Peb Yeej Nyob Tau Mus Ib Txhis

1. Thaum peb xav txog txoj sia ntev dhawv mus ib txhis uas Yehauvas cog tseg, ua rau peb xav ua dab tsi?

YEHAUVAS muab “txojsia ntev dhawv mus ibtxhis” rau txhua tus uas mloog nws lus. (Loos 6:23) Thaum peb zaum tsaws xav txog qhov uas Yehauvas muab rau peb no, ua rau peb huab yam raug zoo nrog nws. Nco ntsoov tias peb Leej Txiv Yehauvas tus uas nyob saum ntuj ceeb tsheej hlub tshua peb kawg nkaus li thiab nws yeej yuav tsis ncaim ntawm peb mus.

2. Txoj sia ntev dhawv mus ib txhis uas Yehauvas cog tseg pab tau peb li cas?

² Txoj sia ntev dhawv mus ib txhis uas Vajtswv cog tseg pab kom peb thev dhau txhua yam uas peb raug. Txawm peb tej yeeb ncuab yuav hawv qaws tias lawv yuav muab peb tua los peb yeej yuav teev tiam Yehauvas. Vim li cas peb xav li ntawd? Peb paub hais tias yog peb tuag vim peb ntseeg Yehauvas ces ib hnub qab nram ntsis Yehauvas yeej yuav tsa peb sawv rov qab los thiab peb yeej cia siab tias ib hnub twg yuav tsis muaj kev ploj kev tuag li lawm. (Yauhas 5:28, 29; 1 Kauleethaus 15:55-58; Henplais 2:15) Ua li cas peb ho paub tseeb tseeb tias peb yuav tau nyob mus ib txhis? Cia peb mam mus tham txuas ntxiv.

YEHAUVAS IB TXWM MUAJ NYOB

3. Vim li cas peb ho paub tias Yehauvas ho tuav tau peb txoj sia mus ib txhis? (Phau Ntawv Nkauj 102:12, 24, 27)

³ Yehauvas tuav tau peb txoj sia mus ib txhis yeeb vim yog nws yog lub hauv paus siav thiab nws nyob mus ib txhis. (Phau Ntawv Nkauj 36:9) Ntawm no tsuas yog ob peb nqes Vajlugkub uas piav txog tias Yehauvas ib txwm muaj nyob thiab nws yuav nyob mus li. Nyob hauv Phau Ntawv Nkauj 90:2 hais txog Yehauvas li no tias “koj yeej yog Vajtswv mus ibtxhis li.” Phau Ntawv Nkauj 102 kuj hais xws nkaus li ntawd thiab. (Nyeem Phau Ntawv Nkauj 102:12, 24, 27.) Tsis tas li ntawd, Hanpakus tus uas cev Vajtswv lus sau li no tias: “[Yehauvas], koj yeej yog Vajtswv tus uas nyob puag thaum ub los lawm. Koj yog kuv tus Vajtswv, tus dawbhuv thiab nyob mus ibtxhis.”​—Hanpakus 1:12.

