“Nyob Ruaj Hauv Txojkev Ntseeg”

1. (1) Thaum lawv hla hiavtxwv Kalilais, Petus ua dabtsi? (Saib daim duab ntawm sab no.) (2) Ua cas Petus thiaj tog hauv dej?

MUAJ ib hmos Yexus cov thwjtim tabtom nquam nkoj hla hiavtxwv Kalilais. Lub sijhawm ntawd muaj cua daj cua dub hlob heev. Lawv ntsia pom Yexus mus kotaw saum nplaim dej. Petus thiaj hu Yexus thiab thov kom Yexus cia nws mus tau saum nplaim dej thiab. Yexus hais kom Petus cia li mus. Petus nqes hauv nkoj mus kotaw saum nplaim dej, tiamsis tib pliag xwb Petus txawm pib tog. Vim li cas? Twb yog Petus pom huab tsaus nti thiab cua nplawm dej ntas tuaj rau nws, nws thiaj poob siab nthav. Petus qw nrov nrov kom Yexus pab nws. Tamsim ntawd Yexus cev loo tes ntsiab nkaus Petus thiab hais tias: “Tus uas kev ntseeg yauʹe, ua cas koj tsis ruaj siab?”​—Mathai 14:24-32.

2. Peb yuav kawm txog dabtsi?

² Petus tus qauv pab kom peb to taub ntxiv txog kev ntseeg. Cia peb kawm txog 3 yam no: (1) Petus tso siab li cas rau Yehauvas txojkev pab? (2) Ua cas Petus txojkev ntseeg ho yau lawm? Thiab (3) ua cas Petus ho rov qab muaj kev ntseeg? Cov ntsiab lus no yuav pab peb “nyob ruaj hauv txojkev ntseeg.”​—1 Khaulee 16:13.

TSO SIAB PLHUAV TIAS VAJTSWV YUAV PAB PEB

3. (1) Vim li cas Petus ho tawm hauv lub nkoj mus? (2) Peb twb xyaum Petus tus qauv li cas lawm?

³ Petus muaj kev ntseeg heev. Ua cas peb thiaj paub li ntawd? Thaum Yexus hais kom Petus nqes nkoj mus, Petus ua raws nkaus li Yexus hais. Petus yeej tso siab plhuav tias Vajtswv yuav pub nws mus kotaw saum nplaim dej li Yexus. Thaum Yexus hu peb los ua nws ib tug thwjtim, peb kuj xyaum raws li Petus thiab. Peb thiaj muab peb tus kheej cob rau Yehauvas thiab ua kevcai raus dej. Vim li cas? Vim peb muaj kev ntseeg rau Yehauvas thiab Yexus, thiab tso siab plhuav tias nkawd yuav pab peb tiag.​—Yauhas 14:1; nyeem 1 Petus 2:21.

4, 5. Vim li cas tseem ceeb rau peb muaj kev ntseeg?

⁴ Kev ntseeg tseem ceeb heev. Tibneeg yeej tsis muaj cuab kav mus kotaw saum nplaim dej, tiamsis Petus ua tau li ntawd vim nws muaj kev ntseeg. Kev ntseeg pab kom peb ua tau tej yam uas tibneeg tsis muaj cuab kav ua tau. (Mathai 21:21, 22) Peb ib txhia hloov ntau yam hauv peb lub neej. Peb tso ntau yam tsis zoo tseg thiab xyaum coj tus cwj pwm zoo, ua rau peb tej phoojywg nruab ze xav tsis thoob li. Twb yog peb hlub Yehauvas, thiab Yehauvas pab peb, peb thiaj hloov tau xwb. (Nyeem Khaulauxi 3:5-10.) Vim peb muaj kev ntseeg peb thiaj muab peb tus kheej cob rau Yehauvas thiab los nrog nws ntaus phoojywg. Yog tsis muaj Yehauvas pab peb ces peb yeej ua tsis tau li ntawd ib zaug li.​—Efexau 2:8.

