1, 2. Cov kwvtij uas ncig xyuas thaj tsam tau pom li cas hauv ntau lub koom txoos?

MUAJ ib tug kwvtij uas ncig xyuas thaj tsam tau nrog ib pab txwj laus sablaj ua ke. Thaum nws saib cov txwj laus ntawd nws yeej hlub tshua lawv heev. Lawv ib txhia twb laus li nws txiv lawm. Zaum tas los uas nws tuaj xyuas lawv, nws twb txhawb kom lawv cob qhia lwm tus los tuav haujlwm. Zaum no nws thiaj nug tias, “Cov kwvtij, nej puas tau nqes tes cob lwm tus los tuav haujlwm hauv lub koom txoos?” Lawv sawvdaws kuj txaj muag teb nws, ces muaj ib tug txwj laus mam li lees tias lawv tsis tau pab txaus. Tag nrho cov txwj laus puavleej lees ib yam li ntawd thiab.

² Nej cov txwj laus puas tau ntsib qhov teeb meem no? Hauv ntau lub koom txoos, cov kwvtij uas ncig xyuas thaj tsam tau pom tias cov txwj laus yuav tsum siv sijhawm ntxiv los cob qhia lwm tus, tsis hais tus laus tus hluas huvsi los pab saib xyuas lub koom txoos. Yeej tsis yoojyim siv sijhawm los cob qhia lwm tus. Ua cas ho nyuaj ua luaj?

3. (1) Phau Vajlugkub puas sam hwm kom peb cob qhia lwm tus, thiab vim li cas zoo rau peb txhua tus kawm txog qhov no thiab? (Saib cov lus hauv qab taw qhia.) (2) Vim li cas nyuaj rau cov txwj laus los cob qhia lwm tus?

³ Nej cov txwj laus yeej paub zoo lawm tias, yuav tsum siv sijhawm thiaj cob qhia tau lwm tus.a (Saib cov lus hauv qab taw qhia.) Yuav kom lub koom txoos sawv ruaj khov, yuav tsum muaj cov kwvtij los pab saib xyuas. Tseem yuav muaj ntau lub koom txoos ntxiv thiab. (Nyeem Yaxaya 60:22.) Phau Vajlugkub thiaj sam hwm kom peb cia li “qhia” lwm tus. (Nyeem 2 Timaute 2:2.) Tiamsis yeej nyuaj heev rau peb lauj sijhawm los cob qhia lwm tus. Cov txwj laus muaj haujlwm ntau heev. Lawv nrhiav noj nrhiav haus, saib xyuas lawv lub cuab lub yig, saib xyuas lub koom txoos thiab pab tu tej haujlwm tseem ceeb. Ua cas ho tseem ceeb ua luaj rau cov txwj laus lauj sijhawm los mus cob qhia lwm tus? Cia peb kawm qhov no ua ke.

COB QHIA COV KWVTIJ TAMSIM NO

4. Vim li cas cov txwj laus ib txhia pheej ncua cia tsis cob qhia lwm tus?

⁴ Ua cas nyuaj ua luaj rau cov txwj laus cob qhia cov tub hluas hauv lub koom txoos? Rau qhov cov txwj laus muaj haujlwm ntau yam ua hauv lub koom txoos. Tej zaum ib txhia xav tias yog lawv leg tej haujlwm ntawd ua ntej, es mam cob qhia cov hluas tom qab yeej tsis lig, thiab tsis ua cas rau lub koom txoos. Tiamsis tsis yog li lawv xav ntawd. Yog tias cov txwj laus pheej ncua cia tsis cob qhia lwm tus, ces ntev mus ntev tuaj yuav ua rau lub koom txoos tu ncua lwm yam thiab.

5, 6. Zaj lus piv txwv txog lub tsheb pab tau cov txwj laus li cas?

⁵ Cia peb muab piv rau lub tsheb. Yuav kom lub tsheb dhia taus, yus yuav tsum sam roj thiab hloov roj cav tsis tseg. Tiamsis muaj ib txhia tsuas txhawj txog cov roj tsheb xwb. Lawv tsis nco qab hloov roj cav lawm. Yog tias lawv tsis hloov roj cav, ntev loo yuav ua li cas rau lub tsheb? Thaum kawg lub cav tsheb yuav dhia tsis zoo, thiab yuav tau siv nyiaj ntau los kho. Yog tias lawv sam roj thiab hloov roj cav tibsi tsis tseg, ces lub tsheb yuav kav ntev dua. Peb kawm tau li cas los ntawm cov lus piv txwv no?

