Koj Puas Muaj Ib Txojkev Sib Raug Zoo Nrog Yehauvas Tiag?
“Txav los ze Vajtswv mas nws yuav los ze nej.”—YAKAUNPAU 4:8.
1. Vim li cas tseem ceeb rau peb txhawb peb txojkev sib raug zoo nrog Yehauvas?
YOG tias koj twb ua kevcai raus dej los ua Yehauvas ib tug Timkhawv lawm, ces koj tau txais ib qho koob hmoov zoo kawg nkaus. Koob hmoov dabtsi? Koj tau los nrog Vajtswv Yehauvas sib raug zoo. Xatas lub qab ntuj yeej nrhiav nrhw kev los txo peb txojkev phoojywg nrog Yehauvas. Peb kuj yog neeg txhaum, yog li peb lub siab niaj hnub dag ntxias kom peb tso Yehauvas tseg. Twb yog vim li ntawd thiaj tseem ceeb rau peb txhawb kom peb txojkev sib raug zoo nrog Yehauvas ruaj khov.
2. Peb yuav txhawb peb txojkev sib raug zoo nrog Yehauvas li cas?
2 Koj puas ntseeg tias muaj Yehauvas tiag? Koj puas xam pom tias Yehauvas yog koj tus Phoojywg? Koj puas xav kom koj txojkev sib raug zoo nrog Yehauvas hajyam ruaj khov? Yakaunpau 4:8 qhia kom peb ua li no: “Cia li txav los ze Vajtswv mas nws yuav los ze nej.” Yog li ntawd, koj yuav tsum txav ze Vajtswv nws thiaj li txav ze koj thiab. Yog tias koj hajyam nrhiav kev los kawm txog Yehauvas, ces koj yuav hajyam ntseeg tias muaj nws tiag. Koj yuav xav ib yam li Yexus hais no: “Tus uas txib kuv tuaj mas muaj tseeb. . . . Kuv paub nws.” (Yauhas 7:28, 29) Tiamsis yuav ua li cas koj thiaj txav ze rau Yehauvas?
Koj nrog Vajtswv sib txuas lus li cas? (Saib nqe 3)
3. Peb yuav nrog Yehauvas sib txuas lus li cas?
3 Yuav kom koj txav ze rau Yehauvas, tseem ceeb rau koj thiab Yehauvas sib txuas lus tsis tu ncua. Tiamsis yuav ua li cas yus thiaj nrog tau Yehauvas sib txuas lus? Xav txog ib tug phoojywg uas nyob deb heev. Neb yuav sib txuas lus li cas? Tej zaum neb sau ntawv lossis hu xov tooj tham pem. Thaum koj thov Vajtswv twb yog koj nrog nws sib txuas lus ntag. (Nyeem Ntawv Nkauj 142:2.) Tiamsis Yehauvas yuav teb koj tej lus thov li cas? Thaum koj nyeem phau Vajlugkub, thiab ua tib zoo xav txog tej uas koj tau nyeem, ces zoo ib yam li Yehauvas teb koj ntag. (Nyeem Yaxaya 30:20, 21.) Cia peb kawm seb qhov uas peb thov Vajtswv thiab nyeem Vajlugkub, txhawb tau peb txojkev sib raug zoo nrog Yehauvas li cas. Tej no yuav pab peb pom tias Yehauvas yeej yog peb tus Phoojywg tiag.
YEHAUVAS TEB KOJ LOS NTAWM PHAU VAJLUGKUB
4, 5. Yehauvas teb peb li cas thaum peb nyeem phau Vajlugkub? Piav seb.
4 Peb paub tias phau Vajlugkub muaj xov zoo rau txhua leej txhua tus. Tiamsis phau Vajlugkub puas pab tau koj txav ze rau Yehauvas tiag? Yeej pab tau xwb! Thaum koj nyeem thiab kawm phau Vajlugkub, ua tib zoo xav txog cov nqe Vajlugkub ntawd. Koj puas txaus siab mloog cov nqe ntawd? Koj puas xyaum coj raws li ntawd? Yog tias koj mloog thiab coj raws li phau Vajlugkub hais, ces zoo ib yam li Yehauvas nrog koj tham ntag. Qhov ntawd yuav pab kom koj txav ze rau Yehauvas. Nws yuav zoo ib yam li tus Phoojywg uas nqes tes pab koj.—Henplais 4:12; Yakaunpau 1:23-25.