⁵ Kev ntseeg yuav txhawb kom peb muaj zog. Peb tus yeeb ncuab uas yog Ntxwg Nyoog muaj zog heev. Tiamsis kev ntseeg yuav pab peb tawm tsam yeej nws. (Efexau 6:16) Thaum peb muaj teeb meem peb tsis txhawj npaum li yav tas los, rau qhov peb tso siab plhuav rau Yehauvas. Vajtswv twb cog lus lawm tias yog peb muaj kev ntseeg rau nws, thiab muab lub Nceeg Vaj tso ua ntej hauv peb lub neej, ces nws yuav tsis pub peb tu ncua ib yam dabtsi. (Mathai 6:30-34) Thiab yog peb tuav rawv txojkev ntseeg ces Yehauvas yuav pub txojsia ib txhis tsis kawg rau peb.​—Yauhas 3:16.

VIM LI CAS KEV NTSEEG YAU LAWM

6, 7. (1) Niaj hnub no dabtsi zoo li tej cua daj cua dub? (2) Vim li cas peb yuav tsum ceev faj, tuav rawv peb txojkev ntseeg?

⁶ Thaum Petus mus kotaw saum nplaim dej, nws ntshai heev. Yog vim li cas? Vim nws pom cua hlob heev thiab dej ntas tuaj rau ntawm nws. Tej cua daj cua dub ntawd zoo ib yam li tej kev nyuaj siab uas raug cov Khixatia niaj hnub no. Txawm peb yuav raug kev nyuaj siab loj npaum li cas los Yehauvas txheem peb sawv ruaj nreeg. Koj puas nco qab vim li cas Petus thiaj tog hauv dej? Tsis yog dej ntas tuaj kuav nws, tiamsis phau Vajlugkub hais tias: “Thaum nws pom cua ntsawj nws txawm ntshai.” (Mathai 14:30) Twb yog vim li ntawd nws txojkev ntseeg thiaj yau lawm. Yog Petus ntsia ntsoov Yexus ces nws twb tsis poob siab li ntawd. Yog peb xav ntsoov txog peb tej kev nyuaj siab xwb, ces peb yuav poob siab thiab. Tej zaum peb yuav txhawj tsam Yehauvas tsis pab peb tiag.

⁷ Tus qauv no qhia rau peb tias yog peb tsis ceev faj ces peb txojkev ntseeg yuav txawj yau. Phau Vajlugkub thiaj qhia tias “lub txim uas yoojyim khi tau peb” yog qhov uas peb tsis muaj kev ntseeg. (Henplais 12:1) Ib yam li Petus, yog peb pheej xav txog tej teeb meem uas los raug peb xwb, ces yuav txo tau peb txojkev ntseeg. Peb yuav ntsuas peb txojkev ntseeg li cas? Cov lus nug nram no yuav pab tau peb.

8. Yog peb tsis ceev faj, peb yuav xav li cas txog Vajtswv tej lus cog tseg?

⁸ Kuv puas tso siab rau Vajtswv tej lus cog tseg ib yam li thaum chiv thawj? Muab xav li no, Vajtswv cog lus tias nws yuav muab Xatas lub qab ntuj rhuav tshem. Tiamsis lub qab ntuj no muaj ntau yam kev lomzem. Yog peb lam cia tej kev lomzem ntawd tab kaum peb, ces yuav ua rau peb xav tias tshuav ntev heev hnub kawg mam li los. (Hanpaku 2:3) Xav txog ib lo lus cog tseg ntxiv. Yehauvas cog lus tias nws yuav zam txim rau peb tej kev txhaum, rau qhov Yexus twb tuag txhiv peb lawm. Tiamsis yog peb pheej nyuaj siab tas zog rau tej kev txhaum uas peb ua yav tas los, tej zaum peb yuav xav tias Yehauvas tsis zam txim rau peb tiag, ces yuav ua rau peb qaug zog. (Tubtxib Tes Haujlwm 3:19) Thaum kawg, peb yuav tsis muaj siab ua Vajtswv tes haujlwm thiab tsis muaj siab mus tshaj tawm txoj xov zoo ntxiv lawm.