4. Piav seb vim li cas ho tsis yooj yim rau peb ib txhia ntseeg tias Yehauvas ib txwm muaj nyob.

⁴ Qhov uas Yehauvas ib txwm “nyob mus ibtxhis” puas nyuaj rau koj to taub? (Yaxayas 40:28) Muaj coob leej ntau tus yeej tsis nkag siab hlo li thiab. Elihus hais li no tias: “Peb tsis . . . paub hais tias Vajtswv nyob thaum twg los lawm.” (Yauj 36:26) Txawm peb tsis nkag siab ib yam twg los qhov ntawd tsis tau qhia tias tsis muaj tseeb. Xws li peb tsis paub tias ua li cas fai fab ho tshwm sim tau, los qhov no tsis tau txhais hais tias tsis muaj fai fab. Zoo ib yam li ntawd, txawm peb tib neeg tsis nkag siab tias Yehauvas ib txwm muaj nyob thiab yuav nyob mus li los qhov no tsis tau txhais tias nws nyob tsis tau mus ib txhis. Peb yuav nkag siab thiab yuav tsis nkag siab los qhov tseeb yeej yog qhov tseeb txog tus kws tsim. (Loos 11:33-36) Yehauvas yeej ib txwm nyob ua ntej ib puas tsav yam saum nruab ntug, tsis hais lub hnub thiab tej hnub qub. Yehauvas qhia rau peb tias nws “tsim lub ntiajteb los ntawm nws lub hwjchim.” Nws yeej ib txwm muaj nyob, nws thiaj “nthuav lub ntuj.” (Yelemis 51:15; Tes Haujlwm 17:24) Cia peb ho mus kawm dua ib lub ntsiab ntxiv los pab peb nkag siab tias peb yeej nyob tau mus ib txhis.

YEHAUVAS TSIM PEB NYOB MUS IB TXHIS

5. Thawj nkawm niam txiv muaj txoj kev vam kev cia siab li cas?

⁵ Txhua yam ciaj sia uas Yehauvas tau tsim hauv ntiaj teb no puav leej txawj tuag, tiam sis nws tseg kom tib neeg tsis txhob txawj tuag. Yog li ntawd, Yehauvas thiaj ceeb toom Adas li no tias: “Kuv tsis pub koj noj tsob txiv ntoo uas ua rau paub qhov phem thiab qhov zoo xwb. Koj yuav tsum tsis txhob noj tsob ntoo ntawd cov txiv; yog koj noj hnub twg, koj yuav tuag hnub ntawd.” (Chivkeeb 2:17) Yog Adas thiab Evas nkawd mloog Yehauvas lus ces nkawd yeej tsis tuag li. Muaj ib hnub twg Yehauvas yeej yuav cia nkawd noj “tsob txiv ntoo uas cawm tau txojsia” kom pab tau nkawd “nyob mus ibtxhis.”b​—Chivkeeb 3:22.

6-7. (1) Muaj dab tsi qhia tias tib neeg tsis yog tsim los kom txawj tuag? (2) Muaj dab tsi uas koj ntshaw ua? (Saib cov duab.)

⁶ Muaj ib txhia neeg tshawb txuj ci nrhiav pom tias tib neeg lub hlwb yeej cim tau ntau yam tseg cia. Nyob rau xyoo 2010, muaj ib zaj sau hais tias tib neeg lub hlwb yeej cim tau ntau npaum nkaus li ib daim yeeb yaj kiab uas kaw li peb plhom txoos teev. Yog muab daim yeeb yaj kiab no saib, yuav siv tshaj li 300 xyoo thiaj saib tag. Tej zaud peb lub hlwb tseem cim nco tau ntau tshaj ntawd los muaj. Tej no qhia tau tias Yehauvas tsim peb lub hlwb kom cim yam ub yam no kom ntau tshaj li 70 rau 80 xyoo.​—Phau Ntawv Nkauj 90:10.

⁷ Yehauvas tsim tau kom muaj lub siab xav nyob mus ib txhis. Nyob rau hauv phau Vajlugkub hais tias Vajtswv “muab qhov uas nyob mus ib txhis tsis kawg tso rau hauv neeg lub siab.” (Tej Lus Qhia 3:11) Yog li ntawd, txoj kev tuag thiaj li yog peb tus yeeb ncuab. (1 Kauleethaus 15:26) Thaum peb muaj mob muaj nkeeg, puas yog peb nyob twj ywm tos txog hnub tuag? Peb yeej tsis ua li ntawd. Peb yeej maj nrawm nroos mus cuag kws tshuaj thiab noj tshuaj kom peb tus mob zoo. Peb yeej ua npaum li peb ua tau kom dim txoj kev tuag. Thaum muaj ib tug uas peb hlub tshua, tsis hais tus laus tus hluas tau tuag, yeej mob peb siab kawg li. (Yauhas 11:32, 33) Vajtswv yeej tsis muab qhov uas ntshaw nyob mus ib txhis tso rau hauv peb siab yog tias nws tsis pub peb nyob mus ib txhis. Cia peb mus piav txuas ntxiv kom peb thiaj nkag siab tias peb yeej nyob tau mus ib txhis. Xws li yuav tham txog tej uas Yehauvas tau ua tag los lawm thiab tej uas nws ua tam sim no los peb nkag siab tias nws yeej tsis tau hloov nws lub ntsiab.

