-
Vajtswv Lub Nceeg Vaj Yog Dab Tsi?Nyob Kaj Siab Lug Mus Ib Txhis—Kawm Phau Vajlugkub
-
-
ZAJ KAWM 31
Vajtswv Lub Nceeg Vaj Yog Dab Tsi?
Txoj xov uas tseem ceeb tshaj plaws hauv phau Vajlugkub yog hais txog Vajtswv lub Nceeg Vaj. Vajtswv Yehauvas yuav siv lub Nceeg Vaj ntawd los ua kom lub ntiaj teb rov zoo li nws lub ntsiab puag thaum chiv thawj. Yog li, Vajtswv lub Nceeg Vaj yog dab tsi? Ua li cas peb thiaj paub tias Vajtswv lub Nceeg Vaj twb kav tam sim no lawm? Lub Nceeg Vaj twb ua tau dab tsi lawm thiab tseem yuav ua dab tsi ntxiv rau yav tom hauv ntej? Zaj kawm no thiab ob zaj tom ntej yuav teb cov lus nug no.
1. Vajtswv lub Nceeg Vaj yog dab tsi, thiab Vajtswv tsa leej twg ua tus Vaj Ntxwv?
Vajtswv lub Nceeg Vaj yog ib lub tseem fwv saum ntuj ceeb tsheej uas Vajtswv Yehauvas ua tus tsa. Nws tau tsa Yexus Khetos ua Vaj Ntxwv saum ntuj ceeb tsheej kav tag nrho lub ntiaj teb. (Mathais 4:17; Yauhas 18:36) Phau Vajlugkub hais tias Yexus “yuav ua vajntxwv kav . . . mus ibtxhis.”—Lukas 1:32, 33.
2. Leej twg nrog Yexus kav?
Muaj ib co nrog Yexus kav thiab. Cov ntawd los ntawm txhua haiv neeg, “tsis hais xeem twg lossis cov uas hais yam lus twg lossis haivneeg twg lossis nyob lub tebchaws twg” los ua vaj ntxwv “kav lub ntiajteb.” (Tshwmsim 5:9, 10) Txij thaum Yexus los rau hauv ntiaj teb, muaj tsheej plhom leej tau los ua nws cov thwj tim, tiam sis tsuas yog 144,000 leej xwb thiaj tau mus nrog Yexus kav saum ntuj ceeb tsheej. (Nyeem Tshwmsim 14:1-4.) Dua li ntawd ces lwm cov uas raws Yexus qab yuav ua lub Nceeg Vaj cov pej xeem nyob hauv ntiaj teb.—Phau Ntawv Nkauj 37:29.
3. Vim li cas Vajtswv lub Nceeg Vaj thiaj zoo tshaj tib neeg tej tseem fwv?
Txawm tej nom tswv hauv ntiaj teb no xav ua zoo npaum li cas los, lawv tsis muaj hwj chim ua tau txhua yam li lawv xav ua. Thiab lawv tsuas kav ib ntus xwb ces lwm tus uas tej zaud tsis hlub pej xeem li lawv yuav los hloov lawv chaw. Tiam sis yuav tsis muaj leej twg los hloov tau Yexus chaw ua vaj ntxwv kav Vajtswv lub Nceeg Vaj. Vajtswv lub Nceeg Vaj “yuav nyob mus ibtxhis tsis paub kawg li.” (Daniyees 2:44) Yexus yuav kav tag nrho lub ntiaj teb thiab nws yuav tsis xaiv ntsej xaiv muag. Nws yuav qhia kom tib neeg txawj sib hlub, paub ua zoo, thiab ua ncaj ua ncees ib yam li nws.—Nyeem Yaxayas 11:9.
KAWM NTXIV
Kawm seb vim li cas Vajtswv lub Nceeg Vaj thiaj zoo tshaj tib neeg tej tseem fwv.
4. Vajtswv lub Nceeg Vaj yuav kav thoob plaws lub ntiaj teb
Tsis muaj ib tug nom tswv twg muaj hwj chim kav npaum li Yexus Khetos. Nyeem Mathais 28:18, thiab tham txog lo lus no:
Vim li cas Yexus lub hwj chim kav thiaj zoo dua tib neeg tej nom tswv txhua tus lub huv si?