9. Yog peb pib xav txog peb tus kheej thiab tej uas peb ntshaw xwb, yuav zoo li cas?

⁹ Kuv puas ua Vajtswv tes haujlwm kawg kuv lub dag lub zog li yav tas los? Thaum peb kub siab lug ua Yehauvas tes haujlwm ces peb yuav xav ntsoov txog nws tej lus cog tseg rau yav pem suab. Tiamsis yog peb pib xav txog peb tus kheej thiab tej uas peb ntshaw xwb, yuav zoo li cas? Tej zaum peb yuav mus ua ib txoj haujlwm uas them nyiaj ntau heev, tiamsis tsis muaj sijhawm teev tiam Yehauvas li qub. Qhov ntawd yuav txo tau peb txojkev ntseeg. Tej zaum peb yuav “ua neeg tub nkeeg,” tsis kub siab ua Yehauvas tes num kawg peb lub dag lub zog lawm.​—Henplais 6:10-12.

10. Yog peb muaj kev ntseeg peb yuav coj li cas nrog lwm tus?

¹⁰ Puas nyuaj rau kuv zam txim rau luag lwm tus? Thaum lwm tus ua rau peb tu siab peb coj li cas xwb? Yog peb muab khaws chim, tsis kam nrog lawv tham li lawm ces qhia tias peb xav txog peb tus kheej xwb. Tiamsis yog peb zam lawv lub txim ces qhia tias peb tso siab rau Yehauvas. Tso siab li cas? Nco ntsoov tias thaum ib tug ua txhaum peb, nws tshuav peb nqe; ib yam li thaum peb ua txhaum rau Vajtswv, peb tshuav Nws nqe. (Luka 11:4) Tiamsis yog peb zam txim rau tus ntawd ces zoo ib yam li peb zam nws tej nuj nqes lawm. Peb tso siab plhuav tias Yehauvas mam li foom koob hmoov rau peb vim peb twb zam nws lub txim lawm. Peb xum cia Yehauvas txaus siab rau peb, puas yog? Thaum Yexus qhia kom nws cov thwjtim zam txim rau lwm tus, lawv paub tias lawv yuav tsum muaj kev ntseeg rau Vajtswv lawv thiaj ua tau li ntawd. Cov thwjtim thiaj thov li no: “Thov koj tsav kev ntseeg rau peb ntau zuj zus.”​—Luka 17:1-5.

11. Vim li cas tsis yoojyim rau peb mloog thaum lwm tus ntuas peb?

¹¹ Kuv puas tu siab thaum lwm tus ntuas kuv? Thaum lwm tus ntuas peb, yoojyim heev rau peb yws tias nws kuj yog neeg txhaum ib yam, lossis tej uas nws hais tsis yog lawm. Tiamsis zoo rau peb mloog tso. (Paj Lug 19:20) Peb yuav tsum nco ntsoov tias thaum cov kwvtij ntuas peb, twb yog Yehauvas pab kom peb muaj nws lub tswvyim xwb.

12. Vim li cas ib txhia pheej yws txog cov uas saib xyuas lub koom txoos?

¹² Kuv puas yws cov uas saib xyuas lub koom txoos? Thaum cov Yixayee tseem nyob tebchaws moj sab qhua, 10 tus neeg tshuaj tebchaws xa xov tsis zoo txog tebchaws Khana-as. Cov Yixayee mloog tej xov phem ntawd, lawv thiaj pib yws Mauxe thiab Aloo nkawd. Yehauvas thiaj nug Mauxe tias: “Cov neeg no yuav saib tsis taus kuv ntev li cas?” (Xwm Txheej Taug Kev 14:2-4, 11) Yehauvas paub tias twb yog cov Yixayee tsis tso siab rau nws, lawv thiaj yws cov uas nws tsa los coj lawv. Niaj hnub no, yog peb pheej yws cov uas Yehauvas tsa los coj nws haiv neeg, ces twb yog peb txojkev ntseeg yau lawm thiab.

13. Yog peb txojkev ntseeg yau lawd, peb yuav tsum nco ntsoov li cas?

¹³ Yog koj pom tias koj txojkev ntseeg yau lawm, tsis txhob tu siab. Tsis yog koj xwb. Nco ntsoov tias tus tubtxib Petus txojkev ntseeg kuj yau thiab. Tsis tas li ntawd xwb, muaj ib zaug Yexus muab tag nrho nws cov tubtxib hu ua “cov uas kev ntseeg yau’e.” (Mathai 16:8) Txawm li ntawd los, Petus tus qauv pab tau peb heev. Cia peb kawm ntxiv seb nws ua li cas tom qab nws pib tog rau hauv dej.

