Sivarai Ginigunana

10 Filistia taudia be Israela taudia idia tuari henia. Bona Israela tuari tatau be Filistia taudia amo idia heau, bona idia momo be Gileboa Ororo ai idia hamasea.+ 2 Filistia taudia be Saulo bona ena natudia memero kahirakahira momokani idia heau lao, bona idia ese Saulo ena natudia memero, Ionatana, Abinadaba, bona Maliki-sua idia aladia mase.+ 3 Tuari ia bada momokani, bona peva gaukaralaia taudia ese Saulo idia pidia bona idia haberoa.+ 4 Bena Saulo be ena kesi huaia tauna dekenai ia gwau: “Emu tuari kaia oi abia bona lau oi alaia, unai amo inai kopina utua lasi tatau ese dagedage dalanai lau do idia kara henia lasi.”+ To ena kesi huaia tauna ia ura lasi, badina ia gari bada. Vadaeni Saulo ese tuari kaia ia abia bona ena latanai ia moru.+ 5 Iena kesi huaia tauna ia itaia Saulo be ia mase neganai, ia danu be ena tuari kaia latanai ia moru bona ia mase. 6 Saulo, ena natudia toi, bona ena bese taudia ibounai idia mase.+ 7 Koura kahanai idia noho Israela taudia ibounai ese Israela tuari tatau idia heau bona Saulo bona ena natudia idia mase ena sivarai idia kamonai neganai, edia siti idia rakatanidia matamaia bona idia heau. Bena Filistia taudia idia mai bona unai siti idia abidia.

8 Murina dinana ai, Filistia taudia be mase taudia edia kohu henaoa totona idia lao neganai, idia itaia Gileboa Ororo ai Saulo bona ena natudia memero idia mase vadaeni.+ 9 Vadaeni Saulo ena kwarana idia utua bona ena tuari kohu idia abia bona Filistia taudia be edia tano ibounai dekenai hereva idia siaia, unai amo unai sivarai be edia kaivakuku bona taunimanima huanai idia gwauraia.+ 10 Bena idia ese ena tuari kohu be edia dirava ena ruma* dekenai idia atoa bona ena kwarana ena turia be Dagona dubu ena haba ai idia kokoa.+

11 Gileada ai idia noho Iabese taudia ibounai+ idia kamonai, Filistia taudia be Saulo dekenai unai idia karaia neganai,+ 12 tuari taudia goadadia ibounai idia toreisi bona Saulo bona ena natudia memero edia mase tauanina idia abia lao. Iabese siti dekenai idia abia lao bona edia turia be unai siti ena au badana ta henunai idia guria,+ bona dina 7 lalonai idia aniani lasi.*

13 Saulo ia mase badina ia ese Iehova ia abidadama henia lasi bona Iehova ena hereva ia badinaia lasi,+ bona danu mase taudia edia lauma ia hereva henia hahinena ta ena heduru ia tahua,+ 14 to Iehova ena heduru ia tahua lasi. Unai dainai Dirava ese ia hamasea bona king dagina be Iese ena natuna mero Davida dekenai ia henia.+