Vajtswv Lub Nceeg Vaj Twb Kav Lawm

1. Tej twg pab tau koj muaj kev cia siab thiab yog vim li cas?

THAUM koj pom tej teeb meem uas muaj tshwm sim hauv lub ntiaj teb, koj puas xav tias ib hnub twg tej ntawd yuav ploj mus? Niaj hnub no hauv lub cuab lub yig los sawv daws twb tsis txawj sib hlub lawm. Tib neeg haj yam ua nruj ua tsiv, ua nyaum heev, thiab xav txog lawv tus kheej xwb. Coob tus tsis tso siab rau tej nom tej tswv. Tiam sis tej no yuav pab koj muaj kev vam kev cia siab rau yav tom ntej. Vim li cas thiaj hais li ntawd? Rau qhov phau Vajlugkub qhia tias thaum peb pom tej ntawd ces twb yog peb nyob rau “lub sijhawm uas ntiajteb yuav kawg.” (2 Timautes 3:1-5) Niaj hnub no yeej muaj raws nraim li zaj faj lem no tiag. Qhov no ua pov thawj tias Yexus Khetos twb sawv ua Vaj Ntxwv kav Vajtswv lub Nceeg Vaj lawm. Zaj faj lem no tsuas yog ib zaj ntawm ntau zaj faj lem uas hais txog Vajtswv lub Nceeg Vaj. Yog peb kawm txog cov faj lem uas muaj tshwm sim niaj hnub nim no ces yuav tsav tau peb txoj kev ntseeg heev.

2. Zaj no peb yuav tham txog dab tsi thiab vim li cas? (Piav txog daim duab ntawm lub khaum.)

² Nyob rau hauv zaj no, peb yuav tham txog (1) zaj faj lem uas pab peb to taub thaum lub Nceeg Vaj pib kav, (2) cov faj lem uas pab peb pom tias Yexus twb sawv kav Vajtswv lub Nceeg Vaj saum ntuj lawm, thiab (3) cov faj lem uas pab peb pom tias Vajtswv cov yeeb ncuab yuav raug rhuav tshem li cas. Thaum peb kawm zaj no, peb yuav pom tseeb tseeb tias peb nyob rau lub caij lub nyoog twg lawm.

LUB NCEEG VAJ PIB KAV THAUM TWG LAWM?

3. Zaj faj lem hauv Daniyees 7:13, 14 qhia meej rau peb tias leej twg yuav yog tus Vaj Ntxwv kav Vajtswv lub Nceeg Vaj?

³ Zaj faj lem hauv Daniyees 7:13, 14 qhia tseeb tias Yexus Khetos yuav yog tus uas tsim nyog kav Vajtswv lub Nceeg Vaj. Txhua haiv neeg yuav zoo siab hlo tiam nws thiab yuav tsis muaj dua lwm tus los hloov nws chaw. Muaj dua lwm zaj faj lem hauv phau Daniyees tau qhia tias Yexus yuav sawv ua Vaj Ntxwv kav lub Nceeg Vaj tom qab lub caij nyoog hu ua xya lub sij hawm xaus. Peb puas muaj cuab kav paub tias Yexus tau sawv ua Vaj Ntxwv thaum twg tiag?

4. Piav seb Daniyees 4:10-17 pab peb pom tias Khetos sawv ua Vaj Ntxwv rau xyoo twg. (Saib cov lus hauv qab taw qhia.)

⁴ Nyeem Daniyees 4:10-17. Xya lub sij hawm ntev li 2,520 xyoo. Lub sij hawm ntawd pib xyoo 607 ua ntej Yexus, thaum cov Npanpiloos muab tus vaj ntxwv kawg uas sawv Yehauvas chaw hauv Yeluxalees rhuav tshem. Lub sij hawm ntawd xaus rau xyoo 1914 tom qab Yexus, thaum Yehauvas tsa Yexus “tus uas muaj feem” sawv ua Vaj Ntxwv kav Vajtswv lub Nceeg Vaj.b​—Exekees 21:25-27.

