ZAJ KAWM 2

Qhia Hauv Nruab Siab Tuaj

2 Khaulee 2:17

LUB NTSIAB LUS: Qhia hauv nruab siab tuaj luag thiaj pom tias koj ntseeg tej uas koj hais, thiab paub tias koj xav pab lawv tiag.

Thov Vajtswv thiab ua tib zoo npaj ua ntej. Thov Yehauvas pab kom koj xav ntsoov rau lub ntsiab uas koj qhia, txhob xav txog koj tus kheej. Cov ntsiab lus uas koj qhia yuav tsum poob hauv koj lub siab ua ntej. Tsis txhob qog cov ntawv uas koj tshawb tau xwb, yuav tsum qhia tawm hauv nruab siab tuaj.

Yog koj yuav nyeem phau Vajlugkub lossis lwm phau ntawv, siv sijhawm nyeem mus nyeem los koj thiaj paub zoo thiab nyeem tau npliag. Yog koj nyeem lwm tus cov lus, kub siab lug nyeem ib yam li lawv tham pem. Txhob muab nyeem muaj ceem dhau tsam ho tsis txaus ntseeg.
Muaj siab qhia. Xav txog cov neeg uas koj tabtom qhia, seb txoj xov zoo yuav pab tau lawv li cas. Yog koj xav ntsoov rau lawv xwb ces koj tus cwj pwm yuav qhia tias koj mob siab txog lawv tiag. Koj yuav sawv ntseg, piav tes, thiab ua ntsej muag luag ntxhi qhia.

Koj yuav tsum qhia li koj niaj hnub tham pem, tiamsis tsis txhob hais tej lus dog dig. Cov lus uas koj hais yuav tsum raug cai, meej thuav, luag thiaj saib taus txoj xov zoo.
Tsa muag ntsia sawvdaws. Thaum koj tabtom qhia, saib cov tibneeg ib tug rau ib tug. Tiamsis nco ntsoov tias nyob rau tej koog tibneeg txaj muag heev thaum koj ntsia lawv. Yog li ntawd, koj yuav tsum paub cai txhob ntsia nruj nruj.