Xaiv Tej Kev Lom Zem Uas Haum Yehauvas Siab

Yehauvas yog tus Vajtswv uas muaj kev zoo siab. Nws xav kom peb ua neej kaj siab lug thiab muaj kev zoo siab. Yog li, nws yuav zoo siab thaum nws pom peb siv sij hawm los so thiab muaj kev lom zem. Hauv zaj no, peb yuav tham seb peb yuav siv lub sij hawm uas peb los so li cas, peb thiaj muaj kev zoo siab thiab ua tau rau Yehauvas zoo siab.

1. Peb yuav tau nco ntsoov li cas thaum peb xaiv peb tej kev lom zem?

Thaum koj los so, koj nyiam ua dab tsi xwb? Muaj ib txhia nyiam nyob ib leeg hauv tsev. Muaj ib txhia nyiam nyeem ntawv, mloog nkauj, saib yeeb yaj kiab, los sis saib ub saib no saum huab saum cua. Hos ib txhia nyiam mus taug kev, mus ua luam dej, los sis ua ub ua no nrog lawv cov phooj ywg. Txawm peb yuav ua dab tsi los xij, peb yuav tsum nco ntsoov ua tej uas “haum Vajtswv siab” xwb. (Efexus 5:10) Tseem ceeb heev rau peb tham txog tej no vim niaj hnub no muaj ntau yam kev lom zem uas Yehauvas ntxub, xws li kev sib ntaus sib tua, ua nruj ua tsiv, ua plees ua yi, sib daj sib dee, los sis tej kev teev dab. (Nyeem Phau Ntawv Nkauj 11:5.) Puas muaj dab tsi pab kom peb txawj xaiv tej kev lom zem uas zoo?

Yog peb ua phooj ywg nrog cov uas hlub Yehauvas ces lawv yuav pab tau peb ntau yam thiab lawv yuav pab kom peb txawj xaiv tej kev lom zem uas zoo. Ib yam li peb twb kawm hauv Zaj Kawm 48 lawm, tus uas “nrog cov neeg txawj ntse ua ke,” tus ntawd “yuav txawj ntse.” Tiam sis yog peb pheej mus nrog cov uas tsis nyiam Vajtswv Yehauvas tej kev cai ces peb ‘yuav raug kev puas tsuaj.’​—Pajlug 13:20.

2. Vim li cas thiaj tseem ceeb rau peb ua kev lom zem kom muaj caij muaj nyoog?

Txawm yog peb ua tej kev lom zem uas zoo xwb los peb yuav tsum tau ceev faj tsis txhob muab ua ntau dhau lawm. Tsis li ntawd ces peb yuav tsis muaj sij hawm mus ua tej uas tseem ceeb dua. Phau Vajlugkub thiaj qhia kom peb ‘yuav tsum siv txhua lub sij hawm kom muaj nqis.’​—Nyeem Efexus 5:15, 16.

KAWM NTXIV

Kawm kom koj txawj xaiv tej kev lom zem uas zoo xwb.

3. Tsis txhob ua tej kev lom zem phem

Vim li cas peb yuav tau ua zoo xaiv peb tej kev lom zem? Saib zaj YEEB YAJ KIAB thiab tham txog ob lo lus no:

YEEB YAJ KIAB: Kuv Yuav Xaiv Tej Kev Lom Zem Twg? (4:39)

• Thaum ub, cov neeg Loos nyiam saib tib neeg sib ntaus sib tua ua kev lom zem. Muaj ib co kev lom zem nim no zoo ib yam li cov neeg Loos thaum ub tej kev lom zem li cas?

• Hauv zaj yeeb yaj kiab no, Ntaj kawm tau li cas txog kev lom zem?

Nyeem Loos 12:9 thiab tham txog lo lus no:

• Nqe Vajlugkub no pab tau koj li cas thaum koj xaiv koj tej kev lom zem?

Tej uas Yehauvas ntxub yog dab tsi? Nyeem Pajlug 6:16-19 thiab Kalatias 5:19-21. Thaum nyeem ib nqe tag ces tham txog lo lus no:

• Tej uas hais hauv cov nqe Vajlugkub no, yam twg zoo li tej kev lom zem uas peb pom niaj hnub nim no?

Txawj xaiv tej kev lom zem uas zoo

Ua zoo xav txog cov lus nug no:

• Qhov no puas muaj tej yam uas Yehauvas ntxub txuam nyob rau hauv?

• Qhov no puas ua kom kuv tsis muaj sij hawm mus ua tej uas tseem ceeb dua?

• Qhov no puas ua rau kuv pheej mus poo nrog cov neeg uas tsis hlub Yehauvas?

Zoo dua rau peb txav kom deb li deb tau ntawm tej kev phom sij. Twb yog vim li ntawd, peb thiaj yuav tsum txav kom deb ntawm tej kev lom zem uas peb xav hais tias tej zaum yuav tsis zoo rau peb

4. Siv koj lub sij hawm kom muaj nqis

YEEB YAJ KIAB: Dab Tsi Noj Koj Lub Sij Hawm Tag Lawm? (2:45)

• Txawm tus kwv tij hauv zaj yeeb yaj kiab no tsis saib dab tsi phem los, nws siv nws lub sij hawm los ua dab tsi xwb?

Nyeem Filipis 1:10 thiab tham txog lo lus no:

• Nqe Vajlugkub no pab kom peb paub ntsuas peb lub sij hawm li cas thaum peb ua kev lom zem?

5. Xaiv tej kev lom zem uas dawb huv

Txawm hais tias muaj ib txhia kev lom zem Yehauvas tsis nyiam los, yeej tseem muaj ntau yam uas lom zem kawg rau peb ua. Nyeem Tej Lus Qhia 8:15 thiab Filipis 4:8 ces tham txog lo lus no:

• Tej kev lom zem zoo uas koj nyiam yog dab tsi?

KOJ KAWM TAU DAB TSI

Yehauvas xav kom peb muaj kev zoo siab thiab ua zoo xaiv peb tej kev lom zem.

Rov Tham Dua

• Cov Khixatias yuav tsum tsis txhob ua tej kev lom zem twg?

• Vim li cas peb yuav tau ceev faj tsis txhob siv sij hawm mus ua kev lom zem ntau dhau?

• Vim li cas koj thiaj xav ua tej kev lom zem uas haum Yehauvas siab xwb?

TSHAWB NTXIV

Nyeem seb yog leej twg lub luag hauj lwm xaiv kev lom zem rau peb.

“Yehauvas Cov Tim Khawv Puas Txwv Tej Phau Ntawv, Yeeb Yaj Kiab, Los Sis Nkauj?” (Nyeem hauv jw.org/hmn)

Xyuas seb koj yuav ua li cas koj thiaj paub xaiv tej kev lom zem uas zoo.

“Koj Tej Kev Lom Zem Puas Zoo Rau Koj?” (Phau Tsom Faj lub 10 Hli tim 15 xyoo 2011)

Mus nyeem zaj “Kuv Tsis Muaj Kev Ntxub Ntxaug Lawm,” seb ua li cas ib tug txiv neej thiaj li hloov tau tej kev lom zem nws ib txwm ua.

“Vajlugkub Kho Tau Lub Neej” (Phau Tsom Faj lub 2 Hlis tim 1 xyoo 2010)

Saib seb ib leej niam ua li cas thaum nws pom zaj yeeb yaj kiab uas ua txog dab hauv TV.

Txav Kom Deb Ntawm Tej Kev Lom Zem Uas Ua Txog Dab (2:02)