5 Muab xav li no, thaum koj nyeem Yexus cov lus ntuas kom “txhob khaws nyiaj txiag cia rau . . . hauv ntiajteb,” koj xav li cas xwb? Yehauvas hais li cas rau koj? Yog tias koj twb muab Yehauvas tso ua ntej hauv koj lub neej lawm, ces koj yuav pom tias Yehauvas txaus siab rau koj tes haujlwm. Tiamsis yog koj nyeem cov nqe ntawd, es koj pom tias koj yuav tsum hloov los coj lub neej yoojyim, xwv koj thiaj ua tau Vajtswv tes haujlwm ntxiv, ces twb yog Yehauvas cob qhia kom koj txav ze rau nws.—Mathai 6:19, 20.
6, 7. (1) Thaum peb kawm phau Vajlugkub, pab peb txojkev sib raug zoo nrog Yehauvas li cas? (2) Thaum peb nyeem Vajlugkub, peb lub hom phiaj yog dabtsi?
6 Thaum peb kawm phau Vajlugkub, tsis yog pab kom peb hloov peb lub neej los teev tiam Yehauvas xwb. Peb kuj kawm tau Yehauvas txojkev hlub thiab nws tus cwj pwm zoo kawg nkaus. Qhov ntawd ua rau peb yimhuab hlub Yehauvas ntxiv. Thaum peb txojkev hlub rau Yehauvas loj hlob, ces nws txojkev hlub rau peb kuj loj hlob thiab.—Nyeem 1 Khaulee 8:3.
7 Thaum peb nyeem phau Vajlugkub, peb lub hom phiaj yog dabtsi? Puas yog peb xav nrhiav tswvyim rau peb xwb? Tsis yog. Hauv Yauhas 17:3, Yexus hais tias: “Txojsia ib txhis tsis kawg yog li no, yog qhov uas lawv paub koj uas yog tus Vajtswv tib leeg uas yog tus tseem Tswv thiab paub Yexus Khetos uas koj txib los.” Yog li ntawd, thaum peb nyeem phau Vajlugkub peb lub hom phiaj yog kawm kom peb paub Yehauvas zoo dua.—Nyeem Khiav Dim 33:13; Ntawv Nkauj 25:4.
8. (1) Tej zaum ib txhia yuav xav li cas txog qhov uas Yehauvas rau txim rau Axaliya? (2) Yog tias peb paub Yehauvas zoo, ces peb yeej tso siab li cas?
8 Yog tias peb nrog Yehauvas sib raug zoo, ces peb yuav tsis xav yuam kev rau Yehauvas thaum peb nyeem txog tej nqe Vajlugkub uas peb tsis nkag siab. Zoo li zaj uas qhia txog Vajntxwv Axaliya uas kav Yuda tebchaws. Thaum nws ua vajntxwv kav, cov pejxeem teev dab teev mlom. Axaliya yeej tsis koom lawv li. Phau Vajlugkub qhia tias, Axaliya “ua tej uas [Yehauvas] pom tias zoo.” (2 Vajntxwv 15:1-5) Tiamsis tom qab no Yehauvas ho ua rau Axaliya mob ruas. Vim li cas? Cov nqe Vajlugkub no tsis piav tias yog vim li cas. Thaum koj nyeem tej zaj zoo li no koj xav li cas xwb? Puas yog Yehauvas ua tsis ncaj rau Axaliya? Tsis yog. Yog tias koj paub Vajtswv Yehauvas zoo, ces koj yeej paub tias txhua yam uas Yehauvas txiav txim siab ua puavleej ncaj ncees. Thaum nws ntuas ib tug twg los nws yeej rau txim kom “tsim nyog xwb.” (Yelemi 30:11) Txawm tias peb tsis paub vim li cas Yehauvas rau txim rau Axaliya los, peb yeej tso siab tias Yehauvas ua qhov yog xwb.
