HOSEA
1 Iuda ena king taudia,+ Usaia,+ Iotama,+ Ahasa,+ bona Hesekaia+ edia nega ai, bona Israela ena king Ieroboama,+ Ioasa+ ena natuna ena nega ai Iehova ena hereva be Beri ena natuna mero Hosea* amo ia gwauraia. 2 Iehova be Hosea amo ena hereva ia gwauraia neganai, Iehova ia gwau: “Oi lao ariara hahine* ai do ia lao hahinena oi adavaia bona oi totona tatau ma haida amo natudia do ia havaraia, badina unai tano taudia edia matabodaga karana* dainai Iehova badinaia karana idia dadaraia momokani.”+
3 Vadaeni ia lao bona Dibalaimi ena natuna kekeni Gomere ia adavaia. Gomere ia rogorogo bona natuna mero ta ia havaraia.
4 Bena Iehova be ia dekenai ia gwau: “Ena ladana oi hatoa Ieserele,* badina nega sisina murinai lau ese Iehu+ ena bese taudia edia davana do lau henia, badina idia ese Ieserele taudia edia rara idia bubua, bona lau ese Israela basileia do lau kokia.+ 5 Unai dina ai lau ese Ieserele ena peva be Israela ena koura ai do lau hamakohia.”
6 Gomere ia rogorogo lou bona natuna kekeni ta ia havaraia. Bona Dirava be Hosea dekenai ia gwau: “Ena ladana oi hatoa Lo-ruhama,* badina lau ese Israela besena do lau hebogahisi henia lou lasi,+ bona lau ese idia do lau lulua lao.+ 7 To lau ese Iuda besena do lau hebogahisi henia,+ bona lau, Iehova, edia Dirava ese idia do lau hamauria.+ To peva eiava tuari kaia eiava tuari eiava hosi eiava hosi guia taudia do lau gaukaralaia lasi.”+
8 Lo-ruhama be rata ia rakatania murinai, Gomere ia rogorogo lou bona natuna mero ma ta ia havaraia. 9 Bena Dirava ia gwau: “Ena ladana oi hatoa Lo-ami,* badina umui be egu taunimanima lasi bona lau be emui Dirava lasi.
10 “To Israela taudia edia namba be kone ena miri bamona, duahia diba lasi.+ Bona guna unai gabu ai idia lau hamaoroa, ‘Umui be egu taunimanima lasi.’+ Idia dekenai do lau hereva, ‘Umui be mauri Diravana ena natudia.’+ 11 Bona Iuda taudia bona Israela taudia be mai lalotamona ida do idia haboua+ bona gunalaia tauna ta do idia abia hidi, bena unai tano amo do idia daekau lao, badina unai be Ieserele ena dina badana.+
2 “Emui tadikakadia dekenai umui gwau: ‘Umui be egu taunimanima!’*+
Bona emui taihudia dekenai umui gwau: ‘Oi be Dirava ese ia hebogahisi henia hahine!’*+
2 Emui sinana umui samania,
Badina ia be egu hahine lasi+ bona lau be iena adavana lasi.
Ia be ena ariara karadia ia rakatania be namo
Bona heudahanai karana do ia karaia lou lasi.
3 Eiava lau ese ena dabua do lau kokia bona kopina kavakava do ia noho, sinana ese ia havaraia negana bamona,
Ia be taunimanima lasi gabuna bamona do lau halaoa,
Ia be ranu lasi tano bamona ai do lau halaoa
Bona ranu mase dainai do ia mase.
4 Bona ena natudia memero dekenai hebogahisi do lau hahedinaraia lasi,
Badina idia be ariara* karana amo idia vara natudia memero.
5 Badina edia sinana be ariara* karadia ia karaia.+
Ia be hemarai karadia ia karaia bona unai natudia memero ia havaraia,+ bona ia gwau,
‘Lau be lau ura henia tatau edia murinai do lau lao,+
Idia ese lau dekenai aniani bona ranu idia henia,
Bona egu wulu bona egu linen* dabua, egu oela bona wain idia henia.’
6 Vadaeni lau ese au ginigini amo emu dala do lau koua,
Bona lau ese nadi magu ta do lau haginia,
Unai amo ena raka dalana do ia davaria lasi.
7 Ia be ia ura henia tatau murinai do ia heau lao, to idia do ia davaria lasi,+
Idia do ia tahua, to do ia davaria lasi.
Bena do ia gwau: ‘Lau be egu adavana ginigunana dekenai do lau giroa lou,+
Badina guna egu mauri be namo, to hari egu mauri be ia dika.’+
8 Ia laloparara lasi lau ese ia dekenai uma aniani,+ wain matamata, bona oela lau henia,
Bona ia dekenai siliva momo lau henia
Bona golo lau henia, unai be Bala totona idia gaukaralaia.+
9 ‘Unai dainai, aniani gogoa negana ai do lau giroa bona egu uma aniani do lau abia
Bona vain haboua negana ai egu wain matamata do lau abia,+
Bona egu wulu bona egu linen dabua, ena tauanina ia koua dabuadia unai, be ia amo do lau kokia.
10 Hari lau ese ena dabua do lau kokia bona ia ura henia tatau ese ena tauanina do idia itaia,
Bona tau ta ese egu imana amo ia do ia hamauria lasi.+
11 Iena moale karadia ibounai,
Ia karaia ariadia,+ hua matamata ai ia karaia aria, sabati dinadia bona ena aria negadia ibounai do lau hadokoa danu.
12 Bona lau ese ena vain audia bona fig audia do lau hadikaia, badina ia gwau:
“Lau ese moni be inai gaudia amo lau abia, unai be lau ura henia tatau ese idia henia.”
Unai audia be uda badana ai do lau halaoa,
Bona dagedage animal ese do idia ania.
13 Lau ese unai hahine ena kerere davana do lau henia, badina Bala kaivakuku dekenai boubou gaudia ia henia,+
Ia be ena rini ia atoa bona herahera gaudia amo sibona ia hahairaia bona ia ura henia tatau murinai ia heau lao,
Bona lau ia laloaboio.’+ Unai be Iehova ena hereva.
14 ‘Vadaeni ena lalona do lau veria,
Taunimanima idia noho lasi tano dekenai do lau hakaua lao,
Bona ia dekenai lalona hanamoa herevadia do lau gwauraia.
