub tebchaws, yog tias tsis muaj ntaub ntawv qhia ces nom tswv yuav los ua tus faib. Yog li ntawd, yog peb xav faib peb tej qub txeeg qub teg ib txhia rau Yehauvas lub koom haum, tseem ceeb rau peb npaj ntaub ntawv los qhia meej li ntawd, thiab ua tib zoo xaiv ib tug los ua tus faib.
Tus uas faib qub txeeg qub teg muaj ib teg haujlwm hnyav kawg li. Tej zaum tej qub txeeg qub teg uas nws saib xyuas raug nqe ntau heev. Yog tias muaj li ntawd, ces yuav siv sijhawm ntev heev los tu tej ntawd mam li tiav. Tsis tas li ntawd xwb, yuav tau faib raws nkaus li nom tswv tej kevcai. Tsis yog txhua tus hauv lub koom txoos yuav tuav tau tes haujlwm no. Tus uas koj xaiv cia yuav tsum txawj saib xyuas tes haujlwm no, yuav tsum yog ib tug uas koj tso siab tau, thiab nws yuav tsum tu ncaj raws li txhua yam uas koj teev tseg.—Mus nyeem zaj hu ua “The Wisdom and Benefits of Estate Planning,” hauv phau Awake! lub 12 Hlis, tim 8, 1998.
Yog Tias Lwm Tus Xav Kom Koj Ua Tus Faib Qub Txeeg Qub Teg: Yog tias lwm tus xav kom koj ua tus faib qub txeeg qub teg rau nws, koj yuav tsum ua tib zoo txiav txim siab. Thov Yehauvas thiab xav seb koj puas muaj peevxwm ua tau tes haujlwm ntawd tiav. (Lk. 14:28-32) Tom qab tus neeg ntawd tas sim neej lawm, koj yuav tsum hais rau cov uas muaj npe txais tej qub txeeg qub teg ntawd paub tibsi. Koj yuav tau faib kom raws kevcai thiab raws nkaus li tau teev tseg lawd. Koj yuav tsum paub seb tus neeg ntawd muaj nyiaj txiag, vaj tse, liaj teb ntau npaum li cas. Tsis txhob hla tej lus uas sau tseg hauv daim ntawv faib qub txeeg qub teg. Yog muaj tej yam uas twb muab feeb rau Yehauvas lub koom haum lawm, yam ntawd yeej yog muab cob rau Yehauvas lawm.—Lk. 16:10; 21:1-4.