Koj puas tau xav li cov no dua thiab? Coob leej xav tias ceeblaj nyeem phau Vajlugkub heev. Tiamsis yog koj paub tias phau Vajlugkub pab tau koj ua neej kaj siab dua, koj puas kam nyeem? Yog koj paub tias yuav nyeem li cas thiaj ua rau koj xav nyeem ntxiv, koj puas kam nyeem?

Cov uas twb nyeem phau Vajlugkub dua lawd tau hais li no:

Ezekiel uas muaj li 20 xyoo hais tias: “Yav tas los kuv ua neej zoo li tus neeg tsav tsheb uas tsis paub yuav mus qhovtwg. Tiamsis thaum kuv nyeem phau Vajlugkub, kuv lub neej muaj hauv paus hauv ntsis lawm. Tej kevcai hauv phau Vajlugkub pab tau kuv txhua hnub.”

Frieda uas kuj muaj li 20 xyoo hais tias: “Yav tas los, kuv yog ib tug neeg npau taws sai heev. Tiamsis vim kuv nyeem phau Vajlugkub, kuv thiaj paub tswj kuv tus kheej. Zaum no tibneeg tsis ntshai nrog kuv tham lawm, kuv thiaj muaj coob tus phoojywg.”

Ib tug pojniam hu ua Eunice uas muaj li 50 xyoo hais tias: ‘Phau Vajlugkub pab tau kuv muab tej uas tsis tshua zoo tso tseg xwv kuv thiaj ua tau ib tug neeg zoo lawm.’

Muaj tsheej plhom leej kuj pom ib yam li cov no thiab. Lawv pom tias thaum lawv nyeem phau Vajlugkub pab tau lawv ua neej kaj siab dua. (Yaxaya 48:17, 18) Phau Vajlugkub yuav pab tau koj txawj txiav txim siab, txawj ntaus phoojywg, kawm qhov tseev txog Vajtswv, thiab thev taus tej kev nyuaj siab. Phau Vajlugkub yog Vajtswv cov lus. Yog koj coj raws nraim li phau Vajlugkub qhia, yeej yuav pab tau koj xwb xwb li. Vajtswv tej lus yeej zoo txhua fab.

Tej twg yuav pab tau koj xav nyeem phau Vajlugkub thiab yuav ua li cas koj thiaj muaj siab nyeem?

Tej twg yuav pab tau koj xav nyeem phau Vajlugkub? Coob tus pom tias 5 yam nram no pab tau lawv.

Nrhiav ib qho chaw zoo. Xaiv ib qho chaw uas nyob ntsiag to. Muab tej twj uas nrov nrov tua tibsi xwv koj thiaj tau zoo nyeem. Kuj xaiv qhov chaw uas muaj zoo cua thiab pom pom kev.

Qheb siab. Peb Leej Txiv uas nyob saum ntuj yog tus uas muab phau Vajlugkub rau peb. Yog li ntawd, koj yuav tsum zoo li tus menyuam uas zoo siab hlo mloog niam txiv lus. Yog koj ib txwm tsis nyiam phau Vajlugkub, koj yuav tau qheb siab, Vajtswv thiaj yuav qhia tau koj.​—Ntawv Nkauj 25:4.

Thov Vajtswv ua ntej nyeem. Phau Vajlugkub yog Vajtswv cov lus. Yog li ntawd, yuav tsum muaj Vajtswv pab, peb thiaj yuav to taub. Vajtswv cog lus tias nws yuav muab “[lub hwj huam] dawb huv rau cov uas thov nws.” (Luka 11:13) Lub hwj huam dawb huv pab tau koj nkag siab phau Vajlugkub. Ces ntev mus, koj yuav paub txog tej “tob tob hauv Vajtswv.”​—1 Khaulee 2:10.

Nyeem kom nkag siab. Txhob lam tau lam nyeem kom tas xwb. Ua tib zoo xav txog tej uas koj nyeem. Xav txog 2 lo lus nug no: ‘Tus uas kuv tabtom nyeem txog muaj tej yeeb yam zoo li cas? Kuv yuav muab tej no siv li cas hauv kuv lub neej?”

