Kev Dawb Huv Yog Li Cas Tiag?

Phau Vajlugkub qhia li no

Kev dawb huv tsis muaj kev phem kev qias txuam yuaj rau. Lo lus Henplais “dawb huv” txhais tias “muab cais cia.” Yog li ntawd, tej yam dawb huv yog tej uas muab cais lossis tshwj cia siv rau tes haujlwm tseem ceeb xwb.

Vajtswv yog tus dawb huv tshaj plaws. Phau Vajlugkub thiaj hais tias: “Tsis muaj leejtwg dawb huv li [Yehauvas].”a (1 Xamuyee 2:2) Yog li ntawd, Vajtswv tib leeg thiaj yog tus muaj cai txiav txim tias yam twg dawb huv, yam twg tsis dawb huv.

Yuav kom ib yam dabtsi dawb huv, yam ntawd yuav tsum muaj feem nrog Vajtswv. Xws li tej yam uas siv los teev tiam Vajtswv. Phau Vajlugkub thiaj hais tias tej uas hais nram no dawb huv:

• Tej chaw dawb huv: Thaum Mauxe txav mus ze tsob ntoo uas muaj nplaim taws cig liab ploog, Vajtswv hais rau nws tias “qhov chaw uas koj sawv no yog lub chaw dawb huv.”​—Khiav Dim 3:2-5.

• Tej koob tsheej dawb huv: Thaum ub, Yehauvas sam hwm kom cov Yixayee ua koob tsheej tsis tseg. Tej koob tsheej no yog lub caij lawv “ua kevcai dawb huv.”​—Levi Tej Kevcai 23:37.

• Tej twj dawb huv: Phau Vajlugkub hais tias tej twj uas siv hauv lub tuam tsev nyob Yeluxalees yog “tej twj dawb huv.” (1 Vajntxwv 8:4) Cov Yixayee ua tib zoo saib xyuas tej twj dawb huv, tiamsis lawv yeej tsis teev hawm tej twj ntawd.b

Noob txaug neeg txhaum puas ua tau neeg dawb huv?

Txawm tibneeg poob kev txhaum lawm los lawv tseem ua tau neeg dawb huv. Vajtswv thiaj sam hwm tias: “Nej yuav tsum ua neeg dawb huv, vim kuv yog tus dawb huv.” (1 Petus 1:16) Tibneeg yeej ua tsis tau zoo npaum li Vajtswv. Tiamsis tus uas mloog Vajtswv tej kevcai ncaj ncees kuj “dawb huv thiab txaus Vajtswv lub siab.” (Loos 12:1) Tus uas xav ua neeg dawb huv yuav tsum hais lus zoo thiab coj lub neej dawb huv raws li phau Vajlugkub qhia tias “tsis txhob ua nkauj nraug” thiab “ua neeg dawb huv rau txhua yam.”​—1 Thexalaunika 4:3; 1 Petus 1:15.

Vajtswv ho xav li cas yog ib tug neeg dawb huv hla nws txoj kevcai?

Yog leejtwg hla Vajtswv txojcai, Vajtswv yuav suav tias tus ntawd tsis dawb huv lawm. Twb yog li ntawd, phau ntawv Vajlugkub Henplais thiaj ceeb toom kom “cov kwvtij dawb huv” ceev faj nyob tsam lawv ib tug twg muaj lub siab tsis ntseeg es coj lawv “yuam kev ntawm Vajtswv uas muaj txojsia nyob.”​—Henplais 3:1, 12.

Ib txhia xav yuam kev li cas txog kev dawb huv?

Xav yuam kev: Ib txhia xav tias cov tsis muaj txij nkawm dawb huv dua cov muaj.

Qhov tseeb: Cov Khixatia nyias yuav tsum txiav txim siab nyias seb yuav muaj txij nkawm los tsis muaj. Txawm ib tug tsis muaj txij nkawm los nws yeej tsis dawb huv dua lwm tus. Cov tsis muaj txij nkawm yeej ua tau Vajtswv tes haujlwm ntau dua. (1 Khaulee 7:32-34) Tiamsis phau Vajlugkub qhia tias cov Khixatia uas muaj txij nkawm los, kuj dawb huv thiab. Petus yog Yexus ib tug thwjtim uas twb muaj txij nkawm.​—Mathai 8:14; 1 Khaulee 9:5.