⁶ Hauv lub koom txoos cov txwj laus yuav tsum “pom tias yam twg tsim txiaj kawg nkaus.” (Filipi 1:10) Yeej muaj haujlwm tseem ceeb hauv lub koom txoos uas cov txwj laus yuav tsum maj nroos ua. Tiamsis ib txhia muaj haujlwm ntau dhau lawm, lawv thiaj tsis muaj sijhawm cob qhia lwm tus los tuav haujlwm hauv lub koom txoos. Yog tias lawv ncua cia tsis cob qhia lwm tus ces yuav zoo ib yam li tus neeg uas sam roj tsheb tas zog, tiamsis tsis nco qab hloov roj cav lawm. Ntev mus yuav tsis muaj kwvtij txaus los pab tuav haujlwm hauv lub koom txoos.

7. Peb xav li cas txog cov txwj laus uas cob qhia lwm tus?

⁷ Yog li ntawd, cov txwj laus yuav tsum pom tias tseem ceeb heev rau lawv cob qhia lwm tus los tuav haujlwm. Cov txwj laus uas thoob tsib yuav nrhiav kev los txhawb lub koom txoos rau yav tom hauv ntej, thiab lauj sijhawm los cob qhia lwm tus. Lawv tes haujlwm yuav pab tau cov kwvtij nkauj muam heev. (Nyeem 1 Petus 4:10.) Yuav pab tau lub koom txoos li cas?

LAUJ SIJHAWM

8. (1) Vim li cas zoo rau cov txwj laus cob qhia lwm tus? (2) Cov txwj laus uas mus pab lwm koog yuav tsum ua dabtsi? (Saib lub ntsiab me “Cob Qhia Lwm Tus Tamsim No.”)

⁸ Txawm tias ib tug txwj laus twb tuav haujlwm tau ntau xyoo thiab ua haujlwm zoo heev los, nws yeej paub zoo tias nws yuav laus zuj zus thiab yuav tuav tsis tau haujlwm mus li. (Mikha 6:8) Tsis tas li ntawd xwb, cov txwj laus yeej paub tias tibneeg txojsia zoo li tej “huab uas nyob ib pliag xwb kuj ploj tag lawm.” Yog li, peb tsis paub tias lub neej tom hauv ntej yuav mus li cas. (Yakaunpau 4:13, 14) Cov txwj laus hlub Yehauvas thiab hlub cov kwvtij nkauj muam hauv lub koom txoos, lawv thiaj cob qhia cov tub hluas kom lawv paub tuav haujlwm hauv lub koom txoos lawm yav tom ntej.​—Nyeem Ntawv Nkauj 71:17, 18.

9. Yog tias cov txwj laus cob qhia lwm tus tamsim no yuav pab peb rau lub caij twg?

⁹ Cov txwj laus uas cob qhia lwm tus pab tau lub koom txoos li cas? Yog cov txwj laus nquag cob qhia lwm tus ces yuav muaj coob tus kwvtij los txheem lub koom txoos sawv ruaj khov. Cov kwvtij ntawd yuav paub txhawb kom sawvdaws koom ib lub siab pe hawm Vajtswv. Tsis yog lawv txhawb peb nyob tiam kawg no xwb, tiamsis thaum txog lub sijhawm muaj kev ceeblaj txom nyem loj kawg li, lawv yuav txhawb peb thiab. (Exekhee 38:10-12; Mikha 5:5, 6) Yog li ntawd, pib hnub no mus thov kom nej cov txwj laus siv sijhawm los cob qhia lwm tus pab tuav haujlwm hauv lub koom txoos.

10. Yuav kom cov txwj laus muaj sijhawm cob qhia lwm tus lawv yuav tsum ua li cas?

¹⁰ Peb pom tias nej cov uas yog txwj laus twb muaj haujlwm ntau heev ua hauv lub koom txoos lawm. Tiamsis zoo rau nej qee sijhawm ntawm lub koom txoos los mus cob qhia lwm tus. (Laj Lim Tswvyim 3:1) Yog tias nej siv sijhawm li ntawd, yeej tsis nkim nej lub zog thiab yav tom hauv ntej yuav pab tau lub koom txoos.

NPAJ LUB SIAB UA NTEJ

11. (1) Thaum lub koom haum nug coob tus txwj laus txog txojkev cob qhia lwm tus, lawv teb li cas xwb? (2) Raws li Paj Lug 15:22, vim li cas tseem ceeb rau peb kawm txog lwm cov txwj laus?

¹¹ Lub koom haum tau nug seb cov txwj laus pab cob qhia lwm tus li cas lawm.b (Saib cov lus hauv qab taw qhia.) Lawv tau nug coob tus txwj laus, nyias nyob nyias ib lub tebchaws thiab nyias muaj nyias kev coj noj coj ua, tiamsis lawv puavleej teb ib yam nkaus. Vim li cas? Vim lawv cob qhia lwm tus raws li lub tswvyim hauv phau Vajlugkub. Phau Vajlugkub tej lus cob qhia yeej zoo siv “rau hauv txhua pawg ntseeg” tibsi. (1 Khaulee 4:17) Yog li ntawd, hauv zaj no thiab zaj tom ntej, peb yuav kawm seb cov txwj laus uas lub koom haum nug ntawd, tau cob qhia lwm tus li cas.​—Paj Lug 15:22.

