Rau Siab Ntso Mus Coj Tibneeg Los Ua Thwjtim
1. Yuav ua li cas peb thiaj cawm tau tibneeg?
1 Peb tes num rau xyoo 2014 qhia tias Vajtswv cov tibneeg kub siab heev mus tshaj tawm txoj xov zoo txog lub Nceeg Vaj. (Mth. 24:14) Vim peb mus qhia txoj xov zoo ib lub tsev rau tsev, mus tseb ntawv caw thiab ntawv tseb, thiab mus teeb rooj teeb laub, peb thiaj qhia tau txoj xov zoo rau tibneeg coob tshaj li yav tas los. Tiamsis yuav kom peb cawm tau tibneeg tiag, peb yuav tsum kawm Vajlugkub nrog lawv es coj lawv los ua Yexus cov thwjtim.—1Tmt. 2:4.
2. Yuav kom peb kawm tau Vajlugkub nrog tibneeg peb yuav tsum xav txog cov lus nug twg?
2 Npaj Kawm Vajlugkub Nrog Txhua Tus: Thaum muaj ib tug uas xav kawm Vajlugkub, koj puas sau nws npe, chaw nyob, xov tooj, lossis e-mail cia es mus xyuas nws sai li sai tau kom pib kawm tau Vajlugkub nrog nws? Zaum tas los uas koj tau nrog ib tug tswv tsev kawm ib ob nqes Vajlugkub thawj zaug koj ntsib nws twb tau hov ntev lawd? Zaum tas los uas koj tau nug ib tug uas koj niaj hli nqa Phau Tsom Faj mus rau seb nws puas xav kawm Vajlugkub twb yog thaum twg lawd? Koj puas tau tso 2 zaj yeeb yaj kiab Kawm Vajlugkub Ua Dabtsi? thiab Kev Kawm Vajlugkub Zoo Li Cas? rau cov koj ua haujlwm nrog, cov koj kawm ntawv nrog, cov neeg zej zog, cov uas txheeb ze, thiab lwm tus uas koj paub saib? Thaum mus teeb rooj teeb laub, koj puas qhia rau txhua tus uas nqa ntaub ntawv tias peb kuj kawm Vajlugkub nrog tibneeg dawb thiab?
3. Vim li cas peb thiaj qhia tau Vajlugkub rau tibneeg?
3 Yehauvas Thiab Yexus Txojkev Pab: Thaum Yexus txib kom peb “cia li mus” coj tibneeg los ua nws cov thwjtim, twb yog nws qhia tias peb yuav tsum rau siab ntso thiab zoo siab hlo mus coj. Tsis yog nws txib kom peb mus ua peb xwb, tiamsis nws tau cog lus tias nws yeej yuav nrog nraim peb. (Mth. 28:19, 20) Tsis tas li ntawd xwb, Yehauvas kuj muab nws lub hwj huam dawb huv los pab peb, muab twj rau peb siv, thiab cob qhia peb kom peb thiaj qhia tau qhov tseeb rau tibneeg. (Xkhy. 4:6; 2Khl. 4:7) Peb thov tau Vajtswv pab kom peb “muaj lub siab xav” ua thiab “muaj peevxwm” ua tes num uas tseem ceeb tshaj plaws no.—Flp. 2:13.
4. Vim li cas peb yuav tsum rau siab ntso mus coj tibneeg los ua thwjtim?
4 Peb zoo siab heev thaum peb tshaj tawm txoj xov zoo. Tiamsis peb yimhuab zoo siab thaum peb qhia qhov tseeb rau ib tug es pab nws los nrog peb taug ‘txojkev uas coj mus txog txojsia.’ (Mth. 7:14; 1Thxk. 2:19, 20) Tiamsis thaum peb rau siab ntso mus coj tibneeg los uas thwjtim, qhov tseem ceeb tshaj yog dabtsi? Yog qhov uas peb ua rau Yehauvas zoo siab, rau qhov nws “tsis xav cia leejtwg puam tsuaj, tiamsis xav kom txhua tus ntxeev dua siab tshiab.”—2Pt. 3:9.