NEHEMIA

1 Hakalaia ena natuna mero Nehemia* ena hereva be inai:+ King* ena lohia lagani namba 20, Kisileve* hua ai, lau be king ia noho gabuna Susa ai lau noho.+ 2 Unai nega ai egu tadikaka Hanani+ bona tatau ma haida be Iuda amo idia mai, bona idia dekenai igui hesiai amo idia heau mauri Iuda taudia oredia edia noho dalana totona lau henanadai,+ bona Ierusalema siti totona danu. 3 Bena idia haere: “Iuda ena provinsi ai idia noho taudia oredia, igui hesiai amo idia roho mauri taudia unai, edia noho be dika bona idia hemarai.+ Ierusalema ena magu idia makohia,+ bona geiti ibounai be lahi amo idia gabua vadaeni.”+

4 Unai hereva lau kamonai neganai, lau helai bona lau tai matamaia, bona dina momo lalonai lau lalohisihisi, bona lau aniani lasi*+ bona guba ena Dirava dekenai lau guriguri noho. 5 Lau gwau: “Iehova, guba ena Dirava e, oi be Dirava badana bona hoa kara badadia oi karaia, oi idia lalokau henia bona emu oda hereva idia badinaia taudia dekenai emu lalokau* oi hahedinaraia noho bona emu gwauhamata oi hagugurua,+ 6 mani emu kara, lau, emu hesiai tauna, oi itaia bona oi kamonai henia bona hari dina lau gwauraia guriguri oi kamonai. Lau be dina bona hanuaboi+ ai emu hesiai taudia, Israela taudia unai, totona lau guriguri noho, bona Israela taudia ese oi vairanai idia karaia kara dika lau gwauraia hedinarai noho. Lau bona egu taunimanima* be ai kara dika vadaeni.+ 7 Ai be emu vairanai ai kara gageva+ badina ai ese emu hesiai tauna Mose amo oi henia oda herevadia, hakaua herevadia, bona taravatu* ai badinaia lasi.+

8 “Mani emu kara, emu hesiai tauna Mose dekenai oi henia sisiba hereva oi laloatao, oi gwau: ‘Bema lau umui badinaia lasi, umui be bese idauidau edia huanai do lau lulua lao.+ 9 To bema lau dekenai umui giroa mai bona egu oda herevadia umui badinaia, ena be umui, egu taunimanima, be tanobada ena daudau gabudia dekenai lau lulua lao, to umui do lau haboua+ bona lau abia hidi gabuna, egu ladana ia noho gabuna unai, dekenai umui do lau mailaia.’+ 10 Idia be emu hesiai taudia bona emu taunimanima, emu siahu bada bona imana goadana amo oi hamauria taudia unai.+ 11 Iehova e, mani emu kara lau, emu hesiai tauna, egu guriguri oi kamonai bona emu hesiai taudia, emu ladana idia gari henia taudia unai, edia guriguri oi kamonai, bona mani emu kara hari dina ai lau dekenai kwalimu do oi henia, bona lau dekenai king ese hebogahisi ia hahedinaraia be namo.”+

Unai nega ai lau be king ena wain bubua tauna.+

2 King Aratasaseta+ ena lohia lagani namba 20,+ Nisan* hua ai, king ia ura wain ia inua bona hanaihanai lau karaia bamona, wain lau abia bona king dekenai lau henia.+ To king ena vairanai nega ta lalohisihisi toana lau hahedinaraia lasi. 2 Unai dainai king be lau dekenai ia gwau: “Oi be oi gorere lasi, to dahaka dainai oi lalohisihisi? Oi be gau ta oi lalohekwarahilaia dainai oi moale lasi.” Unai neganai lau gari dikadika.

3 Vadaeni lau be king dekenai lau gwau: “King ia mauri daudau! Bema egu sene taudia idia guria siti be ia dika vadaeni, bona ena geiti be lahi ese ia araia ore vadaeni, dahaka dainai do lau lalohisihisi lasi?”+ 4 Bena king be lau dekenai ia gwau: “Emu ura gauna be dahaka?” Vadaeni maoromaoro guba ena Dirava dekenai lau guriguri.+ 5 Bena lau be king dekenai lau gwau: “King e, bema oi dekenai ia namo bona bema lau, emu hesiai tauna, oi lalonamo henia, vadaeni Iuda dekenai lau oi siaia lao, egu sene taudia idia guria siti dekenai, unai amo unai siti lau haginia lou diba.”+ 6 Bena king, ena kwini be ia badinai ia helai noho, be lau dekenai ia gwau: “Oi lao neganai, edena nega ai do oi giroa mai?” Lau ese ia dekenai egu giroa lou negana lau hamaoroa, bona king ia moale dainai lau ia siaia.+

7 Bena lau ese king lau hamaoroa: “King e, bema oi dekenai ia namo, namona be Euperate Sinavai ena west kahana* ena gavana taudia totona oda revareva ta be lau dekenai oi henia,+ unai amo edia tano lau hanaia neganai, lau do idia koua lasi ela bona Iuda dekenai lau ginidae. 8 Danu king ena uma gabu naria tauna Asapa totona revareva ta be lau dekenai oi henia, unai amo lau dekenai timba do ia henia Magu Aukadia Rumana* ena geiti,+ siti ena magu ena geiti bona do lau noholaia rumana ena geiti lau karaia totona.”+ Vadaeni king ese unai revareva be lau dekenai ia henia,+ badina egu Dirava ese lau ia durua.+

9 Dokonai lau be Euperate Sinavai ena west kahana ena gavana taudia dekenai lau lao bona idia dekenai king ena revareva lau henia. King ese tuari gunalaia taudia bona hosi guia taudia be lau ida ia siaia danu. 10 Horono tauna Sanubalata+ bona Amono ofesa tauna Tobaia+ be unai sivarai idia kamonai neganai, idia moale lasi badina tau ta be Israela taudia durua totona ia mai vadaeni.

11 Bena Ierusalema dekenai lau ginidae, bona unuseniai dina toi lau noho. 12 Hanuaboi ai, lau bona tatau haida ai toreisi, bona Ierusalema hanamoa totona egu Dirava ese lau ia hagoadaia dalana be tau ta lau hamaoroa lasi. Bona lau sibona be doniki ai lau guia, to haida be idia raka. 13 Bona hanuaboi ai lau be Koura Iduara+ amo lau raka-lasi, bona Gaigai Badana Ranu Lohilohi gabuna ena vaira kahana lau hanaia bona Momoru Negea Iduara dekenai lau lao,+ bona Ierusalema ena makohi magudia bona lahi ese ia araia geiti lau sekea.+ 14 Bona Ranu Lohilohi Iduara+ bona King Ena Gohu dekenai lau lao, to lau guia doniki ia hanaia dalana be lasi. 15 To hanuaboi ai koura amo lau daekau lao,+ bona magu lau sekea noho, unai murinai lau giroa lou bona Koura Iduara amo lau vareai.

16 Lau lao gabuna bona lau karaia gauna be ofesa taudia+ idia diba lasi, badina lau ese Iuda taudia, hahelaga taudia, lohia taudia, ofesa taudia, bona gaukara karaia taudia oredia dekenai gau ta lau gwauraia lasi. 17 Dokonai lau be idia dekenai lau gwau: “Umui itaia ita be dika lalonai, bona Ierusalema ia dika bona ena geiti be lahi ese ia araia ore be umui itaia vadaeni. Umui mai, Ierusalema ena magu ita haginia lou, unai amo iseda hemarai do ia ore.” 18 Bena egu Dirava ese lau ia durua dalana+ bona king ese lau dekenai ia gwauraia herevadia be idia dekenai lau herevalaia.+ Unai dainai idia gwau: “Namona be ita toreisi bona haginia gaukara ita karaia.” Vadaeni ta ta idia hagoadaia gaukara namona idia karaia totona.+

19 Horono tauna Sanubalata, Amono ofesa tauna Tobaia,+ bona Arabia tauna Geseme+ be unai sivarai idia kamonai neganai, ai idia kirikirilaia+ bona hadikaia herevadia idia gwauraia, idia gwau: “Umui be dahaka umui karaia? Umui be king umui gwau-edeede henia, a?”+ 20 To, lau gwau: “Guba ena Dirava ese ai dekenai kwalimu do ia henia,+ bona ai, iena hesiai taudia be do ai toreisi bona haginia gaukarana do ai karaia. To Ierusalema dekenai umui be ahuna ta lasi, mai emui maoro ta lasi, bona gau ta umui karaia lasi umui idia laloatao totona.”+

3 Hahelaga tauna badana Eliasibi+ bona ena tadikakadia, hahelaga taudia unai, be vareai gabuna ladana Mamoe Iduarana idia haginia.+ Unai vareai gabuna idia hahelagaia+ bona ena iduara idia karaia. Idia ese Mamoe Iduarana amo ia lao Mea Kohorona dekenai, bona Mea Kohorona amo ia lao Hananele Kohorona idia hahelagaia.+ 2 Bona Eliasibi bona ena orea edia badinai Ieriko tatau+ ese magu haginia gaukarana idia karaia. Bona edia badinai Imiri ena natuna mero Sakuru ese magu haginia gaukarana ia karaia.

3 Hasena ena natudia memero ese vareai gabuna ladana Gwarume Iduara idia haginia.+ Idia ese timba idia kokoa+ bona ena iduara idia karaia, bona loka bona auri idia atodia. 4 Bona edia badinai Uraia ena natuna mero Meremoto,+ Hakoso ena tubuna unai, be magu hanamoa gaukara ia karaia, bona ia badinai Berekaia ena natuna mero Mesulama,+ Mesesabele ena tubuna unai, be magu hanamoa gaukara ia karaia, bona ia badinai Bana ena natuna mero Sadoka be magu hanamoa gaukara ia karaia. 5 Bona Sadoka badinai Tekoa taudia+ be magu hanamoa gaukara idia karaia, to edia ladana bada taudia be edia biagudia henunai hesiai gaukara idia karaia namonamo lasi.

6 Pasea ena natuna mero Ioiada bona Besodeia ena natuna mero Mesulama be vareai gabuna ladana Hanua Gunana Ena Iduara idia hanamoa lou.+ Idia ese timba idia kokoa bona ena iduara idia karaia, bona loka bona auri idia atodia. 7 Bona edia badinai Gibeona tauna+ Melataia bona Merenoto tauna Iadono ese magu hanamoa gaukarana idia karaia, idia be Gibeona bona Misipa tatau,+ Euperate Sinavai ena west kahana* ena gavana ena siahu henunai idia gaukara taudia.+ 8 Bona edia badinai Usiele ena natuna mero Harahaia, golo gaukaralaia tauna unai, be magu hanamoa gaukarana ia karaia, bona ia badinai Hananaia, ia be dehoro mikisia tauna* ta, be magu hanamoa gaukarana ia karaia. Bona idia ese Ierusalema ena nadi floa idia karaia ela bona Magu Lababa dekenai.+ 9 Bona edia badinai Huru ena natuna mero Repaia, ia be Ierusalema ena distrik ena kahana ta ena lohia tauna ta, ia be magu hanamoa gaukara ia karaia. 10 Bona edia badinai Harumapa ena natuna mero Iedaia be ena ruma vairanai magu hanamoa gaukarana ia karaia, bona iena badinai Hasabaneia ena natuna mero Hatusu ese magu hanamoa gaukara ia karaia.

