IOELA
1 Iehova ese inai hereva be Petuela ena natuna mero Ioela* dekenai ia henia:
2 “Umui tau badadia e, inai umui kamonai,
Bona inai tano umui noholaia taudia ibounai e, umui kamonai.
Emui tubudia edia negai eiava emui mauri negadia ai
Inai bamona gauna ta ia vara, a?+
3 Emui natudia memero dekenai unai umui herevalaia,
Bona emui natudia memero ese edia natudia memero do idia hadibaia,
Bona edia natudia memero ese uru ma ta do idia hadibaia.
4 Idia aniani haragaharaga kwadi ese idia rakatania gauna be kwadi orea badana ese idia ania.+
Bona kwadi orea badana ese idia rakatania gauna be apena lasi kwadi ese idia ania.
Bona apena lasi kwadi ese idia rakatania gauna be idia hitolo bada kwadi ese idia ania.+
5 Kekero taudia e,+ umui noga bona umui taitai!
Wain inua taudia ibounai e, umui tai mai boiboi ida,
Badina wain digarana be emui uduna amo idia kokia vadaeni.+
6 Badina bese ta be egu tano dekenai ia mai, ia be hutuma bada bona mai ena goada.+
Iena isena bona iena aukina be laiona ena bamona.+
7 Ia ese egu vain auna ia hadikaia bona egu fig auna be gabana sibona ia rakatania,
Edia rauna ibounai idia ania ore bona au kavakava idia negea,
Rigi ena kopina ta idia rakatania lasi.
8 Rami-hebou kekenina be puse dabua ia atoa
Bona iena adavana totona ia taitai bamona do umui taitai.
9 Aniani boubou*+ bona wain boubou+ be Iehova ena ruma dekenai idia karaia lasi,
Hahelaga taudia, Iehova ena hesiai taudia unai, be idia taitai noho.
10 Uma ena aniani be idia dika bona tano be ia taitai,+
Witi idia dika, wain matamatana be ia kaukau, bona oela ia ore.+
11 Biru taudia idia lalohisihisi bona vain uma idia naria taudia idia taitai,
Badina uma aniani idia dika,
Witi bona bali* idia ore.
12 Vain auna ia kakoro,
Fig auna ia mase.
Pomogranet auna,* pama auna bona apolo auna idia kakoro,
Uma dekenai idia tubu au ibounai idia kakoro,+
Taunimanima idia moale lasi to idia hemarai.
13 Umui hahelaga taudia e, puse dabua umui atoa bona umui taitai,*
Boubou patana ai umui gaukara hesiai taudia e, umui taitai.+
Egu Dirava ena hesiai taudia e, umui mai bona hanuaboi ai puse dabua umui atoa bona umui mahuta,
Badina emui Dirava ena ruma dekenai aniani boubou*+ bona wain boubou+ be idia abia lao lasi.
14 Ibounai oi oda henia dina haida lalonai do idia aniani lasi bona hebou helagana ta totona ibounai oi boiria.+
Tau badadia ibounai bona unai tano ai idia noho taudia ibounai oi haboua,
Iehova emui Dirava ena ruma dekenai do umui lao+ bona Iehova ena heduru totona do umui noinoi.
15 Unai dina ai dika bada do ia vara!
Badina Iehova ena dina be ia kahirakahira,+
Bona Siahu Ibounai Diravana amo unai dika badana do ia mai!
16 Aniani be iseda vairana amo idia kokia,
Bona Dirava ena ruma amo moale ia ore, ani?
17 Idia ura hadoa fig ena uhe kakorodia be idia dika vadaeni.
Aniani haboua rumadia lalonai aniani ta be lasi.
Witi haboua rumadia idia kokia, badina witi be idia kakoro.
18 Animal danu idia taitai noho!
Boromakau oreana be idia loa kava loa kava, badina ava gabudia namodia be lasi!
Bona mamoe oreana be hisihisi idia davaria.
19 Iehova e, lau be oi dekenai do lau taitai,+
Badina lahi ese ava gabudia ia araia ore vadaeni,
Bona lahi ese uma dekenai idia tubu au ibounai ia araia ore.
20 Sinavai be idia kaukau
Bona lahi ese ava gabudia ia araia ore dainai,
Dagedage animal be oi dekenai idia taitai danu.”
2 “Siona ai kibi ta umui hiriria!+
Egu ororo helagana ai umui boiboi badina tuari ia mai noho.