15 Unai nega amo ia dekenai ena vain umadia do lau henia,+
Bona Akoro Kourana+ do lau henia, unai be ia naria noho gau namona ena dala,
Unai hahine be unuseni amo lau do ia haere henia, ia matamata negana ai ia karaia bamona,
Aigupito tano amo ia raka-lasi negana ai ia karaia bamona.+
16 Bona unai dina ai,
Oi ese lau do oi gwauraia, Egu adavana, to lau do oi gwauraia lou lasi, Egu biaguna.’* Unai be Iehova ena hereva.
17 ‘Unai hahine ena uduna amo Bala kaivakuku edia ladana do lau kokia,+
Bona unai kaivakuku edia ladana do ia laloatao lasi.+
18 Unai nega ai lau ese uda animal,
Bona atai manudia bona tano ai idia rau animal totona gwauhamata ta do lau karaia,+
Lau ese tano dekenai peva bona tuari kaia do lau hadikaia bona tuari do lau haorea,+
Bona idia be mauri namona do idia noholaia.+
19 Oi be egu maoheni hahine ai do lau halaoa ela bona hanaihanai,
Bona lau gwauhamata oi dekenai kara maoromaoro bona kara momokani do lau hahedinaraia,
20 Lau gwauhamata lau be oi do lau badinaia,
Bona do oi diba lau be Iehova.’+
21 Iehova ia gwau, ‘Unai dina ai do lau haere,
Lau ese guba do lau haere henia,
Bona guba ese tanobada do ia haere henia.+
22 Bona tanobada ese uma aniani bona wain matamata bona oela do ia haere henia,
23 Lau ese hahine be uhe bamona tano ai do lau hadoa,+
Bona lau ese ia do lau hebogahisi henia, badina taunimanima ese ia idia hebogahisi henia lasi,*
Idia be egu taunimanima lasi,* to hari do lau gwau: “Umui be egu taunimanima.”+
Bona do idia gwau: “Oi be emai Dirava.”’”+
3 Bena Iehova be lau dekenai ia gwau: “Oi lao, bona tau ma ta ese ia ura henia bona ia heudahanai hahine oi ura henia lou.+ Lau, Iehova, ese Israela taudia lau ura henia hegeregerena,+ herevana idia be dirava ma haida idia ura henia+ bona greips kaukaudia* idia ura henia.”
2 Vadaeni siliva moni 15 bona bali homa* ta mai kahana amo hahine lau hoia. 3 Bena ia dekenai lau gwau: “Oi be lauegu, nega ibounai. Namo lasi matabodaga karadia oi karaia, bona tau ma ta ida oi mahuta hebou lasi, bona lau danu be oi ida do lau mahuta hebou lasi.”
4 Badina nega daudau lalonai Israela taudia be king ta eiava lohia tauna ta ese do ia lohiaia lasi,+ boubou gaudia do idia henia lasi, nadi du helagadia do idia haginia lasi, edia epodi*+ dabua be lasi bona kaivakuku* ta do idia tomadiho henia lasi.+ 5 Unai nega ena dokona ai Israela taudia do idia giroa lou edia Dirava, Iehova,+ bona edia king, Davida,+ do idia tahua, bona mai gari ida Iehova dekenai do idia lao ena lalonamo abia totona.+
4 Israela taudia e, Iehova ena hereva umui kamonai,
Iehova be mai ena kota herevana ta inai tano ai idia noho taudia totona,+
Badina idia be koikoi karadia idia karaia, idia lalokau* heheni lasi bona Dirava diba lasi taudia bamona idia karaia noho.+
2 Taunimanima be gwauhamata koikoi idia karaia, idia hereva koikoi+ bona idia ala-ala,+
Bona henaohenao bona heudahanai karadia+ be bada herea,
Bona taunimanima be ma haida hamasea karana idia karaia noho.+
3 Unai dainai tano do ia taitai+
Bona tano idia noholaia taudia ibounai be do idia mase.
Uda animal idauidau bona atai manudia,
Bona davara ena gwarume be do idia boio.
4 “To, namo lasi tau ta ese umui ia sisiba henia,+
Badina umui be hahelaga tauna idia gwau-edeede henia taudia bamona.+
5 Vadaeni dina ena diari ia noho, to do umui moru kava,
Bona hahelaga tauna be umui ida do ia moru, hanuaboi ai bamona.
Bona lau ese emui sinana do lau hamasea.
6 Egu taunimanima be do idia ore, badina idia be lau idia diba lasi.
Umui ura lasi lau umui dibaia dainai,+
Umui do lau dadaraia, bona hahelaga gaukara do umui karaia lasi,
Bona umui ese egu taravatu* umui laloaboio dainai,+
Lau ese emui natudia do lau laloaboio.
7 Egu taunimanima idia momo herea neganai, edia kara dika ia bada ia lao danu.+
Lau ese edia ladana namona do lau hadikaia.*
8 Egu taunimanima idia kara dika neganai, hahelaga taudia be vamu momo idia ania,
Idia ura taunimanima be kara dika do idia karaia noho.
9 Taunimanima bona hahelaga taudia idia kara dika dainai,
Lau ese edia kara hegeregerena do lau hahemaoro henia,
Bona edia kara dika hegeregerena davana do lau henia.+
10 Do idia aniani, to do idia bogakunu lasi.+
Idia be lebulebu karadia* do idia karaia, to edia bese taudia do idia momo lasi,+
Badina idia be Iehova idia matauraia lasi.
11 Ariara* karadia idia karaia bona wain gunana bona wain matamata idia inua dainai,
Edia lalona idia dika bona kara maorodia idia karaia lasi.+
12 Egu taunimanima be edia au kaivakuku edia heduru idia tahua,
Bona edia itotohi ese idia ia hamaoroa hegeregerena idia kara,
Bona heudahanai urana ese idia ia hakaua kerere,
Bona edia ariara* karadia dainai idia ura lasi Dirava idia badinaia.
13 Ororo edia ataiai boubou gaudia idia henia,+
Bona ororo maragidia ataiai boubou gaudia idia gabua, unai amo kwalahu ia daekau,
Ouki audia bona storak audia* bona au badadia ibounai edia henunai danu,+
Badina unai au edia henunai be keruma namo herea.
