AMOSA
1 Tekoa siti+ ena mamoe naria tauna ta Amosa* ena hereva, unai be matahanai ta amo ia abia. Unai hereva be Israela taudia totona, idia be Iuda ena king Usaia+ bona Israela ena king Ieroboama,+ Ioasa+ ena natuna, edia negai idia noho. Unai matahanai be tano mareremarere ia vara bena lagani rua idia ore murinai ia abia.+ 2 Ia gwau:
“Iehova be Siona Ororo amo do ia boiboi badabada,
Bona Ierusalema amo ena gadona do ia habadaia.
Mamoe naria taudia edia tano ai idia noho rei namodia be do idia kakoro,
Bona Karamele Ororo ataiai idia noho rei gabudia be do idia kaukau.”+
3 “Iehova be inai bamona ia hereva,
‘“Damaseko be ia kara dika loulou dainai, lau ura karaia gauna be do lau haidaua lasi,
Badina auri amo idia karaia witi momoru kokia gauna amo Gileada idia moia.+
4 Vadaeni lau be Hasaele ena ruma dekenai lahi do lau siaia diho,+
Bona lahi be Bene-hadada ena magu aukadia do ia gabua ore.+
5 Lau ese Damaseko ena geiti edia auri do lau hamakohidia,+
Bona Avene-kepata ai idia noho taudia
Bona Bete-dena amo ia lohia tauna* do lau hadikadia ore.
Bona Suria taudia be Kiri dekenai do idia abia lao.”+ Unai be Iehova ena hereva.’
6 Iehova be inai bamona ia hereva,
‘“Gasa be ia kara dika loulou dainai,+ lau ura karaia gauna do lau haidaua lasi,
Badina idia ese taunimanima momo herea idia abia lao,+ Edoma taudia idia henia totona.
7 Vadaeni lau ese lahi be Gasa ena magu dekenai do lau siaia diho,+
Bona ena magu aukadia do ia gabua ore.
8 Lau ese Asadoda hanua ai idia noho taudia do lau hadikaia ore,+
Bona Asakelona amo ia lohia tauna* danu do lau kokia.+
Lau ese Ekarona hanua do lau hadikaia ore danu,+
Bona Filistia taudia oredia be do idia mase ore.”+ Unai be Siahu Ibounai Lohiabadana Iehova ena hereva.’
9 Iehova be inai bamona ia hereva,
‘Turo be ia kara dika loulou dainai,+ lau ura karaia gauna do lau haidaua lasi,
Badina bese ta ena taunimanima ibounai be Edoma tanona dekenai idia abidia lao,
Bona idia be edia tadikaka ida idia karaia gwauhamata idia laloatao lasi.+
10 Vadaeni lau ese lahi be Turo ena magu dekenai do lau siaia diho,
Bona ena magu aukadia do ia gabua ore.’+
11 Iehova be inai bamona ia hereva,
‘Edoma be ia kara dika loulou dainai,+ lau ura karaia gauna do lau haidaua lasi,
Badina ia be tuari kaia ida ena tadikaka ia lulua lao,+
Bona ia ura lasi hebogahisi ia hahedinaraia.
Mai badu ida idia ia hadarerea noho,
Bona ia be idia ia badu henia noho.+
12 Vadaeni lau ese lahi be Temana dekenai do lau siaia diho,+
Bona Bosera ena magu aukadia do ia gabua ore.’+
13 Iehova be inai bamona ia hereva,
‘“Amono taudia be idia kara dika loulou dainai,+ lau ura karaia gauna be do lau haidaua lasi,
Badina edia teritori idia habadaia totona idia ese Gileada ena rogorogo hahine edia bogana idia utua kehoa.+
14 Vadaeni lau ese lahi be Raba ena magu dekenai do lau siaia diho,+
Bona ena magu aukadia do ia gabua ore.