Tano* dekenai umui noho taudia ibounai umui heudeheude,
Iehova ena dina badana ia mai noho!+ Ia be kahirakahira!
2 Unai dina be dibura masemase negana,+
Ori koremadia ese gabu do idia koua,+
Daba rere ai dina ena diari be ororo dekenai ia hedinarai hegeregerena.
Bese badana bona goadana ta do ia mai,+
Gunaguna bese ta be unai bamona lasi,
Bona gabeai uru iboudiai lalonai
Unai bamona bese ta do ia noho lasi.
3 Ia vairanai idia noho gaudia ibounai be lahi ese ia araia,
Bona ia murinai idia noho gaudia ibounai be lahi ese ia araia ore.+
Ia vairanai ia noho tano be Eden umana bamona,+
To ia murinai be tano kaukauna ia noho,
Bona gau ta be ia amo ia heau mauri diba lasi.
4 Edia toana be hosi bamona,
Bona edia heau be tuari totona idia heau hosi bamona.+
5 Ororo ataiai idia heau neganai, edia regena be kariota ena regena bamona,+
Lahi badana be rei kakoro ia araia ena regena bamona.
Idia be tuari totona idia gini hegaegae bese goadana ta bamona.+
6 Idia dainai taunimanima do idia gari.
Taunimanima ta ta edia vairana ese gari toana do idia hahedinaraia.
7 Idia be tuari taudia bamona idia heau mai noho,
Tuari taudia bamona magu idia daekau,
Ta ta be edia heau gabudia dekenai idia heau lao,
Bona edia heau dalana amo idia heau siri lasi.
8 Ta ta idia doria lasi,
Ta ta be edia heau dalana ai idia heau lao noho.
Bema peva amo haida idia pidia,
Ma haida be edia heau idia hadokoa lasi.
9 Siti lalonai idia heau vareai, magu dekenai idia heau daekau.
Ruma dekenai idia daekau, henaoa tauna bamona windo amo idia vareai.
10 Edia vairanai tano bona guba idia mareremarere.
Dina bona hua idia dibura,+
Bona hisiu be idia diari lasi.
11 Iehova ese iena tuari oreana vairanai ena gadona do ia habadaia,+ badina iena tuari kamepa be bada herea.+
Badina iena Hereva ia hagugurua tauna be mai ena goada,
Iehova ena dina be dina badana mai garina.+
Daika ese ia haheaukalaia diba?”+
12 Iehova ia gwau: “To hari dina, mai emui kudouna ibounai ida lau dekenai umui giroa mai,+
Dina haida lalonai umui aniani lasi,*+ umui taitai bona umui boiboi badabada.
13 Emui dabua umui darea sibona lasi, to emui kudouna amo helalo-kerehai toana* do umui hahedinaraia,+
Bona Iehova emui Dirava dekenai umui giroa lou,
Badina ia be hebogahisi* Diravana, ia badu haraga lasi,+ bona ena lalokau* be bada herea.+
Bona dika ia mailaia murinai ia hebogahisi henidia.
14 Daika ia diba, reana ena lalona do ia haidaua+
Bona umui dekenai hahenamo do ia henia,
Unai amo Iehova emui Dirava dekenai aniani boubou* bona wain boubou do umui henia.
15 Siona ai kibi ta umui hiriria!
Dina haida lalonai aniani lasi taravatu umui atoa,* bona hebou helagana ta totona ibounai umui boiria.+
16 Taunimanima umui boiria bona kongrigeisen umui hahelagaia.+
Tau burukadia* do umui haboua, natudia bona rata idia inua beibi do umui haboua.+
Headava matamata tauna bona headava matamata hahine be edia daiutu amo do idia raka-lasi.
17 Dubu ena iduara bona boubou patana ena huanai+
Hahelaga taudia, Iehova ena hesiai taudia unai, do idia taitai bona idia gwau:
‘Iehova e, emu taunimanima do oi hebogahisi henia,
Namo lasi haida ese idia kirikirilaidia,
Bona bese haida ese idia do idia lohiaia.
Namo lasi do idia gwau, “Edia Dirava be edeseni?”’+
18 Bena Iehova be iena tano do ia laloa bada
Bona ena taunimanima dekenai hebogahisi do ia hahedinaraia.+
19 Iehova be ena taunimanima do ia haere henia:
‘Lau ese umui dekenai witi, wain matamata bona oela lau siaia,
Bona do umui bogakunu momokani,+
Bona bese haida ese umui do idia kirikirilaia lasi.+
20 Not kahana amo ia mai kwadi oreana do lau lulua,
Ranu lasi gabuna dekenai do lau luludia lao
Iena vairana be ist kahana ena davara* ia vaira henia
Bona iena murina be west kahana ena davara* dekenai ia henia.