Unai dainai emu natuna kekenidia be ariara* karadia idia karaia,
Bona emu ravana hahinedia be idia heudahanai.
14 Emu natuna kekenidia edia ariara* karadia dainai lau ese idia do lau panisia lasi,
Bona emu ravana hahine edia heudahanai karadia dainai idia do lau panisia lasi.
Badina tatau be ariara hahinedia ida idia lao
Bona dubu ena ariara hahinedia ida boubou gaudia idia henia,
Unai bamona laloparara lasi taudia+ be dika do idia davaria.
15 Israela taudia e, ena be umui be ariara* karadia umui karaia,+
To namo lasi Iuda besena be unai kara dika do ia karaia danu.+
Gilegala+ eiava Betavene+ dekenai umui lao lasi,
Bona gwauhamata umui karaia neganai, namo lasi umui gwau, ‘Iehova ia mauri noho hegeregerena!’+
16 Israela taudia be idia kwara-auka, boromakau ia kara auka bamona.+
Unai dainai Iehova ese idia do ia naria lasi, mamoe natuna be rei gabuna ai ia naria hegeregerena.
17 Eparaima iduhu be kaivakuku tomadiho henia karadia ia badinaia.+
Ia lau rakatania bona ena kara dika dainai ia davaria hisihisi do ia mamia.
18 Edia bia* ia ore neganai,
Sihari kava karadia idia karaia.
Bona Eparaima ena lohia taudia be hemarai karadia idia ura henia.+
19 Lai ese ena apena amo unai bese taudia do ia abia lao,
Bona taunimanima edia boubou gaudia dainai do idia hemarai.”
5 “Hahelaga taudia e, inai hereva umui kamonai,+
Israela bese e, umui kamonai namonamo,
King ena bese taudia e, umui kamonai,
Inai hahemaoro hereva be umui totona.
Badina umui be tarapu bamona Misipa dekenai
Bona reke bamona gauna amo Taboro umui koua.+
2 Bona gwau-edeede taudia ibounai be ala-ala karadia idia karaia,
Bona lau ese idia ibounai do lau matahakani henia.
3 Lau be Eparaima lau diba,
Bona Israela be lau amo ia hunia diba lasi.
Eparaima e, hari oi be matabodaga karadia oi karaia.
Unai kara amo Israela be sibona ia hamiroa.+
4 Edia kara dainai Dirava dekenai idia giroa lou diba lasi,
Badina idia be ariara* karadia idia karaia noho,+
Bona idia ese Iehova ena kara idia laloa bada lasi.
5 Israela ena hekokoroku karana dainai sibona ia kota henia,+
Israela bona Eparaima be idia kara dika dainai idia moru,
Bona Iuda be idia ida ia moru.+
6 Idia be edia mamoe oreana bona boromakau oreana ida Iehova idia tahua.
To ia idia davaria lasi.
Ia be idia ia rakatania vadaeni.+
7 Idia be Iehova idia badinaia lasi,+
Badina idau bese hahinedia amo natudia memero idia havaraia.
Vadaeni hua tamona lalonai idia ibounai do idia hadikaia ore, edia tano bona kohu danu.
8 Gibea dekenai kibi umui hiriria,+ Rama dekenai kibi umui hiriria!+
Betavene dekenai, tuari totona umui boiboi!+ Beniamina taudia e, tuari orea umui gunalaia!
9 Eparaima taudia e, panisia dinana ai umui be gari gauna ai do umui lao.+
Lau ese Israela ena iduhu ibounai dekenai do ia vara gauna lau gwauraia hedinarai vadaeni.
10 Iuda ena lohia taudia be tano hetoana ena maka idia haidaua taudia bamona.+
Lau ese edia latanai egu badu do lau bubua, ranu bamona.
11 Eparaima be hahemaoro ia abia dainai hisihisi ia davaria,
Badina ena lalona ia hadaia ena inai tauna ena murinai ia lao.+
12 Vadaeni lau ese Eparaima be manumanu bamona do lau hadikaia
Bona Iuda besena be bodaga gauna ta bamona do lau negea.
13 Eparaima be ena gorere ia itaia, bona Iuda be ena toto dikana ia itaia neganai,
Eparaima ese ena hesiai taudia be Asuria ena king badana dekenai ia siaia lao.+
To unai king ia hegeregere lasi edia gorere ia hanamoa totona,
Bona edia toto dikana ia hanamoa diba lasi.
14 Badina Eparaima dekenai, lau be laiona natuna ta bamona,
Bona Iuda besena dekenai, lau be laiona goadana ta bamona.
Lau ese idia do lau darea maragimaragi bona idia do lau rakatania,+
Idia do lau huaia lao, bona ta ese idia do ia hamauria lasi.+
15 Lau be egu gabu dekenai do lau giroa lou ela bona edia kerere davana idia abia,
Bena unai nega ai egu lalonamo do idia tahua.+
Idia lalometau neganai, lau do idia tahua.”+
6 “Umui mai, bona Iehova dekenai ita giroa lou,
Badina ia ese laiona bamona ita ia darea maragimaragi,+ to ita do ia hanamoa lou.
Ia ese toto dikadia amo ita ia hahisia, to iseda toto do ia kumia.
2 Ia ese dina rua murinai ita do ia hanamoa lou.
Dina ihatoina ai ita do ia hatorea isi lou,
Bona do ita mauri lou bona ita do ia ura henia lou.
3 Ita be do ita gaukara goada Iehova ita dibaia totona.
Ia be ita dekenai do ia mai, daba ia rere bamona,
Bona ita dekenai do ia mai, medu bada ia diho bamona,
Bona medu negana ai tano be ranu amo ia honu bamona.”
4 “Eparaima iduhuna e, oi dekenai dahaka do lau karaia?
Iuda iduhuna e, oi dekenai dahaka do lau karaia?
Badina emui taunimanima ese idia hahedinaraia lalokau be daba ena ori bamona,
Bona daba paripari bamona ia ore haraga.