11 Harimi ena natuna mero Malekaia+ bona Pahata-moaba+ ena natuna mero Hasuba ese magu ena kahana ma ta ai hanamoa gaukara idia karaia, bona Paraoa Gabua Aveni Kohorona idia hanamoa danu.+ 12 Bona edia badinai Halohese, Ierusalema ena distrik ena kahana ta ena lohia tauna ta unai, ena natuna mero Salumu ese magu hanamoa gaukarana ia karaia, bona ena natudia kekeni ese ia idia durua.

13 Hanunu bona Sanoa ai idia noho taudia+ ibounai ese vareai gabuna ladana Koura Iduarana idia hanamoa.+ Idia ese unai idia haginia bona ena iduara idia karadia, bona loka bona auri idia atodia, bona idia ese magu idia hanamoa ela bona vareai gabuna ladana Rabesi Negea Iduarana dekenai idia ginidae, ena pada be 1,000 kiubit.*+ 14 Rekaba ena natuna mero Malekaia, Bete-hakereme distrik ena lohia tauna ta unai,+ ese vareai gabuna ladana Rabesi Negea Iduarana ia hanamoa. Ia ese unai ia haginia, bona ena iduara ia karaia, bona loka bona auri ia atodia danu.

15 Kolohose ena natuna mero Salunu, Misipa distrik ena lohia tauna unai,+ ese raka vareai gabuna ladana Ranu Lohilohi Iduarana ia hanamoa.+ Ia ese unai ia haginia bona ena guhi ia karaia, ena iduara ia karaia, bona loka bona auri ia atodia, bona magu ladana Ranu Ia Aru Lao Gohuna ia hanamoa+ ela bona King Ena Uma Gabuna dekenai,+ bona ia lao Davida Ena Siti bona ia diho lao Vadavada dekenai.+

16 Salunu murinai Asabuku ena natuna mero Nehemia, Bete-suru distrik ena lohia tauna unai,+ be Davida Ena Guria Gabudia ena magu amo hanamoa gaukarana ia karaia+ ela bona idia karaia vadaeni gohuna dekenai,+ ma ela bona Tuari Taudia Goadadia Edia Ruma dekenai.

17 Iena badinai Levi taudia ese magu hanamoa gaukara idia karaia: Bani ena natuna mero Rehumu, bona ena badinai be Hasabaia, ia be Keila distrik ena kahana ta ena lohia tauna ta,+ ia ese ena distrik totona magu hanamoa gaukara ia karaia. 18 Iena badinai ena tadikakadia ese magu hanamoa gaukara idia karaia, unai be Henadada ena natuna mero Bavai, ia be Keila distrik ena kahana ta ena lohia tauna ta.

19 Bona ena badinai Iesua ena natuna mero Esere,+ ia be Misipa ena lohia tauna ta, ia ese Tuari Kohu Atoa Gabuna ena vairana kahana ai magu hanamoa gaukarana ia karaia, unai be Kohoro Sapotia Du dekenai.+

20 Esere ena badinai Sabai ena natuna mero Baruku+ be mai ura bada ida kahana ma ta dekenai magu hanamoa gaukarana ia karaia, unai be Kohoro Sapotia Du amo ela bona hahelaga tauna badana Eliasibi ena ruma ena vareai gabuna ai ia doko.+

21 Baruku ena badinai Uraia ena natuna mero Meremoto,+ Hakoso ena tubuna mero unai, ese magu ena kahana ma ta ai hanamoa gaukara ia karaia. Unai be Eliasibi ena ruma ena vareai gabuna amo ela bona Eliasibi ena ruma ena kahana ma ta dekenai ia doko.

22 Bona Meremoto ena badinai hahelaga taudia, Ioridane distrik* tatau unai,+ ese magu hanamoa gaukara idia karaia. 23 Hahelaga taudia edia badinai, Beniamina bona Hasuba be edia ruma edia vairana kahana ai magu hanamoa gaukara idia karaia. Bona edia badinai Maseaia ena natuna mero Asaraia, Ananaia ena tubuna mero unai, ena ruma badinai magu hanamoa gaukara ia karaia. 24 Asaraia ena badinai Henadada ena natuna mero Binui ese magu ena kahana ma ta ia hanamoa, unai be Asaraia ena ruma amo ela bona Kohoro Sapotia Du+ bona ia lao ela bona siti magu ena kona dekenai ia ginidae.

25 Binui ena badinai Usai ena natuna mero Palala ese magu hanamoa gaukara ia karaia, unai be Kohoro Sapotia Du ena vairana kahana amo ela bona King Ena Ruma ena kohoro dekenai,+ unai be Gadi Taudia Edia Ariara kahana.+ Iena badinai Paroso ena natuna mero Pedaia ese magu hanamoa gaukara ia karaia.+

26 Bona Opele ai idia noho+ dubu ena hesiai taudia*+ ese magu hanamoa gaukara idia karaia ela bona ist kahana ena vareai gabuna ladana Ranu Iduarana+ bona kohoro dekenai idia ginidae.

27 Dubu ena hesiai taudia edia badinai Tekoa taudia+ ese magu hanamoa gaukara idia karaia, unai be kohoro badana ena vaira kahana amo ela bona Opele ena magu dekenai idia ginidae.

28 Hahelaga taudia ese vareai gabuna ladana Hosi Iduarana+ ena ataiai kahana ai idia ta ta be sibona edia ruma ta ta ena vaira kahana ai magu hanamoa gaukara idia karaia.

29 Hahelaga taudia edia badinai Imere ena natuna mero Sadoka+ ese ena ruma ena vaira kahana ai magu hanamoa gaukara ia karaia.

Bona Sadoka ena badinai Sekanaia ena natuna mero Semaia, ia be Ist Iduarana ena gima tauna.+ Ia be hanamoa gaukara ia karaia danu.

30 Semaia ena badinai Selemaia ena natuna mero Hananaia bona Salapa ena natuna mero namba 6, Hanunu, ese magu ena kahana ma ta ai hanamoa gaukara idia karaia.

Edia badinai Berekaia ena natuna mero Mesulama+ ese ena daiutu badana ena vaira kahana ai magu hanamoa gaukara ia karaia.

31 Mesulama ena badinai Malekaia, golo gaukaralaia tauna ta, ese magu hanamoa gaukara ia karaia ela bona dubu ena hesiai taudia*+ bona hoihoi taudia edia ruma ena kahana, unai be vareai gabuna ladana Gau Itaia Iduarana ena vaira kahanai, bona ia lao ela bona siti magu ena kona ena ataiai daiutu ena kahana ai ia ginidae.

32 Bona siti magu ena kona ena ataiai daiutu ena kahana amo ia lao vareai gabuna ladana Mamoe Iduarana+ dekenai golo gaukaralaia taudia bona hoihoi taudia ese magu hanamoa gaukara idia karaia.

4 Vadaeni Sanubalata+ ia kamonai ai be magu ai haginia noho neganai, ia badu bona ia lalohisihisi momokani, bona Iuda taudia ia gwauraia dika noho. 2 Bona Sanubalata be ena turadia bona Samaria ena tuari taudia vairanai ia gwau: “Inai goada lasi Iuda taudia be dahaka idia karaia noho? Idia sibona be unai gaukara do idia karaia, a? Boubou gaudia do idia henia, a? Dina tamona lalonai haginia gaukara do idia haorea, a? Momoru haboua gabuna amo idia abia nadi idia gaukaralaia lou diba, a?”+

3 Vadaeni Sanubalata badinai ia gini Amono tauna Tobaia+ ia gwau: “Bema uda sisia ta be idia haginia magu latanai ia daekau, edia nadi magu do ia hamorua diba.”

4 Vadaeni lau guriguri: “Emai Dirava e, mani oi kamonai, idia ese ai idia gwauraia dika noho,+ bona dala oi karaia, ai dekenai idia gwauraia hadikaia herevadia be idia dekenai do ia vara,+ bona edia inai taudia dekenai idia oi henia bona tano ma ta dekenai do idia abidia lao. 5 Bona edia kara dika oi gwauatao lasi eiava emu vairanai edia kerere oi kokia lasi,+ badina idia ese magu haginia taudia idia gwauraia dika.”

6 Vadaeni magu ai haginia noho, bona idia makohi kahana ibounai ai hanamoa bona magu ai haginia daekau ela bona huanai, bona Iuda taudia be mai kudouna ibounai ida gaukara idia karaia noho.

7 Vadaeni Sanubalata, Tobaia,+ Arabia taudia,+ Amono taudia, bona Asadoda taudia+ idia kamonai Ierusalema ena magu hanamoa gaukara be ia heau noho bona magu ena dika kahadia idia hanamoa neganai, idia badu dikadika. 8 Idia ibounai idia haboua Ierusalema taudia idia tuari henia bona idia dekenai daradara idia havaraia totona. 9 To emai Dirava dekenai ai guriguri bona gima tauna ta ai abia hidi dina bona hanuaboi ai, idia amo ai ia gimaia totona.

10 To, Iuda taudia idia hereva noho: “Gaukara karaia taudia* edia goada ia ore, bona momoru be momo herea. Do ita hegeregere lasi magu ita haginia totona.”

11 Bona ai idia inai henia taudia idia gwau noho: “Idia do diba lasi bona ita idia itaia lasi neganai, edia huanai do ita lao bona idia do ita hamasedia bona gaukara do ita koua.”

12 Ai idia inai henia taudia kahirakahira idia noho Iuda taudia idia mai bona ai idia hamaoroa loulou, idia gwau: “Iseda inai taudia be kahana kahana amo do idia mai ita idia tuari henia totona.”

13 Vadaeni lau ese tatau haida lau abia hidi bona magu murinai idia gini, edia inai taudia do idia vareai diba gabudia dekenai idia gini, edia bese taudia hegeregerena, bona tuari kaia, io, bona peva idia dogoatao. 14 Lau itaia Iuda taudia idia gari dainai, lau toreisi bona ladana bada taudia,+ ofesa taudia bona taunimanima oredia dekenai lau gwau: “Idia dekenai do umui gari lasi.+ Iehova umui laloa, ia be hoa kara badadia ia karaia Diravana,+ ia ese emui tadikakadia, emui natudia memero bona natudia kekeni, emui adavadia bona emui ruma totona ia tuari noho.”

15 Vadaeni emai inai taudia idia kamonai ai dekenai idia ura karaia gauna ai diba vadaeni bona Dirava momokanina ese edia palani ia hadikaia neganai, ai ibounai ai giroa lou magu haginia gaukara ai karaia totona. 16 Unai dina amo, tatau haida be gaukara idia karaia+ bona haida be tuari kaia, io, bona peva idia dogoatao bona tuari dabuadia* idia karaia. Bona lohia taudia+ be Iuda taudia edia murina ai idia gini, idia durudia noho. 17 Iuda taudia be magu idia haginia noho. Metau gaudia idia huaia taudia be edia imana kahana ai gau ta idia huaia, bona edia imana kahana ta ai tuari gauna ta idia dogoatao. 18 Bona magu haginia taudia ta ta ese edia gabana ena beleta dekenai tuari kaia idia kwatua, bona kibi hiriria tauna+ be egu badinai ia gini.

