4. Puas Yog Vajtswv Tsim Kom Tibneeg Txom Nyem?
Ua Cas Thiaj Nug Li No?
Yog tibneeg paub qhov tseeb txog Vajtswv ces lawv yuav tsis xav yuam kev txog nws ntxiv lawm.
Xav Txog Qhov No
Yog tias Vajtswv tsim tau lub ntiajteb zoo heev, nws puas yuav cia tibneeg raug kev txom nyem?
Thaum cov neeg tsis paub Vajtswv pom tibneeg raug kev txom nyem, lawv yuav lam tau lam liam Vajtswv. Lawv hais tias Vajtswv tsis quav ntsej tibneeg, Vajtswv pab tsis tau tibneeg, lossis twb tsis muaj Vajtswv.
Puas muaj tseeb li lawv hais?
KAWM NTXIV
Saib zaj yeeb yaj kiab Vim Li Cas Peb Ho Paub Tias Phau Vajlugkub Yog Vajtswv Tshoov Neeg Sau? hauv lub vej xaij jw.org/hmn.
Phau Vajlugkub Hais Li No
Vajtswv tsim kom peb tau ib lub neej zoo.
Nws tsis xav kom peb ua neej txom nyem.
“Yog li ntawd, kuv pom hais tias yam uas peb tau, ces tsuas yog cia li txaus siab rau tej uas peb muaj thiab tej uas peb ua thaum peb tseem ua neej nyob no xwb. Peb sawvdaws cia li noj thiab haus kom txaus siab rau tej uas peb khwv tau los. Tej ntawd yog tej uas Vajtswv muab pub rau peb.”—TEJ LUS QHIA 3:12, 13.
Vajtswv pub txhua yam rau thawj nkawm niam txiv.
Nws tsis xav pub nkawd lossis tej tub tej ki txom nyem.
“Vajtswv foom koob hmoov rau nkawd thiab hais tias, ‘Neb cia li muaj tub muaj ki kom coob, neb tej xeebntxwv yuav huamvam mus nyob thoob plaws txhua qhov chaw kom puv ntiajteb thiab lawv yuav kav tagnrho lub ntiajteb.’”—CHIVKEEB 1:28.
Thawj txwj nkawm tsis mloog Vajtswv lus.
Vim li ntawd, nkawd thiab tej tub tej ki thiaj raug kev txom nyem.
“Twb yog vim ib tug xub ua txhaum, neeg ntiajteb txhua tus thiaj ua txhaum. Vim tus ntawd ua txhaum, tus ntawd thiaj tuag. Yog li ntawd, txhua haivneeg uas nyob hauv ntiajteb no thiaj txawj tuag, rau qhov txhua tus puavleej tau ua txhaum lawm.”—LOOS 5:12.a
Vajtswv tsim kom neeg nyob hauv nws qab kev tswjhwm.
Zoo tib yam li tibneeg ua pa tsis tau hauv dej ces tibneeg kav tsis tau tibneeg.
“Tsis muaj leejtwg uas nws rov ua tus tswv kav nws; thiab tsis muaj leejtwg nws rov tswj nws lub neej.”—YELEMIS 10:23.
Vajtswv tsis xav kom peb raug kev txom nyem.
Mloog Vajtswv lus peb thiaj tsis tshua muaj teeb meem.
“Yog nej ua tib zoo mloog kuv tej lus samhwm! Ces tej koob hmoov yuav ntws laub lug los rau nej ib yam li tus dej ntws tsis paub nqhuab li.”—YAXAYAS 48:18.
a Lo lus “txhaum” hauv phau Vajlugkub yog hais txog tej kev phem tibneeg ua. Thiab lo ntawd kuj hais tias txhua tus puav leej yug los muaj kev txhaum.