5. Zaj faj lem txog xya lub sij hawm pab tau peb li cas?

⁵ Zaj faj lem no pab tau peb li cas? Yog peb to taub zaj faj lem txog xya lub sij hawm ces yuav pab peb cia siab tias Yehauvas yeej ua raws li nws tau cog tseg tiag. Yehauvas tau txiav txim siab tias lub sij hawm twg nws yuav tsa Yexus sawv ua Vaj Ntxwv ces thaum txog lub sij hawm ntawd, nws yeej tau ua li ntawd tiag. Qhov no pab peb pom tias Yehauvas yeej yuav ua raws li lwm zaj faj lem uas nws tau hais tseg kom raws caij raws nyoog thiab. Yog li hnub uas Yehauvas teem tseg, “nws yuav tsis sej cia ntev.”​—Hanpakus 2:3.

YEXUS TWB SAWV KAV VAJTSWV LUB NCEEJ VAJ THAUM TWG LAWM?

6. (1) Tej twg ua pov thawj tias Yexus twb sawv kav saum ntuj lawm? (2) Zaj faj lem hauv Tshwmsim 6:2-8 qhia tseeb li cas txog tej uas Yexus tau hais?

⁶ Thaum Yexus nyob hauv ntiaj teb, nws tau qhia txog tej uas yuav muaj tshwm sim thaum nws sawv ua Vaj Ntxwv saum ntuj. Tej uas nws tau qhia ntawd ib txhia yog kev tsov kev rog, kev tshaib kev nqhis, thiab av qeeg. Nws kuj tau qhia txog kab mob kev nkeeg uas yuav muaj nyob “thoob plaws txhua qhov,” xws li tus kab mob khaus viv-19 (COVID-19) uas muaj niaj hnub nim no. Tej uas tau muaj tshwm sim no ua “pov thawj” tias Yexus twb sawv kav lawm. (Mathais 24:3, 7; Lukas 21:7, 10, 11) Tshaj li 60 lub xyoos tom qab Yexus tuag mus saum ntuj lawm, nws hais rau tus tub txib Yauhas tias tej uas nws tau hais thaum nws nyob hauv ntiaj teb yeej yuav tshwm sim xwb xwb li. (Nyeem Tshwmsim 6:2-8.) Thaum Yexus sawv ua Vaj Ntxwv xyoo 1914, txawm muaj txhua yam raws li Yexus tau hais tiag.

7. Ua li cas ho muaj kev phem ua luaj hauv ntiaj teb tom qab Yexus sawv ua Vaj Ntxwv?

⁷ Ua li cas tej teeb meem hauv ntiaj teb tsuas loj zuj zus xwb tom qab Yexus sawv ua Vaj Ntxwv? Tshwmsim 6:2 qhia tias thawj yam uas Yexus ua tom qab nws sawv ua Vaj Ntxwv yog mus ua rog. Yexus mus ua rog nrog leej twg? Yexus mus ua rog nrog Dab Ntxwg Nyoog thiab nws cov dab. Tshwmsim tshooj 12 qhia tias Xatas swb ntsuj rog ntawd ces nws thiab nws cov dab thiaj raug muab pov los rau hauv ntiaj teb no lawm. Qhov no ua rau Xatas npau taws kawg li. Nws thiaj tsim kom muaj “kev txomnyem heev” hauv lub ntiaj teb.​—Tshwmsim 12:7-12.

