Tso Siab Tias Phau Vajlugkub Qhia Qhov Tseeb
Thaum ub, ntau haiv neeg tso siab tias phau Vajlugkub qhia qhov tseeb. Niaj hnub no, coob leej tseem coj raws li phau Vajlugkub qhia. Txawm li ntawd los, ib txhia hais tias phau Vajlugkub pab tsis tau lawv thiab qhia tej yam tsis muaj tseeb. Ua li, koj puas xav tias phau Vajlugkub qhia qhov tseeb?
UA CAS KOJ THIAJ NTSEEG TAU PHAU VAJLUGKUB
Dabtsi pab tau koj tso siab tias phau Vajlugkub qhia qhov tseeb? Muab ua piv txwv li no: Koj muaj ib tug phoojywg zoo uas yeej ib txwm tsis dag, koj ntseeg txhua yam nws hais. Zoo li koj tus phoojywg, phau Vajlugkub puas ib txwm qhia qhov tseeb? Nyeem mus ntxiv seb ua cas peb thiaj ntseeg tau phau Vajlugkub.
Cov Tau Sau Vajlugkub Tsis Dag
Cov tau sau phau Vajlugkub qhia qhov tseeb xwb. Lawv tseem sau txog tej yam lawv ua yuam kev huvsi. Xws li, Yaunas uas yog ib tug cev Vajtswv lus. Nws sau txog thaum nws tsis mloog Vajtswv lus. (Yaunas 1:1-3) Thaum Yaunas sau nws phau ntawv yuav tas, nws hais tias Vajtswv tau ntuas nws. Tiamsis nws tsis sau qhia tias nws txo hwjchim thiab yuav li Vajtswv hais. (Yaunas 4:1, 4, 10, 11) Zoo ib yam li Yaunas, cov uas tau sau phau Vajlugkub tej lus tsuas muaj tseeb xwb.
Pab Tau Peb Lub Neej Tiag
Phau Vajlugkub tej tswvyim puas pab tau peb lub neej tiag? Yeej pab tau. Xws li, phau Vajlugkub qhia kom peb nrog lwm tus sib raug zoo. Muaj ib nqe hais tias: “Nej xav kom lwm tus ua li cas rau nej, nej yuav tsum ua ib yam li ntawd rau lwm tus.” (Mathais 7:12) Muaj lwm nqe hais tias: “Lo lus mos lus muag ua rau kev chim ploj mus, tiamsis lo lus nruj tsiv ua rau kev chim tawm tuaj.” (Pajlug 15:1) Yog li ntawd, tej tswvyim hauv phau Vajlugkub yeej tseem pab tau peb niaj hnub nimno.
Tej Keeb Kwm Muaj Tseeb
Cov neeg tshawb fawb nrhiav tau pov thawj txog cov neeg nyob thaum ub, lawv tej tebchaws, thiab tej yam uas tau tshwm sim rau lawv lub neej. Tej ntawd yeej muaj tseeb raws li sau tseg hauv phau Vajlugkub. Cia peb tham txog ib qho piv txwv uas nyob rau Nehemis tiam. Nws yog ib tug uas sau phau Vajlugkub. Nws sau txog cov neeg Faunikias hauv Yeluxalees, uas thaum ub nyob Tiles. Nws hais tias lawv “coj ntses thiab txhua yam khoom zoo tuaj rau hauv lub nroog.”—Nehemis 13:16.
Puas muaj pov thawj los txhawb tej yam uas hais hauv Nehemis 13:16? Yeej muaj. Cov neeg tshawb fawb nrhiav tau tej khoom cov Faunikias coj tuaj muag hauv tebchaws Yixalayees. Tsis tas li ntawd xwb, hauv lub nroog Yeluxalees lawv nrhiav tau tej ntses hiavtxwv Meditelene (Mediterranean). Lawv ntseeg tias cov neeg ua lag luam coj tej ntses no tuaj muag rau hauv Yeluxalees. Ib tug neeg txawj ntse hais tias: “Yeej muaj tseeb tias cov neeg Tiles tuaj muag ntses rau hauv Yeluxalees. Qhov no txhawb nqe Vajlugkub hauv Nehemis 13:16.”