Ia amo bonana dikana do ia daekau,
Unai bonana dikana be do ia ore lasi,+
Badina Dirava ese hoa kara badadia do ia karaia.’
21 Tano e, umui gari lasi.
Umui moale, badina Iehova ese hoa kara badadia do ia karaia.
22 Uda boromadia e, do umui gari lasi.
Badina tano kaukauna ai ava matamata do idia tubu,+
Bona au be huahua do idia atoa,+
Fig auna bona vain auna be huahua momo do idia havaraia.+
23 Siona ena natudia memero e, Iehova emui Dirava dainai do umui moale,+
Badina ia ese do ia siaia medu ginigunana be do ia hegeregere momokani,
Bona ia ese umui latanai medu bada herea do ia bubua diho,
Medu ginigunana bona medu ginigabena do ia siaia, nega gunadia hegeregerena.+
24 Witi kwadia gabuna be witi amo do ia honu momokani,
Bona vain huahua moia gabuna bona olive huahua moia gabuna ai, wain matamata bona oela do idia honu bona bubua diho.+
25 Guna laganidia ai umui dekenai egu tuari orea badana lau siaia
Kwadi orea badana, apena lasi kwadi, idia aniani haragaharaga kwadi bona idia hitolo bada kwadi ese emui uma aniani idia hadikaia.
Lau ese idia ania ore aniani ena davana do lau henia.+
26 Do umui aniani bona bogakunu,+
Bona Iehova emui Dirava ena ladana do umui hanamoa,+
Ia be umui totona hoa karadia ia karaia,
Egu taunimanima be do idia hemarai lou lasi.+
27 Vadaeni do umui diba lau be Israela besena ena huanai lau noho+
Bona lau be Iehova emui Dirava,+ ma ta be lasi!
Egu taunimanima be do idia hemarai lou lasi.
28 Unai murinai lau ese egu lauma helaga be taunimanima ibounai latanai do lau bubua,+
Bona emui natudia memero bona kekeni be do idia peroveta,
Emui tau burukadia be do idia nihi,
Bona emui tatau matamatadia be do idia matahanai.+
29 Bona unai negadia ai, egu hesiai tatau bona hesiai hahinedia latanai danu
Egu lauma helaga do lau bubua diho.
30 Guba ai bona tanobada ai hoa karadia do lau karaia,
Rara bona lahi bona kwalahu bada do ia daekau.+
31 Iehova ena dina badana mai garina ia do mai lasi neganai,+
Dina be do ia dibura bona hua be rara ai do ia lao.+
32 Bona Iehova ena ladanai idia boiboi taudia ibounai be mauri do idia abia,+
Badina Iehova ia hereva hegeregerena, Siona Ororo bona Ierusalema ai roho mauri taudia do idia noho,+
Iehova ese idia ia hamauria.”
3 “Kamonai! Unai dinadia ai bona unai nega ai,
Iuda bona Ierusalema amo idia abia igui hesiai taudia do lau abia giroa,+
2 Lau ese bese ibounai do lau haboua
Bona Iehosapata* Koura dekenai do lau abidia lao.
Unuseniai idia do lau kota henia+
Egu taunimanima bona egu ahuna Israela totona do lau gini,
Badina egu taunimanima be bese idauidau huanai idia haria,
Bona egu tano be idia huanai idia haria.+
3 Bona egu taunimanima haria totona gadara ta* idia karaia.+
Ariara hahine ena davana karaia totona, mero ta idia henia,
Bona wain idia inua totona, kekeni ta idia hoihoilaia.
4 Danu Turo, Sidono bona Filistia tanodia ibounai e,
Dahaka dainai lau umui heai henia?
Egu kerere ta dainai lau dekenai davana umui henia, a?
Bema lauegu kerere dainai davana umui karaia noho,
Karaharaga lau ese emui kara davana do lau haloua.+
5 Badina umui ese egu siliva bona golo umui abia,+
Bona egu dava bada kohudia be emui dubu lalodiai umui atoa,
6 Iuda bona Ierusalema taudia be Grik taudia dekenai umui hoihoilaia+
Edia tano amo do idia daudau totona.
