Samuela Ginigunana

28 Unai nega lalodiai, Filistia taudia ese edia tuari taudia idia haboua Israela taudia tuari henidia totona.+ Unai dainai Akisi be Davida dekenai ia gwau: “Oi diba vadaeni, oi bona emu tatau be lau ida tuari totona do ita lao.”+ 2 Unai neganai Davida be Akisi dekenai ia gwau: “Emu hesiai tauna ese do ia karaia gauna oi diba vadaeni.” Bena Akisi be Davida dekenai ia gwau: “Unai dainai oi do lau abia hidi, bona hanaihanai oi be lauegu gima tauna.”+

3 Samuela ia mase vadaeni, bona Israela taudia ibounai be ia totona idia taitai bona ia be ena siti Rama dekenai idia guria.+ Bena Saulo ese mase taudia edia lauma idia hereva henia taudia bona vaira nega gwauraia taudia be Israela tanona amo ia kokidia.+

4 Filistia taudia idia haboua bona idia lao bona Suneme dekenai kamepa idia haginia.+ Vadaeni Saulo ese Israela ena tuari taudia ia haboudia, bona Gileboa dekenai kamepa idia haginia.+ 5 Saulo be Filistia taudia edia kamepa ia itaia neganai, ia gari dikadika.+ 6 Ena be Saulo ese Iehova dekenai ia noinoi,+ to Iehova ese nihi lalonai eiava Urima*+ amo eiava peroveta taudia amo Saulo ia haere henia lasi. 7 Dokonai, Saulo be ena hesiai taudia dekenai ia gwau: “Mase taudia edia lauma ia hereva henia hahine ta be lau totona umui tahua,+ bona do lau lao ia lau itaia.” Ena hesiai taudia idia gwau: “Hahine ta be Ene-doro ai ia noho, ia be mase taudia edia lauma ia hereva henia hahinena.”+

8 Vadaeni Saulo ese ena toana ia haidaua bona dabua ma haida ia atoa bona hanuaboi ai ia bona ena tatau rua be unai hahine dekenai idia lao. Saulo ia gwau: “Mase taudia oi hereva henia diba dainai, mani vaira nega be lau dekenai oi gwauraia,+ bona ena ladana lau gwauraia tauna be lau dekenai oi hahedinaraia.” 9 To unai hahine be ia dekenai ia gwau: “Saulo ia karaia karana oi diba be namo. Ia ese inai tano amo mase taudia edia lauma idia hereva henia taudia bona vaira nega gwauraia taudia ia kokidia.+ Vadaeni dahaka dainai oi ura lau oi koia oi hamasea totona?”+ 10 Saulo be ia dekenai Iehova ena ladanai ia gwauhamata, ia gwau: “Ia mauri noho Diravana, Iehova, ena ladana ai oi lau hamaoroa momokani, oi be inai kara dainai panisi do oi abia lasi.” 11 Unai neganai unai hahine ia gwau: “Oi totona daika do lau boiria?” Ia gwau: “Lau totona Samuela oi boiria.” 12 Vadaeni unai hahine be “Samuela”* ia itaia neganai,+ ia boiboi badabada bona Saulo dekenai ia gwau: “Dahaka dainai lau oi koia? Oi be Saulo!” 13 King be ia dekenai ia gwau: “Oi gari lasi, to dahaka oi itaia?” Ia be Saulo dekenai ia gwau: “Lau itaia tauna be dirava ta bamona bona tano amo ia daekau mai noho.” 14 Bena maoromaoro unai hahine ia nanadaia: “Unai tauna ena toana be edena bamona?” Hahine ia gwau: “Ia daekau mai noho tauna be tau burukana bona ia be imana lasi dabua ia hahedokilaia.”+ Unai neganai Saulo ia laloparara unai be “Samuela,” bena ia tui diho bona ena vairana be tano dekenai ia atoa diho.

15 Vadaeni “Samuela” be Saulo dekenai ia gwau: “Dahaka dainai lau oi hanogaia bona oi boiria mai?” Saulo ia gwau: “Lau be dika bada lalonai lau noho. Filistia taudia be lau idia tuari henia noho bona Dirava be lau ia rakatania vadaeni bona lau ia haere henia lasi, peroveta taudia amo eiava nihi amo,+ unai dainai oi lau boiria, lau oi hadibaia dahaka do lau karaia.”+

16 Bena “Samuela” ia gwau: “Iehova ese oi ia rakatania+ bona ia be emu inai tauna ai ia lao, vadaeni dahaka dainai lau totona oi henanadai? 17 Iehova be lau amo ia gwauraia herevana do ia hagugurua: Iehova ese basileia be emu imana amo do ia kokia bona emu varavara Davida dekenai do ia henia.+ 18 Badina oi ese Iehova ena gadona oi kamonai henia lasi bona Amaleka taudia dekenai iena badu siahuna oi hahedinaraia lasi,+ unai dainai hari dina Iehova ese oi dekenai inai bamona ia karaia noho. 19 Iehova ese oi bona Israela taudia be Filistia taudia edia imana dekenai do ia atoa,+ bona kerukeru oi+ bona emu natudia+ be lau ida do umui haboua.* Iehova ese Israela taudia edia tuari oreana danu be Filistia taudia edia imana dekenai do ia atoa.”+

20 Vadaeni maoromaoro Saulo be tano dekenai ia moru, badina ia be “Samuela” ena hereva dainai ia gari dikadika. Iena goada ibounai ia ore, badina ia be dina bona hanuaboi lalonai ia aniani lasi. 21 Bena unai hahine ia lao bona ia itaia Saulo ia laloa momo, vadaeni ia dekenai ia gwau: “Lau be oi gwauraia herevana lau badinaia, bona ena be egu mauri lau haboioa diba,+ to oi gwauraia gauna lau karaia. 22 Vadaeni namona be emu hesiai hahinena do ia gwauraia herevana mani oi kamonai. Emu vairanai paraoa sisina lau atoa be namo, bena do oi ania, unai amo goada oi abia bona oi lao.” 23 To ia ura lasi bona ia gwau: “Do lau aniani lasi.” To, iena hesiai taudia bona unai hahine danu ese ia idia hereva henia noho ia aniani totona. Dokonai, idia ia kamonai henia bena tano amo ia toreisi bona pata dekenai ia helai. 24 Unai hahine ena ruma lalonai boromakau natuna namona ta ia noho, vadaeni karaharaga ia alaia, bena paraoa ia abia bona ia hegaegaelaia, bena isti lasi paraoa ia gabua. 25 Bena Saulo bona ena hesiai taudia dekenai ia henia bona idia ania. Unai murinai idia toreisi bona hanuaboi neganai idia lao.+