5 Unai dainai lau ese hahemaoro herevana be egu peroveta taudia amo do lau gwauraia, idia lau utua maragimaragi bamona,+
Bona lau gwauraia herevadia amo idia do lau hadikaia ore,+
Bona inai hahemaoro herevadia be do idia hedinarai momokani, dina ena diari ia hedinarai bamona.+
6 Badina lalokau* idia hahedinaraia taudia dekenai lau moale, to boubou karana dekenai lau moale lasi,
Bona Dirava dibaia karana lau moalelaia, to gabua bouboudia lau moalelaia lasi.+
9 Hahelaga taudia be dadidadi tuari taudia bamona hehuni ai idia naria noho, tau ta idia alaia totona.
Idia be Sekema dalana ai ala-ala karadia idia karaia,+
Bona idia karaia karadia be hemarai karadia.
10 Lau ese Israela bese lalonai gau dikana ta lau itaia.
Unuseniai Eparaima iduhu be ariara karadia ia karaia,+
Bona Israela be sibona ia hamiroa.+
11 To Iuda iduhu e, oi totona gogoa negana ia ginidae,
Unai neganai egu taunimanima, idia abia mauri taudia unai, do lau haboua lou.”+
7 “Israela taudia lau hanamoa negadia ai,
Eparaima iduhu ena kerere ia hedinarai,+
Bona Samaria taudia edia kara dikadia danu.+
Badina idia be koikoi karadia idia karaia,+
Bona henaohenao taudia be ruma lalodiai idia vareai, bona dadidadi tuari oreadia be siti ena murimuri ai gabu idia hadikaia.+
2 To idia laloa lasi lau ese edia kara dikadia ibounai do lau laloatao.+
Vadaeni edia kara dikadia ese idia ia hagegea noho,
Bona idia be egu vairanai kara dikadia idia karaia noho.
3 Edia kara dikadia amo king idia hamoalea,
Bona edia koikoi karadia amo lohia taudia idia hamoalea.
4 Idia ibounai be heudahanai taudia,
Idia be paraoa gabua tauna ese ia karaia lahi bamona,
Paraoa gabua tauna ese lahi ena siahu ia habadaia murinai, paraoa ia hapalakaia bona ia naria ela bona paraoa ia gudu.
5 Iseda king ena dina ai, lohia taudia idia gorere,
Idia be wain dainai idia badu dikadika.+
King be ia idia hevasehalaia taudia ia tura henidia.
6 Badina idia mai neganai edia kudouna be lahi ia araia noho aveni bamona.*
Hanuaboi lalonai paraoa gabua tauna ia mahuta noho,
Daba ai, aveni ia siahu dikadika lahi ia hururuhururu bamona.
7 Idia ibounai be aveni bamona idia siahu noho,
Bona edia lohia taudia* idia hamasea.
Edia king taudia ibounai idia moru,+
Idia huanai ta be lau dekenai ia boiboi lasi.+
8 Eparaima be idau bese taudia ia bamoa.+
Eparaima be lahi ai ia noho keke kuboruna, idia hagiroa lasi gauna bamona.
9 Ia be idau taudia ia bamoa dainai, ena goada ia ore,+ to unai ia diba lasi.
Bona ena huina ia kurokuro vadaeni, to unai ia itaia lasi.
10 Israela taudia edia hekokoroku karana ese edia dika ia hahedinaraia,+
To herevana inai ibounai ia vara, idia be edia Dirava Iehova dekenai idia giroa lou lasi,+
Bona ia idia tahua lasi.
11 Eparaima be kavakava pune manu bamona, lalohadai namona ia abia lasi.+
Ia be Aigupito taudia dekenai heduru totona ia boiboi,+ bona Asuria dekenai ia lao.+
12 Eparaima ia lao gabudia ibounai dekenai, lau ese egu reke do lau negea.
Bona atai amo ia do lau veria diho, ataiai idia roho manudia bamona.
Lau ese idia do lau matahakani henia, idia haboua taudia dekenai lau henia hadibaia hereva hegeregerena.+
13 Dika do idia davaria, badina idia ese lau idia rakatania!
Edia gau ibounai do idia dika, badina lau vairanai idia kara dika!
Lau noho hegaegae idia lau hoia lou totona, to lau idia gwauraia koikoi.+
14 Idia be mai kudouna ibounai ida lau dekenai heduru totona idia boiboi lasi,+
Ena be edia mahuta patana latanai mai hisihisi ida idia hekure noho.
Badina edia witi bona wain matamata be sibodia totona idia utudia,
Idia be lau dekenai idia gwau-edeede.
15 Ena be idia lau sisiba henia bona idia lau hagoadaia,
To idia be lau idia hadikaia totona palani idia karaia.
16 Edia mauri dalana idia haidaua, to tomadiho momokani idia badinaia lasi,
Idia be peva dikana bamona, gau idia karaia namonamo diba lasi.+
Edia lohia taudia be tuari kaia amo do idia hamasea badina koikoi herevadia idia gwauraia.
Unai dainai Aigupito tano ai idia be taunimanima ese do idia hevasehalaia.”+
8 “Kibi oi hiriria!+
Umui ia inai henia tauna ta be ugava manu bamona ia mai, Iehova ena ruma hadikaia totona,+
Badina idia ese egu gwaubou idia hadikaia+ bona egu taravatu idia utua vadaeni.+
2 Idia be lau dekenai idia taitai, idia gwau, ‘Emai Dirava e, ai Israela taudia be oi ai diba!’+
3 Israela taudia be kara namo idia dadaraia.+
Namona be idia ia inai henia tauna be edia murinai ia lao.
4 Idia ese king taudia idia abia hidi, to egu dala hegeregerena lasi.
Idia ese lohia taudia idia abia hidi, to egu ura hegeregerena lasi.
Idia be edia siliva bona golo amo kaivakuku idia karaia,+
Unai amo dika do idia davaria.+
5 Samaria taudia e, emui boromakau kaivakuku lau dadaraia vadaeni.+
Umui dekenai egu badu ia bada herea.+
Umui be do umui noho ela bona edena negai do umui goeva?
6 Badina inai boromakau kaivakuku be Israela amo.
Gaukara idauidau ia diba tauna ese ia karaia, bona ia be Dirava lasi,
Bona Samaria taudia edia boromakau kaivakuku be do ia makohi maragimaragi.
