Lub Vaj Kaj Siab Uas Vajtswv Cog Tseg

DAIM duab no yog ua txog ib lub vaj kaj siab. Tej zaum lub vaj kaj siab uas Vajtswv tau qhia rau Yaxaya yuav zoo li no. Yaxaya yog ib tug neeg cev Vajtswv lus uas nyob tsis ntev tom qab Yauna.

Lub vaj kaj siab yog ib qho chaw uas zoo nkauj heev. Daim duab no ua rau koj nco txog lub vaj twg? Daim duab no zoo ib yam li lub vaj zoo zoo nkauj uas Vajtswv Yehauvas tau ua rau Adas thiab Eva, puas yog? Tiamsis tag nrho lub ntiajteb puas yuav ua tau ib lub vaj kaj siab tiag tiag?

Yehauvas twb qhia kom Yaxaya sau txog lub vaj kaj siab uas yuav muaj yav tom ntej rau Vajtswv cov tibneeg. Yehauvas hais tias: ‘Hma yuav nrog menyuam yaj nyob ua ke. Menyuam nyuj thiab tsov ntxhuav yuav nrhiav noj ua ke, tej menyuam yaus yuav yug cov tsiaj ntawd. Txawm yog tus menyuam mos ua si ze nab muaj taug los, nab yuav tsis tom.’

Coob leej yuav hais tias: ‘Yeej muaj tsis tau li ntawd ib zaug li. Ib txwm muaj teeb meem nyob hauv ntiajteb no, yeej yuav muaj li ntawd mus li.’ Tiamsis xav txog qhov no saib: Lub vaj uas Vajtswv muab rau Adas thiab Eva nyob, zoo li cas?

Vajtswv muab Adas thiab Eva tso rau hauv ib lub vaj kaj siab. Tiamsis nkawd tsis mloog Vajtswv lus, nkawd thiaj tsis tau nyob hauv lub vaj lawm. Nkawd kuj txawj laus thiab txawj tuag. Vajtswv cog lus tias cov tibneeg uas hlub nws, yuav tau txais tej uas Adas thiab Eva muab ua poob lawm.

Hauv lub vaj kaj siab uas yuav muaj tom ntej no, tibneeg thiab tej tsiaj yuav tsis ua phem li lawm. Yuav muaj kev thaj yeeb tiag tiag. Txhua leej txhua tus yuav noj qab nyob zoo thiab muaj kev zoo siab. Ib puas tsav yam yuav zoo li Vajtswv npaj tseg thaum chiv thawj. Nyob rau lwm zaj peb tseem yuav kawm tias Vajtswv yuav ua kom muaj tej no li cas.