Nau-es Thiab Dej Dag Nyab Ntiajteb Puas Yog Dab Neeg Xwb?

Phau Vajlugkub qhia li no

Dej Dag Nyab ntiajteb tsis yog dab neeg. Vajtswv tso dej dag los nyab ntiajteb rhuav tshem cov neeg limhiam. Vajtswv hais kom Nau-es txua lub nkoj los cawm cov neeg zoo thiab tej tsiaj txhu txojsia. (Chivkeeb 6:11-20) Peb ntseeg tias Dej Dag Nyab ntiajteb yeej muaj tseeb tiag, rau qhov muaj sau cia hauv phau Vajlugkub uas “yog Vajtswv tshoov neeg lub siab kom neeg sau.”​—2 Timautes 3:16.

• Tiag los yog dab neeg?

• Ua cas Dej Dag Nyab ntiajteb?

• Tibneeg tiam ntawd, puas paub tias dej dag yuav nyab ntiajteb?

• Nau-es lub nkoj zoo li cas?

• Nau-es txua lub nkoj tau pes tsawg xyoo?

• Tej dab neeg uas hais txog dej nyab ntiajteb

Tiag los yog dab neeg?

Phau Vajlugkub qhia tias Nau-es thiab Dej Dag Nyab ntiajteb muaj tseeb tiag, tsis yog dab neeg.

• Cov uas sau Vajlugkub yeej ntseeg tias muaj Nau-es tiag. Xws li, Exalas, Lukas thiab cov tshawb fawb keeb kwm tau muab Nau-es lub npe tso rau hauv haiv neeg Yixalayees caj ces. (1 Xwmtxheej Vajntxwv 1:4; Lukas 3:36) Tus sau Vajlugkub Mathais thiab Lukas kuj sau Yexus tej lus hais txog Nau-es thiab Dej Dag Nyab ntiajteb.​—Mathais 24:37-39; Lukas 17:26, 27.

  Tsis tas li ntawd, tus cev Vajtswv lus Exekhees thiab tus tubtxib Paulus kuj hais tias Nau-es tso tau ib tug qauv zoo heev, nws muaj kev ntseeg ruaj nreeg thiab ncaj ncees. (Exekees 14:14, 20; Henplais 11:7) Yog tias tsis muaj Nau-es tiag, lawv puas yuav qhuas nws? Tseeb tiag, Nau-es thiab cov neeg ncaj ncees tsis hais pojniam txivneej los yeej tso tau ib tug qauv zoo rau qhov lawv yeej muaj txojsia nyob dua los lawm.​—Henplais 12:1; Yakaunpaus 5:17.

• Vajlugkub yeej qhia meej txog Dej Dag Nyab ntiajteb. Phau Vajlugkub qhia tias dej dag nyab ntiajteb rau lub xyoo twg, lub hlis twg, thiab hnub twg huv tibsi. (Chivkeeb 7:11; 8:4, 13, 14) Tsis tas li ntawd, tseem qhia tias lub nkoj uas Nau-es txua loj npaum li cas. (Chivkeeb 6:15) Qhov no ua pov thawj tias Dej Dag Nyab ntiajteb yeej muaj tseeb tiag tsis yog dab neeg.

Ua cas Dej Dag Nyab ntiajteb?

Phau Vajlugkub qhia tias ua ntej dej nyab ntiajteb “txhua tus neeg uas nyob hauv ntiajteb no, muaj lub siab ua phem ua qias.” (Chivkeeb 6:5) Thiab hais ntxiv tias “Vajtswv pom hais tias sawvdaws puavleej ua txhaum huv tibsi.” Vim ntiajteb tsuas muaj kev ua nruj ua tsiv ua nkauj ua nraug nkaus xwb.​—Chivkeeb 6:11; Yudas 6, 7.

Vajlugkub kuj qhia tias tej teeb meem no muaj tshwm los twb yog vim cov tubtxib phem saum ntuj nqes los deev cov pojniam hauv ntiajteb no. Cov tubtxib saum ntuj thiab cov pojniam ntawd yug tau ib co tub hu ua Nefili. Cov tub no tsiv heev, lawv tsim kev kub ntxhov rau tibneeg tiam ntawd. (Chivkeeb 6:1, 2, 4) Vajtswv thiaj txiav txim siab rhuav tshem cov neeg limhiam kom cov neeg zoo pib dua tshiab hauv lub ntiajteb uas tsis muaj kev phem li lawm.​—Chivkeeb 6:6, 7, 17.

Tibneeg tiam ntawd, puas paub tias dej dag yuav nyab ntiajteb?

Cov tibneeg tiam ntawd yeej paub rau qhov Vajtswv twb qhia rau Nau-es ua ntej lawm tias dej yuav nyab ntiajteb. Tsis tas li ntawd, nws hais kom Nau-es txua lub nkoj thiaj cawm tau nws tsev neeg thiab tej tsiaj txhu dim. (Chivkeeb 6:13, 14; 7:1-4) Nau-es kuj mus ceeb toom rau sawvdaws paub tiamsis tsis muaj leejtwg quav ntsej li. (2 Petus 2:5) Vajlugkub hais tias: “Lawv tsis paub mus txog thaum dej los nyab thiab kuav lawv mus tas huv tibsi.”​—Mathais 24:37-39.

Nau-es lub nkoj zoo li cas?

Lub nkoj uas Nau-es txua zoo li ib lub thawv loj loj, ntev li 133 mev (437 feet), dav li 22 mev (73 feet), thiab siab li 13 mev (44 feet).a Nau-es siv cov ntoo thuv kaufaw txua lub nkoj, thiab muab roj ntoo luam sab hauv sab nraud huvsi. Lub nkoj no muaj 3 txheej thiab muab kem ua tej chav. Muaj ib lub qhov rooj nkoj rau ib sab. Txheej 3 kawg nkaus muaj qhov rais ua saum lub npoo nkoj. Saum lub nkoj muaj ruv mentsis kom dej thiaj ntws taus.​—Chivkeeb 6:14-16.

Nau-es txua lub nkoj tau pes tsawg xyoo?

Vajlugkub tsis qhia tias Nau-es siv sijhawm ntev npaum li cas. Thaum Nau-es muaj 500 tawm xyoo nws muaj thawj tus tub, thiab thaum dej nyab ntiajteb Nau-es muaj 600 xyoo.b​—Chivkeeb 5:32; 7:6.

Thaum Vajtswv hais kom Nau-es txua lub nkoj nws peb tug tub twb yuav pojniam tas lawm. Tej zaum yuav siv li 50 lossis 60 lub xyoo nws cov tub mam hlob tiav txiv thiab yuav tau pojniam. (Chivkeeb 6:​14, 18) Yog li ntawd, tej thaud Nau-es yuav siv sijhawm ntev li 40 lossis 50 lub xyoo txua lub nkoj.