Tib neeg tej tseem fwv ib sij hloov ib zaug, thiab nyias tsuas kav nyias lub teb chaws. Ua li Vajtswv lub Nceeg Vaj yuav kav ntev npaum li cas? Nyeem Daniyees 7:14, thiab tham txog ob lo lus no:
Vim li cas ho zoo rau Vajtswv lub Nceeg Vaj “kav mus tsis paub kawg”?
Vim li cas ho zoo rau Vajtswv lub Nceeg kav thoob ntiaj teb?
5. Yuav tau muab tib neeg tej nom tswv hloov
Vim li cas yuav tau muab Vajtswv lub Nceeg Vaj los hloov tib neeg tej tseem fwv? Saib zaj YEEB YAJ KIAB, thiab tham txog lo lus no:
Tib neeg txoj kev kav thaum kawg muaj li cas xwb?
Nyeem Tej Lus Qhia 8:9, thiab tham txog ob lo lus no:
Koj xav puas tsim nyog muab Vajtswv lub Nceeg Vaj los hloov tib neeg tej tseem fwv? Vim li cas koj ho xav li ntawd?
6. Cov uas kav Vajtswv lub Nceeg Vaj to taub peb zoo
Vim Yexus tau los yug ua neeg ib zaug, nws thiaj “paub tej uas peb qaug zog” los sis peb raug. (Henplais 4:15) Cov 144,000 leej poj niam txiv neej uas muab siab npuab Yehauvas yuav nrog Yexus kav. Yehauvas xaiv lawv tawm ntawm txhua haiv neeg, “tsis hais xeem twg lossis cov uas hais yam lus twg lossis haivneeg twg lossis nyob lub tebchaws twg.”—Tshwmsim 5:9.
Koj puas zoo siab tias Yexus thiab cov nrog nws kav to taub peb tej kev txom nyem nyuaj siab vim lawv twb ua neeg nyob hauv ntiaj teb no dua lawm? Vim li cas koj ho xav li ntawd?
Yehauvas tau xaiv poj niam txiv neej ntawm txhua haiv neeg los nrog Yexus kav
7. Vajtswv lub Nceeg Vaj muaj kev cai zoo dua tib neeg tej tseem fwv
Tej nom tswv tsa kev cai los pab thiab tiv thaiv lawv cov pej xeem. Vajtswv lub Nceeg Vaj los kuj muaj kev cai rau cov pej xeem coj thiab. Nyeem 1 Kauleethaus 6:9-11, thiab tham txog cov lus no:
Koj xav lub ntiaj teb yuav zoo npaum li cas yog txhua leej txhua tus coj raws li Vajtswv tej kev cai?a
Koj xav Yehauvas puas muaj cai hais kom cov pej xeem hauv lub Nceeg Vaj coj raws li tej kev cai ntawd? Vim li cas koj ho xav li ntawd?
Ua li cas koj thiaj ntseeg tias cov uas tsis coj raws li Vajtswv tej kev cai yuav hloov tau?—Saib nqe 11.
Tej nom tswv tsa kev cai los pab thiab tiv thaiv lawv cov pej xeem. Vajtswv lub Neeg Vaj muaj kev cai zoo dua los pab thiab tiv thaiv nws cov pej xeem
TEJ TUG YUAV NUG TIAS: “Vajtswv lub Nceeg Vaj yog dab tsi?”
Koj yuav teb li cas?
KOJ KAWM TAU DAB TSI
Vajtswv lub Nceeg Vaj yog ib lub tseem fwv tiag tiag nyob saum ntuj ceeb tsheej thiab yuav kav thoob plaws lub ntiaj teb.
Rov Tham Dua
Leej twg yog cov uas kav Vajtswv lub Nceeg Vaj?
Vajtswv lub Nceeg Vaj zoo tshaj tib neeg tej tseem fwv li cas?
Yehauvas xav kom cov pej xeem hauv lub Nceeg Vaj coj li cas?
TSHAWB NTXIV
Kawm seb Yexus tau qhia tias Vajtswv lub Nceeg Vaj nyob rau qhov twg.
“Vajtswv Lub Nceeg Vaj Puas Yog Nyob Hauv Koj Lub Siab?” (Nyeem hauv jw.org/hmn)
Vim li cas Yehauvas Cov Tim Khawv thiaj muab siab npuab Vajtswv lub Nceeg Vaj dua li tib neeg tej tseem fwv?
Kawm seb phau Vajlugkub hais li cas txog cov 144,000 leej uas Yehauvas xaiv mus kav nrog Yexus.
