“Ua Timkhawv Rau Sawvdaws”
1. Povlauj tso tau tus qauv zoo li cas rau peb mus ua Vajtswv tes num?
1 “Ua koj tes haujlwm kom tiav.” (2Tmt. 4:5) Povlauj yeej muaj cai ntuas Timaute li no. Vim tias nyob rau xyoo 47 txog xyoo 56 T.Q.Y., Povlauj tau ncig mus tshaj tawm txoj xov zoo txawv tebchaws 3 lwm. Phau ntawv Tubtxib Tes Haujlwm tau hais ntau zaus tias Povlauj tau “ua timkhawv” rau sawvdaws. (Ttx. 23:11; 28:23) Ua li, niaj hnub no peb xyaum tau Povlauj tus qauv li cas?
2. Thaum peb tshaj txoj xov zoo lub tsev rau tsev, peb yuav ua li cas peb thiaj ua tau timkhawv rau sawvdaws?
2 Lub Tsev Rau Tsev: Yuav kom peb mus ntsib cov uas tsis tau hnov txoj xov zoo ib zaug li vim lawv pheej tsis nyob tsev, zoo rau peb nrhiav dua lwm lub caij mus seb puas ntsib lawv. Tej zaum tus txiv tsev yuav nyob thaum yav tsaus ntuj lossis hnub 6 thiab hnub 7. Thaum peb rov mus xyuas tus uas pheej tsis nyob tsev, yog peb ntsib leejtwg cia li nrog tus ntawd tham. Tiamsis yog koj mus thaum twg los nws pheej tsis nyob tsev, koj yuav ua li cas? Tej zaum kuj zoo rau koj sau ntawv lossis hu xov tooj seb puas ntsib nws.
3. Koj siv lub caij lub nyoog twg los ua timkhawv rau ib tsoom sawvdaws?
3 Ua Timkhawv Rau Ib Tsoom Sawvdaws: Niaj hnub no Yehauvas cov tub qhe qhia nws lub “tswvyim” rau txhua tus uas tig ntsej mloog. Tej zaum lawv qhia rau “ntawm tej kev” lossis “ntawm tshav puam.” (P.L. 1:20, 21) Txhua txoj ke uas peb mus, peb puas nco ntsoov ua timkhawv? Thiab luag lwm tus puas pom tias peb “rau siab ntso qhia txoj xov zoo”? (Ttx. 18:5) Yog luag pom peb ua li ntawd, ces yeej qhia tau tias peb ua peb tes haujlwm “ua timkhawv rau sawvdaws” tiag.—Ttx. 10:42; 17:17; 20:20, 21, 24.
4. Kev thov Vajtswv thiab xav txog Vajtswv txojlus pab tau peb ua timkhawv rau sawvdaws li cas?
4 Tej lub sijhawm peb yuav tsis muaj cuab kav qhia Vajlugkub rau lwm tus vim yog txaj muag. Nco ntsoov tias, Yehauvas yeej paub tej peb ua tsis tau. (Nt.Nk. 103:14) Thaum muaj li ntawd, peb yuav tau thov Yehauvas pab kom peb muaj lub siab tuab qhia nws txojlus. (Ttx. 4:29, 31) Ib qho ntxiv uas yuav pab tau peb yog peb yuav tau kub siab kawm Vajlugkub thiab xav txog Vajtswv txojlus kom peb nco txiaj ntsig rau txoj xov zoo uas muaj nqes heev. (Flp. 3:8) Yog peb ua li no, yuav txhawb tau peb muaj lub siab kub lug mus tshaj tawm txoj xov zoo.
5. Peb muaj feem ua tau li Yau-ee zaj lus faj lem li cas?
5 Yau-ee zaj lus faj lem tau qhia tias ua ntej Yehauvas hnub tseem ceeb thiab txaus ntshai kawg nkaus los txog, Vajtswv cov tibneeg yuav “txeem plaws” mus los yog rau siab ntso, tsis cia ib yam dabtsi los tav lawv txoj hau kev. (Y-ee 2:2, 7-9) Cia peb rau siab ntso ua timkhawv rau sawvdaws, rau qhov tes haujlwm no yuav tsis rov muaj dua ib zaug ntxiv lawm!