Qhia Raws Li Kev Tshawb Txujci
Phau Vajlugkub yog ib phau ntawv uas qhia txog kev ntseeg thiab keeb kwm. Tiamsis thaum hais txog kev tshawb txujci, nws kuj hais raug raws li neeg tshawb tau, xws li thaum hais txog lub ntiajteb.
Muaj li 3,500 xyoo dhau los, phau Vajlugkub hais tias lub ntiajteb nyob “ntawm qhov chaw uas tsis muaj dabtsi.” (Yauj 26:7) Qhov no txawv ntawm tej dab neeg uas tibneeg piav. Ib txhia hais tias lub ntiajteb ntab saum nplaim dej lossis nyob saum ib tug vaub kib lub khauj khaum. Muaj li 1,100 xyoo tom qab sau tiav phau ntawv Yauj hauv phau Vajlugkub, tibneeg tseem ntseeg tias lub ntiajteb yuav tsum txawb rau ntawm ib qhov chaw twg xwb. Nyuam qhuav yog li 300 xyoo tas los no, tibneeg mam tshawb tau qhov tseeb. Xyoo 1687, Ixaj Nuteem (Isaac Newton) tshawb txog lub zog rub ntiajteb (lus Askiv hu ua “gravity”). Nws piav tias lub zog no rub lub ntiajteb kiv puag ncig lub hnub. Qhov uas lawv tshawb pom li no qhia tias cov lus hauv phau Vajlugkub uas twb sau tshaj li 3,000 xyoo los lawm yeej muaj tseeb.
Tej Lus Faj Lem Muaj Tseeb
Puas muaj tshwm sim raws li tej lus faj lem hauv phau Vajlugkub? Cia peb tham txog ib zaj lus faj lem uas Yaxayas sau hauv phau Vajlugkub txog lub nroog Npanpiloos.
Zaj Lus Faj Lem: Xyoo 732 U.Nt.Y., Yaxayas sau tias Npanpiloos yuav raug puam tsuaj thiab yuav tsis muaj leejtwg nyob rau hauv li lawm. (Yaxayas 13:17-20) Yaxayas zaj lus faj lem qhia ntxiv tias tus uas yuav txeeb Npanpiloos yog Xailas. Nws kuj qhia tias Xailas muab tus dej uas ntws ncig Npanpiloos ua kom qhuav, thiab tej rooj vag yuav nyob qhib lug cia.—Yaxayas 44:27–45:1.
Muaj Tshwm Sim: Muaj li 200 xyoo tom qab Yaxayas sau zaj lus faj lem, vajntxwv Pawxias tuaj ua rog rau Npanpiloos. Nws hu ua Xailas. Nyuaj rau nws pab tub rog nkag rau hauv Npanpiloos vim tej ntsa loog tuab thiab siab, thiab muaj tus dej ntws ib ncig lub nroog. Xailas thiaj hais kom cov tub rog muab tus dej cais mus rau lwm qhov. Thaum tus dej nqeg lawm, Xailas thiab nws cov tub rog mam hla mus rau ntawm Npanpiloos tus ntsa loog. Tsis tas li ntawd, lub rooj vag kuj nyob qheb lug cia rau lawv nkag mus kov yeej Npanpiloos.
Tiamsis zaj lus faj lem kuj hais tias yuav tsis muaj leejtwg nyob rau hauv Npanpiloos ib zaug ntxiv li lawm. Puas muaj tseeb li ntawd? Ntau pua xyoo tom qab Pawxias txeeb tau Npanpiloos, tibneeg tseem nyob rau hauv. Tiamsis nimno, hauv Npanpiloos uas nyob ze lub nroog Baghdad, hauv tebchaws Iraq, tsis muaj neeg nyob lawm. Qhov no qhia tias tej yam uas phau Vajlugkub hais txog yav tom hauv ntej yeej yuav muaj tseeb.