7 Idia be lai idia hadoa,
Bona lai gubana do idia gogoa.+
Witi ese anina ia havaraia diba lasi,+
Idia tubu witi be do idia gogoa lasi.
Bona ena be witi ena anina haida idia noho, to idau bese taudia ese do idia gogoa ore.+
8 Edia inai taudia ese Israela taudia do idia hadonoa.+
Vadaeni bese idauidau huanai do idia noho,+
Ta ese ia ura henia lasi uro bamona.
9 Badina idia be Asuria dekenai idia daekau lao,+ uda doniki be sibona ia raka lao bamona.
Eparaima ese matabodaga karadia idia ura henia taudia ia hoia.+
10 Ena be ia ese bese idauidau amo unai taudia ia hoia,
To lau ese idia do lau haboua lou.
Hisihisi do idia abia matamaia,+ badina king bona lohia taudia ese idia dekenai maduna metauna idia henia.
11 Eparaima ese boubou patadia momo ia karaia, unai amo ia kara dika.+
Ia ese unai boubou patadia ia gaukaralaia ia kara dika totona.+
13 Eparaima ese lau dekenai harihari bouboudia ia henia, bona vamu ia ania,
To Iehova be unai gaudia ia moalelaia lasi.+
Vadaeni hari Dirava ese iena kerere do ia laloatao bona ena kara dikadia dainai do ia panisia.+
14 Israela besena ese ena Havaraia Tauna ia laloaboio+ bona dubu momo ia haginia,+
Bona Iuda ese siti mai magu aukadia momo ia haginia.+
To lau ese iena siti lalodiai lahi do lau siaia,
Bona unai siti mai magu aukadia ta ta do ia araia ore.”+
9 Hosea ia gwau: “Israela taudia e, umui moale lasi,+
Bese idauidau idia moale bamona do umui moale lasi.
Badina ariara* karadia umui karaia dainai emui Dirava umui rakatania.+
Ariara karadia amo umui abia davana, witi moia gabudia ibounai dekenai umui abia davana unai, umui ura henia.+
2 To witi moia gabuna bona vain huahua moia gabuna amo witi bona vain do idia abia lasi,
Bona wain matamata do idia abia lasi.+
3 Idia be Iehova ena tano dekenai do idia noho lasi,+
To, Eparaima be Aigupito dekenai do ia giroa lou
Bona Asuria ai miro gaudia do ia ania.+
4 Idia be Iehova dekenai wain boubou gaudia do idia henia lou lasi,+
Edia boubou gaudia ese Dirava do ia hamoalea lasi.+
Unai gaudia be mase neganai idia ania paraoa bamona,
Unai paraoa idia ania taudia ibounai be do idia miro.
Unai paraoa be idia sibona totona dainai,
Iehova ena ruma dekenai do idia abia mai lasi.
5 Dahaka do oi karaia bema umui haboua* negana ia ginidae?
Eiava dahaka do oi karaia bema Iehova ena aria karaia dinana ia ginidae?
6 Kamonai! Dika bada do ia vara dainai do idia heau be namo.+
Aigupito ese idia do idia haboua,+ bona Memepisi ese idia do ia guria.+
Ava ginigini ese edia gau namodia, siliva amo idia karaia gaudia, do idia abia,
Bona edia palai rumadia ai au ginigini do idia tubu.
7 Edia dika laloatao dinana do ia mai,+
Edia kara dika davana abia dinana do ia mai,
Bona Israela be unai do idia diba.
Edia peroveta tauna be do ia kavakava, bona sibona ia gwauraia ia be peroveta tauna be kavakava tauna.
Dagedage karadia momo oi davaria, badina emu kara dika be bada herea.”
8 Eparaima ena gima tauna+ be egu Dirava ena gaukara ia karaia.+
To hari ena peroveta taudia ibounai edia kara+ be manu tarapua tauna ena tarapu bamona.
Iena Dirava ena ruma ai inai heheni kara ia noho.
9 Edia kara dika be bada herea, Gibea ena nega ai ia vara bamona.+
Ia ese edia kara dika do ia laloatao bona idia do ia panisia.+
10 Dirava ia gwau: “Tano kaukau gabuna ai ta ese greips ia davaria hegeregerena, lau ese Israela lau davaria.+
Fig auna ai idia tubu huahua ginigunadia hegeregerena, lau ese emui sene tamadia lau itaia.
To idia be Peoro ena Bala dekenai idia lao.+
Hemarai gauna* dekenai sibona idia henia,+
Bona idia be gau dika rohorohona ai idia lao, idia lalokau henia diravana bamona.
11 Eparaima ena hairai be manu bamona ia roho boio,
Hahine do idia rogorogo lasi eiava natuna do idia havaraia lasi.+
12 Bema natudia idia havaraia,
Lau ese edia natudia do lau abia lao ela bona ta do ia noho lasi,+
Oibe, bema idia lau rakatania, dika bada do idia davaria!+
13 Eparaima be rei gabuna dekenai ia noho, lau dekenai ia be Turo bamona.+
Vadaeni namona be Eparaima ese ena natudia ia abia mai idia alaia totona.”
14 Iehova e, edia ura gauna be idia dekenai oi henia,
Idia mara negana ai natudia idia mase bona edia rata ia kaukau.
15 Dirava ma ia gwau: “Edia kara dika ibounai be Gilegala ai idia karaia,+ unai dainai idia lau inai henia.
Egu ruma amo idia do lau lulua badina kara dikadia idia karaia.+
Lau ese idia do lau lalokau henia lasi.+
Edia lohia taudia ibounai be kwara-auka taudia.
16 Eparaima do lau hadikaia.+
Edia ramuna do ia kakoro, bona huahua do idia havaraia lasi.
Ena be natudia idia havaraia, to edia lalokau natudia do lau hamasea.”
17 Egu Dirava ese idia do ia dadaraia,
Badina idia be ia idia kamonai henia lasi,+
Bona idia be bese idauidau huanai do idia hunia loaloa.+
10 “Israela be ia dika ia lao* vain auna mai ena huahua momo bamona.+
Iena huahua idia momo herea neganai, boubou patadia momo ia haginia.+
Ena tano ese anina namona ia havaraia neganai, ena nadi du helagadia idia hairai momokani.+
2 To edia kudouna be ia koikoi,
Vadaeni edia kerere davana do idia abia.
