14 Kavakava tauna be ena lalona ai ia gwau:

“Iehova be ia noho lasi.”+

Kavakava taudia edia kara be gageva, bona kara dika rohoroho idia karaia,

Idia ta be kara namo ia karaia lasi.+

 2 To Iehova be guba amo taunimanima ia itaia noho,

Ia ura diba bema idia ta be mai ena laloparara, eiava bema idia ta be Iehova ena heduru ia tahua noho.+

 3 Idia ibounai be kara namodia idia rakatania vadaeni,+

Idia ibounai be kara gageva taudia.

Idia ta be kara namo ia karaia lasi,

Lasi bona lasi momokani.

 4 Inai kerere karaia taudia idia laloparara lasi, ani?

Idia ese Dirava ena taunimanima idia haorea noho, paraoa idia ania ore bamona.

Idia be Iehova ena ladana dekenai idia boiboi lasi.

 5 To idia be do idia gari bada,+

Badina Iehova be kara maoromaoro taudia ida ia noho.

 6 Umui kerere karaia taudia be ladana maragi tauna ena palani umui hadikaia toho,

To Iehova be iena heau mauri gabuna.+

 7 Israela hamauria dalana be Siona amo do ia mai be namo!+

Iehova ese ena taunimanima, idia abia lao taudia ia haboua lou neganai,

Iakobo ia moale be namo, Israela ia moale bada be namo.