NTSIA NTSOOV YEXUS THIAJ TXHAWB TAU KOJ TXOJKEV NTSEEG

14, 15. (1) Thaum Petus pib tog lawd, nws ua li cas xwb? (2) Peb yuav “ntsia ntsoov” Yexus li cas?

¹⁴ Thaum Petus pib tog lawd, nws ua li cas xwb? Petus yeej txawj ua luam dej rov mus rau ntawm lub nkoj. (Yauhas 21:7) Tiamsis Petus tsis ua li ntawd. Vim li cas? Vim nws tso siab rau Yexus, nws thiaj tig rov los ntsia Yexus thiab tuav nkaus Yexus txhais tes. Yog peb txojkev ntseeg yau lawd, peb yuav tsum xyaum Petus tus qauv thiab. Peb yuav xyaum Petus li cas?

¹⁵ Peb yuav tsum “ntsia ntsoov” Yexus thiab. (Nyeem Henplais 12:2, 3.) Tiamsis peb qhov muag tsis pom Yexus, peb yuav “ntsia” nws li cas? Peb yuav tsum kawm txog Yexus tej lus qhuab qhia thiab xyaum raws li nws tus qauv. Yog peb ua li ntawd, yuav tsav kev ntseeg rau peb. Cia peb kawm ntxiv seb peb yuav xyaum Yexus tus qauv li cas.

16. Peb yuav tshawb nrhiav phau Vajlugkub li cas, thiaj txhawb tau peb txojkev ntseeg?

¹⁶ Xyaum tso siab rau phau Vajlugkub. Yexus ntseeg tias yeej tsis muaj lus qhuab ntuas zoo npaum li Vajtswv Txojlus. (Yauhas 17:17) Yog peb xav xyaum Yexus ces peb yuav tsum nyeem phau Vajlugkub txhua hnub. Peb yuav tau kawm phau Vajlugkub thiab ua tib zoo xav txog tej ntsiab lus ntawd. Peb yuav tsum tshawb nrhiav seb phau Vajlugkub teb tau peb cov lus nug li cas. Xav txog cov lus nug no: Peb puas ntseeg ruaj nreeg tias peb nyob rau tiam kawg lawd? Peb yuav tsum tshawb nrhiav tej lus faj lem uas qhia tias peb nyob rau tiam kawg lawm, peb thiaj muaj kev ntseeg. Peb puas tso siab rau Vajtswv tej lus cog tseg tiag? Peb yuav tsum tshawb nrhiav tej lus faj lem uas twb muaj tiav lawd, peb thiaj tso tau siab. Peb puas ntseeg tias niaj hnub no phau Vajlugkub pab tau peb tiag tiag? Peb yuav tsum nyeem seb phau Vajlugkub twb pab peb cov kwvtij nkauj muam hloov lawv lub neej li cas lawm.a (Saib cov lus hauv qab taw qhia.)​—1 Thexalaunika 2:13.

17. (1) Vim li cas Yexus thiaj thev dhau tej kev tsim txom hnyav ua luaj? (2) Peb yuav xyaum Yexus li cas?

¹⁷ Xav ntsoov txog tej koob hmoov uas Yehauvas twb cog tseg rau koj lawm. Yexus xav ntsoov txog tej koob hmoov rau yav tom hauv ntej xwb, nws thiaj thev dhau txojkev tsim txom uas hnyav kawg nkaus. (Henplais 12:2) Nws tsis pub tej yam hauv lub qab ntuj no tab kaum nws. (Mathai 4:8-10) Peb yuav xyaum Yexus tus qauv li cas? Peb yuav tsum ua tib zoo xav txog Yehauvas tej lus cog tseg. Xav seb thaum peb nyob hauv lub qab ntuj tshiab yuav zoo npaum li cas. Siv sijhawm los kos ib daim duab seb koj yuav ua dabtsi hauv lub Vaj Kaj Siab. Lossis sau seb thaum txog hnub ntawd koj yuav ua dabtsi xwb. Hauv lub Vaj Kaj Siab coob leej ntau tus yuav sawv hauv qhov tuag rov qab los. Koj xav ntsib leejtwg? Koj yuav hais li cas rau lawv? Muab tej ntawd sau cia tibsi. Nco ntsoov tias Vajtswv tej lus cog tseg tsis yog hais rau leejtwg, tiamsis hais rau koj ntag.

