ZAJ KAWM 05
Phau Vajlugkub Yog Vajtswv Txoj Xov Rau Peb
Ib yam zoo kawg nkaus uas Yehauvas pub rau peb yog phau Vajlugkub uas muaj 66 phau ntawv me me nyob rau hauv. Tiam sis tej zaum koj yuav xav hais tias: ‘Ua cas thiaj muaj tau phau Vajlugkub? Phau Vajlugkub sau txog leej twg lub tswv yim?’ Yuav kom peb paub txog ob qho no, cia peb mus tham seb Vajtswv ua li cas thiaj muab tau nws txoj xov hauv phau Vajlugkub los rau peb.
1. Yog tias neeg sau phau Vajlugkub, ua cas ho hais tau tias yog Vajtswv Txoj Lus?
Muaj li 40 tus txiv neej uas nyias nyob nyias ib tiam sau phau Vajlugkub. Cov txiv neej no nyias muaj nyias lub neej, tej tug tsuas yog neeg ua liaj ua teb thiab yug yaj xwb, hos tej tug yog vaj ntxwv. Txawm li ntawd los, tag nrho tej uas lawv tau sau rau hauv phau Vajlugkub yeej sau sib dhos thiab ib tug sau tsis cov nyom ib tug. Tau siv li 1,600 xyoo mam sau tiav phau Vajlugkub. Muaj tau li no rau qhov yeej yog Vajtswv Txoj Lus tiag. (Nyeem 1 Thexalaunikes 2:13.) Vim li ntawd, lawv thiaj tsis sau raws li neeg tej tswv yim tiam sis sau raws li lub hwj huam dawb huv tshoov kom lawv sau xwb.a (2 Petus 1:21) Vajtswv siv nws lub hwj huam dawb huv los tshoov cov txiv neej ntawd lub siab kom lawv thiaj paub sau tseg nws tej tswv yim.—2 Timautes 3:16.
2. Phau Vajlugkub pab tau leej twg xwb?
“Tsis hais haivneeg twg, xeem twg, thiab cov neeg uas hais yam lus twg” los txoj xov zoo hauv phau Vajlugkub yeej pab tau lawv huv tib si. (Nyeem Tshwmsim 14:6.) Niaj hnub no, tau muab phau Vajlugkub txhais ntau tshaj lwm phau ntawv. Tsis tas li ntawd, yuav luag txhua txhua tus neeg yeej mus nyeem thiab mloog tau Vajtswv Txoj Lus txawm lawv yuav nyob qhov twg los sis hais yam lus twg.
3. Yehauvas tau ua li cas los tiv thaiv phau Vajlugkub?
Yav thaum ub, luag muab tawv tsiaj los sis tauj deg los hiab ua ntawv sau phau Vajlugkub xwb thiaj tsis kav ntev. Vim li ntawd cov tib neeg uas saib phau Vajlugkub rau nqi, thiaj ua tib zoo xuas tes sau kom thiaj theej tau ntau phau Vajlugkub. Txawm tias cov neeg uas muaj hwj chim xav rhuav tshem phau Vajlugkub los, tseem muaj lwm tus uas zoo siab hlo muab lawv txoj sia los tiv thaiv. Yehauvas yeej tsis cia ib yam dab tsi los txwv tau nws txoj kev sib txuas lus nrog peb. Phau Vajlugkub hais tias: “Peb tus Vajtswv txojlus nyob mus ib txhis.”—Yaxayas 40:8.
KAWM NTXIV
Mus kawm ntxiv txog seb Vajtswv tshoov tib neeg sau phau Vajlugkub li cas, nws ua cas thiaj khaws tau tseg, thiab nws ua cas thiaj muab tau rau noob neej.
4. Phau Vajlugkub qhia tias Vajtswv Txoj Lus yog leej twg lub tswv yim
Saib zaj YEEB YAJ KIAB. Ces nyeem 2 Timautes 3:16, thiab tham txog ob lo lus no.
Yog tib neeg sau phau Vajlugkub, vim li cas ho muab hu ua Vajtswv Txoj Lus?
Koj xav li cas txog qhov uas hais tias Vajtswv yeej muab tau nws tej tswv yim los rau neeg sau cia?
