Tej Koj Kawm Thaum Xub Thawj Puas Tseem Pab Tau Koj?

1. Thaum koj nyuam qhuav pib kawm Vajlugkub, tej koj kawm ho hloov tau koj lub neej li cas?

TEJ yam uas peb kawm hauv phau Vajlugkub thaum chiv thawj yeej hloov tau peb lub neej ntau heev. Xws li peb kawm tias Vajtswv lub npe hu ua Yehauvas ces peb txawm pib muaj kev sib raug zoo nrog nws zuj zus. (Yaxayas 42:8) Thaum peb kawm tau qhov tseeb tias cov tuag zoo li cas tiag ces peb tsis nco qab txob tsis nco qab txhawj nyob tsam cov uas peb hlub tshua es tau nruam sim lawm raug kev txom nyem. (Tej Lus Qhia 9:10) Ntxiv ntawd, thaum peb kawm tau tias Vajtswv cog lus yuav muab lub ntiaj teb no kho ua ib lub Vaj Kaj Siab ces peb tsis nco qab txhawj tias lub neej tom ntej yuav zoo li cas. Peb tso siab plhuav tias peb yuav ua neej nyob mus ib txhis, tsis yog nyob txog 70 los sis 80 xyoo xwb.​—Phau Ntawv Nkauj 37:29; 90:10.

2. Vim li cas Petus ho xav txhawb cov uas ib txwm ntseeg Yehauvas kom xav txog tej yam uas lawv tau kawm thaum xub thawj lawm? (2 Petus 1:12, 13)

² Peb yuav tau nco ntsoov txog tej uas peb kawm thaum xub thawj hauv phau Vajlugkub tias tseem ceeb npaum li cas. Tus tub txib Petus tsab ntawv ob uas nws xa rau cov Khixatias, lawv yeej ib txwm “muab siab rau ua raws li Vajtswv txojlus lawm.” (Nyeem 2 Petus 1:12, 13.) Tiam sis nyob rau lub sij hawm ntawd, txawm muaj cov neeg siab phem xav qhia tej yam tsis tseeb kom cov kwv tij nkauj muam tso Yehauvas tseg. (2 Petus 2:1-3) Yog li ntawd, Petus thiaj xav txhawb cov kwv tij nkauj muam lub zog kom tsis txhob mloog tej lus dag ntawd. Nws thiaj rov txhawb kom lawv xav txog tej yam uas lawv kawm thaum xub thawj vim tej kev cob qhia ntawd yuav pab kom lawv rau siab ntso teev tiam Yehauvas.

3. Piav seb vim li cas zoo rau txhua tus Khixatias xav txog tej uas lawv xub kawm thaum chiv thawj hauv phau Vajlugkub.

³ Txawm peb twb ntseeg Yehauvas tau ntev loo lawm los tej peb kawm thaum xub thawj hauv phau Vajlugkub haj tseem pab tau peb. Muab ua piv txwv li no tias: Muaj ib tug keej ua zaub mov heev hos ib tug nyuam qhuav xyaum ua zaub ua mov noj. Nkawd ob leeg siv tib co khoom los ua tib hom zaub mov noj xwb. Tiam sis tus ib txwm txawj ua zaub mov noj, tej zaum nws yuav siv cov khoom los ua ntau yam zaub mov noj thiab. Zoo ib yam li ntawd, cov uas teev tiam Yehauvas tau ntev loo kuj txawj muab cov nqe Vajlugkub coj los siv rau ntau fab dua li cov uas nyuam qhuav kawm Vajlugkub. Vim li cas ho hais li ntawd? Rau qhov thaum peb teev tiam Yehauvas tau ntev loo lawm, peb kuj tau ua ntau yam hauj lwm rau Yehauvas thiab ntsib ntau yam txij thaum peb ua kev cai raus dej los. Ces zoo rau peb rov qab xav txog tej yam thaum xub thawj peb kawm vim qhov peb ua li no yuav pab kom peb huab yam txawj muab cov nqe Vajlugkub siv rau ntau fab. Cia peb mam mus kawm seb cov uas teev tiam Yehauvas tau ntev loo lawm yuav khaws tau li cas los ntawm peb yam uas lawv tau kawm thaum xub thawj.