19 Bena lau ese ladana bada taudia bona ofesa taudia bona taunimanima oredia dekenai lau gwau: “Gaukara be bada dainai magu ataiai ita be ta ta amo ita daudau. 20 Kibi ena regena umui kamonai neganai, lau gini gabuna ai umui haboua. Iseda Dirava be ita totona do ia tuari.”+

21 Vadaeni ai be gaukara ai karaia noho to ma haida be io idia dogoatao noho, daba amo ela bona hanuaboi unai bamona ai karaia. 22 Unai nega ai lau ese Iuda taudia ibounai lau hamaoroa: “Tatau ta ta bona edia hesiai taudia be Ierusalema dekenai hanuaboi ai do idia noho, bona idia ese hanuaboi ai ita do idia gimaia bona dina ai gaukara do idia karaia.” 23 Vadaeni lau, egu tadikakadia, egu hesiai taudia,+ bona lau idia badinaia gima taudia be emai dabua ai senisia lasi, bona ai ta ta be emai imana idibana ai tuari gauna ai dogoatao noho.

5 To, tatau momo bona edia adavadia be edia Iuda tadikakadia dekenai idia maumau.+ 2 Haida idia gwau: “Ai be momo, mai emai natudia memero bona natudia kekeni danu. Namona be aniani ai abia, unai amo ai aniani bona ai mauri noho diba.” 3 Ma haida idia gwau: “Ai ese emai witi, vain umadia bona emai ruma ai henia bona gwauhamata ai karaia, unai amo aniani lasi negana ai aniani ai abia diba.” 4 Ma haida idia gwau: “Ai ese emai witi bona vain umadia amo ai abia moni ai abitorehai, king ena takisi moni ai henia totona.+ 5 Ai bona emai tadikakadia be rara tamona, bona emai natudia bona edia natudia be hegeregere. To emai natudia memero bona natudia kekeni ai henia igui hesiai gaukara idia karaia totona, bona emai natudia kekeni haida be igui hesiai gaukara idia karaia noho.+ Dala be lasi unai ai koua totona, badina emai witi bona vain umadia be haida ese idia biagua.”

6 Lau ese edia maumau herevadia lau kamonai neganai, lau badu dikadika. 7 Vadaeni lau ese unai gaudia lau laloa namonamo, bona lohia taudia bona ofesa taudia dekenai lau lalotamona lasi bona lau gwau: “Umui ta ta ese emui tadikaka amo atoa kau moni umui noia noho.”+

Ma danu, unai tatau edia kara dainai lau ese hebou badana ta lau hegaegaelaia. 8 Bona idia dekenai lau gwau: “Ita ese iseda Iuda tadikakadia, bese ma haida ese idia hoia taudia unai, be ita hoia lou vadaeni. To hari umui ese emui tadikakadia do umui hoihoilaia,+ bona idia do ita hoia lou diba, a?” Unai nega ai idia be hereva ta idia gwauraia diba lasi. 9 Bena lau gwau: “Umui karaia karana be namo lasi. Namona be iseda Dirava gari henia karana umui hahedinaraia,+ unai amo ita idia inai henia besedia ese ita do idia gwauraia dika lasi, ani? 10 Ma danu, lau, egu tadikakadia, bona egu hesiai taudia ese idia dekenai moni bona aniani ai henia, to atoa kau moni ai noia lasi. Namona be atoa kau moni noia karana ita hadokoa.+ 11 Mani emui kara, hari dina edia witi bona vain umadia, edia olive audia, bona edia ruma umui henia lou.+ Danu moni, aniani, wain matamata bona oela, idia amo umui abia gaudia unai, edia kahana 100 amo kahana ta* be idia dekenai umui henia lou.”

12 Unai neganai idia gwau: “Ai ese idia dekenai inai gaudia do ai henia lou bona idia amo gau ta do ai noia lou lasi. Emu hereva hegeregerena do ai karaia.” Vadaeni lau ese hahelaga taudia lau boiria bona unai tatau* lau hamaoroa edia gwauhamata do idia badinaia. 13 Danu, egu dabua ena lokua kahana lau hamarerea bona lau gwau: “Inai dala amo Dirava momokanina ese ena ruma amo bona ia biagua gaudia amo inai gwauhamata ia badinaia lasi tauna be do ia kokia, bona unai dala amo ia biagua gaudia ibounai do idia kokia bona ia dekenai gau ta do ia noho lasi.” Unai nega ai idia hebou taudia ibounai idia gwau: “Amen!”* Bona Iehova idia hanamoa, bona taunimanima be edia gwauhamata hegeregerena idia karaia.

14 Ma danu, king ese lau ia abia hidi Iuda taudia edia gavana ai lau lao dinana amo,+ unai be King Aratasaseta+ ena lohia lagani namba 20+ amo ia lao lagani namba 32,+ lagani ibounai be 12, lau eiava egu tadikakadia ese gavana totona idia henia aniani ai ania lasi.+ 15 To guna idia lohia gavana taudia ese taunimanima dekenai maduna metau idia henia bona idia amo 40 siliva sikel* idia abia, dina ta ta ena aniani bona wain totona. Danu, edia hesiai taudia ese taunimanima idia hahisia. To lau be Dirava lau gari henia dainai unai bamona lau karaia lasi.+

16 Ma danu, lau be magu haginia gaukarana lau durua, bona egu hesiai taudia ibounai be gaukara karaia totona unuseni idia haboua, bona tano ta ai abia lasi.+ 17 Iuda taudia 150 bona ofesa taudia bona bese ma haida amo ai idia vadivadi henia totona idia mai taudia be lau danu idia aniani. 18 Dina ta ta lau ese tatau lau oda henia boromakau ta, mamoe namodia 6, bona manu idia hegaegaelaia ai ania totona. Bona dina 10 10 amo nega ta ta ai wain idauidau momo ai abia. Ena be unai bamona ia vara, to lau ese gavana totona idia henia aniani amo gau ta lau abia lasi, badina taunimanima be king totona hesiai gaukara metauna idia karaia vadaeni. 19 Egu Dirava e, inai taunimanima totona lau karaia gaudia dainai, mani lau oi laloatao.+

6 Vadaeni Sanubalata, Tobaia,+ Arabia tauna Geseme,+ bona ai idia inai henia taudia ma haida idia kamonai lau ese magu lau haginia lou+ bona magu ena makohia kahadia ibounai lau hanamoa vadaeni (ena be unai nega ai vareai gabudia edia iduara lau do karadia lasi),+ 2 maoromaoro Sanubalata bona Geseme be lau dekenai hereva idia siaia, idia gwau: “Oi mai, bona namona be Ono ena tano palakana ai+ idia noho hanuadia ai do ita hedavari negana ita herevalaia.” To idia be palani idia karaia lau idia hadikaia totona. 3 Vadaeni idia dekenai egu hesiai taudia lau siaia, bona lau gwau: “Lau be gaukara badana lau karaia noho, bona lau hegeregere lasi lau mai totona. Dahaka dainai inai gaukara lau hadokoa bona umui dekenai do lau mai?” 4 Idia ese lau dekenai unai hereva tamona be nega 4 idia siaia, bona unai nega ta ta ai lau ese haere tamona lau henia.

5 Bena Sanubalata be nega namba 5 ena hesiai tauna be lau dekenai ia siaia mai, ena imana ai be revareva ta, koua lasi gauna, bona unai hereva tamona ia gwauraia. 6 Revareva be inai bamona ia torea: “Bese idauidau ese sivarai idia kamonai vadaeni, bona Geseme+ be unai ia gwauraia danu, oi bona Iuda taudia be palani umui karaia noho king umui gwau-edeede henia totona.+ Unai dainai umui be magu umui haginia noho. Bona idia kamonai oi ura Iuda taudia edia king ai oi lao. 7 Ma danu, oi ese peroveta taudia oi abia hidi emu sivarai be Ierusalema ibounai dekenai do idia gwauraia totona, do idia gwau: ‘Iuda ai king ta ia noho!’ Bena king ese unai sivarai do ia kamonai. Unai dainai oi mai, bona do ita herevahereva.”

8 To, ia dekenai egu haere lau siaia, lau gwau: “Oi gwauraia gaudia ibounai be idia vara lasi. Oi be sibona emu lalohadai oi gwauraia noho.” 9 Idia ibounai idia ura ai idia hagaria dainai, idia gwau noho: “Idia be do idia lalomanoka bona edia gaukara do idia haorea lasi.”+ To lau guriguri: “Dirava e, lau oi hagoadaia.”+

10 Bena lau be Semaia ena ruma dekenai lau lao. Semaia be Delaia ena natuna mero bona Mehetabela ena tubuna mero, unai nega ai ia be ena ruma ia rakatania lasi. Semaia ia gwau: “Namona be ita gwauraia nega ai Dirava ena ruma, dubu helaga unai, lalonai do ita hedavari, bona namona be dubu helaga ena iduara ita koudia, badina idia be oi alaia totona idia mai noho. Hanuaboi ai do idia mai.” 11 To lau gwau: “Lau be gavana tauna dainai do lau heau boio, a? Lau bamona tauna ta be dubu helaga lalonai ia vareai bona ia mauri diba, a?+ Lau be do lau vareai lasi!” 12 Bena lau laloparara Dirava ese Semaia ia siaia lasi, to Tobaia bona Sanubalata+ ese Semaia dekenai moni idia henia lau ia koia totona. 13 Idia ese Semaia dekenai moni idia henia vadaeni lau ia hagaria bona kerere lau karaia totona, unai amo egu ladana do idia hadikaia bona lau do idia gwauraia dika.

14 Egu Dirava e, Tobaia+ bona Sanubalata ese idia karaia karadia oi laloatao, bona peroveta hahinena Noadia bona hanaihanai idia ura lau idia hagaria peroveta taudia ma haida edia kara oi laloatao danu.

