HAMATAMAIA HEREVANA

Buka Helaga be Dirava ena hereva ita ibounai dekenai. Baibel ia Torea Tauna ita diba totona, Baibel ita stadilaia be namo. (Ioane 17:3; 2 Timoteo 3:16) Baibel lalonai, Iehova Dirava ese ena ura taunimanima bona tanobada totona ia hahedinaraia.—Genese 3:15; Apokalupo 21:3, 4.

Baibel ese taunimanima edia mauri ia haidaua diba, buka ma ta be unai bamona lasi. Baibel ese ita ia hagoadaia Iehova ena lalokau bona hebogahisi karadia ita hahedinaraia totona. Taunimanima dekenai helaro ia henia bona ia durudia hisihisi badadia idia haheaukalaia totona. Guna ema bona hari, Baibel ese Dirava ena ura ida idia hegeregere lasi tanobada gaudia ia hahedinaraia.—Salamo 119:105; Heberu 4:12; 1 Ioane 2:15-17.

Guna, Baibel be Heberu, Aramia, bona Grik ai idia hahanaia. Gabeai Baibel ibounai o ena kahana haida be gado 3,000 mai kahana dekenai idia hahanaia. Guna amo ema bona hari, Baibel sibona be gado momo ai idia hahanaia bona taunimanima momo herea ese idia abia. Momokani, Baibel dekenai unai bamona idia karaia be maoro, badina peroveta herevana, ia gwau: “Basileia ena sivarai namona [Baibel ena hereva badana unai] be tanobada ibounai dekenai do idia harorolaia, bese ibounai idia kamonai totona, unai murinai dokona do ia ginidae.”—Mataio 24:14.

Ai abia dae Baibel ena hereva be mai anina bada dainai, emai tahua gauna be toretore gunadia do ai badinaia, bona auka lasi herevadia ai gaukaralaia, unai amo taunimanima ese idia duahia diba. Apendiks ai inai kahadia, “Baibel Hahanaia Dalana Ena Taravatu,” “Inai Baibel Ena Kahana Idauidau,” bona “Baibel Ita Abia Dalana” ese inai Baibel matamata idia hahanaia lalonai idia badinaia taravatudia bona idia karaia senisi idia herevalaia.

Iehova Dirava idia lalokau henia bona tomadiho henia taudia be idia ura idia duahia Baibel ena hereva be ia maoro bona ena anina idia lalopararalaia. (1 Timoteo 2:4) Unai dainai, ai ese inai Baibel be Hiri Motu dekenai ai hahanaia, bona emai ura be New World Translation Baibel be gado momo ai do ai hahanaia. Ai ura bada bona ai guriguri, inai Baibel matamata ese oi, duahia tauna, do ia durua, Dirava do oi tahua, bona do oi davaria totona.—Kara 17:27.