12. Ib tug txwj laus yuav tsum ua li cas ua ntej nws yuav cob qhia lwm tus, thiab yog vim li cas?

¹² Ua ntej ib tug txwj laus yuav cob tau lwm tus, nws yuav tsum npaj tus hluas lub siab. Muab piv rau tus neeg ua teb. Nws yuav tsum laij teb ua ntej nws mam cog qoob rau. Ib yam li ntawd, tus txwj laus yuav tsum npaj tus hluas lub siab lossis txhawb nws ua ntej, mam li cob qhia nws. Cov txwj laus yuav npaj lwm tus lub siab li cas? Zoo rau lawv xyaum Xamuyee tus qauv.

13-15. (1) Yehauvas qhia kom Xamuyee ua dabtsi? (2) Xamuyee txhawb Xa-u li cas kom nws npaj txhij ua nws tes haujlwm? (Saib daim duab ntawm sab 8.) (3) Vim li cas zaj no pab tau cov txwj laus?

¹³ Tau 3,000 xyoo dhau los Yehauvas qhia li no rau nws tus tub qhe Xamuyee: “Tagkis kwvlam lub sijhawm no kuv yuav xa ib tug txivneej uas nyob hauv Npeeyamee tebchaws tuaj. Koj yuav tsa nws ua thawj kav kuv haiv neeg Yixayee.” (1 Xamuyee 9:15, 16) Xamuyee paub lawm tias nws yuav tsis tau coj cov Yixayee ntxiv lawm. Yehauvas yuav tsa ib tug thawj coj tshiab. Yog li ntawd, Xamuyee thiaj tawm tswvyim los txhawb thiab cob qhia tus thawj coj tshiab ntawd kom paub tuav haujlwm zoo.

¹⁴ Hnub tom qab Xamuyee mus ntsib Xa-u. Yehauvas hais li no rau Xamuyee: “No yog tus txivneej uas twb hais rau koj lawd.” Txij hnub ntawd los, Xamuyee thiaj nrhiav kev los cob qhia Xa-u. Nws caw Xa-u mus nrog nws noj ib pluag mov. Nws muab lub rooj zoo tshaj rau Xa-u zaum thiab muab cov nqaij zoo tshaj rau Xa-u noj. Xamuyee hais tias: “Koj cia li noj vim yog muab khaws cia rau koj txog lub sijhawm lawm, kuv twb hu tej qhua tuaj tag lawm.” Tom qab nkawd noj mov tas, Xamuyee thiab Xa-u nkawd taug kev mus tom nws tsev thiab mus nyob “saum txheej tsev las tshav” tham pem mus txog thaum tsaus ntuj kiag. Hnub tom qab, Xamuyee mam li muab roj hliv rau Xa-u taubhau thiab nwj Xa-u. Nws qhia Xa-u ntxiv, Xa-u mam li mus lawm. Vim Xamuyee tau pab Xa-u li no, Xa-u thiaj paub tuav haujlwm rau Yehauvas.​—1 Xamuyee 9:17-27; 10:1.

¹⁵ Thaum kawg Xamuyee mam li muab roj hliv rau Xa-u taubhau qhia tias Yehauvas xaiv Xa-u los coj haiv neeg Yixayee lawm. Tes haujlwm saib xyuas lub koom txoos tsis thooj li tes haujlwm ua vajntxwv. Txawm li ntawd los, cov txwj laus yuav tau xyaum Xamuyee tus qauv thaum lawv pab cov tub hluas hauv lub koom txoos. Cia peb kawm seb Xamuyee pab Xa-u rau 2 txojke twg.

QHIA THIAB NTAUS PHOOJYWG

16. (1) Xamuyee xav li cas thaum cov Yixayee thov kom nws tsa ib tug vajntxwv los kav lawv? (2) Thaum Yehauvas qhia kom Xamuyee xaiv Xa-u, nws ua li cas xwb?

¹⁶ Zoo siab hlo pab lwm tus. Thaum Xamuyee hnov tias cov Yixayee xav tsa ib tug vajntxwv kav lawv, nws tu siab heev. (1 Xamuyee 8:4-8) Xamuyee tsis xav tsa vajntxwv rau lawv, Yehauvas thiaj hais 3 lwm kom Xamuyee mloog cov tibneeg hais. (1 Xamuyee 8:7, 9, 22) Txawm tias Xamuyee tu siab heev los nws tsis khib thiab tsis chim rau tus vajntxwv uas yuav hloov nws chaw coj cov Yixayee. Thaum Yehauvas qhia kom Xamuyee xaiv Xa-u, Xamuyee ua raws li Yehauvas hais tamsid. Nws zoo siab mloog Yehauvas lus rau qhov nws hlub Yehauvas, tsis yog nws lam mloog xwb.

