Nrhiav Ib Qho Chaw Zoo Kawm Vajlugkub

Cov ntsiab lus no yuav pab kom koj kawm tau Vajlugkub zoo dua:

• Nrhiav ib qho chaw zoo kawm. Mus kawm rau ntawm ib qho chaw uas muab tu du lug thiab muaj teeb taws pom kev lam lug. Koj zaum tau ntawm rooj los sis ib qho chaw zoo kawm nraum zoov.

• Nrhiav ib qho chaw ntsiag to. Yexus thov Vajtswv “thaum tsis tau kaj ntug” thiab ntawm qhov “chaw uas tsis muaj neeg li.” (Malakaus 1:35) Yog tsis muaj chaw nyob ntsiag to, hais rau koj tsev neeg los sis cov neeg uas nrog koj nyob paub hais tias koj yuav kawm Vajlugkub rau lub sij hawm twg, lawv thiaj tsis ua tej yam los mus tab kaum koj lub sij hawm.

• Tsis txhob cia dab tsi tab kaum. Yog koj siv xov tooj los sis lub twj ntawm tes los kawm ces muab lub suab kaw. Yog koj ho xav tau ib yam uas koj yuav ua, cia li muab sau tseg kom koj thiaj nco ntsoov mus ua tom qab koj kawm tag. Yog koj xav tsis tau, so me ntsis mus taug kev thiab ncab dua.