9. Vim li cas Yehauvas thiaj ua rau Axaliya mob ruas?
9 Phau Vajlugkub qhia ntxiv txog Vajntxwv Axaliya. Phau Vajlugkub qhia tias nws kuj muaj dua ib lub npe hu ua Uxiya. (2 Vajntxwv 15:7, 32) Yog tias koj nyeem ntxiv rau 2 Vaj Keeb Kwm 26:3-5, 16-21 ces koj yuav pom tias Axaliya lossis Uxiya yeej “ua tej uas [Yehauvas] pom tias zoo.” Tiamsis tshooj ntawd piav ntxiv tias tom qab no nws “ua lub siab khav theeb thiaj li ua rau nws raug kev puam tsuaj.” Nws khav theeb li cas? Nws txeeb cov pov thawj tes haujlwm ua. Muaj 81 tug pov thawj cheem nws thiab ntuas nws tias txhaum rau nws txeeb tes haujlwm ntawd ua. Tiamsis nws puas mloog? Nws tsis mloog li! Nws tseem npau taws rau lawv thiab. Thaum peb nyeem txog cov nqe no peb mam li pom tias yog vim li ntawd Yehauvas thiaj rau txim rau Axaliya.
10. (1) Vim li cas tsis tas Yehauvas qhia txhua yam ntxaws ntxaws rau peb? (2) Yuav ua li cas peb thiaj tso siab plhuav rau Yehauvas?
10 Peb kawm tau li cas los ntawm zaj no? Thaum peb nyeem thoob cov nqe Vajlugkub uas qhia txog Axaliya peb mam li paub tias yog vim li cas Yehauvas thiaj rau txim rau nws. Tiamsis muaj dua tej zaj hauv phau Vajlugkub uas tsis qhia txhij txhua li ntawd. Thaum koj nyeem raug cov nqe ntawd, koj xav li cas xwb? Koj puas yuav tso siab rau phau Vajlugkub thiab tso siab tias txhua yam uas Vajtswv ua puavleej ncaj thiab zoo tibsi? Lossis koj yuav xav tias Yehauvas txiav txim yuam kev lawm? (Kevcai 32:4) Thaum koj paub Yehauvas zoo lawd, koj yuav hlub nws thiab tso siab plhuav rau nws. Tsis tas nws yuav piav ntxaws ntxaws txog txhua yam es koj mam li ntseeg nws. Thaum koj nyeem phau Vajlugkub, koj yuav paub Yehauvas zoo dua thiab pom tias nws yog ib tug Vajtswv tiag tiag li.—Ntawv Nkauj 77:12, 13.
THAUM KOJ THOV VAJTSWV YEEJ YOG KOJ NROG NWS THAM
11-13. Ua cas koj thiaj paub tias Yehauvas mloog koj tej lus thov? (Saib daim duab ntawm sab 19.)
11 Thaum peb thov Vajtswv peb yuav txav ze rau nws. Tej zaum peb yuav qhuas txog nws, ua nws tsaug, los yog thov kom nws pab peb. (Ntawv Nkauj 32:8) Yog koj xav nrog Yehauvas sib raug zoo, koj yuav tsum ntseeg tias nws hnov koj tej lus thov.
12 Ib txhia xav tias Vajtswv tsis mloog lawv tej lus thov. Lawv lam thov Vajtswv kom siab nqeg xwb. Lawv ntseeg tias tsis yog Vajtswv pab lawv tiag. Lawv tsuas muab lawv tej kev nyuaj siab piav mus piav los mus txog thaum lawv tawm tau ib lub tswvyim los tu qhov teeb meem ntawd. Tiamsis nco ntsoov tias tsis yog peb thov kom siab nqeg xwb. Yehauvas yeej hnov txhua lo uas peb thov. Ua cas peb thiaj paub li ntawd?