17. (1) Cov txwj laus xyaum Xamuyee tus qauv li cas? (2) Cov txwj laus puas zoo siab pab cov hluas?

¹⁷ Niaj hnub no, muaj coob tus txwj laus uas tau xyaum raws li Xamuyee tus qauv. Lawv muaj lub siab hlub thiab xav pab kom cov kwvtij hauv lub koom txoos loj hlob. (1 Petus 5:2) Cov txwj laus ntawd zoo siab hlo cob qhia lwm tus. Lawv yeej tsis ntshai lossis khib xeeb tsam cov hluas yuav los txeeb haujlwm. Tiamsis lawv suav tias cov kwvtij ntawd nrog lawv “koom tes” ua haujlwm saib xyuas lub koom txoos xwb. (2 Khaulee 1:24; Henplais 13:16) Cov txwj laus ntawd zoo siab heev thaum lawv pom cov hluas siv lawv lub peev xwm los pab Yehauvas cov tibneeg.​—Tubtxib Tes Haujlwm 20:35.

18, 19. (1) Cov txwj laus yuav pab kom ib tug hluas npaj siab tuav haujlwm li cas? (2) Ua cas tseem ceeb rau cov txwj laus pab lawv li no?

¹⁸ Nrog luag ntaus phoojywg, tsis yog qhia xwb. Thaum Xamuyee ntsib Xa-u, puas yog Xamuyee maj nroos muab roj hliv rau Xa-u taubhau? Tsis yog. Yog tias nws maj li ntawd ces Xa-u yeej tsis paub coj Vajtswv cov tibneeg. Ua ntej nws muab roj hliv rau Xa-u taubhau, Xamuyee tau siv sijhawm nrog Xa-u ua ke, npaj nws lub siab. Nws ua tib zoo qhia ib qho zuj zus kom Xa-u paub tuav haujlwm. Nkawd noj ib pluag mov ua ke, nkawd taug kev tham pem ntev loo, nkawd kuj nrhiav caij so thiab. Tom qab Xamuyee ua tej no tas, nws mam li muab roj hliv rau Xa-u taubhau tsa nws ua vajntxwv.

¹⁹ Niaj hnub no Xamuyee tus qauv pab tau cov txwj laus heev. Ua ntej cov txwj laus yuav cob qhia ib tug kwvtij twg, lawv yuav tsum nrhiav kev los nrog nws ntaus phoojywg. Xav li no: Tus kwvtij ntawd tsev neeg coj li cas? Nws haiv neeg tej kev coj noj coj ua txawv txav li cas? Yog tias cov txwj laus xav txog tej no lawv yuav paub yoog tus kwvtij, nws thiaj tsis ntshai thiab tsis txaj muag rau lawv. Txawm nyob lub tebchaws twg los xij, yog cov txwj laus qee sijhawm los pab cov kwvtij hauv lub koom txoos, lawv yeej yuav tsis mom nws txheej. Cov kwvtij yuav pom tias cov txwj laus saib lawv rau nqe thiab hlub tshua lawv tiag tiag.​—Nyeem Loos 12:10.

20, 21. (1) Tus uas txawj qhia luag yuav coj li cas? (2) Lwm zaj peb yuav kawm txog dabtsi?

²⁰ Nco ntsoov li no: Tus uas txawj qhia luag, tsis yog nws nyiam tes haujlwm uas nws ua xwb, nws kuj hlub tshua tus neeg uas nws qhia thiab. (Muab piv rau Yauhas 5:20.) Vim li cas tseem ceeb rau cov txwj laus hlub cov kwvtij uas lawv qhia? Thaum ib tug kwvtij paub tias cov txwj laus hlub tshua nws thiab xav pab nws tiag tiag, nws yuav zoo siab hlo xyaum raws li tej uas nws tau kawm. Yog li ntawd, thov kom nej cov txwj laus nrog cov kwvtij uas nej qhia sib cog phoojywg.​—Paj Lug 17:17; Yauhas 15:15.

²¹ Thaum cov txwj laus pab tau lwm tus npaj siab ua haujlwm lawd, lawv yuav cob qhia tus kwvtij ntawd li cas ntxiv? Lwm zaj yuav piav txog qhov no.

1. (1) Kev cob qhia puas tseem ceeb rau Vajtswv cov tibneeg thiab niaj hnub no Vajtswv cov tibneeg puas tseem cob qhia lwm tus? (2) Hauv zaj no peb yuav kawm dabtsi?