15 Vadaeni inai magu be Elulu* hua ena dina namba 25 ai idia haorea, unai gaukara be dina 52 lalonai idia karaia.

16 Unai gaukara ai haorea ena sivarai be emai inai taudia ese idia kamonai bona ai idia hagegea besedia ese unai idia itaia neganai, idia hemarai bada,+ bona idia laloparara ai be emai Dirava ena heduru dainai inai gaukara ai hagugurua. 17 Unai negadia lalonai Iuda ena ladana bada taudia+ ese Tobaia dekenai revareva momo idia siaia, bona Tobaia ese idia dekenai unai revareva edia haere ia siaidia lou. 18 Iuda ai idia noho taudia momo be Tobaia ida maino karaia gwauhamatana idia karaia, badina ia be Araha ena natuna Sekanaia ena ravana,+ bona iena natuna mero Iehonana ese Mesulama+ ena natuna kekeni ia adavaia, Mesulama be Berekaia ena natuna. 19 Danu, idia ese hanaihanai lau dekenai Tobaia ena kara namodia idia gwauraia bona lau herevalaia gaudia be ia dekenai idia gwauraia. Bena Tobaia be lau hagaria totona revareva ia siaidia.+

7 Magu idia haginia lou murinai,+ lau ese iduara lau karadia.+ Bena geiti naria taudia,+ ane abia taudia,+ bona Levi taudia+ lau abia hidi. 2 Bena egu tadikaka Hanani+ bona Hananaia lau abia hidi Ierusalema idia naria totona. Hananaia be Magu Aukadia Rumana ena gunalaia tauna,+ badina ia kara momokani bona Dirava momokanina ia gari henia,+ tatau ma haida bamona lasi. 3 Vadaeni idia dekenai lau gwau: “Ierusalema ena vareai gabuna ena iduara do umui kehoa lasi ela bona dina tubu ai, bona idia gima noho lalonai, namona be iduara idia koudia bona auri idia atoa. Bona Ierusalema ai idia noho taudia umui abia hidi gima gaukara idia karaia totona, idia ta ta be edia gima gabuna ai do idia gini bona edia ruma ta ta vairanai do idia gini.” 4 Ierusalema siti be bada bona unuseniai taunimanima be momo lasi,+ bona ruma idia do haginidia lasi.

5 To egu Dirava ese lalohadai ia henia lau ese lohia taudia, ofesa taudia bona taunimanima lau haboua, bona edia ladadia be lista ai do idia torea.+ Bena lau ese igui tano amo idia giroa mai taudia ginigunadia edia ladadia ena lista lau davaria, bona inai toretore lau itaia:

6 Bona inai be provinsi* ai idia noho taudia. Idia be Babulonia ena king, Nebukanesa+ ese ia guidia bona Babulonia dekenai ia abia lao+ bona gabeai Ierusalema bona Iuda dekenai idia giroa lou, edia siti ta ta dekenai.+ 7 Idia be Serubabele,+ Iesua,+ Nehemia, Asaraia, Ramaia, Nahamani, Modekai, Bilesana, Misaperete, Bigevai, Nehumu, bona Banaha ida idia mai.

Israela tatau ibounai edia namba be inai:+ 8 Paroso ena bese amo be 2,172; 9 Sepataia ena bese amo be 372; 10 Araha ena bese+ amo be 652; 11 Pahata-moaba ena bese,+ unai be Iesua bona Ioaba edia bese taudia,+ idia be 2,818; 12 Elama ena bese+ amo be 1,254; 13 Satu ena bese amo be 845; 14 Sakai ena bese amo be 760; 15 Binui ena bese amo be 648; 16 Bebai ena bese amo be 628; 17 Asagada ena bese amo be 2,322; 18 Adonikama ena bese amo be 667; 19 Bigevai ena bese amo be 2,067; 20 Adini ena bese amo be 655; 21 Hesekaia ena bese tauna Atere ena bese amo be 98; 22 Hasumu ena bese amo be 328; 23 Besaia ena bese amo be 324; 24 Haripa ena bese amo be 112; 25 Gibeona ena bese+ amo be 95; 26 Betelehema hanua bona Netopa hanua amo be 188; 27 Anatoto tatau+ be 128; 28 Bete-asamavete tatau be 42; 29 Kiriata-iearimi taudia,+ Kepira taudia, bona Beroto taudia,+ ibounai be 743; 30 Rama taudia bona Geba taudia,+ ibounai be 621; 31 Mikimas amo be tatau+ 122; 32 Betele+ bona Ai+ amo be tatau 123; 33 Nebo ma ta amo be tatau 52; 34 Elama ma ta ena bese amo be 1,254; 35 Harimi ena bese amo be 320; 36 Ieriko taudia be 345; 37 Lodu taudia, Hadida taudia, bona Ono taudia,+ ibounai be 721; 38 Senaha taudia be 3,930.

39 Hahelaga taudia:+ Iesua ena bese tauna Iedaia ena bese amo be 973; 40 Imere ena bese amo be 1,052; 41 Pasahuru ena bese+ amo be 1,247; 42 Harimi ena bese+ amo be 1,017.

43 Levi taudia:+ Hodeva ena bese amo, Iesua bona Kademiele edia bese taudia unai,+ ibounai be 74. 44 Ane abia taudia:+ Asapa ena bese+ amo be 148. 45 Geiti naria taudia:+ Salumu ena bese taudia, Atere ena bese taudia, Talamono ena bese taudia, Akubu ena bese taudia,+ Hatita ena bese taudia, Sobai ena bese taudia, idia ibounai be 138.

46 Dubu ena hesiai taudia:*+ Siha ena bese amo, Hasupa ena bese amo, Tabaota ena bese amo, 47 Kerosi ena bese amo, Sia ena bese amo, Padono ena bese amo, 48 Lebana ena bese amo, Hagabaha ena bese amo, Samalai ena bese amo, 49 Hanana ena bese amo, Gidele ena bese amo, Gahara ena bese amo, 50 Reaia ena bese amo, Resini ena bese amo, Nekoda ena bese amo, 51 Gasama ena bese amo, Usa ena bese amo, Pasea ena bese amo, 52 Besai ena bese amo, Meunimi ena bese amo, Nepusimi ena bese amo, 53 Bakabuku ena bese amo, Hakupa ena bese amo, Harahuru ena bese amo, 54 Basaliti ena bese amo, Mehida ena bese amo, Harasa ena bese amo, 55 Bakosi ena bese amo, Sisera ena bese amo, Temaha ena bese amo, 56 Nesaia ena bese amo, Hatipa ena bese amo.

57 Solomona ena hesiai taudia edia bese taudia:+ Sotai ena bese amo, Soperete ena bese amo, Perida ena bese amo, 58 Iala ena bese amo, Darakono ena bese amo, Gidele ena bese amo, 59 Sepataia ena bese amo, Hatili ena bese amo, Pokerete-hasabaimi ena bese amo, Amona ena bese amo. 60 Dubu ena hesiai taudia*+ bona Solomona ena hesiai taudia edia bese taudia ibounai be 392.

61 Bona Tele-mela, Tele-harasa, Kerubu, Adana, bona Imere amo taunimanima idia lao, to unai taudia be lista ai idia hamomokania diba lasi edia tamana ena bese taudia bona idia be Israela taudia eiava lasi.+ 62 Delaia ena bese taudia, Tobaia ena bese taudia, Nekoda ena bese taudia, ibounai be 642. 63 Bona hahelaga taudia amo be, Habaia ena bese taudia, Hakoso ena bese taudia,+ Barasilai ena bese taudia. Barasilai ese Gileada tauna Barasilai+ ena natuna kekeni ta ia adavaia, bona ia ese ena ravana tauna ena ladana ia abia hanai. 64 Inai taudia be sene taudia edia ladadia ena lista ai edia bese ena ladana idia tahua, to idia davaria diba lasi, unai dainai idia be hegeregere lasi hahelaga taudia edia gaukara idia karaia totona.+ 65 Gavana*+ ese idia ia hamaoroa helaga herea gauna ta idia ania diba lasi+ ela bona Urima bona Tumima* ia gaukaralaia hahelaga tauna ta do ia hedinarai.+

66 Idia haboua taudia ibounai be 42,360,+ 67 bona hesiai tatau bona hesiai hahinedia+ ibounai be 7,337, danu ane abia tatau bona hahine* ibounai be 245.+ 68 Edia hosi badadia ibounai be 736, edia hosi maragidia* ibounai be 245, 69 edia kamelo ibounai be 435, edia doniki ibounai be 6,720.

70 Iduhu kwaradia edia gunalaia taudia haida be unai gaukara dekenai harihari gaudia idia henia.+ Gavana* ese dava bada kohu haboua gabuna dekenai golo drekma* 1,000 bona disi 50 ia henia, bona hahelaga taudia totona dabua 530 ia henia.+ 71 Bona iduhu kwaradia edia gunalaia taudia haida ese gaukara durua totona moni idia henia, hegeregere golo drekma 20,000 bona siliva mina* 2,200 idia henia. 72 Bona taunimanima ibounai ese golo drekma 20,000, siliva mina 2,000, bona hahelaga taudia totona dabua 67 idia henia.

73 Bona hahelaga taudia, Levi taudia, geiti naria taudia, ane abia taudia,+ taunimanima haida, dubu ena hesiai taudia,* bona Israela taudia ibounai be edia siti ta ta dekenai idia noho.+ Hua namba 7 ia ginidae neganai,+ Israela taudia ibounai be edia siti ta ta dekenai idia noho vadaeni.+

8 Bena taunimanima ibounai be mai lalotamona ida ariara ai idia haboua, unai be Ranu Iduarana ena vairanai.+ Idia ese taravatu torea hanai tauna* Esera+ idia hamaoroa Mose ena Taravatu bukana,+ Iehova ese Israela taudia ia oda henia gauna unai, ia abia mai totona.+ 2 Vadaeni hua namba 7 ena dina ginigunana ai+ hahelaga tauna Esera ese idia haboua tatau, hahine, bona do idia kamonai bona laloparara diba taudia ibounai+ vairanai Taravatu bukana ia abia mai. 3 Bona Ranu Iduarana ena vaira kahana ena ariara ai Esera be daba amo ela bona dina tubua ai Taravatu bukana be mai gado bada ida ia duahia,+ tatau, hahine, bona idia laloparara diba natudia ibounai dekenai. Unai taunimanima ibounai ese Taravatu bukana ena hereva idia kamonai namonamo.+ 4 Bona taravatu torea hanai tauna* Esera be unai nega totona au amo idia karaia platfom ta latanai ia gini. Bona ena idiba kahana ai idia gini taudia be Matitaia, Sehema, Anaia, Uria, Hilekaia, Maseaia. Bona ena lauri kahanai idia gini taudia be Pedaia, Misaela, Malekaia,+ Hasumu, Hasa-badana, Sekaraia, bona Mesulama.