Dirava ese edia boubou patadia do ia hamakohia bona nadi du do ia hadikadia ore.
3 Vadaeni do idia gwau: ‘Ita be Iehova ita gari henia lasi dainai, king ta ese ita ia lohiaia lasi.+
Bona bema ita be mai eda king, ita totona dahaka do ia karaia?’
4 Anina lasi herevadia idia gwauraia bona gwauhamata koikoidia idia karaia,+
Unai dainai kota idia karaia dalana be uma dekenai idia tubu poisini ava bamona.+
5 Samaria dekenai idia noho taudia be Betavene ena boromakau kaivakuku totona do idia gari.+
Unai kaivakuku totona do idia taitai,
Unai kaivakuku totona idia moale bona idia hanamoa idau dirava edia hahelaga taudia danu do idia taitai,
Badina unai kaivakuku be tano ma ta dekenai do idia abia lao.
6 Unai kaivakuku be Asuria dekenai do idia abia lao, king badana ena harihari gauna bamona.+
Eparaima be do ia hemarai,
Bona Israela taudia do idia hemarai, badina idia ese sisiba kererena idia badinaia.+
7 Samaria bona ena king be dika do idia davaria,+
Ranu latanai ia hure au rigina ta bamona.
8 Betavene ena ataiai gabudia,*+ Israela taudia idia kara dika gabudia unai,+ be do idia hadikaia ore.+
Edia boubou patadia latanai au ginigini bona ava dikadia do idia tubu.+
Taunimanima be ororo badadia dekenai do idia gwau, ‘Ai umui koua!’
Bona ororo maragidia dekenai do idia gwau, ‘Ai latanai umui moru!’+
9 Israela taudia e, Gibea ai ia vara karana amo ema bona hari umui kara dika noho.+
Unuseniai kara dika idia do karaia noho.
Gibea ai kara maoromaoro lasi taudia idia tuari henia neganai, idia ibounai idia hamasea ore lasi.
10 Bema lau ura, vadaeni idia do lau matahakani henia.
Bona taunimanima be idia tuari henia totona do idia haboua,
Israela taudia be idia karaia kara kereredia rua ena metau idia huaia.
11 Eparaima be idia treinia boromakau ta bamona, tano moia gaukara ia ura henia,
Vadaeni lau ese iena boromakau hahine namona lau hadikaia lasi.
Bena lau ese ta do lau gaukaralaia Eparaima ia gunalaia totona.+
Iuda be tano geia gaukara do ia karaia, bona Iakobo be ia totona tano makohia gaukara do ia karaia.
12 Umui sibona totona tano namona umui abia hidi bona umui geia.
Unai tano lalonai kara maoromaoro ena uhe umui hadoa bona lalokau* ena anina umui gogoa.+
Nega ia do noho lalonai Iehova umui tahua,+
Vadaeni do ia mai bona umui dekenai kara maoromaoro ena hakaua herevadia do ia hadibaia.+
13 To umui ese kara dika ena tano umui geia,
Umui ese kara maoromaoro lasi karadia ena huahua umui abia,+
Bona koikoi ena uhe umui ania,
Badina sibona emui dala umui abia hidi,
Bona emui tuari taudia momo dekenai umui tabekau.
14 Emui taunimanima tuari henia totona idia mai neganai, tuari regena do umui kamonai,
Bona emui siti mai magu aukadia do idia hadikaia,+
Arabele amo ia mai tauna Salamana ese ia havaraia dika bamona,
Unai tuari negana lalonai hahine mai edia natudia be mai dagedage ida idia hamasedia.
15 Betele e, umui dekenai unai bamona do ia vara,+ badina emui kara dika be bada.
Daba momokani ai Israela ena king be do idia hadikaia ore.”+
11 “Israela be mero matamata neganai, ia lau lalokau henia,+
Bona ia, egu natuna mero, be Aigupito amo lau boiria mai.+
2 Nega momo idia* ese Israela taudia idia boiria,
To nega momo Israela taudia be idia amo idia raka-siri.+
Idia be Bala kaivakukudia dekenai boubou gaudia idia henia noho.+
Bona idia koroa kaivakukudia dekenai boubou gaudia idia henia noho.+
3 To lau ese Eparaima lau hadibaia ia raka totona,+ bona egu imana amo ia lau dogoatao.+
Bona idia lau hanamoa karana idia laloa lasi.
4 Lau ese lalokau bona hebogahisi be varo* bamona lau gaukaralaia idia lau veria mai totona.+
Bona idia laloa lau be edia aiona amo metau gauna ta ia kokia tauna bamona,
Bona mai manau ida idia ta ta dekenai aniani lau mailaia.
5 Idia be Aigupito tanona dekenai do idia giroa lou lasi, to Asuria be edia king ai do ia lao,+
Badina idia ura lasi lau dekenai idia giroa mai.+
6 Bona tuari amo edia siti ibounai do idia hadikaia+
Bona edia palani dikadia dainai, edia siti ena geiti idia koua auri latadia idia hamakohia bona taunimanima idia hamasedia.+
7 Egu taunimanima be edia lalona idia hadaia lau idia badinaia lasi totona.+
Ena be peroveta taudia ese idia boiridia ataiai momokani Diravana dekenai idia giroa lou totona, to ta ia toreisi lasi.
8 Eparaima e, edena bamona oi do lau rakatania?+
Israela taudia e, edena bamona umui be ma haida dekenai do lau henia?
Edena bamona umui be Adima bamona do lau kara henia?
Edena bamona umui be Seboimi bamona do lau halaoa?+
Umui dainai egu lalona lau haidaua.
Danu umui lau hebogahisi henia bada.+
9 Egu badu mai siahuna do lau halasia lasi.
Eparaima do lau hadikaia lou lasi,+
Badina lau be Dirava, to lau be taunimanima lasi.
Umui huanai lau sibona be Dirava Helagana.
Bona mai badu ida umui hadikaia totona do lau mai lasi.
