Vajtswv Txojlus Puas Tseem Zoo Li Qhov Qub?

Muaj tej txhia xav paub seb puas yog tibneeg muab Vajtswv Txojlus hloov lawm. Yaxayas, tus cev Vajtswv lus hais tias: “Vajtswv txojlus nyob mus ibtxhis.” (Yaxayas 40:8) Yog li ntawd, ua li cas peb thiaj paub tseeb tseeb tias Vajtswv Txojlus tsis hloov?

Vajtswv muaj hwjchim txuag tau nws Txojlus tseg kom tsis txhob muaj leejtwg hloov tau. Cov tibneeg txheej thaum ub los, yeej ua tib zoo saib kom lawv sau tau raws nraim li Vajtswv Txojlus teev tseg cia. Lawv kuj muab txhua tus ntawv los suav kom txhob tshaj lossis raug rho tawm. Txawm li ntawd los, tibneeg haj tseem ua yuam kev quj qees vim lawv yog neeg txhaum.

UA CAS PEB THIAJ PAUB TIAS TSEEM YOG VAJTSWV TEJ LUS NIAJ HNUB NIMNO?

Muaj ntau ntau kauj ntawv qub qub thaum ub uas hais txog Vajtswv Txojlus. Yog tias ib kauj ntawv twg hais zoo tsis sib xws, ces mam li muab lwm kauj coj los piv seb puas sib dhos.​—Yog xav paub ntxiv, mus nyeem hauv lub vej xaij jw.org ntawm lub ntsiab ua lus Askiv “Has the Bible Been Changed or Tampered With?”

Cia peb mus tham txog tej kauj ntawv uas ib co neeg Alav nrhiav tau hauv tej qhov tsua ntawm dej Hiavtxwv Tuag (Dead Sea) nyob rau xyoo 1947. Tej kauj ntawv uas hais txog Vajtswv Txojlus no, twb sau tshaj li 2,000 xyoo dhau los lawm. Niaj hnub nimno, cov neeg tshawb fawb muab tej kauj ntawv no coj los sib piv seb puas zoo sib xws. Lawv tshawb nrhiav tau li cas?

Lawv nrhiav tau tias Vajtswv Txojlus niaj hnub no tseem qhia tib yam li cov thaum ub.a Yog li ntawd, peb yeej tso siab tau tias thaum peb nyeem Vajtswv Txojlus, yeej muaj tseeb. Zoo siab kawg li tias Vajtswv tseem txuag nws Txojlus tseg kom peb thiaj li tau nyeem niaj hnub nimno.

Peb yeej tso siab lug nyeem Vajtswv Txojlus, vim nws hais sib dhos thiab hais raug lub ntsiab. Yog peb twb paub tseeb li no lawm, nyeem txuas ntxiv seb cov cev Vajtswv lus tau hais li cas txog nws.