YEHAUVAS YOG TUS KWS TSIM

4. Txij thaum koj paub tias Yehauvas yog tus Tswv Tsim ho pab tau koj lub neej li cas?

⁴ “Vajtswv yog tus tsim ib puas tsav yam.” (Henplais 3:4) Peb paub hais tias muaj ib tug ntse heev thiab muaj zog heev tsim lub ntiaj teb no thiab tej yam ciaj sia huv tib si. Nws tsim peb ces nws yeej paub peb tshab tshab. Nws yeej txhawj txog peb thiab nws paub qhov twg zoo rau peb. Qhov uas peb paub tias Yehauvas yog tus Tswv Tsim yam li no hloov tau peb lub neej lawm hov ntau thiab peb ua neej muaj ntsiab rau.

5. Dab tsi ho pab tau kom peb ua neeg txo hwj chim? (Yaxayas 45:9-12)

⁵ Qhov uas peb paub tias Yehauvas yog tus Tswv Tsim yeej pab tau kom peb ua neeg txo hwj chim. Tom qab Yauj pheej hais los daws nws zaj, Yehauvas thiaj li qhia rau nws kom nws nco ntsoov tias Yehauvas yog tus kws tsim ib puas tsav yam. (Yauj 38:1-4) Qhov no pab tau kom Yauj pom tias Vajtswv txoj kev xav yeej siab dua neeg txoj kev xav. Vim li ntawd, tom qab no Yaxayas thiaj li sau tias: “Cov av nplaum puas nug tus uas puab lub laujkaub hais tias, ‘Koj ua dabtsi?’”​—Nyeem Yaxayas 45:9-12.

6. Thaum twg zoo rau peb xav txog qhov uas Yehauvas txawj ntse thiab muaj hwj chim tsim txhua tsav yam? (Saib cov duab.)

⁶ Thaum ib tug twg teev tiam Yehauvas tau ntau ntau xyoo lawm, tej zaud nws yuav xav tias nws twb paub txaus lawm tsis tas nws yuav thov Yehauvas pab thiab tsis tas nws yuav siv phau Vajlugkub. (Yauj 37:23, 24) Vim li cas ho zoo rau nws xav txog tus kws tsim tias tus kws tsim yuav ntse thiab muaj hwj chim ua luaj li? (Yaxayas 40:22; 55:8, 9) Qhov uas nws xav li no yuav pab kom nws xam pom tias nws yuav tau txo hwj chim vim Yehauvas txoj kev xav siab dua li nws txoj kev xav.

7. Lahelam tau ua dab tsi kom nws thiaj li yoog tau raws li lub koom haum qhia?

⁷ Nyob rau teb chaws Xalauvenia (Slovenia) muaj ib tug muam npe hu ua Lahelam (Rahela) xam pom tias thaum nws xav txog tus Tswv Tsim, pab tau nws kom mloog tej yam uas hloov hauv lub koom haum. Nws hais tias: “Muaj tej thaud tsis yooj yim rau kuv mloog cov uas coj lus. Xws li tom qab kuv saib Pab Uas Ntaus Thawj Txoj Xov Xwm 8 Xyoo 2023 tag, kuv ntseeg tsis tau tias cov kwv tij cia li tseg hwj txwv thiab ho tham lus qhuab qhia. Yog li ntawd, kuv thiaj li thov Yehauvas pab kom kuv hloov kuv txoj kev xav.” Lahelam thiaj li xam pom tias Yehauvas yog tus kws tsim ntuj tsim teb ces nws yeej paub hais tias nws yuav coj nws lub koom haum li cas rau li cas. Yog tias muaj ib yam twg ho nyuaj rau koj hloov kom ua raws li Yehauvas lub koom haum qhia, tsis txhob ua siab deb, cia li txo hwj chim thiab xav tias tus kws tsim yeej ntse thiab muaj hwj chim dua.​—Loos 11:33-36.

VIM LI CAS VAJTSWV HO CIA MUAJ KEV TXOM NYEM?