8. Thaum peb pom muaj tiav raws li cov faj lem uas hais txog lub Nceeg Vaj, pab tau peb li cas xwb?

⁸ Cov faj lem no pab tau peb li cas? Thaum peb pom tib neeg tej cwj pwm phem zuj zus ces qhia tias Yexus sawv ua Vaj Ntxwv lawm. Yog li ntawd, thaum peb pom tib neeg ua phem thiab xav txog lawv tus kheej xwb, tsis txhob chim tiam sis nco ntsoov tias twb yog lawv ua raws li tej lus faj lem hauv phau Vajlugkub xwb. Tej no qhia tias lub Nceeg Vaj twb kav lawm. (Phau Ntawv Nkauj 37:1) Thaum Amankedoos los ze zuj zus ces tej kev nyuaj siab hauv ntiaj teb yuav loj zuj zus. (Malakaus 13:8; 2 Timautes 3:13) Peb zoo siab uas peb Leej Txiv Yehauvas pab peb pom tias vim li cas thiaj muaj teeb meem ntau ua luaj hauv lub ntiaj teb.

VAJTSWV COV YEEB NCUAB YUAV RAUG RHUAV TSHEM LI CAS?

9. Zaj faj lem nyob rau hauv Daniyees 2:28, 31-35 qhia li cas txog lub teb chaws uas muaj zog tshaj uas kawg nkaus tom qab, thiab lub teb chaws ntawd tshwm thaum twg?

⁹ Nyeem Daniyees 2:28, 31-35. Niaj hnub nim no peb kuj pom muaj tiav raws li zaj faj lem no. Nenpukajnexales zaj npau suav qhia txog “tej uas yuav muaj tshwm los” tom qab Khetos sawv ua Vaj Ntxwv. Phau Vajlugkub qhia tias Yexus cov yeeb ncuab hauv ntiaj teb no ib tug kuj yog lub teb chaws uas muaj zog tshaj uas “ob txhais kotaw yog hlau xyaw av nplaum.” Lub teb chaws ntawd tab tom tswj teb kav chaw niaj hnub nim no. Lub teb chaws ntawd pib kav rau thaum muaj Ntsuj Rog Thoob Qab Ntuj Zaum 1 thaum teb chaws Askiv thiab teb chaws Yunaithim Xatej (United States) los koom tes ua ke. Tus mlom hauv Nenpukajnexales zaj npau suav kuj qhia txog ob yam uas lub teb chaws ntawd muaj uas zoo tsis thooj li cov teb chaws ua ntej.

10. (1) Niaj hnub no lub teb chaws Askiv thiab Yunaithim Xatej zoo li Daniyees zaj faj lem li cas? (2) Peb yuav tsum ceev faj txog dab tsi? (Mus saib lub ntsiab “Ceev Faj Txog Cov Av Nplaum”)

¹⁰ Yam ib uas lub teb chaws Askiv thiab Yunaithim Xatej zoo tsis thooj li cov teb chaws ua ntej rau qhov lub teb chaws ntawd tsis yog ib yam khov khov li nyiaj thiab kub tiam sis yog hlau xyaw av nplaum xwb. Cov av nplaum piv txwv txog cov pej xeem. (Daniyees 2:43) Niaj hnub nim no, peb yeej pom tseeb tseeb tias tej pej xeem muaj feem xyuam nrog ntau tsav ntau yam hauv lub teb chaws, xws li kev xaiv nom xaiv tswv, sawv tawm tsam nom tswv, thiab sawv tawm tsam tej chaw ua hauj lwm. Vim li no thiaj nyuaj heev rau lub teb chaws Askiv thiab Yunaithim Xatej tej nom tej tswv los coj teb kav chaw.

11. Ua cas peb ho tso siab tias thaum lub teb chaws Askiv thiab Yunaithim Xatej kav ces yog peb nyob rau lub sij hawm kawg lawm?

¹¹ Yam ob, lub teb chaws Askiv thiab Yunaithim Xatej yog lub teb chaws muaj zog tshaj uas phau Vajlugkub qhia tias yog lub kawg. Yuav tsis muaj dua lwm lub teb chaws los hloov lub ntawd chaw rau qhov Vajtswv lub Nceeg Vaj yuav muab lub teb chaws ntawd thiab txhua lub teb chaws los sis tseem fwv hauv ntiaj teb rhuav tshem thaum Amankedoos los.c​—Tshwmsim 16:13, 14, 16; 19:19, 20.

