Coob Tus Yuav Dim Hnub Kawg​—Koj Kuj Dim Tau Thiab

Phau Vajlugkub qhia peb tias thaum txog hnub kawg yuav muaj kev puam tsuaj: “Yuav muaj kev ceeblaj txom nyem loj kawg li, txij thaum tsim ntuj tsim teb los txog niaj hnub nimno tsis tau muaj dua li ntawd . . . Yog tsis muab lub caij lub nyoog ntawd txiav kom luv, yuav tsis muaj neeg dim tau li.” (Mathai 24:21, 22) Tiamsis Vajtswv cog lus rau peb tias yuav muaj coob tus dim hnub ntawd. Nws cog lus li no: “Lub ntiajteb . . . yuav dua mus, tiamsis tus uas ua raws li Vajtswv lub siab nyiam yuav nyob mus ib txhis.”​—1 Yauhas 2:17.

Yog koj xav dim hnub uas lub ntiajteb no dua mus thiab xav “nyob mus ib txhis,” koj yuav tau ua li cas? Puas yog koj yuav tau npaj khoom ub khoom no ntau ntau cia? Tsis yog. Muaj ib yam tseem ceeb tshaj uas phau Vajlugkub txhawb kom peb ua. Phau Vajlugkub txhawb peb li no: “Vim txhua yam yuav puam tsuaj tag li uas hais tag no tsim nyog nej yuav ua neeg zoo li cas? Nej yuav tsum ua lub neej dawb huv thiab hwm Vajtswv, thiab nej yuav tsum zov tos . . . kom Vajtswv hnub los txog.” (2 Petus 3:10-12) Nqe Vajlugkub no qhia tias “txhua yam” uas yuav puam tsuaj tag yog lub ntiajteb no tej kev nom kev tswv thiab txhua tus uas xaiv tuaj cov nom tswv ntawd tog es tsis yeem tuaj Vajtswv tog. Muaj tseeb, yog peb npaj khoom ub khoom no ntau ntau xwb, tej no yuav cawm tsis tau peb dim thaum muaj txojkev puam tsuaj no.

Qhov tseeb tiag, yuav kom peb dim, peb yuav tau muab siab npuab Vajtswv Yehauvas thiab yuav tau kawm seb peb yuav tsum coj lub neej li cas thiaj haum nws siab. (Xefaniya 2:3) Tsis zoo rau peb coj li feem coob niaj hnub no es tsis quav ntsej txog tej cim uas qhia tias peb twb nyob rau ib lub caij nyoog uas tshwj xeeb heev lawm. Tiamsis peb “yuav tsum zov tos . . . kom Vajtswv hnub los txog.” Yehauvas Cov Timkhawv siv tau phau Vajlugkub los qhia koj seb koj yuav tau ua li cas koj thiaj dim hnub uas yuav los ntawd.