YEHAUVAS YEEJ TSIS TAU HLOOV NWS LUB NTSIAB

8. Nyob rau hauv Yaxayas 55:11, qhia tias Yehauvas lub hom phiaj tsis tau hloov li cas txog peb?

⁸ Adas thiab Evas nkawd tau ua txhaum, nkawd tej tub tej ki thiaj li saws tau kev ploj kev tuag los Yehauvas haj tseem tsis tau hloov nws lub ntsiab. (Nyeem Yaxayas 55:11.) Yehauvas lub ntsiab yog xav kom cov neeg uas mloog nws lus nyob tau mus ib txhis. Peb paub li ntawd, yeeb vim yog Yehauvas tau hais thiab ua ntau yam kom muaj raws li nws lub ntsiab.

9. Vajtswv tau cog lus li cas tseg? (Daniyees 12:2, 13)

⁹ Yehauvas cog lus tseg tias nws yuav tsa cov neeg uas tas sim neej lawm sawv rov los thiab cia sij hawm rau lawv los kawm txog nws kom lawv thiaj tau txoj sia ntev dhawv mus ib txhis. (Tes Haujlwm 24:15; Titus 1:1, 2) Yauj tau hais tseg tias Yehauvas tos tsis hnyu yuav tsa cov tib neeg uas nruam sim lawm. (Yauj 14:14, 15) Daniyees tus uas cev Vajtswv lus, paub hais tias Vajtswv yuav tsa tib neeg sawv rov los kawm txog Vajtswv kom lawv thiaj nyob tau mus ib txhis. (Phau Ntawv Nkauj 37:29; nyeem Daniyees 12:2, 13.) Cov tib neeg Yudais uas nyob rau Yexus tiam los kuj paub tias Yehauvas yuav muab “txojsia ntev dhawv mus ibtxhis” rau cov neeg uas teev tiam nws. (Lukas 10:25; 18:18) Yexus kuj tau hais ntau ntau zaus txog qhov uas Vajtswv yuav tsa tib neeg. Yexus tus kheej los Vajtswv yeej tau tsa hauv qhov tuag rov los lawm.​—Mathais 19:29; 22:31, 32; Lukas 18:30; Yauhas 11:25.

10. Yav thaum ub Vajtswv tsa ib txhia sawv rov los muaj sia qhia tau li cas? (Saib daim duab.)

¹⁰ Yehauvas pub tau txoj sia thiab nws muaj hwj chim tsa tau kom tib neeg rov sawv los muaj sia dua. Thaum tus poj ntsuam uas nyob hauv lub nroog Xalefas tus me tub nruam sim lawm, Yehauvas muab hwj chim rau Eliyas kom tsa nws sawv rov los. (1 Vajntxwv 17:21-23) Tom qab no, tus poj niam uas nyob hauv lub nroog Sunees tus me tub kuj nruam sim tib yam nkaus ces Yehauvas muab hwj chim rau Elisas tsa kom nws sawv rov los. (2 Vajntxwv 4:18-20, 34-37) Tej no ua tim khawv tias Yehauvas yeej muaj hwj chim tsa tau tib neeg sawv rov qab los. Thaum Yexus tseem nyob hauv ntiaj teb no, nws Txiv pub hwj chim rau nws tsa tib neeg sawv rov qab muaj sia. (Yauhas 11:23-25, 43, 44) Tam sim no Yexus nyob saum ntuj ceeb tsheej thiab Vajtswv twb pub hwj chim rau nws “saib xyuas ib puas tsav yam saum ntuj thiab hauv ntiaj teb no lawm.” Yog li ntawd yav tom ntej no, nws muaj peev xwm tsa tau “cov neeg uas tuag lawm” kom sawv rov los kawm txog Vajtswv kom lawv thiaj nyob tau mus ib txhis.​—Mathais 28:18; Yauhas 5:25-29.

