Koj Puas Paub?
Cov thwv cib hauv lub nroog Npanpiloos qhia tau li cas tias tej lus hauv phau Vajlugkub muaj tseeb tiag?
COV neeg khawb tej khoom qub nrhiav pom cov thwv cib uas nyob txheej puag thaum ub hauv lub nroog Npanpiloos. Muaj ib tug neeg khawb tej khoom qub hu ua Lanpaw Khaudeves (Robert Koldewey) hais tias tej thwv cib no yog siv qhov txos los ncu “nraum lub nroog sab nraud xwv thiaj muaj av nplaum thiab taws rauv los plhov rau.”
Nyob rau yav txheej thaum ub hauv lub nroog Npanpiloos, cov nom tswv siv tej qhov txos los ua tej yam tsis zoo. Muaj ib tug xib hwb npe hu ua Phos Alees Npilus (Paul-Alain Beaulieu) paub txog cov neeg Axilias tej keeb kwm hais tias: “Cov neeg Npanpiloos sau tseg tias lawv tus vaj ntxwv muab cov neeg tsis mloog nws lus thiab cov tsis hwm tej yam lawv saib rau nqi pov rau hauv qhov txos.” Xws li muaj ib tug sau tseg txij thaum Vaj Ntxwv Nenpukajnexales lub caij hais tias: “Muab lawv ua kom puas tsuaj, hlawv lawv, ci lawv, . . . ua kiag kom lawv siav kiag hauv qhov txos . . . ua kom ncho pa lug, muab lawv thawb rau hauv qhov cub kom lawv tuag kiag.”
Qhov no ua rau cov uas tau nyeem phau Vajlugkub ras txog Daniyees tshooj 3. Nyob rau tshooj ntawd, Vaj Ntxwv Nenpukajnexales tau ua ib tug mlom kub loj heev rau ntawm lub tiaj Dulas sab nraum lub nroog Npanpiloos. Thaum peb tug hluas uas yog neeg Henplais hu ua Sadalas, Mesakas thiab Anpenekaus tsis kam pe tus mlom ntawd, Nenpukajnexales npau taws vog thiab hais kom muab lub qhov txos rauv “cig hlob dua qub xya npaug ntxiv.” Ces nws hais kom lawv muab cov hluas “pov rau hauv.” Tiam sis muaj ib tug tub txib saum ntuj ceeb tsheej los cawm cov hluas ntawd dim.—Daniyees 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Ib lub thwv cib uas muaj Nenpukajnexales lub npe nias rau
Cov thwv cib uas nrhiav tau nyob hauv Npanpiloos qhia tias tej uas hais nyob hauv phau Vajlugkub yeej muaj tseeb tiag. Nyob rau ntawm cov thwv cib ib txhia sau qhuas txog tus vaj ntxwv. Muaj ib qho sau hais tias: “Nenpukajnexales yog Npanpiloos tus Vaj Ntxwv . . . Kuv yog tus muaj hwj chim thiab tsa muaj lub vaj loog no . . . Thov kom kuv kav mus ib txhis.” Cov lus sau tseg no hais tau muaj ntsis sib xws li cov lus sau tseg nyob rau hauv Daniyees 4:30 thaum Nenpukajnexales khav txog nws tus kheej tias: “Lub nroog Npanpiloos no yog lub nroog uas loj kawg li. Kuv tsim lub nroog no ua kuv lub tuamceeb nroog kom sawvdaws thiaj li pom kuv lub hwjchim, kuv lub meejmom thiab kuv lub koob lub npe.”