Vim li cas ib tug poj niam hauv tsev loj cuj thiaj ntseeg tias tsuas yog Vajtswv tib leeg xwb thiaj kho tau kom lub ntiaj teb muaj kev ncaj ncees?
“Vim Li Cas Kuv Thiaj Paub Tias Yuav Muaj Kev Ncaj Ncees” (Tsim Dheev! lub 11 Hlis xyoo 2011)
-
-
Vajtswv Lub Nceeg Vaj Twb Kav Lawm!Nyob Kaj Siab Lug Mus Ib Txhis—Kawm Phau Vajlugkub
-
-
ZAJ KAWM 32
Vajtswv Lub Nceeg Vaj Twb Kav Lawm!
Vajtswv lub Nceeg Vaj pib kav saum ntuj ceeb tsheej rau xyoo 1914. Xyoo ntawd kuj yog xyoo uas pib lub caij kawg rau tib neeg txoj kev kav. Vim li cas peb thiaj paub li ntawd? Cia peb mus kawm txog tej lus faj lem hauv phau Vajlugkub, thiab txog tej uas tau muaj tshwm sim hauv lub ntiaj teb thiab tib neeg tus cwj pwm txij xyoo 1914 los.
1. Tej lus faj lem hauv phau Vajlugkub qhia li cas?
Phau Daniyees hauv phau Vajlugkub qhia tias thaum puv “xya xyoo” los sis xya lub sij hawm, Vajtswv lub Nceeg Vaj mam li pib kav. (Daniyees 4:16, 17) Ntau pua xyoo tom qab ntawd, Yexus kuj muab lub sij hawm ntawd hu ua “lwm haiv neeg lub sij hawm,” thiab nws hais tias lub sij hawm ntawd tseem tsis tau xaus. (Lukas 21:24) Peb yuav kawm tias xya lub sij hawm ntawd los xaus rau xyoo 1914.
2. Txij xyoo 1914 los, tau muaj dab tsi tshwm sim hauv ntiaj teb thiab tib neeg coj cwj pwm zoo li cas?
Yexus cov thwj tim nug nws tias: “Yuav muaj pov thawj dab tsi qhia tias twb txog lub sij hawm uas koj rov los thiab lub sim ceeb yuav kawg?” (Mathais 24:3) Yexus teb lawv tias tom qab nws sawv ua Vaj Ntxwv kav Vajtswv lub Nceeg Vaj yuav muaj ntau yam tshwm sim. Nws qhia tias yuav muaj kev tsov kev rog, kev tshaib kev nqhis, thiab av qeeg ib qho rau ib qho. (Nyeem Mathais 24:7.) Phau Vajlugkub kuj hais tias nyob rau “lub sijhawm uas ntiaj teb yuav kawg yuav muaj kev ntxhov siab heev” vim tib neeg tej cwj pwm phem. (2 Timautes 3:1-5) Txij xyoo 1914 los, peb yeej pom muaj li phau Vajlugkub hais ntawd tiag.
3. Vim li cas ho muaj kev kub ntxhov ntau ua luaj txij thaum Vajtswv lub Nceeg Vaj pib kav los?
Tom qab Yexus sawv ua Vaj Ntxwv kav Vajtswv lub Nceeg Vaj, nws nrog Xatas thiab cov dab ua rog saum ntuj ceeb tsheej. Xatas swb ntsuj rog ntawd lawm. Phau Vajlugkub hais tias Xatas “raug muab pov los rau hauv lub ntiajteb, thiab nws cov tubtxib saum ntuj kuj raug muab pov nrog nws ua ke los thiab.” (Qhia Tshwm 12:9, 10, 12) Xatas npau taws heev vim nws paub tias tshuav tsis ntev nws yuav raug puas tsuaj. Yog li, nws thiaj tsim kev txom nyem nyuaj siab ntxhov plawv thoob ntiaj teb. Twb yog vim li ntawd lub ntiaj teb thiaj muaj kev kub ntxhov ntau ua luaj! Tiam sis Vajtswv lub Nceeg Vaj yuav muab tej teeb meem ntawd tshem huv si mus.
KAWM NTXIV
Kawm seb vim li cas peb thiaj paub tias Vajtswv lub Nceeg Vaj twb pib kav rau xyoo 1914 lawm thiab qhov no ho pab tau peb li cas.
