Ua Neeg Ncaj Ncees Rau Txhua Yam

Peb txhua leej txhua tus yeej xav muaj cov phooj ywg uas ncaj ncees thiab tsis dag peb. Yehauvas los xav kom nws cov phooj ywg ua ncaj ncees rau nws thiab. Tiam sis yeej tsis yooj yim, vim lub ntiaj teb no muaj cov neeg dag coob heev. Yog peb ua neeg ncaj ncees, yuav pab tau peb li cas?

1. Vim li cas peb thiaj yuav tsum ua neeg ncaj ncees?

Yog peb hlub Yehauvas thiab hwm nws ces peb yuav ua neeg ncaj ncees thiab tsis dag. Muab xav li no, Yehauvas paub ib puas tsav yam uas peb xav thiab peb ua. (Henplais 4:13) Yog li ntawd, thaum peb ua neeg ncaj ncees thiab tsis dag, Yehauvas yeej pom thiab ua rau nws zoo siab heev. Phau Vajlugkub hais tias: ‘Yehauvas ntxub tej neeg uas ua phem ua qias, tiam sis nws txaus siab rau cov neeg ncaj ncees.’​—Pajlug 3:32.

2. Peb yuav ua neeg ncaj ncees li cas?

Yehauvas xav kom peb ‘ib leeg hais lus tseeb rau ib leeg.’ (Xakhaliyas 8:16, 17) Yog li ntawd, txawm peb nrog peb tsev neeg, nrog cov neeg peb ua hauj lwm nrog, nrog peb cov kwv tij nkauj muam, los sis nrog tej nom tswv tham los peb yuav tsum tsis txhob dag lawv. Peb kuj tsis nyiag los sis dag ntxias luag lwm leej lwm tus. (Nyeem Pajlug 24:28 thiab Efexus 4:28.) Thiab nom tswv kom peb them se li cas los peb yeej zoo siab them tag nrho. (Loos 13:5-7) Txawm peb ua dab tsi los xij, peb yeej rau siab ua neeg ncaj ncees txhua lub sij hawm.​—Titus 2:10.

3. Yog peb ua neeg ncaj ncees, yuav pab tau peb li cas?

Thaum luag paub hais tias peb yog neeg ncaj ncees ces luag yuav tso siab rau peb thiab ntseeg peb siab. Hauv lub koom txoos los peb ib leeg yuav tso siab tau rau ib leeg ib yam li peb yog ib tse neeg. Peb los kuj yuav muaj kev zoo siab vim peb paub tias peb ua haum Yehauvas siab. Yog peb ua neeg ncaj ncees ces tib neeg ‘yuav saib taus Vajtswv tej lus qhia.’ Thiab yuav ua rau lawv xav los paub Vajtswv Yehauvas thiab teev tiam nws.​—Titus 2:10.

KAWM NTXIV

4. Cov neeg ncaj ncees ua rau Yehauvas zoo siab

Nyeem Phau Ntawv Nkauj 44:21 thiab Malakis 3:16 ces tham txog ob lo lus no:

• Vim li cas peb yuav tsum tsis txhob xav hais tias txawm peb dag los yeej tsis muaj leej twg paub?

• Xav seb Yehauvas yuav xav li cas, txawm hais tias thaum tsis yooj yim los koj yeej qhia qhov tseeb thiab koj yeej tsis dag.

5. Ua neeg ncaj ncees txhua lub sij hawm

YEEB YAJ KIAB: Dab Tsi Ua Rau Peb Zoo Siab?​—Lub Neej Ncaj Ncees (2:32)

Nyeem Henplais 13:18 thiab tham seb yuav ua li cas peb thiaj ua tau neeg ncaj ncees . . .

• thaum peb nrog peb tsev neeg.

• thaum peb mus hauj lwm los sis mus kawm ntawv.

• thaum peb ua lwm yam.

6. Ua neeg ncaj ncees yuav pab tau peb

Muaj tej thaud, zoo li yog peb qhia qhov tseeb ces peb yuav raug teeb meem, txawm li ntawd los yeej zoo dua rau peb qhia qhov tseeb. Nyeem Phau Ntawv Nkauj 34:12-16 thiab tham txog lo lus no:

• Vim li cas ua neeg ncaj ncees thiaj zoo dua rau peb?

1. Ob niam txiv lub neej yuav ruaj ntseg yog nkawd ib leeg ua ncaj ncees rau ib leeg

2. Tus los pav yuav tso siab tau rau nws cov neeg ua hauj lwm uas tsis dag

3. Tej nom tswv saib taus laj mej pej xeem uas coj ncaj thiab tsis dag

KOJ KAWM TAU DAB TSI

Yog peb xav ua Yehauvas tus phooj ywg, peb yuav tsum ua neeg ncaj ncees thiab tsis txhob dag.

Rov Tham Dua

• Peb yuav ua neeg ncaj ncees li cas?

• Vim li cas peb yuav tsum tsis txhob xav tias txawm peb dag los yeej yuav tsis muaj leej twg paub?

• Vim li cas peb thiaj yuav tsum ua neeg ncaj ncees txhua lub sij hawm?

TSHAWB NTXIV

Cov niam thiab txiv yuav cob qhia lawv cov me nyuam kom ua neeg ncaj ncees li cas?

Hais Lus Tseeb (1:44)

Vim li cas thiaj zoo rau peb ua li peb twb cog lus tseg rau lwm tus lawm?

Yog Peb Ua Li Peb Cog Tseg, Yehauvas Yuav Foom Koob Hmoov (9:09)

Yog lawv tsis txawj siv cov nyiaj se, peb tsis them puas tau?

“Puas Yog Peb Yuav Tsum Tau Them Se?” (Phau Tsom Faj lub 9 Hlis tim 1 xyoo 2011)

Ua li cas ib tug neeg tsis ncaj ncees thiaj hloov tau nws lub neej?

“Yehauvas Khuv Leej Thiab Zam Txim” (Phau Tsom Faj lub 5 Hlis tim 1 xyoo 2015)