Peb Yuav Tsum Txawj Sib Hlub Sib Pab

Sawvdaws puavleej yog ib tse neeg vim peb yog Adas tej xeeb leej xeeb ntxwv. Txhua yim neeg yuav tsum txawj sib pab, sib hlub, thiab sib hwm. Tiamsis niaj hnub no tsis muaj li ntawd lawm. Vajtswv lub ntsiab tsis yog kom tibneeg ua neej zoo li no.

VAJTSWV TXOJLUS HAIS LI NO TXOG KEV HLUB

“Hlub koj tej kwvtij zejzog ib yam li koj hlub koj lub cev.”​—LEVIS KEVCAI 19:18.

“Hlub nej cov yeebncuab.”​—MATHAIS 5:44.

TXAWJ SIB HLUB SIB PAB LI HAIS NO

Nyob hauv 1 Kauleethaus 13:4-7, Vajtswv qhia tias kev hlub yog li no:

“Kev hlub . . . ua taus siab ntev, nws muaj lub siab dawb siab zoo.”

Ua tib zoo xav li no: Yog koj nyiam thaum muaj ib tug twg ua siab ntev thiab ua zoo rau koj, thiab txawm yog koj ua yuam kev lawm los nws tsis cem koj, ces koj yuav tau ua ib yam li ntawd rau lwm tus.

Kev hlub “tsis khib.”

Ua tib zoo xav li no: Yog koj tsis nyiam thaum muaj ib tug pheej soj ntshis koj lossis khib thiab ntshaw tej yam uas koj muaj, ces koj yuav tsum tsis txhob ua li ntawd rau lwm tus.

Kev hlub “tsis qia dub.”

Ua tib zoo xav li no: Yog koj nyiam thaum ib tug twg saib taus tej yam uas koj ua es tsis yuam koj los ua li nws hais xwb, ces koj yuav tau ua ib yam li ntawd rau lwm tus.

Kev hlub “tsis cim ntsoov luag tej kev txhaum rau nruab siab.”

Ua tib zoo xav li no: Vajtswv muaj lub siab zam xeeb rau cov ntxeev dua siab tshiab. “Nws tsis cem thiab nws tsis chim mus ibtxhis.” (Phau Ntawv Nkauj 103:9) Peb yeej zoo siab heev thaum ib tug zam peb lub txim. Tib yam li ntawd, peb yuav tau zam cov uas tau ua txhaum rau peb.​—Phau Ntawv Nkauj 86:5.

Kev hlub “tsis nyiam kev phem kev qias, tiamsis nws nyiam kev ncaj kev ncees.”

Ua tib zoo xav li no: Yog peb tsis nyiam lwm tus hnyos thaum peb raug kev txom nyem ces tsis txhob coj ib yam li ntawd rau lwm tus, tab txawm lawv ua tsis ncaj rau peb.

Yuav kom peb tau Vajtswv tej koob hmoov, peb yuav tsum paub hlub lwm tus, txawm tias lawv yuav laus yuav hluas, yuav yog haiv neeg twg, lossis yuav ntseeg li cas los xij. Ib qho uas peb ua tau li no, yog pab cov uas tsis muaj leejtwg pab.