8. Qhov uas paub tias vim li cas Vajtswv cia muaj kev txom nyem pab tau peb li cas?

⁸ Vim li cas Vajtswv ho cia muaj kev txom nyem? Muaj ib txhia tsis paub tias yog vim li cas ces lawv chim rau Vajtswv los sis lawv ho xav hais tias tsis muaj Vajtswv nyob qhov twg. (Pajlug 19:3) Tiam sis peb tsis ntseeg li ntawd vim peb twb kawm los ntawm phau Vajlugkub tias peb saws kev txaug kev txhaum peb thiaj li ntsib kev txom nyem, tsis yog Yehauvas ua rau peb. Tsis tas li ntawd, peb kuj kawm tias qhov uas Yehauvas ua siab ntev kuj pab tau coob leej ntau tus tib neeg los paub nws thiab yav tom ntej nws yuav muab tej kev txom nyem tshem tawm mus ib txhis. (2 Petus 3:9, 15) Qhov uas koj paub li no thiaj nplig tau koj thiab rub koj los nrog Yehauvas sib raug zoo.

9. Lub caij twg zoo rau peb xav txog tias vim li cas Yehauvas ho cia muaj kev txom nyem?

⁹ Cheem peb tseem tos Yehauvas los muab tej kev txom nyem rhuav tshem, peb yuav tau ua siab ntev. Tiam sis thaum peb muaj ib tug uas peb hlub tau tag sim neej, los sis thaum peb tsev neeg muaj kev ntxhov siab los sis raug luag ua saib tsis taus ces tej zaum peb yuav xav hais tias vim li cas Yehauvas yuav laug sij hawm ntev ua luaj. (Hanpakus 1:2, 3) Tej lub sij hawm zoo li no peb yuav tau ua zoo xav seb vim li cas Yehauvas ho cia cov ncaj ncees raug kev nyuaj siab.a (Phau Ntawv Nkauj 34:19) Tsis tas li ntawd, zoo rau peb xav txog Yehauvas lub ntsiab uas nws yuav rhuav tshem kev txom nyem mus ib txhis.

10. Dab tsi ho pab tau kom Es lub siab tus thaum nws niam tag sim neej?

¹⁰ Qhov uas peb paub vim li cas Vajtswv cia muaj kev txom nyem yuav pab kom peb thev taus. Nyob rau lub pov txwv Maiyauj (Mayotte), muaj ib tug muam npe hu ua Es (Anne) tau hais tias: “Ob peb xyoos dhau los lawd, kuv niam tau tag sim neej mas ua rau kuv ntsoos ntsoos. Kuv pheej rov hais rau kuv tus kheej hais tias tsis yog tim Yehauvas thiaj muaj tej kev txom nyem no. Nws yeej tos tsis hnyu yuav muab txhua yam kev txom nyem tshem tawm mus thiab tsa cov uas peb hlub tshua sawv rov qab los. Qhov uas kuv pheej xav li no pab tau kom kuv muaj kev kaj siab.”

11. Qhov uas peb paub vim li cas Vajtswv cia muaj kev txom nyem pab tau kom peb mus tshaj tawm txoj xov zoo tsis tseg tsis tu li cas?

¹¹ Qhov uas peb paub vim li cas Vajtswv cia muaj kev txom nyem pab kom peb rau siab ntso mus tshaj tawm txoj xov zoo. Tom qab Petus qhia tias Yehauvas ua siab ntev vim nws xav kom tib neeg hloov dua siab tshiab thiab dim, Petus thiaj li sau li no tias: “Yog li ntawd nej yuav tsum ua nej lub neej zoo li cas? Tsimnyog nej ua nej lub neej kom dawbhuv thiab hwm Vajtswv.” (2 Petus 3:11) Ib yam uas peb ua tau hauv peb lub neej los qhia tias peb hwm Vajtswv yog mus tshaj tawm txoj xov zoo. Peb hlub tib neeg ib yam li Yehauvas hlub thiab xav kom lawv nyob rau hauv lub qab ntuj tshiab. Yehauvas muab lub cij fim rau cov tib neeg uas nyob rau ntawm koj zej zog kom los teev tiam nws. Koj tau ib qho txiaj ntsig zoo kawg li uas tau ua hauj lwm rau Vajtswv thiab mus pab tib neeg kom coob npaum li coob tau los kawm txog nws ua ntej lub sim ceeb no kawg!​—1 Kauleethaus 3:9.

