KEV PAB RAU THAUM KHOOM KIM ZUJ ZUS TUAJ
Ua Siab Dawb Pub Rau Luag
Tab txawm khoom kim zuj zus tuaj lawm los, koj yeej tseem txuag tau nyiaj thiab ua tau lub siab dawb pub rau lwm tus. Qhov uas ua lub siab dawb pub rau lwm tus yuav pab tau koj thev taus lub sij hawm uas muaj kev txhawj xeeb txog nyiaj txiag.
UA SIAB DAWB PAB TAU KOJ LI CAS?
Txawm koj tsuas muab tau me me xwb los, yeej ua rau koj muaj taus kev zoo siab. Ib co kws kho mob tshawb pom tias thaum peb ua lub siab dawb paug pub rau lwm tus, pab tau kom peb txhob muaj ntshav siab los sis lwm yam kev mob kev nkeeg. Kuj pab tau kom peb tsis tshua muaj kev txob kev txhawj, peb thiaj tau zoo pw tsaug zog.
Thaum peb pub rau lwm tus, tsis hais nyiaj txiag los sis lwm yam, yuav yooj yim zog rau peb txais lwm tus txoj kev pab thiab. Hau-ees (Howard) uas nyob lub teb chaws Askiv hais li no tias, “Thaum kuv thiab kuv poj niam wb pub rau luag thiab pab txhawb lwm tus ces thaum lwm tus pab wb, wb thiaj tsis txaj muag txais. Cov uas ua siab dawb pub rau lwm tus, lawv yeej tsis tos kom tau txais kev pauj rov qab. Txawm lawv tsis tau kev pauj rov qab los lawv twb ntaus tau ib tug phooj ywg zoo uas yuav zoo siab hlo tuaj pab thaum muaj teeb meem dab tsi.”
KOJ YUAV UA LI CAS XWB?
Pub me ntsis rau lwm tus. Koj yeej tseem pub tau rau lwm tus txawm tias koj tsis muaj ua luaj twg. Txawm yog ib pluag mov zaub tsuag xwb los yeej zoo lawm. Dawnkees (Duncan) thiab nws tsev neeg uas nyob teb chaws Yunkadas (Uganda) yeej tsis muaj ntau, tiam sis lawv yeej muaj lub siab dawb siab zoo. Dawnkees hais tias, “Kuv tsev neeg peb nyiam nrog luag lwm tus ua ke. Yog li, kuv poj niam wb nyiam caw qhua los rau hauv wb lub tsev, noj ib pluag mov thiab tham pem ua ke.”
Tiam sis nco ntsoov tias, txhob ua tshaj li koj ua tau, tsam ho tsim kev nyuaj siab rau koj tsev neeg.—Yauj 17:5, phau Qab Ntuj Tshiab.
Koj yuav pub me ntsis li cas xwb? Caw ib tug tuaj noj ib pluag mov ntawm koj tsev los sis muab khoom txom ncauj rau nws noj. Yog muaj tej yam khoom uas koj tsis siv lawm, seb koj puas xav muab cov khoom ntawd pub rau lwm tus?
Lwm yam uas koj tseem ua tau. Txawm koj pub tsis tau ib yam khoom los sis nyiaj txiag los, koj yeej tseem ua tau tej yam uas qhia rau lwm tus tias koj hlub nws. Xws li, yog muaj ib tug hu koj mus pab nws, koj kuj mus pab. Los sis qhia rau ib tug paub tias koj saib nws rau nqi thiab hlub nws heev. Txawm koj hais ib lo lus nplig nws lub siab xwb los yeej txhawb tau nws lawm.
Koj yuav ua li no li cas xwb? Yog muaj ib tug uas xav kom koj pab nws ua nws tej dej num xws li kho vaj kho tsev los sis lwm yam los kav tsij mus pab. Koj kuj sau ntawv los sis hu xov tooj mus rau ib tug, qhia rau nws tias koj xav txog nws thiab nco txog nws.
Thaum koj ua lub siab dawb siab zoo pab lwm tus, koj yuav muaj kev zoo siab dua.