Koj Puas Paub?

Ua li cas peb thiaj paub tias nkauj yog ib yam tseem ceeb hauv cov Ixayees lub neej?

COV Ixayees nyiam mloog nkauj heev. Nyob hauv phau Vajlugkub piav txog tej tug uas ntaus nkauj thiab hu nkauj. Ib feem kaum ntawm cov nqe Vajlugkub yog nkauj xwb. Xws li Phau Ntawv Nkauj, Xalumoos Tej Nkauj, thiab Nkauj Quaj Ntsuag. Muaj ib phau ntawv uas hais txog neeg lub neej hauv phau Vajlugkub. Phau ntawv ntawd hais tias nyob hauv phau Vajlugkub muaj ntau zaus cov Ixayees yeej ntaus nkauj thiab hu nkauj thaum lawv ua ub ua no.

Lawv yeej ntaus nkauj thiab hu nkauj txhua txhua hnub. Cov Ixayees ntaus nkauj thiab hu nkauj los piav txog tej yam uas nyob hauv lawv nruab siab. (Yaxayas 30:29) Cov poj niam nyiam npuaj nruas, hu nkauj, thiab dhia seev cev thaum xaiv tsa vaj ntxwv, ua koob tsheej thiab yeej tsov rog. (Cov Thawjtswj 11:34; 1 Xamuyees 18:6, 7; 1 Vajntxwv 1:39, 40) Tsis tas li ntawd, cov Ixayees kuj hu nkauj thaum muaj kev quaj ntsuag. (2 Xwmtxheej Vajntxwv 35:25) Tej no yeej qhia tias cov Ixayees nyiam nkauj kawg nkaus li.

Cov Ixayees tej vaj ntxwv yeej nyiam mloog nkauj. Vaj Ntxwv Xa-ules coj Daviv tuaj ntaus nkauj rau nws mloog hauv nws lub yeej. (1 Xamuyees 16:18, 23) Tom qab no thaum Daviv los ua vaj ntxwv nws tsim tsa kom muaj tej twj ntaus nkauj, nws sau nkauj, thiab tsa kom muaj neeg ntaus nkauj ntawm Yehauvas lub tuam tsev. (2 Xwmtxheej Vajntxwv 7:6; Amaus 6:5) Vaj Ntxwv Xalaumoos muaj cov tub thiab ntxhais hu nkauj hauv nws lub yeej.​—Tej Lus Qhia 2:8.

Cov Ixayees siv nkauj thaum lawv teev tiam Yehauvas. Muaj 4,000 leej txiv neej ntaus nkauj ntawm lub tuam tsev hauv lub nroog Yeluxalees. (1 Xwmtxheej Vajntxwv 23:5) Lawv npuaj nruas tooj liab, tshuab raj xyu, ntaus nkauj nog ncas me thiab ntaus nkauj nog ncas loj. (2 Xwmtxheej Vajntxwv 5:12) Tiam sis tsis yog lawv xwb thiaj li siv nkauj thaum teev tiam Yehauvas. Muaj coob leej ntau tus Ixayees hu nkauj thaum lawv tab tom taug kev tuaj mus ua tej koob tsheej hauv Yeluxalees. Tej nkauj no hu ua Tej Nkauj Hu Nce Mus. (Phau Ntawv Nkauj 120-134) Tsis tas li ntawd raws li cov Yudais sau tseg, cov Ixayees hu cov nkauj hauv Phau Ntawv Nkauja thaum lawv ua Kev Cai Hla Dhau.

Niaj hnub nim no los nkauj yeej tseem ceeb heev rau Vajtswv cov tib neeg. (Yakaunpaus 5:13) Peb hu nkauj qhuas Yehauvas. (Efexus 5:19) Thaum peb hu nkauj rau Yehauvas ua ke, pab kom peb yim huab sib raug zoo. (Kaulauxais 3:16) Tsis li ntawd, tej nkauj ntawd pab kom peb thev taus tej teeb meem uas peb raug. (Tes Hauj Lwm 16:25) Nkauj yog ib yam uas qhia tias peb muaj kev ntseeg rau Yehauvas thiab peb hlub nws.