VAJTSWV cov tibneeg yeej ib txwm paub tias yuav tsum cob thiaj txawj. Yav thaum ub, Aplas cov tibneeg mus cawm tau Lauj rau qhov nws twb cob qhia lawv “txawj ua rog” lawm. (Chiv Keeb 14:14-16) Tiam Vajntxwv Davi nyob, muaj cov uas “kawm hu nkauj” los qhuas Yehauvas. (1 Vaj Keeb Kwm 25:7) Niaj hnub no peb tawm tsam Xatas lub qab ntuj tas zog. (Efexau 6:11-13) Peb kuj nrhiav kev los qhuas Yehauvas thiab tshaj tawm nws lub npe. (Henplais 13:15, 16) Yuav kom peb ua tau tej no yuav tsum muaj tus cob qhia peb thiaj txawj. Hauv lub koom txoos, Yehauvas tsa cov txwj laus los cob qhia lwm tus ntag. (2 Timaute 2:2) Cov txwj laus yuav cob qhia Yehauvas cov tibneeg li cas?

TXHAWB KOM COV KWVTIJ HLUB YEHAUVAS

2. Ua ntej tus hluas yuav kawm tau ib yam tshiab, tus txwj laus yuav tsum ua dabtsi, thiab yog vim li cas?

² Peb twb kawm lawm tias cov txwj laus zoo ib yam li tus neeg ua liaj ua teb. Yuav kom nws cov qoob tuaj zoo nws yuav tsum muab xyaw av chiv. Ib yam li ntawd, yuav kom ib tug tub hluas kawm tau ib teg haujlwm tshiab, cov txwj laus yuav tau nyeem thiab piav phau Vajlugkub tej hauv paus ntsiab lus rau nws, xwv nws thiaj muaj lub siab xav xyaum raws li cov kwvtij qhia.​—1 Timaute 4:6.

3. (1) Yexus cov lus hauv Malakau 12:29, 30 yuav pab tau cov hluas li cas? (2) Thaum cov hluas hnov cov txwj laus thov Vajtswv pab lawv, yuav txhawb tau lawv li cas?

³ Nej cov txwj laus yuav tsum paub tias tus hluas xav li cas txog qhov tseeb. Yuav kom koj paub txog tus hluas lub siab, nug seb thaum nws muab nws tus kheej cob rau Yehauvas pab tau nws li cas. Nws tau txiav txim siab siv nws lub neej los ua dabtsi? Thaum koj nug tej no tas, tej zaum neb kuj tham ntxiv seb yuav ua li cas thiaj teev tiam tau Yehauvas kawg siab kawg ntsws. (Nyeem Malakau 12:29, 30.) Kuj zoo rau neb thov Yehauvas ua ke. Zoo rau koj thov Yehauvas pub lub hwj huam dawb huv pab tus hluas kom ua tau haujlwm hauv lub koom txoos. Thaum tus hluas hnov koj cov lus thov, yuav txhawb kom nws kub siab lug ua haujlwm ntxiv.

4. (1) Phau Vajlugkub muaj tej qauv twg los pab kom cov hluas loj hlob? (2) Thaum cov txwj laus cob qhia lwm tus, lawv yuav tsum muaj lub hom phiaj twg?

⁴ Thaum nej cov txwj laus pib cob qhia ib tug hluas, zoo rau nej piav tej qauv hauv phau Vajlugkub rau nws. Tej qauv ntawd qhia kom yus pab lwm tus, xyaum coj zoo luag thiaj tso siab rau yus, thiab xyaum txo hwjchim. (1 Vajntxwv 19:19-21; Nehemi 7:2; 13:13; Tubtxib Tes Haujlwm 18:24-26) Cov qauv no zoo ib yam li tej av chiv ua rau tej qoob loo hlob mos nyoos. Yog tias tus hluas xyaum cov qauv no nws yuav loj hlob sai dua. Ib tug txwj laus hauv Fab Kis teb tau hais tias, thaum nws pab cov hluas, nws lub hom phiaj yog kom lawv txawj siv phau Vajlugkub tej hauv paus ntsiab lus los txiav txim zoo. Nws hais tias: “Kuv nrhiav tej lub sijhawm zoo los nyeem tej nqe Vajlugkub rau cov kwvtij kom qheb tau lawv lub ‘qhov muag,’ lawv thiaj nkag siab tej yam ‘phimhwj’ hauv Vajtswv Txojlus.” (Ntawv Nkauj 119:18) Cov txwj laus yuav txhawb cov hluas li cas ntxiv thiab?

NPAJ HOM PHIAJ THIAB PIAV LUB NTSIAB RAU LAWV

5. (1) Puas tseem ceeb rau cov txwj laus nug tus hluas txog nws cov hom phiaj? (2) Vim li cas zoo rau cov txwj laus cob qhia cov yau? (Saib cov lus hauv qab taw qhia.)