Tuari negana ai mai boiboi ida do idia lao,
Bona lai goadana ese ena magu do ia hadikaia ore.
15 Bona edia king bona lohia taudia be tano ta dekenai do idia abia lao.”+ Unai be Iehova ena hereva.’
2 “Iehova be inai bamona ia hereva,
‘“Moaba be ia kara dika loulou dainai,+ lau ura karaia gauna do lau haidaua lasi,
Badina ia ese Edoma ena king ena turia ia gabua, ena kahu ia abia totona.
2 Vadaeni lau ese Moaba dekenai lahi do lau siaia diho,
Bona lahi ese Kerioto ena magu aukadia do ia gabua ore.+
Moaba be regerege bada lalonai do ia dika ore,
Unai be tuari taudia edia boiboi regena bona kibi ena regena.+
3 Lau ese lohia tauna* be ena huana amo do lau kokia,
Bona ia bona ena lohia taudia* ibounai do lau hamasea ore.”+ Unai be Iehova ena hereva.’
4 Iehova be inai bamona ia hereva,
‘Iuda taudia be idia kara dika loulou dainai,+ lau ura karaia gauna do lau haidaua lasi,
Badina idia ese Iehova ena taravatu* idia dadaraia,
Bona iena hakaua herevadia idia badinaia lasi.+
To edia sene taudia ese idia badinaia koikoi karadia ese idia ia hakaua kerere danu.+
5 Vadaeni lau ese Iuda taudia dekenai lahi do lau siaia diho,
Bona lahi ese Ierusalema ena magu aukadia do ia gabua ore.’+
6 Iehova be inai bamona ia hereva,
‘Israela taudia idia kara dika loulou dainai,+ lau ura karaia gauna do lau haidaua lasi,
Badina idia ese kara maoromaoro taudia idia hoihoilaia, siliva moni abia totona,
Bona ogogami taudia idia hoihoilaia, sandolo idia hoia totona.+
7 Idia ese ogogami taudia edia kwarana be tano dekenai idia moia,+
Bona manau taudia totona kota maoromaoro idia karaia lasi.+
Tamana ta bona ena natuna mero be kekeni tamona ida idia mahuta hebou,
Idia ese egu ladana helagana idia hadikaia noho.
8 Idia be boubou pata ta ta vairanai idia hekure,+ bona abitorehai davana abia lou totona ogogami taudia amo idia abia dabua edia latanai idia hekure.+
Bona ogogami taudia amo idia abia moni idia gaukaralaia wain idia hoia bona edia dirava edia dubu dekenai wain idia inua.’
9 ‘To lau ese edia vairana amo Amoro taudia lau hadikaia ore,+
Amoro taudia be sida au latadia bamona bona edia goada be ouki audia bamona.
Lau ese edia huahua bona edia ramuna lau hadikaia.+
10 Lau ese Aigupito amo umui lau hakaua raka-lasi,+
Bona lagani 40 lalonai taunimanima lasi gabuna ai umui lau hakaua,+
Unai amo umui ese Amoro taudia edia tano do umui abia.
11 Lau ese emui natudia memero haida lau abia hidi peroveta taudia edia gaukara idia karaia totona+
Bona tau matamatadia haida lau abia hidi Nasiri taudia edia gaukara idia karaia totona.+
Israela taudia e, lau be unai bamona lau karaia, ani?’ Unai be Iehova ena hereva.
12 ‘To umui ese Nasiri taudia dekenai wain umui henia noho idia inua totona,+
Bona peroveta taudia umui oda henia, umui gwau: “Umui peroveta lasi.”+
13 Vadaeni lau ese emui gabu dekenai umui do lau moia diho,
Idia utua witi matamata amo ia honu treila ese ia moia patapata gaudia bamona.
14 Ia heau haraga tauna dekenai heau mauri gabuna ta be lasi,+
Mai ena goada tauna be ena siahu do ia abia lou lasi,
Bona tuari tauna goadana be ena mauri* do ia haboioa.
