Vajtswv, tus uas “teb peb tej lus thov,” yeej zoo siab hlo tig ntsej los mloog peb.—PHAU NTAWV NKAUJ 65:2
Rau Siab Ntso Thov Vajtswv
Vajtswv pub kom tibneeg nrog tau nws sib txuas lus. Thaum peb thov Vajtswv, peb phua hlo tau peb lub siab lub ntsws rau nws. Daviv, tus uas cev Vajtswv lus tau thov tias: “Koj teb peb tej lus thov lawm. Tej neeg nyob txhua qhov yuav los cuag koj.” (Phau Ntawv Nkauj 65:2) Tiamsis peb yuav thov li cas Vajtswv thiaj hnov thiab foom koob hmoov rau peb?
TXO HWJCHIM THIAB THOV TAWM PLAWS HAUV NRUAB SIAB TUAJ
Kev thov Vajtswv yog ib txoj hau kev rau peb qhia siab rau nws. (Phau Ntawv Nkauj 62:8) Vajtswv, tus uas muaj hwjchim loj kawg nkaus nyiam thaum peb thov tawm plaws hauv nruab siab tuaj.
SIV VAJTSWV LUB NPE
Txawm tias Vajtswv muaj ntau lub npe meej mom los, nws tsuas muaj tib lub npe xwb. Vajtswv Txojlus hais tias: “Nws lub npe hu ua [Yehauvas, NWT ].” (Khiav Dim 15:3)a Vajtswv lub npe muaj tshwm txog li 7,000 zaus hauv nws Txojlus. Muaj coob leej cev Vajtswv lus siv nws lub npe. Ib tug ntawd yog Anplahas. Nws hais tias: “[Yehauvas, NWT ], thov koj tsis txhob chim, rau qhov kuv xav rov hais dua.” (Chivkeeb 18:30) Niaj hnub no los, thaum peb thov Vajtswv, peb yuav tsum siv nws lub npe Yehauvas.
THOV VAJTSWV UA KOJ YAM LUS
Txawm peb yuav thov Vajtswv yam lus twg los nws yeej yuav nkag siab. Vajtswv Txojlus hais tias: “Vajtswv tsis xaiv leejtwg ntsejmuag. Txawm yog haivneeg twg los xij, Vajtswv lees yuav txhua tus uas hwm Vajtswv thiab ua haum Vajtswv siab.”—Tes Haujlwm 10:34, 35.
Tiamsis peb tsis yog thov Vajtswv xwb es cia li yuav tau nws tej koob hmoov. Peb yuav tau ua ntau tshaj qhov ntawd. Nyeem txuas ntxiv seb peb yuav tau ua li cas.
a Nyob rau ntau phau Vajlugkub, tibneeg tau muab Yehauvas lub npe hloov ua Tus Tswv. Hauv cov nqe Vajlugkub no peb thiaj rov muab Yehauvas lub npe los tso rau kom zoo li thaum ub.