⁵ Nej cov txwj laus yuav tau nug seb tus hluas npaj tej hom phiaj zoo li cas los ua Yehauvas tes haujlwm. Yog tias nws tsis tau npaj hom phiaj dabtsi, ces pab kom nws npaj ib lub hom phiaj uas nws yuav ncav cuag. Zoo rau koj qhia tus hluas ntawd txog tej hom phiaj uas koj tau npaj rau koj tus kheej, thiab piav tias koj zoo siab npaum li cas thaum koj ua tau raws li koj npaj tseg. Ib tug txwj laus uas yog ib tug tho kev nyob hauv Afika tau hais li no: “Thaum kuv tseem hluas muaj ib tug txwj laus nug tias kuv npaj hom phiaj li cas. Nws cov lus ua rau kuv ua tib zoo xav txog kuv tes num rau Vajtswv.” Cov txwj laus uas paub tab hais tias zoo rau peb cob cov tub hluas thaum lawv nyuam qhuav nto hluas. Muab mentsis haujlwm rau lawv ua hauv lub koom txoos, npaum li lawv ua tau. Yog tias nej cov txwj laus cob lawv thaum lawv tseem yau ces lawv yuav tau hau ntsoov ua haujlwm thaum lawv loj, txawm tias muaj ntau yam los tab kaum lawv.​—Nyeem Ntawv Nkauj 71:5, 17.a (Saib cov lus hauv qab taw qhia.)

6. Yexus cob qhia lwm tus li cas?

⁶ Yog tias nej cov txwj laus xav txhawb kom tus hluas tuav haujlwm, ces tsis yog nej lam qhia haujlwm rau nws ua xwb. Nej yuav tsum piav lub ntsiab rau tus hluas, xwv nws thiaj pom tias tes haujlwm ntawd tseem ceeb npaum li cas. Yexus yog tus xibhwb uas txawj qhia tshaj plaws. Thaum nws qhia nws cov tubtxib mus tshaj tawm, nws yeej piav lub ntsiab rau lawv kom lawv pom tias tsim nyog mloog nws lus. Nws hais tias: “Hwjchim tag nrho saum ntuj thiab hauv ntiajteb twb muab cob rau kuv lawm. Yog li no nej cia li mus coj txhua haiv neeg los ua kuv li thwjtim.” (Mathai 28:18, 19) Koj yuav xyaum Yexus li cas?

7, 8. (1) Niaj hnub no cov txwj laus yuav xyaum Yexus tus qauv li cas? (2) Puas tseem ceeb rau cov txwj laus qhuas cov hluas? (3) Cov txwj laus yuav cob qhia lwm tus li cas? (Saib lub ntsiab me “Cob Qhia Lwm Tus Li No.”)

⁷ Thaum nej cov txwj laus muab haujlwm rau ib tug hluas ua, piav lub ntsiab rau nws kom nws paub tias tseem ceeb. Thaum nej piav li ntawd, ces qhia tias peb yuav tsum coj raws li phau Vajlugkub tej hauv paus ntsiab lus, tsis yog coj raws li cov txwj laus hais xwb. Muab xav li no: Koj txib ib tug hluas pab tu lub qhov rooj hauv lub Tsev Nceeg Vaj kom du lug thiaj tsis dawm. Zoo rau koj nyeem Titau 2:10 thiab piav tias thaum peb tu lub Tsev Nceeg Vaj yuav ua timkhawv zoo rau sawvdaws pom thiab lawv yuav yimhuab xav mloog txoj xov zoo. Tsis tas li ntawd xwb, xav txog cov laus hauv lub koom txoos. Yog tias lawv tu txojkev ntawd du lug ces yuav tsis nyuaj rau cov laus mus. Thaum koj piav ntxaws ntxaws li no rau tus hluas, ces nws yuav pom tias tes haujlwm no pab tau cov kwvtij nkauj muam hauv lub koom txoos. Tus hluas yuav zoo siab leg num rau sawvdaws.

⁸ Puas tseem ceeb rau nej cov txwj laus qhuas txog cov hluas thiab? Muab xav rau tus neeg ua liaj ua teb. Nws yuav tsum ywg dej tej qoob loo thiaj hlob zoo. Ib yam li ntawd, thaum peb qhuas cov hluas uas tabtom xyaum tuav haujlwm ces lawv yuav mob siab ua Yehauvas tes haujlwm dua.​—Muab piv rau Mathai 3:17.

NYUAJ LWM YAM THIAB

9. (1) Vim li cas hauv tej tebchaws vam meej, ho nyuaj rau cov txwj laus cob qhia cov tub hluas? (2) Vim li cas cov tub hluas ib txhia tsis muab Yehauvas tes haujlwm tso ua ntej?

⁹ Nyob hauv tej tebchaws vam meej, cov txwj laus pom tias nyuaj heev rau lawv txhawb cov tub hluas uas muaj 20 txog 30 xyoo los tuav haujlwm hauv lub koom txoos. Lub koom haum thiaj nug ib co txwj laus uas paub tab, nyob hauv 20 lub tebchaws seb yog vim li cas cov tub hluas thiaj coj li ntawd. Feem coob hais tias thaum lawv tseem yau, lawv niam lawv txiv tsis cob kom lawv npaj hom phiaj los ua Yehauvas tes haujlwm. Kuj muaj cov tub hluas uas xav tuav haujlwm, tiamsis lawv niam lawv txiv ho txhawb kom lawv mus kawm ntawv siab lossis nrhiav haujlwm ua hauv lub qab ntuj. Yog li ntawd, lawv yeej ib txwm tsis muab Vajtswv tes haujlwm tso ua ntej hauv lawv lub neej.​—Mathai 10:24.

