Mloog Vajtswv Lus Thiaj Tau Koob Hmoov

Mauxes uas yog tus cev Vajtswv lus tau hais tias, yog peb ua raws li Vajtswv tej kevcai ces Nws yuav foom koob hmoov. (2 Kevcai 10:13; 11:27) Peb tsis yog mloog Vajtswv lus vim peb ntshai tsam nws rau txim. Tiamsis twb yog Vajtswv muaj tej yeeb yam zoo, peb lub siab thiaj xib rau nws thiab tsis xav ua ib yam dabtsi rau nws tu siab. “Qhov uas peb hlub Vajtswv yog peb ua raws li tej lus uas Vajtswv hais.”​—1 Yauhas 5:3.

Cia peb tham txog ob lub ntsiab uas yuav qhia tias vim li cas mloog Vajtswv lus thiaj tau nws tej koob hmoov.

1. MLOOG VAJTSWV LUS PAB PEB MUAJ TSWVYIM

“Kuv yog [Yehauvas, NWT ] uas yog nej tus Vajtswv, tus uas qhia qhov zoo rau nej thiab coj nej taug txojkev uas tsimnyog taug.”​—YAXAYAS 48:17.

Vajtswv Yehauvas paub peb zoo heev thiab qhia txojkev zoo rau peb taug. Yog peb xav kom Vajtswv pab peb ua neej, peb yuav tau nyeem nws Txojlus seb nws xav kom peb coj thiab siv li cas rau hauv lub neej.

2. MLOOG VAJTSWV THIAJ MUAJ KEV ZOO SIAB

“Cov neeg uas hnov Vajtswv Txojlus thiab ua raws li Txojlus ntawd, thiaj yog cov uas tau koob hmoov!”​—LUKAS 11:28.

Niaj hnub no, coob tus uas coj raws li Vajtswv Txojlus muaj kev kaj siab dua. Xws li, ib tug txiv tsev hauv tebchaws Xapee (Spain). Ua ntej ntawd, nws yog neeg siab heev, thiab ua nruj ua tsiv rau nws tus pojniam thiab lwm tus. Muaj ib hnub, nws nyeem Mauxes cov lus txog Yakhauj tus tub Yauxej uas raug mus ua cev qhev thiab raug kaw. Txawm Yauxej raug kev tsis ncaj los nws ua siab mos siab muag, nrog luag sib raug zoo, thiab zam lwm tus lub txim. (Chivkeeb, tshooj 37-45) Tus txiv tsev ntawd hais tias, “Thaum kuv xav txog Yauxej, txhawb tau kuv ua siab mos siab muag, ua zoo rau lwm tus, thiab paub tswj kuv lub siab. Kuv lub neej kaj siab lawm ntau.”

Vajtswv Txojlus qhia ntxiv seb peb yuav tau coj li cas rau lwm tus. Mus nyeem txuas ntxiv rau zaj tom ntej.