COV NEEG tshawb txujci ntseeg tias xyoo 2017 lub ntiajteb yuav raug xwm txheej loj heev. Yog li, lub 1 Hlis xyoo 2017, cov tshawb txujci thiaj tshaj tawm tias hnub ntawd twb los ze heev lawm. Lawv thiaj siv ib lub moos hu ua Doomsday Clock los ua piv txwv qhia seb hnub ntawd yuav los txog thaum twg. Lawv muab lub moos txav 30 chib rau tom hauv ntej los qhia tias hnub ntawd los ze heev lawm. Zaum no lub moos ntawd tshuav li 2 feeb thiab 30 chib ua ntej 12 teev ib tag hmo lawm xwb, ze hnub uas ntiajteb yuav raug xwm txheej loj kawg li. Rau caum xyoo tas los, hnub ntawd tsis tau ze npaum no ib zaug li!

Xyoo 2018, cov neeg tshawb txujci yuav rov ntsuas dua seb tshuav sijhawm ntev npaum cas hnub kawg rau lub ntiajteb mam los txog. Lub moos no puas qhia tau tias hnub kawg yuav los txog thaum twg tiag? Koj xav li cas? Lub ntiajteb puas muaj kev kub ntxhov tiag? Tej zaum yuav tsis yoojyim rau koj teb lo lus nug no. Cov neeg tshawb txujci los nyias yeej xav nyias lawm ib yam thiab. Ib txhia twb tsis ntseeg tias muaj ib hnub twg lub ntiajteb yuav kawg.

Muaj ntau plhom leej tseem cia siab heev rau yav tom hauv ntej. Lawv ntseeg tias yeej muaj pov thawj qhia tias noob neej thiab lub ntiajteb yuav nyob mus li thiab tibneeg tseem yuav muaj neej zoo dua niaj hnub nimno. Puas tsim nyog ntseeg tej pov thawj ntawd tiag? Lub ntiajteb twb muaj kev kub ntxhov heev los tsis yog?

YOG tej xov xwm uas koj hnov ua rau koj ntshai, tsis yog koj ib leeg thiaj ntshai xwb. Xyoo 2014, Barack Obama, uas thaum ntawd yog lub tebchaws U.S.A. tus thawj tswj, tau hais tias vim pheej muab tej phem tshaj tawm rau sawvdaws hnov, coob tus thiaj ntseeg tias “lub ntiajteb kub ntxhov heev . . . tsis muaj leejtwg yuav tswj tau.”

Tiamsis, tsis ntev tom qab ntawd xwb, nws txawm siv tham zoo siab hlo txog tej tswvyim uas yuav siv los daws lub ntiajteb no tej teeb meem. Nws hais tias tej tswvyim ntawd ib txhia yog tej “xov zoo” thiab kuj ua rau nws muaj “kev cia siab heev” thiab tso siab tias txhua yam “yeej yuav mus zoo” xwb. Thaum nws hais li no twb yog nws hais tias cov neeg uas muaj hwjchim meej mom yeej muaj cuab kav tswj tau tej kev kub ntxhov uas muaj tshwm sim hauv lub ntiajteb no.

Coob leej yeej xav li Barack Obama thiab. Lawv tso siab tias kev tshawb txujci yuav tsim tau tej uas yuav kho tau lub ntiajteb tej teeb meem. Ib tug yawg uas paub koos pis tawj heev cia siab tias txog xyoo 2030, “peb yuav tsim tau tej koos pis tawj uas muaj zog tshaj cov niaj hnub no ib txhiab npaug thiab txog xyoo 2045, tseem yuav muaj zog tshaj ib plhom npaug.” Nws hais ntxiv tias: “Peb yeej ua tau zoo kawg lawm. Lub ntiajteb yimhuab muaj teeb meem, tiamsis peb yimhuab muaj tswvyim los kho thiab.”

Lub ntiajteb no phem npaum li cas tiag? Puas yog peb twb nyob ze heev rau hnub uas lub ntiajteb yuav raug puam tsuaj? Txawm tej neeg tshawb txujci thiab tej nom tej tswv tsuas hais qhov zoo txog yav tom hauv ntej xwb los, coob tus yeej tsis paub yuav xav li cas li. Yog vim li cas?

TEJ CUAB YEEJ UA ROG LOJ. Txawm lub koom haum ntiajteb United Nations thiab lwm cov koom haum yuav siv zog npaum li cas los, lawv yeej tav tsis tau tibneeg kom tsis txhob ua tej hoob pob loj. Ntau lub tebchaws tej nom tswv yeej tsis quav ntsej tej kevcai uas tau tsa los txwv tsis pub ua tej hoob pob loj. Cov tebchaws uas muaj hoob pob loj tseem muab tej ntawd kho kom zoo dua qub thiab tseem ua ib co tshiab uas yimhuab muaj zog dua thiab. Tej lub tebchaws uas yav thaud tsis muaj hoob pob loj, niaj hnub no kuj muaj peevxwm ua tau hoob pob los tua tau tibneeg coob heev.