10, 11. (1) Cov txwj laus yuav ua siab ntev pab ib tug tub hluas hloov siab li cas? (2) Zoo siv cov nqe Vajlugkub twg los txhawb tus hluas thiab vim li cas ho zoo siv cov nqe Vajlugkub ntawd?

¹⁰ Yog tias ib tug tub hluas tsis tshua xav tuav haujlwm hauv lub koom txoos, cov txwj laus yuav tsum ua siab ntev pab tiag, ntev mus ntev tuaj nws yeej hloov tau. Zoo ib yam li tus tswv vaj uas rau nreeg txheem kom tsob ntoo yiag tuaj, tus txwj laus yuav tsum ua siab ntev cob qhia kom tus tub hluas hloov nws tus cwj pwm, los tuav haujlwm ntxiv hauv lub koom txoos. Tiamsis cov txwj laus yuav pab cov tub hluas li cas?

¹¹ Cov txwj laus yuav tsum nrog tus kwvtij ntawd ntaus phoojywg. Pab kom nws pom tias lub koom txoos cheem tsum nws txojkev pab. Tom qab ib nyuag ntu, rov qab nrog nws tham thiab piav tej nqe Vajlugkub kom nws xav txog lub sijhawm uas nws muab nws tus kheej cob rau Yehauvas. (Laj Lim Tswvyim 5:4; Yaxaya 6:8; Mathai 6:24, 33; Luka 9:57-62; 1 Khaulee 15:58; 2 Khaulee 5:15; 13:5) Yuav kom cov txwj laus qhia raug nws siab, lawv yuav tsum nug li no: ‘Thaum koj muab koj lub neej cob rau Yehauvas, koj cog lus li cas rau nws? Yehauvas xav li cas xwb thaum koj ua kevcai raus dej?’ (Paj Lug 27:11) ‘Xatas ho xav li cas thiab?’ (1 Petus 5:8) Yog tias cov txwj laus siv tej nqe Vajlugkub no, ces yuav rub tau cov kwvtij lub siab.​—Nyeem Henplais 4:12.b (Saib cov lus hauv qab taw qhia.)

COV HLUAS, UA RAWS LI LUAG COB QHIA

12, 13. (1) Elisa coj tus cwj pwm zoo li cas xwb? (2) Vim Elisa npuab siab rau Eliya heev, Yehauvas thiaj cia Elisa pom dabtsi?

¹² Nej cov tub hluas, nco ntsoov tias lub koom txoos cheem tsum nej txojkev pab! Yuav kom nej ua tau Yehauvas tes haujlwm tiav, nej yuav tsum coj tus cwj pwm zoo li cas? Cia peb kawm seb peb yuav xyaum Elisa tus qauv li cas.

¹³ Tau 3,000 xyoo dhau los lawm, tus cev Vajtswv lus hu ua Eliya caw kom Elisa nrog nws ua haujlwm. Elisa txiav txim siab tamsim ntawd los ua haujlwm rau Eliya. (2 Vajntxwv 3:11) Eliya cob Elisa tau 6 lub xyoos. Thaum Eliya tes haujlwm hauv Yixayee tebchaws yuav tiav, nws mam li qhia tias Elisa tsis tas ua haujlwm rau nws lawm. Tiamsis Elisa hais 3 zaug li no: “Kuv yeej yuav tsis ncaim koj kiag li.” Elisa npaj siab tias nws yuav nrog nraim nws tus xibhwb mus txog thaum nws tus xibhwb ncaim nws kiag. Yehauvas pom tias Elisa yeej npuab siab rau Eliya tiag, Yehauvas thiaj cia Elisa pom thaum Yehauvas tso khaub zeeg cua los nqa hlo Eliya mus lawm.​—2 Vajntxwv 2:1-12.

14. (1) Cov tub hluas yuav xyaum Elisa li cas? (2) Vim li cas tseem ceeb rau cov tub hluas ua lawv tes haujlwm tiav?