15 Peva gaukaralaia tauna be tuari ai do ia kwalimu lasi,
Ia heau haraga tauna be do ia heau mauri lasi,
Bona hosi guia tauna be ena mauri* do ia haboioa.
16 Danu, tuari taudia goadadia huanai ia noho gari lasi tuari tauna be
Unai dina ai kopina kavakava do ia heau boio.’+ Unai be Iehova ena hereva.”
3 “Israela taudia e, Iehova ese umui totona ia gwauraia herevana mani umui kamonai, unai hereva be Aigupito amo ia hakaua raka-lasi besena totona:
2 ‘Tanobada ena bese ibounai amo umui sibona lau diba.+
Bona emui kara dika ibounai dainai umui do lau panisia.+
3 Bema taunimanima rua be idia hedavari totona idia lalotamona lasi, do idia raka hebou lasi, ani?
4 Bema laiona be vamu ta ia davaria lasi, uda lalonai do ia boiboi badabada, a?
Bema laiona natuna be vamu ta ia abia lasi, ena noho gabuna amo do ia boiboi, a?
5 Bema tano ai manu ena tarapu ta idia atoa lasi,* manu ta be tarapu lalonai do ia moru, a?
Bema gau ta ese tarapu ia hamarerea lasi, tarapu be tano amo do ia daekau kava, a?
6 Bema siti ta lalonai kibi idia hiriria, taunimanima do idia gari lasi, a?
Bema siti lalonai dika badana ta ia vara, unai be Iehova ese ia havaraia, ani?
7 Siahu Ibounai Lohiabadana Iehova be gau ta ia do karaia lasi neganai,
Ia be ena peroveta taudia amo hehuni gauna ia hadibaia guna.+
8 Laiona be ia boiboi vadaeni!+ Daika be do ia gari lasi?
Siahu Ibounai Lohiabadana Iehova ia hereva vadaeni! Daika do ia peroveta lasi?’+
9 ‘Asadoda ena kohoro aukadia amo inai hereva umui gwauraia hedinarai
Bona Aigupito tanona ena kohoro aukadia amo inai hereva do umui gwauraia hedinarai.
Umui gwau: “Samaria ena ororo dekenai umui haboua,+
Unai hanua lalonai ia vara dika
Bona koikoi karadia umui itaia.+
10 Badina idia be kara maoromaoro daladia idia diba lasi,
Bona edia kohoro aukadia lalonai dagedage karadia idia habadaia bona dika bada idia havaraia.” Unai be Iehova ena hereva.’
11 Unai dainai Siahu Ibounai Lohiabadana Iehova be inai bamona ia hereva,
‘Dagedage tauna ta ese tano do ia hagegea,+
Ia ese emui goada do ia haorea,
Bona emui magu aukadia do ia hadikadia.’+
12 Iehova be inai bamona ma ia hereva,
‘Mamoe naria tauna ese laiona ena uduna amo mamoe ta ena aena rua sibona eiava ena taiana ia veria oho hegeregerena,
Israela taudia be unai bamona do idia abia oho,
Unai be Samaria ena bedi namo hereadia bona sea namodia latanai idia helai noho taudia.’+
13 ‘Umui kamonai bona Iakobo ena bese taudia umui hadibaia.’ Siahu Ibounai Lohiabadana Iehova, tuari oreadia edia Dirava, be unai bamona ia hereva.
14 ‘Lau ese Israela taudia be edia kara dika dainai lau panisia hegeregerena,+
Lau ese Betele ena boubou patadia do lau hadikaia ore danu,+
Bona boubou patadia ta ta ai idia noho doa do lau utudia bona tano dekenai do idia moru.+
15 Keru negana ena ruma bona siahu negana ena ruma do lau hadikaia,’
‘Aivori amo idia karaia rumadia do idia boio ore,+
Bona ruma badadia* be do idia ore.’+ Unai be Iehova ena hereva.”
