Sivarai Ginigunana

14 Turo ena king Hirama+ ese Davida dekenai gwaukau taudia ia siaia, bona sida audia, kapenta taudia, bona nadi koroa taudia ia siaia danu, Davida ena ruma idia haginia totona.+ 2 Davida ia diba Iehova ese ia be Israela ena king ai ia halaoa vadaeni bona ena taunimanima,+ Israela taudia totona Ia ese Davida ena lohia dalana ia hanamoa bada.+

3 Davida be Ierusalema ai hahine momo ia adavaia,+ bona Davida be natudia memero bona kekeni momo edia tamana ai ia lao.+ 4 Inai be iena natudia, Ierusalema ai idia vara natudia edia ladana:+ Samua, Sobaba, Natana,+ Solomona,+ 5 Ibihara, Elisua, Elepelete, 6 Noga, Nepega, Iapia, 7 Elisama, Beliada, bona Elipelete.

8 Filistia taudia idia kamonai, Davida be idia horoa Israela ena king ai ia lao totona,+ vadaeni Filistia taudia ibounai idia daekau lao Davida idia tahua totona.+ Davida be unai ia kamonai neganai, idia tuari henia totona ia lao. 9 Bena Filistia taudia idia vareai bona Repaima Kourana dekenai idia noho taudia idia tuari henia matamaia.+ 10 Davida ese Dirava ia nanadaia: “Filistia taudia tuari henia totona do lau lao, a? Oi ese idia be egu imana dekenai do oi atoa, a?” Unai neganai Iehova be ia dekenai ia gwau: “Oi daekau lao, badina lau ese momokani Filistia taudia be emu imana dekenai do lau atoa.”+ 11 Vadaeni Davida be Bala-perasimi dekenai ia lao,+ bona unuseniai ia ese idia ia alaia mase. Bena ia gwau: “Dirava momokanina be egu vairanai ia lao, ia aru haraga ranuna bamona, bona egu inai taudia ia hadikaia ore.” Unai dainai unai gabu ena ladana ia hatoa Bala-perasimi.* 12 Filistia taudia ese edia dirava be unuseni idia rakatanidia, bona Davida ena oda hegeregerena, lahi dekenai idia gabua.+

13 Gabeai Filistia taudia be idia daekau lao lou bona koura* ai idia noho taudia idia tuari henia.+ 14 Davida ese Dirava ia nanadaia lou, to Dirava momokanina be ia dekenai ia gwau: “Idia dekenai maoromaoro oi lao lasi. To edia murina kahana amo oi lao, unai amo baka audia vairanai idia oi tuari henia.+ 15 Baka audia edia ataiai amo aena regena oi kamonai neganai, namona be oi haraga, badina lau, Dirava momokanina, be oi vairanai do lau lao Filistia ena tuari taudia lau alaia mase totona.”+ 16 Vadaeni Davida be Dirava momokani ese ia oda henia hegeregerena ia kara,+ bona Filistia taudia ia alaia mase, Geba amo ela bona Gesere dekenai.+ 17 Bona tano ibounai dekenai Davida ena ladana ia bada ia lao, bona Iehova dainai bese ibounai ese Davida idia gari henia.+