Vim tej cuab yeej ua rog loj no, tibneeg thiaj ua neej ntshai ruj rwg xwb, tsis hais thaum “thaj yeeb” los tsis thaj. Lub vej xaij Bulletin of the Atomic Scientists ceeb toom tias: ‘Tsim nyog ntshai kawg li vim muaj tej cuab yeej ua rog uas nws txawj tua nws tsis tas yuav tibneeg tua li.’

KEV NOJ QAB NYOB ZOO. Hais txog kev noj qab nyob zoo, tej txujci uas neeg tshawb tau tsuas pab tau mentsis xwb. Ntshav siab, rog dhau, huab cua phem, thiab haus yeeb haus tshuaj yog tej uas ua rau neeg muaj mob coob zuj zus xwb. Coob tus tuag vim yog kheeb xawm, plawv tsis zoo, thiab ntshav qab zib. Coob tus lub cev tsis meej xeeb vim lawv mob hlwb. Thiab tsis ntev tas los no, kuj muaj 2 tug kab mob Ebola thiab Zika uas ua rau coob leej ntau tus mob hnyav heev. Thaum kawg tibneeg pom tias tej kev mob kev nkeeg yeej tsis muaj leejtwg yuav tav tau thiab yeej tsis muaj ib hnub yuav kawg.

TIBNEEG MUAB NTIAJTEB UA PUAS TAS. Tej tsev haujlwm loj uas neeg tsim tau muaj pa ncho ua rau tej huab cua tsis huv tas. Plhom plhom leej tau tas sim neej vim lawv nqus tau tej pa ntawd.

Tibneeg tsis hais ib tug twg, ib lub zos twg, lossis ib lub koom haum nom tswv twg yeej muab tej dej qias neeg, tej tshuaj kho mob thiab tej tshuaj ua liaj teb, tej roj hmab, thiab lwm yam uas tsis huv hliv thiab pov rau hauv hiavtxwv tas li. Phau ntawv Encyclopedia of Marine Science hais tias: “Tej uas xuam tsis huv no lom tau tej ntses thiab tej nroj tsuag hauv hiavtxwv, tsis tas li ntawd xwb, tseem lom tau cov tibneeg uas noj tej ntawd thiab.”

Tshuav tsis ntev xwb yuav tsis muaj dej ntshiab los siv los haus lawm. Tus yawg Askiv uas tshawb txujci hu ua Robin McKie ceeb toom tias: “Lub ntiajteb yuav tsis muaj dej txaus siv txaus haus rau txhua leej txhua tus lawm.” Tej nom tswv lees tias neeg yog tus tsim qhov teeb meem no thiab yog ib qho teeb meem uas loj kawg nkaus.

XWM TXHEEJ PHEM. Thaum muaj cua daj cua dub, khaub zeeg cua, thiab av qeeg, yeej ua tau dej nyab, toj pob, thiab lwm yam xwm txheej phem. Thaum muaj tej xwm txheej no, yeej ua rau coob leej ntau tus raug ploj tuag lossis raug mob thiab kuj ua rau tej vaj tse puam tsuaj tag. Lub koom haum hu ua U.S. National Aeronautics and Space Administration hais tias yav tom hauv ntej tseem yimhuab yuav muaj “cua daj cua dub hlob heev, tshav yuav kub heev, thiab av los yuav qhuav heev.’ Tej xwm txheej no puas yuav ua tau rau tibneeg tu noob nrho mus?

Tej zaum kuj muaj lwm yam xwm txheej phem koj pom uas hais tsis txog thiab. Txawm li ntawd los, yog koj pheej xav txog tej kev phem uas peb niaj hnub pom xwb, koj yuav tsis muaj kev cia siab rau yav tom hauv ntej. Cov uas mloog tej nom tswv thiab tej neeg tshawb txujci los kuj yuav tsis muaj kev cia siab li ntawd thiab. Zoo li tau hais hauv zaj dhau los, twb muaj coob tus uas nrhiav tau cov lus teb rau lawv tej lus nug txog lub ntiajteb thiab yav tom hauv ntej lawm. Lawv ho nrhiav tau qhovtwg los?

Cia peb mus saib ob zaj faj lem txog qhov no:

• “Ib lub tebchaws yuav sawv tawm tsam rau ib lub tebchaws, ib tug vajntxwv yuav tawm tsam rau ib tug vajntxwv, yuav muaj kev tshaib nqhis thiab ntuj qeeg ntau qhov.”​—Mathai 24:7.