5 Esera be platfom latanai ia gini dainai, buka ia kehoa neganai taunimanima ibounai ese ia idia itaia diba. Bona buka ia kehoa neganai, taunimanima ibounai idia gini. 6 Bena Esera ese Dirava momokanina Iehova, Dirava badana, ia hanamoa, unai dainai taunimanima ibounai idia gwau: “Amen!* Amen!”+ bona edia imana idia abia isi. Bena Iehova dekenai idia goru diho bona edia vairana be tano dekenai idia atoa. 7 Bona Levi taudia Iesua, Bani, Serebaia,+ Iamina, Akubu, Sebetai, Hodaia, Maseaia, Kelita, Asaraia, Iosabada,+ Hanana, bona Pelaia be taunimanima dekenai Taravatu idia hadibaia,+ bona taunimanima be idia gini noho. 8 Bona Dirava momokanina ena Taravatu bukana idia duahia badabada, bona taravatu herevadia edia anina idia gwauraia hedinarai namonamo. Vadaeni idia ese taunimanima idia durua idia duahia gauna idia lalopararalaia totona.+

9 Bona gavana tauna Nehemia, hahelaga tauna bona taravatu torea hanai tauna* Esera,+ bona taunimanima idia hadibaia Levi taudia be taunimanima ibounai dekenai idia gwau: “Inai dina be emui Dirava Iehova ena dina helagana.+ Umui lalohisihisi eiava taitai lasi.” Badina taunimanima ibounai be Taravatu herevadia idia kamonai neganai idia taitai noho. 10 Esera be idia dekenai ia gwau: “Umui lao, aniani namodia umui ania bona wain digarana umui inua, bona gau ta idia hegaegaelaia lasi taudia dekenai aniani umui henia.+ Badina hari dina be iseda Lohiabada ena dina helagana, bona umui lalohisihisi lasi, badina Iehova ese ia henia moalena ese umui ia hagoadaia.”* 11 Bona Levi taudia ese taunimanima ibounai idia hagoadaia, idia gwau: “Umui taitai lasi! Badina inai dina be helaga, bona umui lalohisihisi lasi.” 12 Vadaeni taunimanima ibounai idia lao bona aniani idia ania bona wain idia inua noho bona haida dekenai aniani idia hariharilaia noho bona idia moale bada herea,+ badina idia dekenai idia gwauraia herevadia idia lalopararalaia.+

13 Bona dina iharuana ai, taunimanima ibounai edia iduhu kwaradia edia gunalaia taudia, hahelaga taudia, bona Levi taudia be taravatu torea hanai tauna* Esera dekenai idia lao, Taravatu herevadia dekenai diba ma haida idia abia totona. 14 Bena unai Taravatu ai idia davaria, Iehova ese Mose amo Israela taudia ia oda henia hua namba 7 ena aria negana ai, idia be au raurau rumadia dekenai do idia noho,+ 15 bona idia ese Ierusalema ai taunimanima ibounai edia siti ta ta dekenai hereva idia siaia+ bona idia hadibadia, idia gwau: “Ororo gabudia dekenai umui lao bona olive audia, paini audia, metol audia* bona pama audia bona au ma haida edia rigi mai edia raurau umui mailaidia, unai amo au raurau rumadia ita haginia, idia torea hegeregerena.”

16 Vadaeni idia lao bona rigi mai edia raurau idia abia bona au raurau rumadia idia haginia, idia be edia ruma ena guhi ataiai au raurau rumadia idia haginia, bona edia ruma edia ariara ai, Dirava momokanina ena ruma ena ariara ai,+ Ranu Iduarana ena ariara ai,+ bona Eparaima Iduarana ena ariara ai au raurau rumadia idia haginia danu.+ 17 Vadaeni igui tano amo idia giroa mai taudia ibounai be au raurau rumadia idia haginia bona idia noholaia, badina Israela taudia be Nunu ena natuna mero Iosua ena nega+ amo unai bamona idia karaia lasi ela bona unai nega ai, unai dainai idia moale bada herea.+ 18 Bona dina ta ta ai Dirava momokanina ena Taravatu bukana idia duahia,+ unai be dina ginigunana ai idia karaia ela bona dina ginigabena ai idia hadokoa. Bona dina 7 lalonai aria idia karaia, bona dina namba 8 ai hebou helagana ta idia karaia, Taravatu ai ia noho hegeregerena.+

9 Inai hua ena dina namba 24 ai, Israela taudia idia haboua. Idia aniani lasi* bona puse dabua idia karaia bona edia kwarana ai kahu idia atoa.+ 2 Bena Israela taudia be idau tano taudia ibounai amo idia raka-siri,+ bona idia gini bona edia kara dika bona edia sene taudia edia kerere idia gwauraia hedinarai.+ 3 Bena edia gabu ai idia gini bona dina ena hora toi* lalonai, edia Dirava Iehova ena Taravatu bukana idia duahia badabada.+ Bona dina ena hora ma toi lalonai edia kerere idia gwauraia hedinarai bona edia Dirava Iehova dekenai idia tui diho.

4 Iesua, Bani, Kademiele, Sebanaia, Buni, Serebaia,+ Bani, bona Kenani be Levi taudia edia platfom ai idia gini,+ bona mai gado bada ida edia Dirava Iehova dekenai idia guriguri. 5 Bona Levi taudia Iesua, Kademiele, Bani, Hasabaneia, Serebaia, Hodaia, Sebanaia, bona Petahaia idia gwau: “Umui gini bona emui Dirava Iehova umui hanamoa ela bona hanaihanai.+ Bona namona be idia ese emu ladana hairaina idia hanamoa, unai ese hahenamo iboudiai bona hanamoa ibounai ia hereaia.”

6 “Oi sibona be Iehova.+ Oi ese guba oi karaia, oibe, guba ena ataiai gabudia bona ia lalonai idia noho gaudia ibounai oi karaia, tanobada bona tanobada ai idia noho gaudia danu oi karaia, davara bona davara lalonai idia noho gaudia oi karaia. Bona idia ibounai oi naria dainai idia mauri noho, bona guba ai idia noho gaudia ibounai* be oi dekenai idia igo diho noho. 7 Oi be Dirava momokanina Iehova, oi ese Aberamo oi abia hidi+ bona Kaledea taudia edia siti, Uru amo ia oi hakaua raka-lasi+ bona ena ladana oi hatoa Aberahamo.+ 8 Oi itaia ia ese mai kudouna ibounai ida oi ia badinaia,+ unai dainai ia ida gwauhamata oi karaia, Kanana taudia, Hiti taudia, Amoro taudia, Perisi taudia, Iebusu taudia, bona Girigasa taudia edia tano be ena natudia dekenai do oi henia,+ bona emu gwauhamata oi badinaia, badina oi be kara maoromaoro Diravana.

9 “Vadaeni Aigupito dekenai iseda sene taudia edia hisihisi oi itaia,+ bona Davara Kakakaka dekenai heduru totona idia taitai neganai, oi kamonai. 10 Bena oi diba Farao bona ena hesiai taudia ibounai bona ena tano ai idia noho taudia ibounai ese emu taunimanima idia hahisia bada dainai,+ oi ese idia dekenai toa bona hoa karadia oi karaia.+ Unai dainai emu ladana idia hanamoa ema bona hari.+ 11 Bona oi ese edia vairana ai davara oi hapararaia, unai amo idia be davara ena tano kaukauna amo idia raka hanaia,+ bona oi ese emu taunimanima edia murinai idia heau lao taudia be davara ena dobu kahana dekenai oi negedia, nadi ta be davara ena hurehure bada lalonai idia negea bamona.+ 12 Oi ese dina ai idia oi hakaua neganai, ori be edia ataiai ia noho, bona hanuaboi ai lahi ena diari amo idia oi hakaua, unai amo edia raka dalana oi hadiaria.+ 13 Oi be Sinai Ororona ai oi diho mai,+ bona danu guba amo idia oi hereva henia+ bona hahemaoro dala maorodia, hereva momokani taravatudia, bona hakaua hereva bona oda hereva namodia be idia dekenai oi henia.+ 14 Oi ese idia oi hadibaia Sabati dinana idia hahelagaia totona,+ bona emu hesiai tauna Mose amo idia dekenai hakaua herevadia, oda herevadia, bona taravatu oi henia. 15 Idia hitolo neganai, oi ese guba amo paraoa oi henia,+ bona idia ranu mase neganai, nadi badana amo ranu oi henia,+ bona idia oi hamaoroa oi gwauhamatalaia tanona dekenai idia vareai bona idia noholaia.

16 “To emai sene taudia idia hekokoroku+ bona edia kudouna idia ha-aukaia,+ bona emu hakaua herevadia idia kamonai henia lasi. 17 Idia ura lasi kamonai,+ bona edia huanai oi karaia kara badadia idia laloatao lasi, bona edia kudouna idia ha-aukaia bona gunalaia tauna ta idia abia hidi igui hesiai gaukara idia karaia tanona, Aigupito, dekenai ia hakaudia lou totona.+ To Dirava e, oi noho hegaegae dika oi gwauatao totona, oi be kara namo bona hebogahisi Diravana, oi badu haraga lasi bona oi hahedinaraia lalokau* be bada herea,+ bona oi ese idia oi rakatania lasi.+ 18 Ena be idia ese auri amo boromakau kaivakuku idia karaia bona idia gwau, ‘Inai be iseda Dirava, Aigupito amo ita ia hakaua raka-lasi,’+ bona oi idia matauraia lasi kara dika badadia idia karaia, 19 to emu hebogahisi bada dainai taunimanima lasi gabuna ai idia oi rakatania lasi.+ Dina ai idia oi hakaua neganai, ori be edia ataiai ia noho, bona hanuaboi ai idia oi hakaua neganai, lahi amo edia raka dalana oi hadiaria.+ 20 Bona oi ese emu lauma oi henia, aonega idia davaria totona,+ bona idia dekenai mana oi henia,+ bona idia ranu mase neganai ranu oi henia.+ 21 Lagani 40 lalonai taunimanima lasi gabuna ai oi ese idia dekenai aniani oi henia.+ Idia be gau ta dekenai idia dabu lasi. Edia dabua idia dika lasi,+ bona edia aena idia gudu lasi.

22 “Oi ese idia dekenai basileia bona bese idauidau oi henia, unai amo edia tano ta ta be idia dekenai oi haria,+ bona Sihona tano idia abia,+ unai be Hesebona ena king ena tano,+ bona Basana ena king Oga ena tano idia abia danu.+ 23 Bona idia dekenai natudia momo herea oi henidia, guba ena hisiu edia momo hegeregerena.+ Bena edia sene taudia dekenai oi gwauhamata do idia abia bona noholaia tanona dekenai idia oi hakaua mai.+ 24 Vadaeni unai tano dekenai idia vareai bona tano idia abia,+ bona edia vairana ai unai tano ai idia noho Kanana taudia oi halusia,+ bona unai tano ena king taudia bona taunimanima ibounai be edia imana ai oi atoa, bona edia ura hegeregerena idia kara henidia. 25 Bona idia ese siti mai magu aukadia+ bona tano namona idia abia,+ bona gau namodia idauidau amo idia honu rumadia, idia geia vadaeni ranu guridia, vain umadia, olive audia+ bona huahua au momo idia abia. Vadaeni idia aniani bona idia bogakunu bona edia tauanina idia bada, bona emu kara namodia dainai mauri namona idia noholaia.