10 Israela taudia be Iehova murinai do idia raka, bona laiona ta bamona do ia boiboi badabada.+
Ia boiboi neganai, ena natudia memero be west kahana amo mai heudeheude ida do idia mai.+
11 Aigupito idia rakatania neganai, idia be manu bamona do idia heudeheude,
Idia be pune manu ta bamona Asuria amo idia raka-lasi.+
Bona lau ese edia ruma ta ta dekenai idia do lau atodia.” Unai be Iehova ena hereva.+
12 “Eparaima be lau dekenai hereva koikoidia ia gwauraia,
Gabu ibounai dekenai Israela besena ena koikoi karadia sibona lau itaia.+
To Iuda be Dirava ida ia raka hebou noho,
Bona Helaga Herea Diravana ia badinaia noho.”+
12 “Eparaima be anina lasi gaudia ia abidadama henia.*
Dina ibounai lalonai ia be ist kahana ena lai ia lulua noho bamona.
Iena koikoi karadia bona dagedage karadia ia habadaia noho.
Asuria ida gwauhamata ia karaia+ bona Aigupito dekenai oela ia abia lao.+
2 Iehova be Iuda totona mai ena kota herevana ta,+
Iakobo ena kara hegeregerena ia ese do ia kota henia,
Bona ena kara hegeregerena davana do ia henia.+
3 Sinana ena bogana lalonai ia ese ena tadikaka ena aena geduna ia dogoatao,+
Bona mai goada ibounai ida Dirava ida ia heatu helulu.+
4 Ia be aneru ida ia heatu ela bona ia kwalimu.
Mai taitai ida Dirava ia noia ena lalonamo ia abia totona.”+
Betele dekenai Dirava ia davaria, bona unuseniai Dirava be ai* ida ia herevahereva.+
6 “Vadaeni emui Dirava dekenai umui giroa lou,+
Lalokau* umui hahedinaraia noho bona kota maoromaoro umui karaia noho,+
Bona hanaihanai emui Dirava do umui abidadama henia.
7 To hoihoi tauna be sikele koikoidia ia gaukaralaia,
Koikoi karadia ia ura henia noho.+
8 Eparaima ia hereva noho, ia gwau, ‘Momokani, lau be taga tauna ai lau lao,+
Lau be kohu momo lau davaria vadaeni,+
Bona egu hekwarahi dainai unai ia vara, lau dekenai kerere eiava kara dika ta do idia davaria lasi.’
9 To Aigupito ena tano ai umui noho negana amo ema bona hari, lau be Iehova emui Dirava.+
Lau ese dala do lau karaia bona palai rumadia ai do umui noho lou
Aria negadia ai idia karaia bamona.
10 Lau be peroveta taudia dekenai lau hereva,+
Idia dekenai matahanai momo lau hahedinaraia,
Bona peroveta taudia amo parabole herevadia lau gwauraia.
11 Gileada ai idia noho taudia be meamea+ bona koikoi karadia idia karaia.
Gilegala ai boromakau idia bouboulaidia,+
Bona edia boubou patadia be idia haboua nadi bamona, uma totona idia geia tano ai idia noho.+
12 Iakobo be Arama* tano dekenai ia heau lao,+
Bona Israela+ be adavana ta abia totona unuseniai hesiai gaukara ia karaia,+
Bona adavana abia totona mamoe naria gaukara ia karaia.+
13 Peroveta tauna ta amo Iehova ese Israela taudia be Aigupito amo ia hakaua raka-lasi,+
Bona peroveta tauna ta amo Israela taudia ia hakaua.+
14 Eparaima ese Dirava ia habadua,+
Bona Eparaima be rara dekenai ia kerere.
Iena Lohiabada ese iena dika davana do ia henia.”+
13 “Eparaima ia hereva neganai, taunimanima idia heudeheude.
Israela ai ia be ladana bada tauna.+
To Bala ia tomadiho henia dainai ia kerere+ bona ia mase.
2 Bena edia kara dika ia bada
Bona edia siliva gaudia amo auri kaivakukudia idia karaia,+
Bona kaivakuku idia karaia namo herea, gaukara idauidau idia diba taudia ese idia karaia.
Unai kaivakuku dekenai idia gwau, ‘Boubou gaudia ia henia tauna ese boromakau natudia ia kisi henia be namo.’+
3 Vadaeni idia be daba ena ori bamona ai do idia lao,
Daba paripari ia boio haraga bamona,
Witi moia gabuna ai ia noho witi momoru be lai dikana ese ia odaia lao bamona.
Bona guhi matuna amo ia raka-lasi kwalahu bamona.
4 To Aigupito ena tano ai umui noho negana amo ema bona hari, lau be Iehova emui Dirava,+
Umui be Dirava ma ta umui diba lasi, to lau sibona,
Bona hamauria tauna ta be lasi, to lau sibona.+
5 Tano kaukauna+ dekenai umui lau naria.
6 Edia aniani be momo dainai idia bogakunu,+
Gau ta dekenai idia dabu lasi dainai idia hekokoroku.
Bona lau idia laloaboio.+
7 Idia dekenai lau be laiona natuna ta bamona ai lau lao,+
Raka gabuna ai ia hunia noho lepadi bamona.
8 Idia do lau tuari henia, ena natuna ia haboioa bea ta bamona,
Bona lau ese edia kemena do lau darea.
Unuseniai idia do lau hadikaia ore, laiona bamona,
Bona uda animal ese idia do ia darea maragimaragi.
9 Israela e, oi do idia hadikaia ore,
Badina lau, emu durua tauna, oi dadaraia.
10 Vadaeni, emu king be edeseni? Ia ese emu siti ibounai amo oi do ia hamauria.+
Bona emu lohia taudia* be edeseni? Idia totona lau oi hamaoroa,
‘Lau dekenai king bona lohia taudia oi henia.’+
11 Lau badu dainai oi dekenai king ta lau henia,+
Bona hari lau badu momokani dainai, king do lau kokia.+
12 Eparaima ena kara dika be idia duahia
Bona buka dekenai idia torea vadaeni.
13 Ia be hisihisi do ia davaria, natuna ia havaraia hahine ese ia abia hisihisi bamona.
To ia be kavakava natuna,
Bona ena vara negana ai ia ura lasi sinana ena bogana amo ia raka-lasi.
14 Mase Gurina* ena siahu amo idia do lau ruhaia,
Mase amo idia do lau hatorea isi lou.+
Mase e, oi havaraia hisihisi be edeseni?+
Mase Gurina e, oi havaraia dika be edeseni?+
Lau ese oi dekenai hebogahisi do lau hahedinaraia lasi.