PEB NYOB RAU TIAM KAWG LAWM

12. Qhov uas peb paub tias peb nyob rau tiam kawg lawm tiag pab tau peb li cas?

¹² Nyob hauv phau Vajlugkub qhia tias nyob rau tiam kawg tib neeg yuav zoo li cas. (2 Timautes 3:1-5) Thaum peb saib tej neeg nyob ib ncig peb ces peb yuav pom tau tias tab tom muaj raws li zaj faj lem ntawd. Thaum peb pom tib neeg tej cwj pwm phem zuj zus ces peb yim huab ntseeg tias tej uas hais hauv phau Vajlugkub yeej muaj tiag tiag li.​—2 Timautes 3:13-15.

13. Yexus zaj lus piv txwv hauv Lukas 12:15-21 pab tau peb li cas?

¹³ Qhov uas peb paub tias peb nyob rau tiam kawg lawm pab kom peb siv peb lub sij hawm kom muaj nuj nqis. Cia peb mus kawm txog Yexus zaj lus piv txwv uas nyob hauv Lukas 12:15-21. (Nyeem.) Vim li cas ho muab tus yawg nplua nuj tis hu ua “ruam”? Tos hu li no los tsis yog vim nws muaj txiag nplua nuj tiam sis vim nws siv nws lub sij hawm tsis muaj nuj nqis. Nws “khaws ntau yam muaj nqis rau nws tus kheej, tiam sis Vajtswv tsis suav tias nws nplua nuj.” Vim li cas ho hais tias tus yawg tsis txawj txiav txim? Vim Vajtswv hais rau nws tias: “Hmo no koj txoj sia twb yuav tu.” Niaj hnub nim no lub sim ceeb no tab tom yuav kawg zuj zus, zoo rau peb rov tshuaj peb tus kheej li no tias: ‘Tej hom phiaj uas kuv npaj tseg puas qhia tias kuv siv kuv lub sij hawm kom muaj nuj nqis? Ua li kuv ho pab kom kuv cov me nyuam npaj tej hom phiaj twg? Kuv puas siv kuv lub dag lub zog, sij hawm, thiab nyiaj txiag los mus txhawb nqa kuv tus kheej los sis kuv yuav khaws tej yam uas muaj nqis rau saum ntuj ceeb tsheej?’

14. Miki tus yam ntawv pab tau peb kom xam pom tias peb nyob rau tiam kawg li cas?

¹⁴ Yog peb ua tib zoo xav txog tias peb nyob rau tiam kawg lawm ces peb yuav ua tib zoo txiav txim siab ua peb lub neej. Muaj ib tug muam npe hu ua Miki hais tias: “Thaum kuv kawm ntawv tiav, kuv xav hais tias kuv yuav mus kawm ntawv qeb siab kom thiaj tau ib txoj hauj lwm kawm txog tsiaj txhu. Tsis tas li ntawd, kuv kuj xav ua ib tug tho kev thiab xav tsiv mus nyob rau tej thaj tsam uas tsis muaj cov Tim Khawv coob pes tsawg. Thaum cov kwv tij nkauj muam uas paub tab hnov txog tias kuv xav ua li ntawd, lawv kuj txhawb kom kuv muab ua tib zoo xav. Lawv kuj txhawb kuv tias tshuav tsis ntev lub sim ceeb no twb yuav kawg, thiab thaum txog lub qab ntuj tshiab kuv xav kawm txog pes tsawg tus tsiaj rau thaum ntawd los yeej tau. Kuv thiaj txiav txim siab mus kawm lub tsev kawm ntawv uas kawm luv luv kom kuv tau hauj lwm ua xwb. Tom qab ntawd, kuv kuj nrhiav tau ib txoj hauj lwm kom pab kuv ua ib tug tho kev ces kuv txawm tsiv mus nyob rau Ekadaus (Ecuador) uas yog lub teb chaws uas tsis muaj Tim Khawv coob pes tsawg.” Tam sim no Miki tus txiv nkawd ua hauj lwm saib xyuas thaj tsam rau lub teb chaws ntawd.