4. Thaum peb muab cov caij nyoog hauv phau Vajlugkub los xam, peb pom tias Vajtswv lub Nceeg Vaj pib kav rau xyoo 1914
Vajtswv ua rau teb chaws Npanpiloos tus Vaj Ntxwv Nenpukajnexales ua ib zag npau suav txog tej uas yuav muaj tshwm sim rau yav tom hauv ntej. Thaum peb nyeem zaj npau suav thiab cov lus uas Daniyees txhais zaj npau suav ntawd hauv phau Vajlugkub, peb pom tias zaj npau suav yog hais txog Nenpukajnexales txoj kev kav thiab Vajtswv txoj kev kav.—Nyeem Daniyees 4:17.a
Nyeem Daniyees 4:20-26, ces siv daim duab los tham txog cov lus no:
(1) Nenpukajnexales ua npau suav pom dab tsi?—Saib nqe 20 thiab 21.
(2) Yuav ua li cas rau tsob ntoo?—Saib nqe 23.
(3) Thaum puv “xya xyoo” los sis xya lub sij hawm, yuav muaj li cas?—Saib nqe 26.
Tsob Ntoo Hauv Zaj Npau Suav Kuj Hais Txog Vajtswv Lub Nceeg Vaj
ZAJ LUS FAJ LEM (Daniyees 4:20-36)
Txoj kev kav
(1) Ib tsob ntoo loj thiab siab heev
Txoj kev kav raug ncua ib ntus
(2) “Ntov tsob ntoo,” thiab cia kom “puv xya xyoo” los sis xya lub sij hawm
Rov tau kav dua
(3) “Koj yuav rov qab tau ua vajntxwv dua”
Thawj zaug zaj lus faj lem no muaj tiav . . .
(4) Tsob ntoo piv txog leej twg?—Saib nqe 22.
(5) Nws txoj kev kav raug ncua thaum twg?—Nyeem Daniyees 4:29-33.
(6) Muaj li cas rau Nenpukajnexales thaum puv “xya xyoo” los sis xya lub sij hawm?—Nyeem Daniyees 4:34-36.
THAWJ ZAUG MUAJ TIAV
Txoj kev kav
(4) Teb chaws Npanpiloos tus Vaj Ntxwv Nenpukajnexales
Txoj kev kav raug ncua ib ntus
(5) Tom qab xyoo 606 ua ntej Yexus, Nenpukajnexales ua neeg vwm, nws thiaj ua tsis taus vaj ntxwv tau xya lub xyoos
Rov tau kav dua
(6) Nenpukajnexales rov feeb meej thiab rov ua vaj ntxwv kav dua
Zaum ob zaj lus faj lem no muaj tiav . . .
(7) Tsob ntoo piv txog leej twg?—Nyeem 1 Xwmtxheej Vajntxwv 29:23.
(8) Lawv txoj kev kav raug ncua thaum twg? Ua li cas peb thiaj paub tias lawv txoj kev kav tseem raug ncua thaum Yexus nyob hauv ntiaj teb?—Nyeem Lukas 21:24.
(9) Txoj kev kav no rov pib thaum twg thiab nyob rau qhov twg?
ZAUM OB MUAJ TIAV
Txoj kev kav
(7) Haiv neeg Ixayees cov vaj ntxwv uas sawv cev Vajtswv txoj kev kav
Txoj kev kav raug ncua ib ntus
(8) Thaum Yeluxalees raug puas tsuaj, cov Ixayees tej vaj ntxwv txoj kev kav raug ncua tau 2,520 xyoo
Rov tau kav dua
(9) Yexus pib ua Vaj Ntxwv kav Vajtswv lub Nceeg Vaj saum ntuj ceeb tsheej
Xya lub sij hawm ntev npaum li cas?
Muaj tej nqe Vajlugkub kuj pab kom peb to taub lwm nqe Vajlugkub. Xws li phau Tshwmsim hais tias peb xyoos thiab rau lub hlis, los sis peb lub sij hawm thiab ib nrab, ntev li 1,260 hnub. (Tshwmsim 12:6, 14) Ces xya lub sij hawm yog ob npaug ntawd, los sis 2,520 hnub. Tej thaud phau Vajlugkub muab ib hnub piv rau ib xyoos. (Exekees 4:6) Yog li ntawd, xya lub sij hawm uas hais hauv phau Daniyees ces yog 2,520 xyoo.
5. Txij xyoo 1914 los lub qab ntuj no tsis zoo li qub lawm
Yexus qhia tias tom qab nws ua Vaj Ntxwv, lub qab ntuj no yuav zoo li cas. Nyeem Lukas 21:9-11, thiab tham txog lo lus no:
Koj puas pom muaj li nqe Vajlugkub no hais?