15 Ena be siriho momo bamona do ia momo herea,
To ist kahana amo lai do ia mai, Iehova ena lai unai,
Tano kaukauna amo do ia mai, ena ranu guri bona sinavai ia hakaukaua totona.
Ta ese iena dava bada kohudia idia haboua rumana do ia hadikaia.+
16 Samaria be ena kerere davana do ia abia,+ badina ena Dirava ia gwau-edeede henia.+
Tuari kaia amo do idia hamasedia,+
Edia natudia be mai dagedage ida do idia hamasedia,
Bona edia rogorogo hahinedia edia bogana do idia utua kehoa.”
14 “Israela e, emui Dirava Iehova dekenai umui giroa lou,+
Umui be emui kara dika dainai umui moru.
2 Iehova dekenai umui giroa lou, bona ia dekenai umui gwau,
‘Mani emai kara dika oi gwauatao+ bona emai kara namodia oi abia dae,
Ta ese boromakau natudia ia bouboulaia hegeregerena, ai ese oi dekenai hanamoa herevadia do ai gwauraia.+
3 Asuria be ai do ia hamauria lasi.+
Ai be hosi amo do ai heau lao lasi,+
Bona emai imana amo ai karaia gaudia dekenai inai hereva, “Emai Dirava e!” do ai gwauraia lou lasi,
Badina tamana lasi natuna dekenai hebogahisi oi hahedinaraia.’+
4 Lau ese idia do lau hanamoa, bona lau idia badinaia karana amo do idia raka-siri lasi.+
Mai kudouna ibounai ida* idia lau lalokau henia,+
Badina egu badu be idia amo lau kokia vadaeni.+
5 Israela taudia dekenai lau be daba ena paripari bamona ai do lau lao.
Idia be lili flaoaflaoa bamona do idia kehoa,
Bona edia ramuna be tano lalonai do idia diho momokani, Lebanona audia bamona.
6 Edia rigi be gabu ibounai dekenai do idia lao,
Edia hairai be olive auna ena hairai bamona,
Bona ena bonana be Lebanona auna ena bonana bamona.
7 Egu taunimanima be egu ikerukeru henunai do idia noho lou.
Idia ese witi uhedia do idia hadoa bona vain huahua bamona do idia hedinarai.+
Taunimanima ese lau do idia herevalaia, Lebanona ena wain idia herevalaia bamona.
8 Eparaima do ia gwau, ‘Kaivakuku ibounai dekenai dahaka do lau karaia?’+
Lau ese ia do lau kamonai henia bona ia do lau gimaia noho.+
Lau be iunipa auna bamona do lau tubu namo herea.
Lau ese umui dekenai huahua do lau henia.”
9 Daika be mai ena aonega? Namona be inai gaudia ia lalopararalaia.
Daika be mai ena laloa kehoa? Namona be inai gaudia ia diba.
Badina Iehova ena dala ibounai be maoromaoro,+
Bona kara maoromaoro taudia be unai dala dekenai do idia raka.
To kara dika taudia be unai dala dekenai do idia hekwakwanai bona moru.
Unai be Hosahaia ena ladana kwadogina. Hosahaia ena anina be “Iah ese Ia Hamauria.”
Eiava “matabodaga karana do ia karaia hahinena.”
Iniseniai “matabodaga karana” be “dirava koikoidia tomadiho henia karana” ia herevalaia.
Anina be “Dirava ese Uhe Do Ia Hadoa.”
Anina be “Ia Dekenai Hebogahisi Ia Hahedinaraia Lasi.”
Anina be “Egu Taunimanima Lasi.”
Ho 1:9 ena futnout itaia.
Ho 1:6 ena futnout itaia.
Eiava “matabodaga.”
Eiava “matabodaga.”
Linen be tubutubu gauna ta amo idia karaia varo eiava dabua.
Eiava “Egu Bala.”
Eiava “noho hanaihanai lalokauna.” Diksenari itaia.
Anina be “Dirava ese Uhe Do Ia Hadoa.”
Ho 1:6 ena futnout itaia.
Ho 1:9 ena futnout itaia.
Inai greips kaukaudia idia moia hebou, bona ena toana be keke bamona, bona tomadiho koikoi totona idia gaukaralaia.
Homa ta be 220 L. Ap. B14 itaia.
Diksenari itaia.
Unai be, edia ruma bese ena dirava idauidau.
Eiava “noho hanaihanai lalokauna.” Diksenari itaia.
Eiava “hadibaia herevana.”
Eiava reana, “Idia be lau idia hanamoa lasi, to lau idia hadikaia.”
Eiava “matabodaga kara dikadia; ariara karadia.”
Eiava “matabodaga.”
Eiava “matabodaga.”
Ena flaoaflaoa be kurokuro bona mai bonana namona.
Eiava “matabodaga.”
Eiava “matabodaga.”
Eiava “matabodaga.”
Eiava “witi bia.”
Eiava “matabodaga.”
Eiava “noho hanaihanai lalokauna.” Diksenari itaia.
Eiava reana, “Badina mai edia ura dikadia ida idia mai neganai, edia kudouna be aveni bamona.”
Heb., “hahemaoro taudia.”
Eiava “hadibaia herevana.”
Eiava reana, “Do idia giroa lou.”
Eiava “matabodaga.”
Eiava “umui abia hidi aria.”
Eiava “hemarai diravana.”
Eiava reana, “gabu idauidau ia lao.”
Diksenari itaia.
Eiava “noho hanaihanai lalokauna.” Diksenari itaia.
Unai be, peroveta taudia bona ma haida. Dirava ese idia ia siaia Israela taudia hadibaia totona.
Reana tama eiava sina ta ese ena natuna dekenai raka dalana ia hadibaia totona ia gaukaralaia varona.
Heb., “Eparaima be lai ia ania noho.”
Unai be Iakobo ena bese taudia ia herevalaia.
Eiava “noho hanaihanai lalokauna.” Diksenari itaia.
Eiava “Suria.”
Heb., “hahemaoro taudia.”
Eiava “Sheol,” unai be, mase taudia guria gabuna. Diksenari itaia.
Eiava “Sibona egu ura dainai.”