26 “To, idia kamonai lasi bona oi dekenai idia gwau-edeede+ bona emu Taravatu idia badinaia lasi. Bona emu peroveta taudia ese idia hadibaia oi dekenai idia giroa lou totona, to idia ese unai peroveta taudia idia hamasea, bona hemataurai lasi kara dika badadia idia karaia.+ 27 Unai dainai edia inai taudia edia imana ai idia oi atoa+ bona idia hahisidia noho.+ To edia hisihisi negadia lalonai oi dekenai idia boiboi neganai, guba amo edia taitai oi kamonai. Bona emu hebogahisi bada dainai, oi ese hamauria taudia oi siaia edia inai taudia amo idia hamauridia totona.+

28 “To idia oi hamauria murinai, oi vairanai kara dika idia karaia lou,+ bona oi ese idia be edia inai taudia dekenai oi henia bona idia hahisidia.+ Bena oi dekenai idia giroa lou bona heduru totona oi dekenai idia boiboi,+ bona guba amo edia noinoi oi kamonai bona emu hebogahisi bada dainai idia oi hamauria loulou.+ 29 Ena be idia oi sisiba henia emu Taravatu idia badinaia totona, to idia hekokoroku bona idia ura lasi emu oda herevadia idia badinaia.+ Bona idia kara dika bona emu hakaua herevadia idia badinaia lasi, bema unai hakaua herevadia idia badinaia do idia mauri noho.+ To oi idia dadaraia bona idia gwau-edeede, bona idia ura lasi kamonai. 30 Lagani momo lalonai edia kara oi haheaukalaia+ bona emu lauma amo peroveta taudia oi gaukaralaia idia oi sisiba henia noho totona, to idia ura lasi kamonai. Dokonai bese haida edia imana ai idia oi atoa.+ 31 Bona emu hebogahisi bada dainai, oi ese idia oi hamasea ore lasi+ eiava idia oi rakatania momokani lasi, badina oi be kara namo bona hebogahisi bada Diravana.+

32 “Bona emai Dirava e, oi be Dirava badana, goada ibounai Diravana, bona hoa kara badadia oi karaia Diravana be emu gwauhamata oi badinaia bona lalokau* oi hahedinaraia noho,+ ai davaria hisihisi mani oi laloaboio lasi. Asuria taudia edia king edia nega amo+ ema bona hari, ai, emai king taudia, emai lohia taudia,+ emai hahelaga taudia,+ emai peroveta taudia,+ emai sene taudia, bona taunimanima ibounai be hisihisi ai davaria noho. 33 Ena be dika ai davaria, to emu kara be maoromaoro, oi be emu hereva oi badinaia. To ai be ai kara dika noho.+ 34 Emai king taudia, emai lohia taudia, emai hahelaga taudia, bona emai sene taudia be emu Taravatu idia badinaia lasi, bona idia oi sisiba henia totona oi henia oda herevadia bona hadibaia herevadia idia ura lasi kamonai. 35 Bona emai king taudia edia lohia negana lalonai idia dekenai oi henia gau namodia momo idia moalelaia bona idia abia tano be bada herea bona tano namona, to oi idia hesiai henia lasi+ bona edia kara dikadia idia rakatania lasi. 36 Unai dainai hari ai be igui hesiai taudia bamona ai noho,+ emai sene taudia dekenai oi henia tano ai, unai tano ia havaraia aniani namodia idia ania bona gau namodia idia moalelaia totona. 37 Emai kara dika be momo dainai, emai tano amo idia vara aniani momo be ai idia lohiaia idau tano edia king taudia ese idia abia.+ Idia be ai bona emai animal idia lohiaia edia ura hegeregerena, bona ai lalohisihisi bada noho.

38 “Vadaeni idia vara gaudia ibounai dainai, gwauhamata metauna ta ai karaia+ bona ai torea, bona emai lohia taudia, emai Levi taudia, bona emai hahelaga taudia ese idia hamomokania.”+

10 Unai revareva idia hamomokania taudia+ be inai:

Gavana tauna Nehemia, Hakalaia ena natuna mero.

Bona Sedekaia, 2 Seraia, Asaraia, Ieremia, 3 Pasahuru, Amaraia, Malekaia, 4 Hatusu, Sebanaia, Maluku, 5 Harimi,+ Meremoto, Obadaia, 6 Daniela,+ Ginetono, Baruku, 7 Mesulama, Abaisa, Miamini, 8 Masaia, Bilugai, Semaia. Idia be hahelaga taudia.

9 Levi taudia ese idia hamomokania danu, idia be: Asanaia ena natuna mero Iesua, Henadada ena natuna mero Binui, Kademiele,+ 10 Sebanaia, Hodaia, Kelita, Pelaia, Hanana, 11 Maika, Rehoba, Hasabaia, 12 Sakuru, Serebaia,+ Sebanaia, 13 Hodaia, Bani, bona Beninu.

14 Taunimanima gunalaia taudia ese idia hamomokania danu, idia be: Paroso, Pahata-moaba,+ Elama, Satu, Bani, 15 Buni, Asagada, Bebai, 16 Adonaisa, Bigevai, Adini, 17 Atere, Hesekaia, Asura, 18 Hodaia, Hasumu, Besaia, 19 Haripa, Anatoto, Nebai, 20 Magapiasa, Mesulama, Hesiri, 21 Mesesabele, Sadoka, Iadua, 22 Pelataia, Hanana, Anaia, 23 Hosahea, Hananaia, Hasuba, 24 Halohese, Pileha, Sobeka, 25 Rehumu, Hasabana, Maseaia, 26 Ahaisa, Hanana, Anana, 27 Maluku, Harimi, bona Banaha.

28 Bona taunimanima oredia, idia be hahelaga taudia, Levi taudia, geiti naria taudia, ane abia taudia, dubu ena hesiai taudia,* bona Dirava momokanina ena Taravatu dainai edia kahirakahira idia noho besedia amo idia raka siri taudia,+ edia adavadia, edia natudia memero bona natudia kekeni, mai edia diba bona laloparara taudia* ibounai unai, 29 be edia tadikakadia, dagi bada taudia ida gwauhamata metauna idia karaia, bema idia ese Dirava momokanina ena Taravatu, Dirava momokanina ena hesiai tauna Mose amo ia henia taravatu unai, idia badinaia lasi bona iseda Lohiabada Iehova ena oda herevadia ibounai, ena hahemaoro herevadia, bona ena hakaua herevadia idia badinaia namonamo lasi, idia dekenai dika do ia mailaia. 30 Ita ese iseda natudia kekeni be idau tano taudia dekenai do ita henia lasi, bona edia natudia kekeni be iseda natudia memero totona do ita abia lasi.+

31 Bema Sabati dinana ai, unai tano ai idia noho idau bese taudia be kohu bona aniani idia abia mai idia hoihoilaia totona, ita ese Sabati+ eiava helaga dinana+ ai idia amo gau ta do ita hoia lasi. Danu lagani namba 7+ ai uma ena aniani bona abitorehai do ita abia lasi.+

32 Ma danu, ita be gwauhamata ta ita karaia lagani ta ta ai 4 siliva gram* be iseda Dirava ena ruma ena hesiai gaukara totona ita henia,+ 33 inai gaudia ita karaia totona: Paraoa helagana,*+ hanaihanai idia henia aniani boubou,+ hanaihanai Sabati+ bona hua matamata+ ai idia henia gabua boubou, bona aria idauidau totona,+ helaga gaudia totona, Israela taudia edia kara dika davana karaia totona idia henia bouboudia,+ bona iseda Dirava ena ruma ai idia karaia gaukara ibounai totona.

34 Ma danu, lahi au haria totona ita ese nadi gadara ita karaia, unai amo lagani ta ta ai hahelaga taudia, Levi taudia, bona taunimanima edia bese kwaradia ese lahi au idia henia diba, iseda Dirava Iehova ena boubou patana ai boubou gaudia idia gabua totona, Taravatu ai idia torea hegeregerena.+ 35 Danu lagani ta ta ai iseda tano ena aniani ginigunadia bona au idauidau edia huahua ginigunadia be Iehova ena ruma dekenai do ita abia mai.+ 36 Danu iseda vara guna natudia bona iseda animal edia vara guna natudia do ita mailaia,+ Taravatu hegeregerena, bona boromakau bona mamoe edia vara guna natudia danu. Ita ese unai gaudia be iseda Dirava ena ruma dekenai do ita mailaia, bona iseda Dirava ena ruma ai idia gaukara hahelaga taudia dekenai do ita henia.+ 37 Ma danu, witi ena anina ginigunana,+ harihari gaudia, au huahua idauidau,+ wain matamata, bona oela,+ be hahelaga taudia dekenai do ita henia be namo, bona iseda Dirava ena ruma ena kohu haboua daiutu ai do idia atoa.+ Bona iseda tano amo ita abia aniani ena kahana 10 amo kahana ta be Levi taudia dekenai do ita henia,+ badina Levi taudia ese iseda biru hanuadia ibounai amo unai kahana 10 ena kahana ta idia gogoa.

38 Bona Levi taudia be unai kahana 10 ena kahana ta idia gogoa neganai, hahelaga tauna, Arona ena natuna unai, be idia ida ia noho be namo. Bona Levi taudia ese unai aniani ena kahana 10 ena kahana ta be iseda Dirava ena ruma dekenai do idia abia lao,+ kohu idia haboua daiutudia dekenai do idia atoa. 39 Israela taudia bona Levi taudia edia natudia memero ese unai aniani,+ wain matamata, bona oela+ be kohu haboua daiutu dekenai do idia mailaia, unai gabu ai dubu helaga ena kohu idia noho, ma danu hahelaga taudia, geiti naria taudia, bona ane abia taudia be unuseniai idia noho. Ita ese iseda Dirava ena ruma do ita rakatania lasi.+

11 Vadaeni taunimanima edia lohia taudia be Ierusalema ai idia noho.+ To taunimanima oredia abia hidi totona gadara ta* idia karaia,+ unai amo famili 10 10 amo famili ta idia abia hidi siti helagana Ierusalema ai idia noho totona, bona famili oredia 9 be siti ma haida ai idia noho. 2 Ma danu, tatau haida idia ura Ierusalema dekenai idia noho dainai, taunimanima ese idia hanamoa.

3 Bona inai be Ierusalema ai idia noho provinsi ena gunalaia taudia. (Israela taudia oredia be, hahelaga taudia, Levi taudia, dubu ena hesiai taudia,*+ bona Solomona ena hesiai taudia edia bese taudia.+ Idia be Iuda ena siti ma haida ai idia noho, idia ta ta be edia siti dekenai edia noho gabuna ai idia noho.+

4 Ma danu, Ierusalema ai Iuda bese taudia bona Beniamina bese taudia haida idia noho.) Iuda bese taudia be Ataia, ia be Usaia ena natuna mero, Usaia be Sekaraia ena natuna mero, Sekaraia be Amaraia ena natuna mero, Amaraia be Sepataia ena natuna mero, Sepataia be Mahalalela ena natuna mero, Mahalalela be Perese ena natuna mero,+ 5 bona Maseaia, ia be Baruku ena natuna mero, Baruku be Kolohose ena natuna mero, Kolohose be Hasaia ena natuna mero, Hasaia be Adaia ena natuna mero, Adaia be Ioiaribi ena natuna mero, Ioiaribi be Sekaraia ena natuna mero, Sekaraia be Selaha ena natuna mero. 6 Perese ena bese taudia ibounai be Ierusalema ai idia noho, idia be tatau goadadia ibounai 468.

7 Bona Beniamina bese taudia be inai: Salulu,+ ia be Mesulama ena natuna mero, Mesulama be Ioede ena natuna mero, Ioede be Pedaia ena natuna mero, Pedaia be Kolaia ena natuna mero, Kolaia be Maseaia ena natuna mero, Maseaia be Itiele ena natuna mero, Itiele be Iesaia ena natuna mero, 8 bona Salulu murinai be Gabai bona Salai, edia bese taudia ibounai be 928. 9 Bona Sikiri ena natuna mero Ioela be edia gunalaia tauna, bona Hasenua ena natuna mero Iuda be siti naria tauna iharuana.