13 Xav txog qhov no: Ua ntej Yexus los hauv ntiajteb no, nws pom tias Yehauvas yeej teb Nws cov tub qhe tej lus thov. Thaum Yexus nyob hauv ntiajteb no nws thiaj qhia hlo nws lub siab rau nws Txiv Yehauvas. Muaj ib zaug nws thov Yehauvas ib hmos kaj ntug plaws. (Luka 6:12; 22:40-46) Yog tias kev thov Vajtswv tsuas pab kom peb siab nqeg xwb, Yexus puas yuav cob kom nws cov thwjtim txawj thov Vajtswv? Nws yeej yuav tsis cob ib zaug li. Yexus yeej paub tseeb tias Yehauvas mloog tibneeg tej lus thov. Nws thiaj hais li no: “Au kuv leej Txiv, kuv ua koj tsaug uas koj twb mloog kuv tej lus.” Tej no pab peb pom tseeb tias Yehauvas yeej mloog ntsoov peb tej lus thov tiag.—Yauhas 11:41, 42; Ntawv Nkauj 65:2.
14, 15. (1) Thaum peb qhia ntxaws ntxaws rau Yehauvas tej uas peb xav tau, pab tau peb li cas? (2) Kab cov lus thov pab kom nws txav ze rau Yehauvas li cas?
14 Muaj tej lub sijhawm koj tsis paub xyov Yehauvas yuav teb koj li cas. Tiamsis cia li qhia ntxaws ntxaws rau Yehauvas txog tej uas koj xav tau. Thaum muaj raws li koj tau thov ces koj yuav paub tseeb tias yog Yehauvas teb koj. Qhov no yuav ua rau koj yimhuab muaj kev ntseeg rau nws. Yog li, qhia koj tej kev txhawj xeeb huvsi rau Yehauvas ces nws yuav txav ze koj.
15 Xav txog ib tug muam hu ua Kab. Nws yeej tsis nyiam mus qhia Vajlugkub li.a (Saib cov lus hauv qab taw qhia.) Nws hais tias: “Kuv yeej tsis nyiam li tiag.” Tom qab no thaum nws so haujlwm lawd, ib tug txwj laus txhawb kom nws ua ib tug tho kev. Tus txwj laus cev kiag ib daim ntawv kom nws rau npe ua ib tug tho kev. Nws hais tias: “Kuv thiaj txiav txim siab ua ib tug tho kev. Tiamsis kuv thov Vajtswv txhua txhua hnub kom nws pab kuv muaj lub siab xav mus qhia Vajlugkub.” Yehauvas puas teb nws tej lus thov? Thaum nws ua ib tug tho kev tau 3 xyoos lawd, nws hais tias: “Vim kuv siv sijhawm ntau dua mus qhia Vajlugkub, thiab muaj cov viv ncaus qhia kuv, ua rau kuv txawj qhia Vajlugkub zuj zus tuaj lawm.” Nimno nws nyiam qhia Vajlugkub tshaj plaws li lawm, thiab nws hajyam nrog Yehauvas sib raug zoo. Yog li ntawd, Kathy tej lus thov pab kom nws txav ze rau Yehauvas tiag.
Txav ze zuj zus rau Yehauvas (Saib nqe 16, 17)
TXAV ZE RAU YEHAUVAS
16, 17. (1) Peb yuav tsum ua dabtsi thiaj txhawb tau peb txojkev sib raug zoo nrog Yehauvas? (2) Peb yuav kawm txog dabtsi rau zaj tom ntej?
16 Peb yuav nrog tau Yehauvas sib raug zoo mus ib txhis li. Cia peb mloog Yehauvas lus es rau siab kawm Vajlugkub thiab thov nws tsis tseg tsis tu. Yog tias peb ua li ntawd, peb txojkev sib raug zoo nrog Yehauvas yuav hajyam ruaj khov ntxiv. Txojkev sib raug zoo no yuav pab peb thev dhau txhua yam kev nyuaj siab.
17 Tiamsis muaj tej lub sijhawm uas peb yuav raug kev nyuaj siab. Tej zaum peb thov Vajtswv tsis tu ncua los peb tseem ntxhov siab qees. Yog peb tsis ceev faj qhov no kuj txo tau peb txojkev ntseeg rau Yehauvas. Tej zaum peb yuav xav tias Yehauvas tsis hnov peb tej lus thov, lossis tsis yuav peb ua nws tus phoojywg lawm. Yog tias koj nyuaj siab li no, koj yuav ua li cas? Zaj tom ntej yuav teb lo lus nug no.
a Tau muab lub npe no hloov lawm.