15. Yakaunpaus tus yam ntxwv pab tau kom peb rau siab ntso mus qhia rau cov uas tsis tau los ntseeg Yehauvas li cas? (Saib cov duab.)

¹⁵ Tsis txhob cia qhov uas tib neeg tsis nyiam txoj xov zoo txo tau peb lub zog. Peb tsis paub thaum twg lawv yuav hloov siab, zoo ib yam li Yexus tus kwv Yakaunpaus. Nws yeej pom Yexus loj hlob, ua tus Mexiyas, thiab txawj qhia lwm tus tshaj plaws. Txawm li ntawd los Yakaunpaus tsis kam raws Yexus qab. Twb yog tom qab Yexus sawv hauv qhov tuag rov qab los Yakaunpaus mam li los ua ib tug thwj tim uas mob siab tshaj tawm txoj xov zoo!b (Yauhas 7:5; Kalatias 2:9) Yog li ntawd, tseem ceeb heev rau peb mus qhia rau peb tej nruab ze uas tseem tsis tau los ntseeg Yehauvas thiab cov uas tsis kam mloog peb qhia txoj xov zoo yav tag los lawm. Nco ntsoov peb nyob rau tiam kawg lawm ces peb yuav tau maj nrawm nroos mus qhia txoj xov zoo rau lawv paub. Tej lus uas peb hais rau lawv tam sim ntawd tej zaum muaj ib hnub yuav ua rau lawv ras txog, xws li tej zaum kuj yuav yog thaum muaj txoj kev txom nyem loj kawg nkaus.c

RIS TXIAJ NTSIG RAU TEJ YEHAUVAS QHIA PEB

16. Tej uas Yehauvas qhia pab tau koj li cas? (Saib lub ntsiab “Siv Mus Pab Lwm Tus.”)

¹⁶ Tej ntaub ntawv thiab yeeb yaj kiab uas Yehauvas lub koom haum tau npaj feem ntau yog npaj rau cov uas tsuas paub Vajlugkub qho me ntsis xwb. Xws li zaj lus qhuab qhia rau txoj kev sib txoos 2, qho yam ntaub ntawv thiab yeeb yaj kiab hauv lub vej xaij jw.org, thiab Phau Tsom Faj tseb tawm thiab phau Tsim Dheev! yog sau rau cov uas tsis yog Yehauvas Cov Tim Khawv. Txawm li ntawd los tej ntaub ntawv thiab yeeb yaj kiab ntawd haj tseem pab tau peb. Yog peb nyeem thiab saib ces yuav ua rau kom peb yim huab hlub Yehauvas, ntseeg tej uas hais nyob hauv phau Vajlugkub, thiab pab peb kom txawj mus qhia qhov tseeb rau lwm tus.​—Phau Ntawv Nkauj 19:7.

17. Lub caij twg zoo rau peb xav txog tej yam uas peb xub kawm hauv phau Vajlugkub?

¹⁷ Thaum muaj ib yam uas peb ib txwm ntseeg es ho muab kho dua tshiab kom peb nkag siab mas ua rau peb zoo siab heev. Txawm li ntawd los peb yeej ris txiaj ntsig rau tej uas peb kawm thaum xub thawj vim yeej pab tau peb los paub qhov tseeb. Muaj tej thaud peb lub siab yuav rub kom peb ua raws li tej peb xav dua li mloog Yehauvas lub koom haum qhia los nco ntsoov tias tus Tswv Tsim yog tus coj nws lub koom haum ces peb yuav tau txo hwj chim. Thaum peb los sis ib tug tug uas peb hlub tau thev kev sim siab, peb yuav tau ua siab ntev thiab ua zoo xav tias vim li cas Yehauvas thiaj li cia muaj kev txom nyem nyuaj siab. Thaum peb xav hauv nruab siab tias peb yuav siv peb lub sij hawm thiab tej yam peb muaj li cas, peb yuav tau nco ntsoov tias peb nyob rau tiam kawg lawm. Cia tej uas Yehauvas qhia txhawb, rub, thiab tsav tswv yim rau peb mus li.