Tus tub txib Povlauj piav tias tib neeg yuav zoo li cas nyob rau lub sij hawm kawg rau tib neeg txoj kev kav. Nyeem 2 Timautes 3:1-5, thiab tham txog lo lus no:
Niaj hnub no, koj puas pom tib neeg coj li nqe Vajlugkub no hais?
6. Vajtswv lub Nceeg Vaj twb kav lawm, peb yuav tau ua dab tsi?
Nyeem Mathais 24:3, 14, thiab tham txog ob lo lus no:
Tes hauj lwm tseem ceeb twg qhia tias Vajtswv lub Nceeg Vaj twb kav lawm?
Yuav ua li cas koj thiaj muaj feem ua tes hauj lwm no?
Vajtswv lub Nceeg Vaj twb kav lawm. Tshuav tsis ntev Vajtswv lub Nceeg Vaj yuav kav thoob plaws lub ntiaj teb. Nyeem Henplais 10:24, 25, thiab tham txog lo lus no:
Hnub uas Vajtswv teem cia twb los ze lawm, peb txhua tus yuav tau ua dab tsi?
Yog koj kawm tau ib yam uas yuav pab thiab cawm tau lwm tus txoj sia, koj yuav ua li cas?
TEJ TUG YUAV NUG TIAS: “Vim li cas Yehauvas Cov Tim Khawv thiaj hais tias xyoo 1914 yog ib xyoos uas tseem ceeb heev?”
Koj yuav teb li cas?
KOJ KAWM TAU DAB TSI
Tej lus faj lem, tej caij nyoog hauv phau Vajlugkub, thiab tej uas muaj tshwm sim hauv lub ntiaj teb no qhia tias Vajtswv lub Nceeg Vaj twb kav lawm. Yog peb ntseeg li no ces peb yuav rau siab ntso mus tshaj tawm txoj xov zoo thiab mus koom tej kev sib txoos tsis tseg.
Rov Tham Dua
Raws li phau Daniyees, thaum puv xya lub sij hawm yuav muaj dab tsi tshwm sim?
Vim li cas koj thiaj ntseeg tias Vajtswv lub Nceeg Vaj twb pib kav rau xyoo 1914 lawm?
Koj yuav tau ua dab tsi yog koj ntseeg tias Vajtswv lub Neeg Vaj twb kav lawm?
TSHAWB NTXIV
Kawm seb cov neeg sau keeb kwm thiab lwm cov hais li cas txog tej uas muaj txawv txav hauv lub ntiaj teb txij xyoo 1914 los.
“Thaum Tib Neeg Coj Phem Zuj Zus” (Tsim Dheev! lub 4 Hlis xyoo 2007)
Nyeem seb cov lus faj lem hauv Mathais 24:14 pab tau ib tug txiv neej li cas.
“Kuv Nyiam Pob Tog Qws Tshaj Txhua Yam!” (Phau Tsom Faj Phau 3 Xyoo 2017)
Vim li cas peb thiaj paub tias zaj lus faj lem hauv Daniyees tshooj 4 yog hais txog Vajtswv lub Nceeg Vaj?
“Vajtswv Lub Nceeg Vaj Pib Kav Thaum Twg Lawm? (Ntu 1)” (Phau Tsom Faj lub 10 Hli tim 1 xyoo 2014)
Ua li cas peb thiaj paub tias “xya xyoo” los sis xya lub sij hawm uas hais hauv phau Daniyees tshooj 4 los xaus rau xyoo 1914?
“Vajtswv Lub Nceeg Vaj Pib Kav Thaum Twg Lawm? (Ntu 2)” (Phau Tsom Faj lub 11 Hlis tim 1 xyoo 2014)
a Mus saib ob zaj kawm kawg hauv ntu Tshawb Ntxiv.
-
-
Vajtswv Lub Nceeg Vaj Yuav Ua Dab Tsi?Nyob Kaj Siab Lug Mus Ib Txhis—Kawm Phau Vajlugkub
-
-
ZAJ KAWM 33
Vajtswv Lub Nceeg Vaj Yuav Ua Dab Tsi?
Vajtswv lub Nceeg Vaj twb kav lawm. Tshuav tsis ntev lub Nceeg Vaj yuav ua ntau yam zoo rau lub ntiaj teb no. Cia peb tham txog yam puav uas lub Nceeg Vaj yuav ua.