18. Thaum peb thov Vajtswv txhawb tau peb txojkev ntseeg li cas?

¹⁸ Thov kom Vajtswv tsav kev ntseeg rau peb. Yexus qhia tias nws cov thwjtim yuav tsum thov kom Yehauvas pub nws lub hwj huam dawb huv rau lawv. (Luka 11:9, 13) Peb yuav tsum thov li ntawd thiab, puas yog? Lub hwj huam dawb huv pab kom peb muaj kev ntseeg. Yog li ntawd, kuj zoo rau peb thov kom nws tsav kev ntseeg ntxiv rau peb. Cia li qhia meej rau Yehauvas tias peb xav tau kev pab li cas. Yog nyuaj heev rau peb zam txim rau lwm tus, ces thov kom Yehauvas tsav kev ntseeg ntxiv rau peb, peb thiaj zam tau.

19. Peb yuav ntaus phoojywg nrog cov neeg zoo li cas?

¹⁹ Ntaus phoojywg nrog cov uas muaj kev ntseeg ruaj nreeg. Yexus ua tib zoo xaiv nws cov phoojywg. Cov uas nws ncawg tshaj yog nws cov tubtxib, vim lawv npuab siab rau nws thiab mloog nws hais. (Nyeem Yauhas 15:14, 15.) Zoo rau peb xyaum Yexus es xaiv cov phoojywg muaj kev ntseeg ruaj nreeg, uas mloog Yexus lus. Tus kwvluag uas hlub yus tiag tsis zais siab, thiab tsis txaj muag ntuas yus.​—Paj Lug 27:9.

20. Yog peb txhawb lwm tus txojkev ntseeg, yuav txhawb tau peb li cas?

²⁰ Txhawb lwm tus txojkev ntseeg. Yexus cov lus thiab nws tes haujlwm txhawb nws cov thwjtim txojkev ntseeg. (Malakau 11:20-24) Yog peb xyaum Yexus tus qauv, yuav txhawb tau peb thiab lwm tus txojkev ntseeg. (Paj Lug 11:25) Peb yuav pab cov neeg zej zos li cas? Thaum peb qhia Vajlugkub, piav tej pov thawj uas qhia tias muaj Vajtswv tiag. Qhia lawv tias Vajtswv hlub tibneeg heev thiab phau Vajlugkub yog nws Txojlus tiag. Peb yuav pab peb cov kwvtij nkauj muam tuav kev ntseeg li cas? Yog peb hnov ib txhia yws txog cov kwvtij uas saib xyuas lub koom txoos, txhob maj txiav kev phoojywg nrog lawv. Tiamsis ua tib zoo txhawb kom nws rov muaj kev ntseeg tuaj. (Yuda 22, 23) Yog peb tseem kawm ntawv, es peb tus xibhwb piav tias tibneeg txia ntawm tsiaj los xwb, txhob txaj muag qhia lawv tias muaj ib tug Tswv Tsim. Yog peb ua siab tawv li ntawd, tej zaum yuav pab tau tus xibhwb thiab cov tub kawm ntawv.

21. Yehauvas cog lus li cas rau peb txhua tus?

²¹ Yehauvas thiab Yexus tau pab kom Petus muaj kev ntseeg thiab ua siab tawv qhawv. Tom qab no, Petus thiaj paub txhawb nws cov kwvtij nkauj muam heev. Yehauvas cog lus tias nws yuav pab kom peb txhua leej txhua tus tuav kev ntseeg ruaj nreeg thiab. (Nyeem 1 Petus 5:9, 10.) Yog peb siv zog peem tiag kom peb muaj kev ntseeg ruaj, Yehauvas yeej yuav foom koob hmoov nplua mias rau peb.