Tu Plaub Kev Lag Kev Luam

Nyob hauv 1 Khaulee 6:1-8, tus tubtxib Povlauj qhia txog tej kev plaub kev ntug uas cov Khixatia muaj. Nws tu siab tias cov ntseeg hauv Khaulee ib txhia “tseem muaj plhus coj [lawv tej plaub ntug] mus rau cov uas tsis ntseeg tu.” (Nqe 1) Povlauj thiaj sam hwm tias tsis tsim nyog cov Khixatia ib leeg foob ib leeg mus txog tsev tu plaub, tiamsis lawv yuav tsum cia lub koom txoos nrog tu. Cia peb xub kawm seb vim li cas Vajtswv ho tshoov kom Povlauj sau tej lus no. Ces tom qab ntawd, peb mam kawm txog tej plaub ntug loj heev uas yuav tsum coj mus rau sab nraud tu thiaj tiav.

Yog tias peb muaj teeb meem nrog ib tug kwvtij twg ntsig txog kev lag kev luam, peb yuav tsum tsis txhob tu raws li neeg lub tswvyim, tiamsis tu raws li Yehauvas lub tswvyim. (Paj Lug 14:12) Yexus twb qhia tias thaum tej teeb meem tseem me, cia li kho kom sib haum; tsis txhob tos txog thaum loj mam kho. (Mathai 5:23-26) Tiamsis tu siab kawg li uas muaj ib txhia Khixatia coj nkhaus zog lawm. Lawv tseem coj lwm tus mus foob rau tej tsev tu plaub thiab. Povlauj twb sau tias: “Qhov uas nej sib ua plaub kuj yog nej poob lub neej ntseeg lawm.” Povlauj paub tias thaum cov ntseeg coj li ntawd, tibneeg yeej yuav thuam lub koom txoos thiab thuam tus Vajtswv uas peb pe hawm. Yog li ntawd, peb yuav tsum ua tib zoo xav txog Povlauj lo lus nug no: “Ua cas nej tsis cia luag ua phem rau nej zoo dua?”​—Nqe 7.

Povlauj kuj qhia tias Vajtswv twb tsa muaj ib txojkev tu plaub rau cov Khixatia lawm. Cov txwj laus hauv lub koom txoos yeej tu tau tej teeb meem vim lawv paub qhov tseeb hauv Vajtswv Txojlus. Povlauj hais tias lawv “yuav txawj tu plaub rau cov kwvtij” thiab “yuav txiav txim rau tej plaub uas muaj hauv lub neej no.” (Nqe 3-5) Yexus qhia tias yog muaj ib tug twg ua txhaum loj, xws li dag ntxias kom lwm tus poob nyiaj poob txiaj lossis nws nyiam hais lus dag txog luag lwm tus, ces yuav tsum kho qhov teeb meem ntawd raws li peb yam no: (1) Mus nrog tus neeg uas yus muaj teeb meem ntawd tham, neb ob leeg xwb; (2) Yog tias nrog nws tham tas lawm los tseem kho tsis tau ces coj ib lossis ob tug timkhawv nrog yus mus; thiab (3) Yog tseem kho tsis tau qhov teeb meem ntawd thiab, ces mus cuag cov txwj laus hauv lub koom txoos.​—Mathai 18:15-17.

Thaum cov kwvtij nkauj muam muaj teeb meem, lawv yuav tsum tsis txhob xav tias cov txwj laus yuav txiav plaub txiav ntug li tej kws lij choj thiab tej tub luam es tsa kevcai los qhia ib qho zuj zus tias yuav raug kho lossis raug nplua li cas. Tiamsis cov txwj laus pab kom ob tog paub siv cov nqe Vajlugkub los kho kom sib haum. Yog tias nyuaj daws qhov teeb meem ntawd, ces cov txwj laus yuav tau nug tus kwvtij uas saib xyuas lawv thaj tsam. Lawv nug ceg uas saib xyuas lawv lub tebchaws los kuj tau thiab. Tiamsis kuj muaj tej yam teeb meem uas Povlauj cov lus sam hwm no tsis duav thiab. Tej teeb meem ntawd yog dabtsi?

Muaj tej zaj plaub ntug uas cov Khixatia yuav tau coj mus rau tsev tu plaub hais thiaj tiav. Tsis yog lawv muaj lub siab ntxo luag tug, lossis xav tsim teeb meem rau luag. Xws li, ua ntawv sib nrauj, thov cai tu menyuam, txiav txim txog tej nyiaj txiag uas yuav them tus txij nkawm tom qab sib nrauj, ua ntaub ntawv mus hais nyiaj faj seeb, ua ntaub ntawv qhia tias luag tseem tiv yus nqe, thiab ua ntaub ntawv txais qub txeeg qub teg. Ib txhia kuj ua ntaub ntawv mus txheem tom tsev tu plaub, vim lwm tus twb ua ntawv foob lawv ua ntej lawm.a

Yog tias ib tug ntseeg ua ntaub ntawv sib foob, tiamsis tsis yog nws muaj lub siab xav foob luag noj, ces yeej tsis txhaum. Tus ntseeg ntawd tsis tau hla Povlauj cov lus qhia rau cov ntseeg.b Txawm li cas los, cov Khixatia yuav tsum xam pom Yehauvas ua ntej, kom nws lub npe dawb huv, thiab pab kom muaj kev sib haum xeeb hauv lub koom txoos. Yexus Khetos qhia tias sawvdaws yuav paub nws cov thwjtim, vim lawv muaj kev hlub. Tus uas muaj kev hlub yeej “tsis xam pom nws [tus kheej] xwb.”​—1 Khaulee 13:4, 5; Yauhas 13:34, 35.