11. Vim li cas yuav tsum muaj tus nqe theej txhoj, peb thiaj nyob tau mus ib txhis?

¹¹ Vim li cas Yehauvas ho cia nws tib leeg Tub los tuag txom nyem ntsuav li ntawd? Yexus qhia rau peb tias: “Vajtswv hlub neeg ntiajteb kawg li, nws thiaj txib nws tib Leeg Tub los rau hauv ntiajteb. Tus uas ntseeg nws Leej Tub, tus ntawd yuav tsis tuag, tiamsis yuav tau txojsia ntev dhawv mus ibtxhis.” (Yauhas 3:16) Vim Vajtswv cia nws tus Tub los tuag theej peb lub txhoj, qhov no thiaj qhib tau txoj hau kev rau peb nyob tau mus ib txhis. (Mathais 20:28) Tus tub txib Paulus tau sau txog tej uas Vajtswv tau ua no tias: “Twb yog vim muaj ib tug uas txhaum, sawvdaws thiaj raug kev ploj kev tuag, thiab twb yog vim muaj ib tug sawv hauv qhov tuag rov qab los, sawvdaws thiaj yuav sawv tau ib yam li tus ntawd. Txhua tus puavleej raug kev ploj kev tuag, rau qhov sawvdaws yog Adas roj ntsha ib yam nkaus li ntawd, txhua tus yuav sawv hauv qhov tuag rov qab los, [rau qhov muaj] Yexus Khetos.”​—1 Kauleethaus 15:21, 22.

12. Lub Nceeg Vaj uas tus Mexiyas kav pab kho kom muaj raws li Vajtswv lub ntsiab li cas rau peb?

¹² Yexus qhia nws cov thwj tim thov kom Vajtswv los kav thiab thov kom txhua yam hauv ntiaj teb muaj tiav raws li Vajtswv lub siab nyiam. (Mathais 6:9, 10) Ib feem ntawm Vajtswv lub ntsiab yog nws xav kom tib neeg nyob tau mus ib txhis hauv lub ntiaj teb no. Qhov uas Yehauvas yuav ua tau raws li nws lub ntsiab yog tsa nws tus Tub sawv ua Vaj Ntxwv los kav lub Nceeg Vaj. Vajtswv saws 144,000 leej tib neeg hauv ntiaj teb los mus nrog Yexus sib koom tes kho txhua yam kom muaj raws li Vajtswv lub siab nyiam.​—Tshwmsim 5:9, 10.

13. Niaj hnub niam no Yehauvas tau ua dab tsi, thiab peb muaj ib feem li cas?

¹³ Tam sim no Yehauvas tab tom sau ib co tib neeg “coob coob suav tsis txheeb” thiab nws cob qhia lawv kom txawj ua pej xeem thaum nws lub Nceeg Vaj kav. (Tshwmsim 7:9, 10; Yakaunpaus 2:8) Txawm tias tib neeg feem coob hauv ntiaj teb cais ua pab ua pawg vim muaj kev ntxub ntxaug thiab kev tsov kev rog los cov neeg “coob coob suav tsis txheeb” yeej niaj hnub xyaum kom txhob muaj kev ntxub ntxaug. Lawv yeej coj tau yam ntxwv qhia tias lawv twb muab lawv tej ntaj ntaus ua khais lawm. (Mikhas 4:3) Lawv tsis mus koom tes ua tsov ua rog tiam sis lawv kub siab lug qhia tib neeg kom paub txog tus tseem Vajtswv thiab nws lub ntsiab kom tib neeg thiaj tau “txojsia uas tsis txawj ploj mus ibtxhis.” (1 Timautes 6:19) Vim lawv txhawb nqa Vajtswv lub Nceeg Vaj, tej zaum lawv tsev neeg kuj yuav tawm tsam los sis lawv yuav tsis muaj nyiaj txiag siv pes tsawg tiam sis Yehauvas yeej saib ntshis kom lawv muaj txawm peem. (Mathais 6:25, 30-33; Lukas 18:29, 30) Tej no qhia tau rau peb tias Vajtswv lub Nceeg Vaj yeej muaj tiag tiag thiab txhua yam yeej yuav mus raws li Vajtswv lub ntsiab.