12. Daniyees zaj faj lem muaj tej pov thawj twg ntxiv los qhia tias peb nyob rau lub sij hawm kawg lawm?

¹² Zaj faj lem no pab tau peb li cas? Daniyees zaj faj lem kuj muaj tej pov thawj uas qhia tias peb nyob rau lub sij hawm kawg lawm. Daniyees tau faj lem tshaj li 2,500 xyoo los lawm tias tom qab lub teb chaws Npanpiloos ces yuav muaj plaub lub teb chaws sawv ua ntu zus los kav Vajtswv cov tib neeg. Daniyees kuj hais tseg tias lub teb chaws kawg nkaus yuav yog lub teb chaws Askiv thiab Yunaithim Xatej. Qhov no pab peb cia siab tias tsis ntev Vajtswv lub Nceeg Vaj yuav muab tib neeg tej tseem fwv rhuav tshem huv tib si mus ces thaum ntawd Vajtswv lub Nceeg Vaj yuav kav thoob plaws lub ntiaj teb.​—Daniyees 2:44.

13. Tus vaj ntxwv yim thiab “kaum tus vajntxwv” hauv Tshwmsim 17:9-12 piv txog dab tsi, thiab zaj faj lem no ho muaj tiav li cas?

¹³ Nyeem Tshwmsim 17:9-12. Ntsuj Rog Thoob Qab Ntuj Zaum 1 ua rau ntau yam puas tsuaj. Qhov no kuj muaj raws li ib zaj lus faj lem hauv phau Vajlugkub uas qhia txog lub sij hawm kawg thiab. Tej nom tej tswv xav kom muaj kev thaj yeeb nyob thoob ntiaj teb. Yog li ntawd, thaum lub 1 Hlis xyoo 1920, lawv thiaj tsa lub koom haum Lis Au Neseem (League of Nations). Ces thaum lub 10 Hli xyoo 1945, lawv ho tsa lub koom haum ntiaj teb UN (United Nations) los hloov lub ntawd chaw. Phau Vajlugkub muab lub koom haum no hu ua tus vaj ntxwv yim. Tiam sis lub koom haum no tsis yog lub teb chaws uas muaj zog tshaj. Lub koom haum no muaj zog vim muaj ntau lub tseem fwv sib koom tes los txhawb. Phau Vajlugkub muab cov tseem fwv no hu ua “kaum tus vajntxwv.”

14-15. (1) Tshwmsim 17:3-5 qhia li cas txog “lub nroog Npanpiloos uas loj dua ntais”? (2) Ua li cas rau cov uas txhawb nqa kev ntseeg cuav lawm?

¹⁴ Nyeem Tshwmsim 17:3-5. Vajtswv ua rau Yauhas ua yog toog pom ib tug niam ntiav uas yog “lub nroog Npanpiloos uas loj dua ntais” uas piv txog txhua txoj kev ntseeg thoob qab ntuj uas tawm tsam Vajtswv Yehauvas. Zaj yog toog no muaj tiav li cas lawm? Tau ntau lub xyoos, tej kev ntseeg cuav yeej tau koom tes thiab tau txhawb tej nom tej tswv. Tshuav tsis ntev xwb ces Vajtswv Yehauvas yuav tshoov tej nom tej tswv lub siab kom “ua raws li Vajtswv lub siab nyiam.” Thaum kawg yuav zoo li cas xwb? Tej nom tej tswv uas yog kaum tus vaj ntxwv yuav tawm tsam tej kev ntseeg cuav thiab yuav muab lawv rhuav tshem.​—Tshwmsim 17:1, 2, 16, 17.