7 Edia lalona do lau hanogaia, unai amo idia oi hoihoilaia tanona amo do idia giroa mai,+
Bona lau ese emui dika davana do lau haloua.
8 Lau ese emui natudia memero bona kekeni be Iuda taudia dekenai do lau hoihoilaia,+
Bona idia ese Sieba, gabu daudau ai ia noho besena dekenai do idia hoihoilaidia.
Badina Iehova sibona ese unai ia gwauraia.
9 Bese idauidau huanai inai do umui gwauraia:+
‘Tuari totona umui hegaegae!* Tatau goadadia umui hanogaia!
Tuari taudia ibounai do idia raka lao bona idia tuari!+
10 Tano geia auridia be tuari kaia ai umui halaodia bona emui uma kaia be io* ai umui halaodia.
Manoka tauna do ia gwau: “Lau be goada tauna.”
11 Kahirakahira umui noho besedia ibounai e, umui haboua, umui mai bona umui heduru!’”+
Iehova e, unai gabu dekenai emu goada taudia* oi haboua.
12 “Bese idauidau e, do umui toreisi bona Iehosapata Ena Koura dekenai umui daekau mai,
Badina lau be unuseniai do lau helai bona badina besedia ibounai do lau kota henia.+
13 Kaia umui mailaia badina greips idia mage vadaeni.
Greips atoa gabuna be ia honu dainai, umui vareai bona umui moia.+
Wain ena hodu be ia bubua diho, badina unai bese taudia edia kara dika be bada herea.
14 Hutuma, hutuma be abia hidi karaia kourana dekenai idia gini,
Badina abia hidi karaia kourana dekenai Iehova ena dina be ia kahirakahira.+
15 Dina bona hua be do idia dibura,
Bona hisiu be do idia diari lasi.
16 Iehova be Siona amo do ia boiboi,
Ierusalema amo iena gadona do ia habadaia.
Bona guba bona tanobada do idia mareremarere,
To Iehova be ena taunimanima do ia gimaia,+
Ia be Israela taudia edia hunia gabuna.
17 Vadaeni do umui diba lau be Iehova emui Dirava, Siona, egu ororo helagana ai lau noho.+
18 Unai dina ai ororo amo wain digara do ia bubua diho,+
Ororo amo milika do ia aru diho,
Iuda ena sinavai be ranu amo do idia honu.
Iehova ena dubu amo sinavai ranu do ia aru diho,+
Bona Akasia Audia Edia Koura do ia haparia.
19 Aigupito ai taunimanima do idia noho lasi,+
Bona Edoma be taunimanima lasi gabuna ai do ia lao,+
Badina Iuda taudia idia dagedage henidia,+
Bona unai tano ai kerere lasi taudia edia rara idia bubua.+
20 To taunimanima be Iuda tanona ai do idia noho hanaihanai,
Bona Ierusalema do idia noholaia ela bona hanaihanai.+
21 Guna taunimanima edia rara idia bubua, to edia kara dika do lau gwauatao.+
Bona Iehova be Siona dekenai do ia noho.”+
Anina be, “Iehova be Dirava.”
Eiava “witi boubou.” Unai bamona boubou gaudia be paraoa namona, lahi dekenai idia gabua witi, eiava auri siahuna latanai o oela amo idia gabua paraoa o bisikesi.
Tubutubu gauna ta, witi bamona.
Inai huahua ena kala be kakakaka bona ena toana be apolo bamona.
Eiava “emui kemena umui botaia.”
Eiava “witi boubou.” Unai bamona boubou gaudia be paraoa namona, lahi dekenai idia gabua witi, eiava auri siahuna latanai o oela amo idia gabua paraoa o bisikesi.
Eiava “tanobada.”
Diksenari ai, “Aniani lasi taravatu” itaia.
Heb., “kudouna umui darea.”
Eiava “kara namo.”
Eiava “noho hanaihanai lalokauna.” Diksenari itaia.
Eiava “witi boubou.” Unai bamona boubou gaudia be paraoa namona, lahi dekenai idia gabua witi, eiava auri siahuna latanai o oela amo idia gabua paraoa o bisikesi.
Heb., “Umui helaga.”
Eiava “tau badadia.”
Unai be, Mase Davara.
Unai be, Mediterenien Davara.
Anina be “Iehova be Hahemaoro Tauna.”
Diksenari itaia.
Heb., “Helaga.”
Eiava “io latana.”
Eiava “emu tuari taudia.”