1. Vajtswv lub Nceeg Vaj yuav kho kom lub ntiaj teb muaj kev thaj yeeb thiab kev ncaj ncees li cas?
Yexus uas yog tus Vaj Ntxwv kav Vajtswv lub Nceeg Vaj yuav kho kom lub ntiaj teb muaj kev thaj yeeb thiab kev ncaj ncees. (Nyeem Yaxayas 11:4.) Nws yuav muab cov neeg lim hiam thiab neeg tej tseem fwv ua kom puas tsuaj thaum ua ntsuj rog Amankedoos. (Tshwmsim 16:14, 16) Thaum ntawd yuav muaj tiav raws li phau Vajlugkub cog lus no: “Cov neeg siab phem nyob ib ntus xwb lawv yuav puastsuaj mus.”—Phau Ntawv Nkauj 37:10.
2. Yuav zoo li cas xwb thaum txhua yam hauv ntiaj teb muaj tiav raws li Vajtswv lub siab nyiam?
Nyob hauv Vajtswv txoj kev kav, “cov ncaj ncees yuav tau lub [ntiaj teb] ua lawv teej lawv tug, thiab tau nyob rau hauv mus ib txhis.” (Ntawv Nkauj 37:29) Sim xav seb lub neej yuav zoo npaum li cas thaum txhua leej txhua tus nyob hauv ntiaj teb yog neeg ncaj ncees, txawj sib hlub, thiab puav leej hlub Yehauvas! Txhua tus yuav tsis muaj mob muaj nkeeg thiab yuav tau txoj sia nyob mus ib txhis.
3. Tom qab cov neeg lim hiam raug rhuav tshem tas, Vajtswv lub Nceeg Vaj yuav ua dab tsi?
Tom qab cov neeg lim hiam puas tsuaj tag, Yexus yuav ua Vaj Ntxwv kav 1,000 xyoo. Lub sij hawm ntawd, Yexus thiab cov 144,000 leej uas nrog nws kav, yuav kho cov neeg hauv ntiaj teb kom zoo tiav tiav tsis muaj txhaum. Tom qab 1,000 xyoo, lub ntiaj teb yuav yog ib lub vaj kaj siab zoo nkauj heev thiab txhua tus yuav zoo siab kawg li vim lawv coj raws li Yehauvas tej kev cai. Ces Yexus yuav muab lub Nceeg Vaj cob rov rau nws Leej Txiv Yehauvas ua tus kav. Thaum ntawd txhua tus yuav “hwm [Vajtswv] lub npe.” (Mathais 6:9, 10) Qhov ntawd yuav ua pov thawj tias Yehauvas txoj kev kav yeej yog txoj zoo thiab nws yeej hlub tshua nws cov pej xeem. Ces Yehauvas yuav muab Xatas, cov dab, thiab txhua tus uas tawm tsam Nws txoj kev kav rhuav tshem mus. (Tshwmsim 20:7-10) Thaum ntawd txhua tsav txhua yam yuav zoo tiav tiav thiab yuav nyob mus ib txhis.
KAWM NTXIV
Kawm seb vim li cas peb thiaj ntseeg tau tias Vajtswv yuav siv lub Nceeg Vaj los ua kom muaj tiav raws li txhua lo lus cog tseg hauv phau Vajlugkub rau yav tom hauv ntej.
4. Vajtswv lub Nceeg Vaj yuav muab neeg tej tseem fwv rhuav tshem
“Ib txhia raug txomnyem vim kev tswjhwm ntawm cov neeg muaj hwjchim.” (Tej Lus Qhia 8:9) Yehauvas yuav siv nws lub Nceeg Vaj los kho tej kev tsis ncaj ncees ntawd.
Nyeem Daniyees 2:44 thiab 2 Thexalaunikes 1:6-8, thiab tham txog ob lo lus no:
Yehauvas thiab nws Leej Tub Yexus yuav ua li cas rau tib neeg tej nom tswv thiab cov uas txhawb lawv?
Raws li tej uas koj tau kawm txog Yehauvas thiab Yexus, koj puas ntseeg tias tej uas nkawd ua yuav ncaj ncees?