Muaj hom phiaj nyeem. Thaum koj nyeem phau Vajlugkub, koj yuav tsum muaj lub hom phiaj tias koj yuav nyeem kom tau ib yam los pab koj lub neej. Muaj tej hom phiaj zoo li no: ‘Kuv xav paub ntxiv txog Vajtswv.’ ‘Kuv xav kom kuv yimhuab coj tau zoo, ua tau ib tug zoo pojniam lossis zoo txiv.’ Ces mus nyeem tej nqe uas yuav pab tau koj ncav cuag tej hom phiaj ntawd.a

Tsib yam hais tas los no yuav pab tau koj nyeem phau Vajlugkub. Yuav ua li cas koj thiaj muaj siab nyeem? Zaj tom ntej yuav qhia ntxiv txog qhov no.

Koj puas ceeblaj nyeem phau Vajlugkub? Yuav ua li cas koj thiaj muaj siab nyeem? Qhov ntawd nyob ntawm seb koj nyeem li cas xwb. Cia peb kawm seb yuav ua li cas koj thiaj muaj siab nyeem phau Vajlugkub.

Xaiv ib phau Vajlugkub uas yoojyim to taub. Yog koj nyeem ib phau uas muaj tej lus qub qub thaum ub uas nimno tsis siv lawd ces yuav ua rau koj tsis muaj siab nyeem. Yog li ntawd, ua zoo xaiv ib phau uas txhais tau raug siab thiab raug ntsiab los nyeem.a

Siv tej twj los nyeem. Niaj hnub no phau Vajlugkub tsis yog muaj nyob hauv tej ntaub tej ntawv xwb. Koj kuj mus nyeem tau hauv Is Taws Nej lossis theej tawm tau los nyeem hauv koos piv tawj, tej twj ntawm tes, lossis tej xov tooj ntawm tes. Muaj tej phau hauv Is Taws Nej kuj muaj chaw rau koj nthuav mus rau lwm nqe uas hais txog tib lub ntsiab, lossis pab koj nthuav tau ob peb phau los sib piv. Yog koj yeem mloog xwb los kuj tau, twb muab phau Vajlugkub kaw ua suab lawm thiab. Coob tus nyiam mloog thaum lawv caij npav, ntxhua khaub ncaws, lossis ua lwm yam. Kavtsij sim seb koj nyiam yam twg dua.

Siv tej twj kawm Vajlugkub. Tej twj kawm Vajlugkub yuav pab kom koj yimhuab nkag siab tej uas koj nyeem, xws li tej duab txog tej chaw uas phau Vajlugkub hais txog puag thaum ub. Thaum koj nyeem Vajlugkub, cov duab no yuav pab kom koj pom tias tej chaw lossis tej uas koj nyeem txog zoo li cas tiag. Tej twj ntawd ib txhia kuj yog tej zaj kawm uas nyob hauv Phau Tsom Faj uas pab piav tej uas phau Vajlugkub hais txog kom hajyam nkag siab.

Txhob pib hauv paus nto ntsis tas li. Yog koj ceeblaj nyeem ib nploog zuj zus tom hauv paus tuaj, koj kuj pib nyeem phau ntawv uas koj nyiam ua ntej. Yog koj nyeem li no yuav pab tau koj muaj siab nyeem mus ntxiv. Yog koj xav paub txog ib tug twg hauv phau Vajlugkub, kuj mus nyeem txog tus ntawd ua ntej. Mus saib cov qauv hauv lub ntsiab me hu ua “Mus Nyeem Txog Cov Neeg Hauv Phau Vajlugkub.” Tej zaum koj yuav xav nyeem raws ib lub ntsiab zuj zus, lossis nyeem raws li tau muaj tshwm sim ib qho zuj zus. Sim seb koj nyiam pib qhovtwg tuaj.