Tus tub sau ntawv yeej yog tus sau tsab ntawv tiag, tiam sis tsab xo yog los ntawm tus uas cev cov lus. Zoo ib yam li ntawd, tib neeg yog tus sau phau Vajlugkub, tiam sis tsab xo yog Vajtswv ua tus cev
5. Txawm tib neeg tawm tsam los, tseem muaj phau Vajlugkub
Yog phau Vajlugkub los ntawm Vajtswv los tiag, ces nws yeej yuav tsis pub dab tsi rhuav tshem tau li. Los tau ntau tiam, cov neeg uas muaj hwj chim yeej xav muab phau Vajlugkub rhuav tshem. Cov thawj coj ntawm tej kev ntseeg tau muab phau Vajlugkub coj mus zais. Txawm tias muaj neeg tawm tsam thiab hem tias lawv yuav raug muab tua los coob tus tseem muab lawv txoj sia los tiv thaiv phau Vajlugkub. Yog xav paub txog ib tug txiv neej uas tau ua li no, saib zaj YEEB YAJ KIAB, thiab tham txog ob lus no.
Tam sim no koj paub tias tib neeg yeem muab lawv txoj sia los tiv thaiv phau Vajlugkub lawm, puas ua rau koj xav nyeem thiab? Vim li cas?
Nyeem Phau Ntawv Nkauj 119:97, thiab tham txog lo lus no:
Muaj dab tsi ua rau coob tus thiaj xav muab phau Vajlugkub coj los txhais thiab tseb tawm txawm tias lawv yuav raug tua los xij?
6. Ib phau ntawv rau txhua tus tib neeg
Phau Vajlugkub yog phau ntawv uas tau muab txhais thiab tseb tawm ntau tshaj plaws hauv keeb kwm. Nyeem Tes Haujlwm 10:34, 35, ces tham txog ob lo lus no:
Vim li cas Vajtswv ho xav kom muab nws Txoj Lus txhais thiab tseb tawm ntau ua luaj?
Koj nyiam dab tsi txog phau Vajlugkub?
Yuav luag
100%
ntawm ib tsoom neeg hauv lub qab ntuj khwb
mus nyeem tau phau Vajlugkub ua yam lus uas lawv to taub
Tau muab txhais tshaj li
3,000
tawm yam lus
tag nrho los sis ua tej ntu
5,000,000,000
Tau kwv yees tias tau muab phau Vajlugkub luam tawm ntau npaum li no,
ntau tshaj lwm phau ntawv
IB TXHIA HAIS TIAS: “Phau Vajlugkub tsuas yog ib phau ntawv qub qub uas tib neeg tau sau los lawm xwb.”
Koj xav li cas?
Puas muaj pov thawj qhov twg qhia tias phau Vajlugkub yog Vajtswv Txoj Lus tiag?
KOJ KAWM TAU DAB TSI
Vajtswv ua tib zoo saib xyuas nws Txoj Lus hauv Phau Vajlugkub kom tsis txhob puas tsuaj es txhua tus thiaj tau nyeem.
Rov Tham Dua
Thaum peb hais tias Vajtswv tshoov neeg sau phau Vajlugkub yog txhais li cas?
Koj xav li cas txog qhov uas tsis muaj dab tsi rhuav tau phau Vajlugkub, tau muab txhais ua ntau yam lus thiab tau muab tseb mus thoob qab ntuj?
Koj xav li cas xwb thaum koj paub tias Vajtswv yeej tsis cia ib yam dab tsi rhuav tau nws txoj kev sib txuas lus nrog koj li?
TSHAWB NTXIV
Mus nyeem tej keeb kwm txog phau Vajlugkub.
“Ua Li Cas Peb Thiaj Tau Phau Vajlugkub” (Tsim Dheev! lub 11 Hlis xyoo 2007)
Mus kawm seb tau muaj peb yam twg los rhuav tshem tsis tau phau Vajlugkub.
“Phau Vajlugkub—Tsis Muaj Dab Tsi Rhuav Tau” (Phau Tsom Faj Phau 4 Xyoo 2016)
Mus saib seb tib neeg tau ua li cas kom thiaj txhais tau phau Vajlugkub.
Phau Vajlugkub tau muab theej tawm thiab muab txhais ntau zaus. Ua li cas koj thiaj paub tias Vajtswv txoj xov hauv phau Vajlugkub tseem yog tib txoj qub?
“Puas Tau Muab Phau Vajlugkub Hloov Los Sis Txhab Lus Ntxiv Rau?” (Nyeem hauv jw.org/hmn)
a Zaj Kawm 07 yuav piav ntxiv tias lub hwj huam dawb huv yog Vajtswv lub hwj chim.