• “Tiam kawg yuav yog lub sijhawm txom nyem nyuaj siab kawg. Rau qhov neeg yuav xam pom lawv tus kheej xwb, ntshaw nyiaj txiag, khav theeb, muab hlob, saib tsis taus luag, tsis mloog niam txiv lus, tsis nco luag txiaj ntsig, tsis yuav Vajtswv, tsis hlub luag, tsis zam txim, xyav luag moo, tsis tswj lub siab, ua neeg nyaum, ntxub qhov zoo, fav xeeb rau luag, ua siab heev, tsab ua loj, nyiam kev lomzem heev dua li nyiam Vajtswv.”​—2 Timaute 3:1-4.

Zoo li 2 zaj faj lem no hais, lub ntiajteb no mas phem kawg li, tsis muaj leejtwg yuav tswj tau. Yeej muaj tseeb li ntawd tiag, lub ntiajteb no yeej tsis muaj leejtwg yuav tswj tau li. Raws li phau Vajlugkub qhia, tibneeg yeej tsis muaj tswvyim thiab hwjchim kho tau tibneeg tej teeb meem kom tu qab. Cov nqe Vajlugkub nram no qhia tseeb txog qhov ntawd:

• “Muaj ib txojkev uas neeg pom tias zoo, tiamsis txojkev ntawd qhov kawg yog kev tuag.”​—Paj Lug 14:12.

• “Ib tug muaj hwjchim kav ib tug, ua rau nws raug txom nyem.”​—Laj Lim Tswvyim 8:9.

• “Tsis yog neeg coj tau neeg tshais kauj ruam.”​—Yelemi 10:23.

Yog cia tibneeg ua ywj siab, lub ntiajteb yeej yuav puam tsuaj xwb xwb li. Tiamsis yuav muaj tsis tau li ntawd! Vim li cas? Phau Vajlugkub hais li no:

• Vajtswv “txawb lub ntiajteb rau saum tej taw tiag, thiaj tsis ua zog ib txhis li.”​—Ntawv Nkauj 104:5.

• “Ib tiam dua tag mus, ib tiam tshwm tuaj, tiamsis lub ntiajteb nyob ruaj mus ib txhis.”​—Laj Lim Tswvyim 1:4.

• “Cov ncaj ncees yuav tau lub tebchaws [ntiajteb] ua lawv teej lawv tug, thiab tau nyob rau hauv mus ib txhis.”​—Ntawv Nkauj 37:29.

• Yuav “muaj qoob loo nplua mias hauv lub tebchaws, cia txhua lub roob muaj qoob loo zoo rawv ntwb nri.”​—Ntawv Nkauj 72:16.

Tej uas phau Vajlugkub tau hais no qhia tias lub ntiajteb yuav tsis raug puam tsuaj mus ib zaug li. Noob neej los yuav tsis tu noob mus vim tej huab cua tsis huv, zaub mov tsis txaus noj dej tsis txaus haus, lossis vim tej kab mob kev nkeeg loj. Lub ntiajteb kuj yuav tsis raug tej hoob pob loj kom puam tsuaj mus thiab. Vim li cas thiaj hais li ntawd? Vim Vajtswv yog tus tswj lub ntiajteb thiab tej uas yuav tshwm sim yav tom hauv ntej. Nws cia tibneeg ua ywj siab tiamsis thaum kawg lawv yuav tau sau tej uas lawv txiav txim siab ua. (Kalatia 6:7) Lub ntiajteb tsis zoo li lub tsheb nqaj uas khiav ceev heev nres tsis tau es thaum kawg puam tsuaj tag. Vajtswv yuav tsis pub kom tibneeg muab lub ntiajteb ua puam tsuaj lossis yuav tsis cia tibneeg ua kom tibneeg tu noob mus.​—Ntawv Nkauj 83:18; Henplais 4:13.

Vajtswv tseem yuav ua ntau tshaj ntawd ntxiv. Nws yuav pub kom tibneeg “vam meej nplua mias.” (Ntawv Nkauj 37:11) Txojkev cia siab uas hais hauv zaj no tsuas yog ib nyuag qhov ntawm ntau yam zoo txog yav tom hauv ntej uas Yehauvas Cov Timkhawv kawm tau hauv phau Vajlugkub.

Yehauvas Cov Timkhawv muaj nyob thoob ntiajteb tsis hais pojniam txivneej, cov laus cov hluas, lossis haiv neeg twg. Lawv sawvdaws pe hawm tus tseem Vajtswv uas phau Vajlugkub muab hu ua Yehauvas. Lawv tsis poob siab txog yav tom hauv ntej vim phau Vajlugkub hais tias: “[Yehauvas] uas tsim lub ntuj, nws yog Vajtswv, nws yog tus uas puab lub ntiajteb thiab muab tsim cia, nws muab lub ntiajteb tsim ruaj khov, nws tsis tsim nyob do cuas, nws tsim kom muaj neeg nyob. Nws hais tias, ‘Kuv yog [Yehauvas,] tsis muaj dua lwm tus li lawm.’”​—Yaxaya 45:18.