LUS NUG THIAB LUS TEB TXOG PHAU VAJLUGKUB

Yav tom hauv ntej noob neej yuav zoo li cas?

Niaj hnub no tibneeg kawm txuj kawm ci ntau yam. Tiamsis neeg puas yuav muaj tswvyim txaus los pab kom lub qab ntuj no txawj sib hlub? Tsis muaj. Lub qab ntuj tsuas txhawb kom tibneeg xam pom lawv tus kheej thiab siab hlob xwb. Tiamsis Vajtswv lub ntsiab yog kom neeg tau lub neej zoo.​—Nyeem 2 Petus 3:13.

Vajtswv Txojlus qhia tias muaj ib hnub twg, cov tibneeg hauv lub qab ntuj no yuav txawj sib hlub. Lawv muaj kev thaj yeeb nyab xeeb tsis txhawj tsis ntshai tsam lwm tus tuaj ua phem rau lawv.​—Nyeem Mikha 4:3, 4.

Thaum twg tibneeg mam li xam pom lwm tus?

Chiv keeb thaum ub Vajtswv tsim kom neeg txawj sib hlub thiab xam pom lwm tus. Tiamsis thawj nkawm niam txiv tsis mloog Vajtswv lus nkawd thiaj poob kev txhaum lawm. Twb yog vim nkawd tsis mloog lus es niaj hnub no peb sawvdaws thiaj tsis txawj sib hlub, ib leeg thiaj tsis xam pom ib leeg. Tiamsis yav tom hauv ntej Vajtswv yuav cia Yexus los kho kom tibneeg rov txawj sib hlub sib pab.​—Nyeem Loos 7:21, 24, 25.

Yexus ua txhua yam raws li Vajtswv lub siab nyiam. Nws los tuag theej neeg lub txhoj xwv thiaj daws tau tej kev nyuaj siab uas thawj tug txivneej tau tsim muaj. (Loos 5:19) Yexus qheb kev rau peb sawvdaws tau lub neej zoo kawg nkaus rau yav tom hauv ntej. Thaum ntawd tibneeg yuav tsis ua siab hlob xam pom lawv tus kheej li nimno lawm.​—Nyeem Ntawv Nkauj 37:9-11.