¹⁵ Ua li cas peb thiaj paub tias hnub kawg rau lub nroog Npanpiloos uas loj dua ntais twb los ze lawm? Nco ntsoov tias lub nroog Npanpiloos txheej thaud kuj muaj tus dej loj Efalates thaiv ib ncig sab nraud. Phau Tshwmsim kuj muab tsheej plhom leej uas txhawb lub nroog Npanpiloos uas loj dua ntais piv zoo li cov “dej” uas thaiv lub nroog ntawd. (Tshwmsim 17:15) Phau Tshwmsim kuj qhia tias cov dej ntawd yuav “nqhuab” uas txhais tias tib neeg yuav tsis txhawb nqa tej kev ntseeg uas tawm tsam Vajtswv Yehauvas lawm. (Tshwmsim 16:12) Niaj hnub no yeej muaj tseeb raws li zaj faj lem ntawd tiag rau qhov coob leej ntau tus tau tso kev ntseeg cuav tseg mus nrhiav lwm txoj kev los pab daws lawv tej teeb meem lawm xwb.

16. Cov faj lem txog lub koom haum ntiaj teb UN thiab hnub kawg rau lub nroog Npanpiloos uas loj dua ntais pab tau peb to taub li cas?

¹⁶ Cov faj lem no pab tau peb li cas? Qhov uas muaj lub koom haum ntiaj teb UN thiab qhov uas coob leej ntau tus tau tso kev ntseeg cuav tseg qhia tias peb nyob rau hnub kawg lawm tiag. Txawm coob leej ntau tus tau tso kev ntseeg cuav tseg los qhov no tsis yog qhov kawg rau kev ntseeg cuav. Zoo li tau hais tas los, Vajtswv Yehauvas yuav tshoov “kaum tus vajntxwv” uas yog tej teb chaws uas txhawb nqa lub koom haum ntiaj teb UN lub siab kom ua raws li nws lub siab nyiam. Cov teb chaws no yuav muab lub nroog Npanpiloos uas loj dua ntais rhuav tshem. Qhov no yuav ua rau tib neeg xav tsis thoob li.d (Tshwmsim 18:8-10) Thaum lub nroog Npanpiloos uas loj dua ntais raug rhuav tshem, yuav ua rau tib neeg thoob ntiaj teb nyuaj siab ntxhov plawv tiam sis Vajtswv cov tib neeg yuav zoo siab. Peb yuav zoo siab vim Vajtswv tus yeeb ncuab uas yog kev ntseeg cuav yuav ploj ntais hauv lub ntiaj teb no mus thiab Vajtswv yuav cawm peb dim ntawm lub qab ntuj phem no.​—Lukas 21:28.

TSO SIAB TIAS YEHAUVAS YUAV TSOM KWM NWS COV NEEG

17-18. (1) Peb yuav tsav peb txoj kev ntseeg li cas? (2) Zaj tom ntej peb yuav kawm txog dab tsi?

¹⁷ Daniyees tau qhia tias tib neeg yuav “totaub txog tej yam uas yuav tshwm los.” Yeej muaj tseeb li Daniyees hais ntawd tiag. Niaj hnub no peb yeej to taub txog tej faj lem uas qhia txog peb lub caij lub nyoog. (Daniyees 12:4, 9, 10) Thaum peb pom muaj tshwm sim raws nkaus li tej lus faj lem ces haj yam ua rau peb ris Yehauvas thiab nws Txoj Lus txiaj ntsig. (Yaxayas 46:10; 55:11) Rau siab ntso kawm Vajtswv Txoj Lus kom koj txoj kev ntseeg haj yam ruaj khov thiab kub siab mus pab lwm tus kom lawv nrog Yehauvas sib raug zoo thiab. Yehauvas yuav tsom kwm txhua tus uas tso siab rau nws thiab nws yuav cia lawv nyob kaj siab lug.​—Yaxayas 26:3.

¹⁸ Nyob rau zaj tom ntej, peb yuav kawm txog cov faj lem uas qhia txog lub koom txoos Khixatia rau lub sij hawm kawg. Cov faj lem ntawd yuav pab peb pom tias peb nyob rau lub sij hawm kawg lawm tiag. Tsis tas li ntawd, peb yuav pom tias Yexus uas yog peb tus Vaj Ntxwv yog tus coj Yehauvas cov tib neeg niaj hnub nim no.