Tej Lus Nug Uas Peb Muaj
◼ Cov niam txiv yuav siv dabtsi los qhia menyuam kom lawv txojkev ntseeg thiaj loj hlob tiav?
Cov niam txiv Khixatia yuav tau siv zog cob lawv tej menyuam kom paub Yehauvas “tej lus qhuab qhia thiab nws tej lus ntuas.” (Efx. 6:4) Piv txwv, cov niam txiv pom tias zoo rau lawv nyeem phau niaj hnub tshawb nrhiav txhua tagkis nrog lawv cov menyuam. Hmo tsev neeg pe hawm Vajtswv ua ke lossis lwm lub caij nyoog uas tsev neeg los nyob ua ke, sawvdaws kuj saib ib daim yeeb yaj kiab thiab tham txog daim yeeb yaj kiab ntawd, tham txog tej zaj Young People Ask hauv cov Awake!, siv tej zaj hauv phau Vajlugkub los ua yeeb yam, lossis xyaum ib yam dabtsi twg. Tiamsis yuav kom tej menyuam txojkev ntseeg loj “hlob tiav,” cov niam txiv yuav tau qhia lawv cov menyuam kom paub tej yam tob tob txog qhov tseeb hauv phau Vajlugkub.—Hnpl. 6:1.
Ua zoo xav seb peb siv tej ntaub ntawv twg los qhia cov tibneeg hauv peb thaj tsam. Ntau zaus peb siv Phau Vajlugkub Qhia Txog Dabtsi Tiag? los pib kawm Vajlugkub nrog ib tug twg thawj zaug peb ntsib nws lossis thaum peb rov mus xyuas nws. Tom qab kawm phau no tas, peb siv phau “Nyob Hauv Vajtswv Txojkev Hlub” los qhia nws ntxiv. Vim li cas peb thiaj siv 2 phau ntawv no? Peb siv 2 phau ntawv no rau qhov phau Vajlugkub Qhia pab tau cov kawm paub txog tej yam tseem ceeb hauv phau Vajlugkub. Thiab phau “Vajtswv Txojkev Hlub” pab kom lawv txawj siv tej hauv paus ntsiab lus hauv phau Vajlugkub los ua lawv lub neej. Ob phau ntawv no pab tau cov kawm “ntsia cag” ruaj rau hauv Khetos thiab “nyob ruaj hauv txojkev ntseeg.” (Khx. 2:6, 7) Yog li ntawd, 2 phau ntawv no yeej yuav pab tau peb cov menyuam thiab. Peb cov menyuam los yuav tsum paub kom zoo txog tus nqe txhiv, lub Nceeg Vaj, thiab thaum tuag lawm zoo li cas. Lawv yuav tsum paub tias ua li cas Vajtswv cia muaj kev txom nyem thiab paub tias lub caij no yog lub caij kawg lawm. Lawv yuav tsum ntseeg tias Yehauvas cov Timkhawv muaj qhov tseeb tiag. Thiab cov menyuam yuav tsum paub tej hauv paus ntsiab lus thiab yuav tsum “txawj cais” seb qhov twg yog thiab qhov twg tsis yog. (Hnpl. 5:14) Tsis tas li ntawd xwb, cov niam txiv yuav tsum paub lawv cov menyuam zoo es thiaj paub qhia lawv. Nco ntsoov tias txawm tej menyuam tseem yau los lawv yeej muaj peev xwm kawm tau tej yam tob tob txog qhov tseeb hauv phau Vajlugkub.—Lk. 2:42, 46, 47.
Lub koom haum tau muab tej yam uas nyob hauv phau Vajlugkub Qhia tso rau hauv lub Vej xaij (Web site) jw.org los pab cov niam txiv qhia lawv cov menyuam. Koj thiab koj tsev neeg kuj mus nrhiav tau tej ntawd hauv peb lub Vej xaij ntawm qhov BIBLE TEACHINGS > TEENAGERS. Tom ntej no mam li muab tej yam uas nyob hauv phau Vajtswv Txojkev Hlub los tso rau hauv lub Vej xaij thiab. Tiamsis yog koj xav siv 2 phau ntawv no los qhia koj cov menyuam los tau. Cov niam txiv mam li ntsuas seb puas zoo rau lawv kawm tej uas hais tas los no rau hmo lawv pe hawm Vajtswv ua ke, rau thaum lawv kawm Vajlugkub nrog lawv cov menyuam, lossis rau thaum lawv cob lawv cov menyuam kom paub kawm Vajlugkub.