¹⁴ Cov uas yog tub hluas yuav xyaum Elisa tus qauv li cas? Zoo siab txais tes haujlwm uas cov txwj laus muab rau koj ua, tsis hais tes haujlwm loj los me. Nco ntsoov tias cov txwj laus uas qhia koj yog koj cov phoojywg. Qhia nws tias koj yeej nco nws txiaj ntsig thiab coj tus cwj pwm uas qhia tias koj xav kawm los ntawm nws. Tsis muaj ib yam tseem ceeb npaum li qhov uas koj ua koj tes haujlwm tiav. Vim li cas? Thaum koj mob siab ua haujlwm, cov txwj laus yuav pom tias lawv tso siab tau rau koj. Lawv yuav pom tias Yehauvas kuj xav kom koj tuav haujlwm ntxiv hauv lub koom txoos.​—Ntawv Nkauj 101:6; nyeem 2 Timaute 2:2.

SAIB TAUS COV TXWJ LAUS UAS PAUB TAB

15, 16. (1) Elisa saib taus nws tus xibhwb li cas? (Saib daim duab ntawm sab 14.) (2) Vim li cas lwm cov cev Vajtswv lus thiaj tso siab rau Elisa?

¹⁵ Elisa tus qauv qhia tias tseem ceeb rau cov tub hluas saib taus cov txwj laus uas paub tab. Tom qab Eliya thiab Elisa mus xyuas cov cev Vajtswv lus nyob hauv Yelikhau, nkawd mus rau ntawm tus dej Yaladee. “Eliya muab nws lub tsho ntev los dov ua ib caj nplawm tus dej, dej txawm faib rau ob sab.” Nkawd “sib tham taug kev mus” hla cov av qhuav. Elisa ua tib zoo mloog txhua yam uas nws tus xibhwb qhia nws. Elisa yeej tsis lam xav tias nws paub txaus lawm. Thaum Vajtswv tso khaub zeeg cua los nqa Eliya mus, Elisa rov qab mus ntawm tus dej Yaladee. Elisa txawm muab Eliya lub tsho ntev nplawm kiag tus dej, thiab hais tias: “[Yehauvas] uas yog Eliya tus Vajtswv nyob qhovtwg?” Tamsim ntawd tus dej txawm rov qab faib hlo rau 2 sab.​—2 Vajntxwv 2:8-14.

¹⁶ Koj puas pom tias Elisa ua txujci zoo ib yam li Eliya? Tus qauv no qhia li cas rau peb? Qhia tias Elisa yeej xyaum raws li Eliya tus qauv. Zaum no Elisa tau ua tus coj lawm, tiamsis nws tsis lam xav tias nws yuav coj txawv ntawm nws tus xibhwb. Qhov uas Elisa xyaum Eliya tus qauv qhia tias nws saib taus Eliya. Vim Elisa ua li no, hajyam ua rau lwm cov cev Vajtswv lus tso siab rau Elisa xwb. (2 Vajntxwv 2:15) Elisa ua ib tug cev Vajtswv lus tau 60 xyoo. Yehauvas pub hwjchim rau Elisa ua txujci ntau dua Eliya thiab. Nimno cov tub hluas kawm tau li cas los ntawm zaj no?

17. (1) Cov tub hluas yuav xyaum Elisa tus cwj pwm li cas? (2) Ntev mus Yehauvas yuav txib kom cov tub hluas ua haujlwm dabtsi?

¹⁷ Thaum koj txais haujlwm ntau los ua hauv lub koom txoos, txhob xav tias koj yuav tsum coj txawv ntawm cov txwj laus uas cob koj. Nco ntsoov tias, peb tsuas hloov haujlwm thaum lub koom haum cob qhia kom peb hloov xwb, lossis muaj tej yam uas lub koom txoos cheem tsum. Tsis zoo muab tej haujlwm hloov li ub li no ywj siab xwb. Thaum Elisa xyaum raws li Eliya tus qauv, pab kom lwm cov cev Vajtswv lus tso siab rau nws. Elisa tus cwj pwm qhia tias nws hwm nws tus xibhwb. Ib yam li ntawd, yog tias koj xyaum raws li cov txwj laus uas tuav haujlwm ua ntej koj, ces qhia tias koj saib taus lawv ua tij. Cov kwvtij nkauj muam hauv lub koom txoos yuav tso siab dua rau koj thiab. (Nyeem 1 Khaulee 4:17.) Thaum koj paub haujlwm dua, koj yuav pab tau kom lub koom txoos caum cuag lub koom haum. Tej zaum Yehauvas yuav pab kom koj ua tau haujlwm ntau dua cov uas qhia koj thiab.​—Yauhas 14:12.

18. Vim li cas tseem ceeb rau cov txwj laus cob qhia cov tub hluas tamsim no?

¹⁸ Peb cia siab tias 2 zaj kawm no yuav pab kom cov txwj laus coob tus lauj sijhawm los cob qhia cov tub hluas. Thiab peb thov kom cov tub hluas coob tus cia cov txwj laus cob qhia lawv, kom lawv paub saib xyuas Yehauvas cov tibneeg. Yog tias cov txwj laus mob siab cob qhia cov tub hluas li no, ces yuav txhawb kom cov koom txoos thoob qab ntuj sawv ruaj khov dhau plaws tiam kawg no.