Phau Vajlugkub yog ib phau ntawv tseem ceeb heev. Phau Vajlugkub yog tus Tswv Tsim tej lus cob qhia rau tibneeg. (2 Timaute 3:16) Tej lus hauv phau Vajlugkub yeej pab tau peb heev. Phau Vajlugkub hais tias: “Vajtswv txojlus muaj sia zees nyob thiab muaj hwjchim.” (Hinplus [Henplais] 4:12, VTL) Phau Vajlugkub yeej muaj hwjchim pab tau peb lub neej li no: Cob qhia peb ua neej tamsim no thiab pab peb los paub Vajtswv thiab nws tej lus cog tseg.​—1 Timaute 4:8; Yakaunpau 4:8.

Pab tau koj lub neej tamsim no. Phau Vajlugkub pab tau koj raws li nram no:

• Sib raug zoo nrog lwm tus.​—Efexau 4:31, 32; 5:22, 25, 28, 33.

• Lub siab kaj thiab noj qab nyob zoo.​—Ntawv Nkauj 37:8; Paj Lug 17:22.

• Coj zoo.​—1 Khaulee 6:9, 10.

• Khwv noj khwv haus.​—Paj Lug 10:4; 28:19; Efexau 4:28.a

Ib khub niam txiv hluas Axia nco txiaj ntsig heev rau tej lus cob qhia hauv phau Vajlugkub. Thaum nkawd nyuam qhuav sib sau ua neej, nkawd sib cov nyom heev thiab tsis paub sib txuas lus. Tiamsis thaum nkawd muab tej uas nkawd nyeem hauv phau Vajlugkub los siv ua neej, pab tau nkawd heev. Vicent uas yog tus txiv thiaj hais tias: “Tej uas kuv nyeem hauv phau Vajlugkub pab kom kuv txawj tu wb tej teeb meem. Vim wb coj raws li phau Vajlugkub hais, wb thiaj muaj kev zoo siab lawm.” Annalou uas yog tus pojniam kuj pom li ntawd thiab. Nws hais tias: “Tej qauv hauv phau Vajlugkub uas wb nyeem txog pab tau wb kawg li. Zaum no kuv zoo siab thiab txaus siab rau wb lub neej thiab wb tej hom phiaj lawm.”

Los paub Vajtswv. Vicent hais ntxiv tias: “Vim kuv nyeem phau Vajlugkub, kuv thiaj txav ze rau Yehauvas dua qub.” Zoo li Vicent hais ntawd, phau Vajlugkub yeej pab tau koj los paub Vajtswv. Yog koj nyeem phau Vajlugkub, Vajtswv tej lus cob qhia yuav pab tau koj lub neej thiab koj yuav ua tau nws tus phoojywg. Tsis tas li ntawd xwb, koj yuav pom tias phau Vajlugkub kuj qhia txog lub neej yav tom hauv ntej uas yuav tau txojsia nyob mus ib txhis tsis kawg. (1 Timaute 6:19) Tsis muaj ib phau ntawv twg yuav zoo tshaj phau Vajlugkub lawm.

Yog koj rau siab ntso nyeem phau Vajlugkub tsis tseg, koj yuav tau tej uas hais tas los no, uas yuav pab tau koj lub neej tamsim no thiab yuav pab koj los paub Vajtswv. Thaum koj nyeem Vajlugkub, tej zaum koj yuav muaj lus nug ntau heev. Thaum ntawd, xav txog tus txivneej Ethi-aupia uas nyob 2,000 xyoos dhau los. Nws muaj lus nug ntau heev txog phau Vajlugkub. Thaum nug nws tias nws puas nkag siab txog tej nws nyeem, nws teb tias: “Yog tsis muaj leejtwg txhais yuav ua li cas nkag siab tau?”b Nws thiaj cia Fili uas yog Yexus ib tug thwjtim pab nws. (Tubtxib Tes Haujlwm 8:30, 31, 34) Yog koj xav paub phau Vajlugkub ntxiv, peb caw koj mus rau npe hauv lub vej xaij www.pr418.com/hmn lossis sau ntawv mus rau ib qho chaw uas nyob ze koj hauv Phau Tsom Faj no. Koj kuj mus cuag Yehauvas Cov Timkhawv ib tug lossis mus xyuas ib lub Tsev Nceeg Vaj uas nyob ze koj. Mus nqa ib phau Vajlugkub los nyeem hnub no es cia Vajtswv Txojlus pab kom koj muaj kev zoo siab xyiv fab.