LUB NEEJ ZOO YAV TOM NTEJ

14-15. Qhov uas Yehauvas yuav tshem txoj kev ploj kev tuag yuav muaj tau li cas?

¹⁴ Tam sim no Yexus yog tus Vaj Ntxwv ntawm Vajtswv lub Nceeg Vaj thiab nws yuav ua txhua yam kom raws li Yehauvas tau cog tseg. (2 Kauleethaus 1:20) Txij ntua thaum xyoo 1914, Yexus twb kov yeej nws cov yeeb ncuab lawm. (Phau Ntawv Nkauj 110:1, 2) Tsis ntev tom ntej no, Yexus thiab cov nrog nws kav yuav muab tag nrho cov tib neeg phem rhuav tshem tawm mus.​—Tshwmsim 6:2.

¹⁵ Thaum Yexus Kav 1,000 Xyoo, nws yuav tsa cov uas tag sim neej lawm rov qab los thiab nws yuav pab kom cov uas mloog Yehauvas lus txhob muaj kev txaug kev txhaum lawm. Tom qab txoj kev sim siab zaum kawg dua tag, cov neeg uas Yehauvas suav hais tias ncaj ncees “yuav tau lub [ntiaj teb] ua lawv teej lawv tug, thiab tau nyob rau hauv mus ib txhis.” (Phau Ntawv Nkauj 37:10, 11, 29) Tsis tas li ntawd, “txojkev tuag yog tus yeebncuab uas thaum kawg . . . yuav muab rhuav kom puastsuaj mus.”​—1 Kauleethaus 15:26.

16. Qhov tseem ceeb tshaj uas peb teev tiam Yehauvas yog dab tsi?

¹⁶ Raws li peb tau kawm hauv zaj no, txoj kev vam kev cia siab yuav tau nyob mus ib txhis yeej hais nyob rau hauv Vajtswv Txoj Lus. Txoj kev cia siab no yuav pab kom peb tsis txhob tso Yehauvas tseg rau lub sij hawm kawg no. Qhov uas peb lub siab npuab Yehauvas thiab Yexus tsis yog vim peb ntshaw kom nyob tau mus ib txhis tiam sis vim peb muaj lub siab hlub tshua nkawd. (2 Kauleethaus 5:14, 15) Txoj kev hlub tshua no yuav pab tau kom peb xyaum nkawd thiab pab lwm leej lwm tus muaj kev vam kev cia siab ib yam li peb. (Loos 10:13-15) Yog peb xyaum ua neeg siab dawb siab zoo thiab pab lwm tus ces peb yuav yog hom neeg uas Yehauvas txais los nrog nws sib raug zoo mus ib txhis.​—Henplais 13:16.

17. Peb ib tug twg muaj feem xyuam ua dab tsi? (Mathais 7:13, 14)

¹⁷ Peb puas muaj ib feem yuav tau txoj sia ntev dhawv mus ib txhis? Yehauvas yeej qhib qhov rooj lug rau peb. Yog li ntawd, peb yuav tau xaiv seb peb puas yeem taug txoj kev uas yuav coj mus tau txoj sia. (Nyeem Mathais 7:13, 14.) Lub neej nyob mus ib txhis yuav zoo li cas xwb? Nyob rau zaj kawm txuas ntxiv tom ntej mam li piav txog seb zoo li cas.