10 Hahelaga taudia be inai: Ioiaribi ena natuna mero Iedaia, Iakini,+ 11 Seraia, ia be Hilekaia ena natuna mero, Hilekaia be Mesulama ena natuna mero, Mesulama be Sadoka ena natuna mero, Sadoka be Meraioto ena natuna mero, Meraioto be Ahitubu ena natuna mero.+ Ahitubu be Dirava momokanina ena ruma* ena gunalaia tauna, 12 bona edia tadikakadia, dubu dekenai hesiai gaukara idia karaia taudia unai, idia ibounai be 822. Bona Adaia be Ierohama ena natuna mero, Ierohama be Pelalaia ena natuna mero, Pelalaia be Amasi ena natuna mero, Amasi be Sekaraia ena natuna mero, Sekaraia be Pasahuru ena natuna mero, Pasahuru+ be Malekaia ena natuna mero, 13 bona ena tadikakadia, bese kwarana taudia, idia ibounai be 242. Bona Amasahai be Asarelo ena natuna mero, Asarelo be Asahai ena natuna mero, Asahai be Mesilemoto ena natuna mero, Mesilemoto be Imere ena natuna mero, 14 bona edia tadikakadia, tatau goadadia unai, ibounai be 128. Bona edia naria tauna be Sabediele, ia be ladana bada ruma bese ta amo.

15 Bona Levi taudia be inai: Semaia,+ ia be Hasuba ena natuna mero, Hasuba be Asarikama ena natuna mero, Asarikama be Hasabaia ena natuna mero, Hasabaia be Buni ena natuna mero, 16 bona Sebetai+ bona Iosabada,+ idia be Levi taudia edia bese kwarana taudia, idia be Dirava momokanina ena ruma totona idia karaia gaukara ma haida idia naria. 17 Bona Matanaia,+ ia be Mika ena natuna mero, Mika be Sabadi ena natuna mero, Sabadi be Asapa ena natuna mero.+ Matanaia be ane gunalaia tauna, guriguri negana ai ia ese hanamoa anedia ia gunalaia,+ bona Bakabukaia be ena durua tauna, bona Abida be Samua ena natuna mero, Samua be Galala ena natuna mero, Galala be Iedutunu ena natuna mero.+ 18 Siti helagana ai idia noho Levi taudia ibounai be 284.

19 Bona geiti naria taudia be Akubu bona Talamono,+ bona edia tadikakadia, idia ibounai be 172.

20 Israela taudia oredia, hahelaga taudia, bona Levi taudia be Iuda ena siti ma haida ai idia noho, idia ta ta edia noho gabudia ai. 21 Dubu ena hesiai taudia*+ be Opele ai idia noho,+ bona Siha bona Gisipa be unai dubu ena hesiai taudia* idia naria.

22 Ierusalema ai idia noho Levi taudia edia naria tauna be Usisi, ia be Bani ena natuna mero, Bani be Hasabaia ena natuna mero, Hasabaia be Matanaia ena natuna mero,+ Matanaia be Maika ena natuna mero, idia be Asapa ena bese amo, ane abia taudia. Usisi ese Dirava momokanina ena ruma ai idia karaia gaukara ia naria. 23 Vadaeni idia totona king ese oda hereva ta ia henia,+ dina ta ta ai ane abia taudia be heduru gaudia do idia abia. 24 Bona Petahaia, ia be Mesesabele ena natuna mero, Mesesabele be Sera ena bese amo, Sera be Iuda ena natuna mero. Petahaia be king ena durua tauna, taunimanima totona king ia hereva henia.

25 Iuda ena bese taudia haida idia lao Kiriata-araba,+ Dibona bona Iekabasele+ dekenai idia noho. Danu unai siti ta ta bona edia badina taonidia dekenai idia noho. 26 Unai be Iesua, Molada,+ Bete-pelete,+ 27 Hasara-suala,+ Bere-sieba, 28 Sikilaga,+ Mekona bona ena badina taonidia, 29 Ene-rimono,+ Sora,+ bona Iaramutu, 30 Sanoa,+ Adulama bona edia hanua maragidia, Lakisi+ bona ena badina tanodia, bona Aseka+ bona ena badina taonidia. Idia be Bere-sieba amo ia lao Hinoma Kourana dekenai idia noho.+

31 Bona Beniamina bese taudia be Geba,+ Mikimasa, Ai, Betele+ bona ena badina taonidia ai idia noho, 32 Anatoto,+ Nobu,+ Ananaia, 33 Hasoro, Rama,+ Gitaimi, 34 Hadida, Seboima, Nebalata, 35 Lodu, bona Ono,+ unai be gaukara idauidau idia diba taudia ena koura, dekenai idia noho. 36 Bona Iuda amo Levi taudia edia orea haida be Beniamina dekenai idia noho.

12 Inai hahelaga taudia bona Levi taudia be Sealetiele+ ena natuna mero Serubabele+ ida Ierusalema dekenai idia daekau lao, idia be Iesua,+ Seraia, Ieremia, Esera, 2 Amaraia, Maluku, Hatusu, 3 Sekanaia, Rehumu, Meremoto, 4 Ido, Ginetoi, Abaisa, 5 Miamini, Madaia, Bilega, 6 Semaia, Ioiaribi, Iedaia, 7 Salulu, Amoka, Hilekaia, bona Iedaia. Unai be Iesua ena nega ai idia noho hahelaga taudia bona edia tadikakadia edia bese kwaradia.

8 Levi taudia be Iesua, Binui, Kademiele,+ Serebaia, Iuda, bona Matanaia.+ Matanaia bona ena varavara be tanikiu anedia idia gunalaia. 9 Bona edia tadikakadia Bakabukaia bona Uni be idia edia kahana ma ta ai idia gini, gima gaukaradia karaia totona.* 10 Iesua be Ioiakimi ena tamana, Ioiakimi be Eliasibi+ ena tamana, Eliasibi be Ioiada ena tamana.+ 11 Bona Ioiada be Ionatana ena tamana, bona Ionatana be Iadua ena tamana.

12 Ioiakimi ena nega ai, hahelaga taudia, idia be bese kwarana taudia, be inai: Seraia+ ena bese amo be Meraia. Ieremia ena bese amo be Hananaia. 13 Esera+ ena bese amo be Mesulama. Amaraia ena bese amo be Iehonana. 14 Maluki ena bese amo be Ionatana. Sebanaia ena bese amo be Iosepa. 15 Harimi+ ena bese amo be Adina. Meraioto ena bese amo be Helekai. 16 Ido ena bese amo be Sekaraia. Ginetono ena bese amo be Mesulama. 17 Abaisa+ ena bese amo be Sikiri. Miniamini ena bese amo be . . . ,* Moadia ena bese amo be Pilitai. 18 Bilega+ ena bese amo be Samua. Semaia ena bese amo be Iehonatana. 19 Ioiaribi ena bese amo be Matenai. Iedaia+ ena bese amo be Usisi. 20 Salai ena bese amo be Kalai. Amoka ena bese amo be Ebere. 21 Hilekaia ena bese amo be Hasabaia. Iedaia ena bese amo be Netanele.

22 Eliasibi, Ioiada, Iohanana, bona Iadua+ edia nega ai idia noho Levi taudia bona hahelaga taudia edia bese kwaradia edia ladana idia torea, ia mai bona Parasa ena king Dariuse ena nega ai.

23 Levi taudia, bese kwaradia unai, edia ladadia be unai nega ia sivarailaia bukana lalonai idia torea, ia mai bona Eliasibi ena natuna mero Iohanana ena nega ai. 24 Levi taudia edia bese kwaradia be Hasabaia, Serebaia, bona Kademiele+ ena natuna mero Iesua,+ bona edia tadikakadia, gima taudia unai, be orea ta ta ai edia vaira kahana dekenai idia gini bona Dirava hanamoa bona tanikiu henia anedia idia abia, Dirava momokanina ena hesiai tauna Davida ena hadibaia hereva hegeregerena.+ 25 Matanaia,+ Bakabukaia, Obadaia, Mesulama, Talamono, bona Akubu+ be geiti naria taudia,+ idia ese kohu haboua daiutu idia gimaia. 26 Idia be Ioiakimi ena nega ai idia noho. Ioiakimi be Iesua ena natuna mero, Iesua+ be Iosadaka ena natuna mero. Bona gavana Nehemia bona hahelaga tauna bona taravatu torea hanai tauna* Esera+ edia nega ai idia noho.

27 Ierusalema ena magu idia hahelagaia negana ai, idia ese Levi taudia be edia noho gabudia dekenai idia tahua bona Ierusalema dekenai idia mailaidia, unai amo mai moale ida magu idia hahelagaia, tanikiu anedia idia abia,+ simbol* bamona gaudia bona miusiki gaudia mai edia varo, bona hap* idia gadaralaia. 28 Bona distrik,* Ierusalema badinai idia noho hanuadia unai, amo idia mai miusiki diba momo taudia* idia haboua, Netopa taudia edia hanua maragidia amo,+ 29 Bete-gilegala siti amo,+ bona Geba+ bona Bete-asamavete tano amo,+ badina ane abia taudia be Ierusalema ena badinai edia hanua maragidia idia haginia. 30 Bona hahelaga taudia bona Levi taudia be sibona idia hagoevaia, bona taunimanima,+ geiti+ bona magu idia hahelagaia.+

31 Bena lau ese Iuda ena lohia taudia be magu ena ataiai dekenai lau hakaua lao. Ma danu, lau ese tanikiu henia ane abia orea rua lau abia hidi idia murinai idia lao totona, orea ta be idiba kahana dekenai ia lao Rabesi Negea Iduarana dekenai.+ 32 Hosaia bona Iuda ena lohia taudia haida be edia murinai idia raka, 33 idia be Asaraia, Esera, Mesulama, 34 Iuda, Beniamina, Semaia, bona Ieremia. 35 Idia ida be hahelaga taudia haida edia bese taudia mai edia kibi:+ Sekaraia, ia be Ionatana ena natuna mero, Ionatana be Semaia ena natuna mero, Semaia be Matanaia ena natuna mero, Matanaia be Mikaia ena natuna mero, Mikaia be Sakuru ena natuna mero, Sakuru be Asapa ena natuna mero,+ 36 bona ena tadikakadia Semaia, Asarelo, Milalai, Gilalai, Mai, Netanele, Iuda, bona Hanani, idia be Dirava momokanina ena hesiai tauna Davida ena miusiki gaudia+ idia dogoatao. Bona taravatu torea hanai tauna* Esera+ be edia vairanai ia raka. 37 Idia be Ranu Lohilohi Iduarana+ dekenai idia ginidae bona Davida Ena Siti+ ena Vadavada,+ unai be magu kahirakahira ai, amo idia raka daekau lao. Bona Davida Ena Ruma amo idia raka lao Ranu Iduarana+ ena ist kahana dekenai.