5. Yexus yog tus Vaj Ntxwv uas zoo tshaj plaws
Yexus yog tus Vaj Ntxwv kav Vajtswv lub Nceeg Vaj. Nws yuav ua ntau yam los pab nws cov pej xeem hauv ntiaj teb. Saib zaj YEEB YAJ KIAB seb Yexus tau ua dab tsi los qhia tias nws yeej xav pab tib neeg thiab Vajtswv yeej muab hwj chim rau nws ua li ntawd.
Tej uas Yexus ua thaum nws tseem nyob hauv ntiaj teb qhia txog tej uas Vajtswv lub Nceeg Vaj yuav ua. Tej uas Vajtswv lub Nceeg Vaj yuav ua no, yam twg yog yam uas koj tos ntsoov? Nyeem cov nqe Vajlugkub txog tej uas lub Nceeg Vaj yuav ua ntawd.
THAUM NYOB HAUV NTIAJ TEB, YEXUS . . .
NYOB SAUM NTUJ, YEXUS YUAV . . .
tswj tau tej huab cua.—Malakaus 4:36-41.
kho lub ntiaj teb.—Yaxayas 35:1, 2.
ua tau txuj ci pub zaub mov rau qas txhiab leej noj.—Mathais 14:17-21.
tshem kev tshaib kev nqhis mus.—Phau Ntawv Nkauj 72:16.
kho tau cov muaj mob muaj nkeeg coob tus.—Lukas 18:35-43.
saib xyuas kom txhua tus noj qab nyob zoo.—Yaxayas 33:24.
tsa tau cov tuag ciaj sawv rov los.—Lukas 8:49-55.
muab kev ploj kev tuag rhuav tshem.—Tshwmsim 21:3, 4.
6. Lub neej hauv qab Vajtswv txoj kev kav yuav zoo tshaj plaws
Vajtswv lub Nceeg Vaj yuav kho kom txhua yam rov zoo li thaum chiv keeb. Thaum ntawd tib neeg yuav nyob hauv lub vaj kaj siab hauv ntiaj teb no mus ib txhis. Saib zaj YEEB YAJ KIAB seb Yehauvas siv nws Leej Tub Yexus los ua kom muaj tiav raws li Nws lub ntsiab li cas.
Nyeem Phau Ntawv Nkauj 37:4, thiab tham txog lo lus no:
Koj puas zoo siab tias Yehauvas ‘yuav muab rau koj raws li koj lub siab xav yuav’?
IB TXHIA HAIS TIAS: “Yog peb sawv daws sib koom tes ces peb yeej daws tau tej teeb meem hauv ntiaj teb no.”
Tej teeb meem twg uas Vajtswv lub Nceeg Vaj daws tau tiam sis tib neeg tej tseem fwv daws tsis tau?
KOJ KAWM TAU DAB TSI
Vajtswv lub Nceeg Vaj yuav ua kom muaj tiav raws li Vajtswv lub siab nyiam. Lub Nceeg Vaj yuav kho kom lub ntiaj teb ua ib lub vaj kaj siab rau cov neeg zoo uas pe hawm Yehauvas nyob mus ib txhis.
Rov Tham Dua
Vajtswv lub Nceeg Vaj yuav ua li cas kom sawv daws hwm Vajtswv lub npe?
Vim li cas peb thiaj ntseeg tau tias Vajtswv lub Nceeg Vaj yuav ua kom muaj tiav raws li tej lus cog tseg hauv phau Vajlugkub?
Tej uas lub Nceeg Vaj yuav ua, koj tos ntsoov yam twg?
TSHAWB NTXIV
Kawm seb Amankedoos yog dab tsi.
“Ntsuj Rog Amankedoos Yog Ntsuj Rog Twg?” (Nyeem hauv jw.org/hmn)
Kawm seb lub sij hawm “muaj kev txom nyem loj kawg nkaus” uas Yexus qhia txog yuav zoo li cas.—Mathais 24:21
Lub Sij Hawm Muaj Kev Txom Nyem Loj Kawg Nkaus Yuav Zoo Li Cas?” (Nyeem hauv jw.org/hmn)
Xav seb thaum koj tsev neeg nyob hauv lub vaj kaj siab yuav zoo npaum li cas.
Hauv zaj “Kuv Ntxhov Siab Txog Ntau Yam,” nyeem seb ib tug txiv neej uas tawm tsam nom tswv tau ua li cas nws thiaj nrhiav tau tej uas nws xav paub.
“Vajlugkub Kho Tau Lub Neej” (Phau Tsom Faj lub 1 Hlis tim 1 xyoo 2012)
-