38 Tanikiu anedia ia abia oreana ta be kahana ta amo idia raka lao, bona lau bona taunimanima haida be idia ai badinaia, Paraoa Gabua Aveni Kohorona+ amo ai raka hanaia ela bona Magu Lababa dekenai,+ 39 bona ai daekau lao Eparaima Iduarana+ amo ai hanaia lao Hanua Gunana Ena Iduara dekenai,+ bona ai lao Gwarume Iduarana,+ Hananele Kohorona,+ bona Mea Kohorona bona ai daekau lao Mamoe Iduarana dekenai.+ Bona Gima Taudia Iduarana dekenai ai doko.

40 Vadaeni tanikiu anedia idia abia orea rua be Dirava momokanina ena ruma vairanai idia gini. Lau bona ofesa taudia ma haida danu ai gini, 41 bona hahelaga taudia Eliakimi, Maseaia, Miniamini, Mikaia, Elioenai, Sekaraia, bona Hananaia, mai edia kibi danu, 42 bona Maseaia, Semaia, Eleasara, Usisi, Iehonana, Malekaia, Elama, bona Esere. Isiraha ese ia naria ane abia taudia be ane idia abia badabada.

43 Unai dina ai boubou gaudia momo idia henia bona idia moale,+ badina Dirava momokanina ese idia dekenai moale bada ia henia. Hahine bona natudia danu idia moale,+ unai dainai Ierusalema ai idia karaia moale ena regena be gabu daudau amo idia kamonai diba.+

44 Unai dina ai tatau haida idia abia hidi, taunimanima ese idia henia harihari gaudia,+ uma ena anina ginigunadia,+ bona aniani ena kahana 10 amo kahana ta+ idia haboua rumadia idia naria totona.+ Taravatu hegeregerena,+ siti idauidau edia tano amo idia haboua aniani ena kahana haida be hahelaga taudia bona Levi taudia totona do idia henia,+ badina idia be hesiai gaukara namona idia karaia dainai Iuda taudia idia moale noho. 45 Bona hahelaga taudia bona Levi taudia be edia Dirava totona edia hesiai gaukara bona hagoevaia gaukarana idia karaia matamaia, danu ane abia taudia bona geiti naria taudia be Davida bona ena natuna Solomona ese idia henia hadibaia hereva hegeregerena idia karaia. 46 Guna Davida bona Asapa edia nega ai, ane abia taudia bona Dirava hanamoa anedia bona tanikiu henia anedia idia abia taudia be mai edia hakaua taudia.+ 47 Serubabele bona Nehemia edia nega ai,+ Israela taudia be dina ta ta ai, ane abia taudia+ bona geiti naria taudia+ dekenai harihari gaudia idia henia. Danu Levi taudia totona harihari gaudia idia henia,+ bona Levi taudia ese Arona ena bese taudia dekenai aniani idia henia.

13 Unai dina ai Mose ena buka be taunimanima vairanai idia duahia,+ bona unai buka lalonai idia davaria Amono taudia eiava Moaba taudia+ be Dirava momokanina ena taunimanima huanai idia noho lasi be namo,+ 2 badina idia ese Israela taudia dekenai paraoa bona ranu idia henia lasi, to Balama dekenai moni idia henia Israela taudia ia gwauraia dika totona.+ To, iseda Dirava ese unai hadikaia herevana ia koua bona hanamoa herevana ai ia halaoa.+ 3 Taunimanima ese Taravatu idia kamonai murinai, idau bese taudia ibounai be Israela taudia edia huana amo idia parara matamaia.+

4 Unai ia do vara lasi neganai, hahelaga tauna Eliasibi be iseda Dirava ena ruma* ena kohu haboua daiutudia* ia naria.+ Ia be Tobaia ena varavara ta.+ 5 Eliasibi ese Tobaia totona aniani haboua daiutu badana ta ia hegaegaelaia, guna unai daiutu ai aniani boubou, frenkinsens* bona kohu idauidau, bona wain matamata, oela bona aniani edia kahana 10 amo kahana ta idia atodia,+ unai gaudia be Levi taudia,+ ane abia taudia, bona geiti naria taudia totona. Hahelaga taudia edia harihari gaudia be unuseni idia haboua.+

6 Bona unai nega ai lau be Ierusalema ai lau noho lasi, badina lau be Babulonia ena king, Aratasaseta,+ dekenai lau lao, unai be ena lohia lagani namba 32 ai.+ Bona dina haida murinai king amo gwaumaoro lau abia lau giroa lou totona. 7 Bena Ierusalema dekenai lau mai bona Eliasibi+ ese Tobaia totona ia karaia kara dikana ena sivarai lau kamonai,+ ia ese Dirava momokanina ena ruma ena ariara ai ia noho aniani haboua daiutuna ta be Tobaia totona ia hegaegaelaia. 8 Unai ese egu lalona ia hametaua, unai dainai Tobaia ena ruma kohudia ibounai be aniani haboua daiutu amo lau negea raka-lasi. 9 Unai murinai lau ese oda lau henia bona aniani haboua daiutudia idia hagoevaia. Bona Dirava momokanina ena ruma ena kohu idauidau, aniani boubou bona frenkinsens be unuseniai lau atodia lou.+

10 Danu lau davaria taunimanima ese idia haboua gaudia edia kahana haida be Levi taudia+ dekenai idia henia lasi,+ unai dainai Levi taudia bona ane abia taudia be edia hesiai gaukara idia rakatania bona ta ta be edia uma dekenai idia lao bona idia gaukara.+ 11 Vadaeni lau ese ofesa taudia lau gwau henia+ bona lau gwau: “Dahaka dainai Dirava momokanina ena ruma ia noho kava?”+ Bena Levi taudia ibounai lau haboua bona edia hesiai gaukara lau henia lou. 12 Bona Iuda taudia ibounai ese wain matamata, oela bona aniani edia kahana 10 ena kahana ta+ be kohu haboua daiutudia dekenai idia atoa.+ 13 Bena lau ese hahelaga tauna Selemaia, taravatu torea hanai tauna* Sadoka, bona Levi tauna Pedaia lau abia hidi kohu haboua daiutudia* idia naria totona, bona Sakuru be idia ia durua, Sakuru be Hanana ena natuna mero, Hanana be Matanaia ena natuna mero. Unai taudia idia abia hidi badina idia be gaukara karaia namonamo taudia. Unai tatau edia maduna be edia tadikakadia dekenai harihari gaudia idia henia.

14 Egu Dirava e, inai gauna dekenai lau oi laloatao,+ bona egu Dirava ena ruma bona ena hesiai gaukara totona lau hahedinaraia lalokau* oi laloaboio lasi.+

15 Unai nega ai lau itaia Iuda taudia be Sabati negadiai wain karaia totona greips huahua idia moia,+ doniki amo witi momo herea idia abia mai, bona wain, greips, fig huahua, bona gau idauidau be Sabati dinana ai Ierusalema dekenai idia abia mai.+ Vadaeni idia lau oda henia unai dina ai idia hoihoi lasi totona. 16 Bona siti dekenai idia noho Turo taudia ese gwarume bona kohu idauidau ibounai be Sabati dinana ai Ierusalema ai idia noho Iuda taudia dekenai idia abia mai bona idia hoihoilaia.+ 17 Vadaeni lau ese Iuda ena ladana bada taudia lau gwau henia bona lau gwau: “Dahaka dainai umui ese inai kara dikana umui karaia? Umui ese Sabati taravatuna umui badinaia lasi! 18 Emui sene taudia ese inai idia karaia, unai dainai iseda Dirava ese ita dekenai bona inai siti dekenai dika bada ia mailaia. Bona hari umui ese Sabati dinana umui badinaia lasi, a? Umui ura Dirava be Israela taudia dekenai do ia badu momokani, a?”+

19 Gabu ia do dibura lasi bona Sabati ia do matamaia lasi neganai, oda lau henia Ierusalema ena iduara do idia koudia. Danu, lau gwau iduara do idia kehoa lasi ela bona Sabati dinana murinai, bona iduara gimaia totona egu hesiai taudia haida lau abia hidi, unai amo Sabati dinana ai hoihoi kohudia idia abia mai lasi. 20 Vadaeni kohu idauidau idia hoihoilaia taudia be nega tamona eiava nega rua, hanuaboi ai Ierusalema ena murimuri ai idia mahuta. 21 Bena idia lau sisiba henia bona lau gwau: “Dahaka dainai hanuaboi ai magu vairanai umui kamepa noho? Bema unai bamona umui karaia lou, lau ese inai gabu amo umui do lau kokia.” Unai nega amo Sabati dinana ai idia mai lou lasi.

22 Bona lau ese Levi taudia lau hamaoroa namona be nega ibounai sibona idia hagoevaia bona iduara idia gimaia, unai amo Sabati dinana idia hahelagaia.+ Danu, egu Dirava e, lau karaia gaudia dainai lau oi laloatao bona emu lalokau* bada dainai lau dekenai hebogahisi oi hahedinaraia.+

23 Unai nega ai danu lau itaia Iuda taudia be Asadoda,+ Amono, bona Moaba+ hahinedia+ idia adavaia. 24 Edia natudia haida be Asadoda taudia edia gado ai idia hereva, bona ma haida be idau taudia edia gado ai idia hereva, to Iuda taudia edia gado ai idia hereva diba lasi. 25 Vadaeni idia lau gwau henidia bona lau hamaorodia Dirava ese idia do ia hahemaoro henia bona tatau haida lau botaia+ bona edia huina haida lau kokia bona lau hamaorodia Dirava dekenai gwauhamata idia karaia. Idia lau hamaoroa: “Namo lasi emui natuna kekenidia be edia natuna memero dekenai umui henia, bona namo lasi edia natuna kekenidia umui abia dae emui natudia memero eiava umui sibona totona.+ 26 Israela ena king, Solomona, be unai kara dainai ia kara dika, ani? Bese momo huanai king ta be ia bamona lasi.+ Bona iena Dirava ese ia lalokau henia,+ unai dainai Dirava ese ia be Israela ena king ai ia halaoa. To ia adavaia idau bese hahinedia ese ia idia hakaua kara dika ia karaia totona.+ 27 Unai dainai umui ese idau bese hahinedia umui adavaia karana amo kara dika badana umui karaia bona iseda Dirava umui badinaia lasi!”+

28 Ioiada ena natuna mero ta,+ hahelaga tauna badana Eliasibi ena tubuna mero unai,+ be Horono tauna Sanubalata ena ravana.+ Unai dainai ia be egu vairana amo lau lulua.

29 Egu Dirava e, idia oi laloatao bona oi panisidia, badina idia ese hahelaga gaukarana idia hadikaia bona hahelaga taudia+ bona Levi taudia+ ida oi karaia gwauhamata idia makohia.

30 Bona idau bese taudia edia kara dikadia idauidau amo idia lau hakaua siri bona idia lau hagoevaia, bona hahelaga taudia bona Levi taudia ese idia karaia gaukaradia lau henia lou, ta ta be edia hesiai gaukara idia karaia,+ 31 bona dala lau karaia nega korikori ai lahi au+ idia mailaia bona idia mage au huahua ginigunadia idia gogoa totona.

Egu Dirava e, lau oi lalonamo henia.+