4 “Samaria ena ororo ai umui noho hahine e, inai hereva umui kamonai,+
Umui be Basana ai idia noho boromakau bamona,
Umui ese ladana maragi taudia umui koia+ bona ogogami taudia umui hadikaia noho,
Umui be emui adavadia* dekenai umui gwau, ‘Ai dekenai gau ta umui henia ai inua totona!’
2 Siahu Ibounai Lohiabadana Iehova be helaga dainai, ia gwauhamata ia gwau,
‘“Itaia, nega ia mai noho, emui inai taudia ese umui do idia abia lao, huku amo umui idia abia isi bamona
Bona taunimanima oredia do idia abia lao danu, gwarume ena kimai amo idia veria lao bamona.
3 Umui ta ta be emui vairanai ia noho haba ena makohia gabudia amo do umui raka-lasi.
Bona Haramono dekenai umui do idia negea lao.” Unai be Iehova ena hereva.’
4 ‘Betele dekenai umui mai bona umui kara dika,*+
Gilegala dekenai umui mai bona kara dika momo umui karaia!+
Daba ai emui boubou gaudia umui mailaia,+
Bona umui dekenai idia noho gaudia edia kahana 10 amo kahana ta+ be dina ihatoina ai umui henia.
5 Tanikiu henia boubouna totona paraoa mai ena isti gauna umui gabua.+
Harihari boubouna umui gwauraia hedinarai!
Badina Israela taudia e, umui be unai kara umui ura henia.’ Unai be Siahu Ibounai Lohiabadana Iehova ena hereva.
6 Iehova ma ia hereva, ‘Lau ese emui siti ibounai lalonai hitolo bada lau havaraia
Bona emui noho gabudia ibounai dekenai aniani be lasi.+
To umui be lau dekenai umui giroa mai lasi.’+
7 ‘Danu aniani gogoa negana do lasi neganai, hua toi lalonai medu lau siaia lasi.+
Siti ta dekenai medu lau siaia to siti ma ta dekenai medu lau siaia lasi.
Uma ta dekenai medu ia diho,
To uma ma ta dekenai medu ia diho lasi bona ia kaukau.
8 Siti rua eiava toi amo idia mai taudia be siti tamona dekenai idia lao ranu inua totona,+
Bona idia dekenai unai ranu be hegeregere lasi.
To umui be lau dekenai umui giroa mai lasi.’+ Unai be Iehova ena hereva.
9 Iehova ma ia hereva, ‘Lau ese lai mai ena siahu bona gorere amo emui tubutubu gaudia lau hadikaia.+
Umui ese uma gabudia bona vain uma momo herea umui karaia,
To kwadi ese emui fig audia bona olive audia idia hadikaia ore.+
To umui be lau dekenai umui giroa mai lasi.’+
10 Iehova ma ia hereva, ‘Umui dekenai gorere dikana lau siaia, Aigupito ai lau karaia bamona.+
Tuari kaia amo emui tatau matamatadia lau hamasea+ bona emui hosi lau abidia.+
Idia mase taudia edia bonana dikana ese emui kamepa ia hadikaia.+
To umui be lau dekenai umui giroa mai lasi.’
11 Iehova ma ia hereva, ‘Lau ese emui tano ibounai lau hadikaia
Sodoma bona Gomora lau hadikaia bamona.+
Bona emui huana amo idia hamauria taudia be lahi amo idia kokia au bamona.
To umui be lau dekenai umui giroa mai lasi.’+
12 ‘Israela taudia e, lau ese umui do lau panisia lou.
Israela taudia e, lau, emui Dirava vairanai umui gini totona do umui hegaegae,
Badina lau ese umui do lau panisia.’
13 Itaia, Dirava ese ororo ia karadia+ bona lai ia havaraia.+
Ia ese taunimanima dekenai iena lalohadai ia gwauraia,
Ia ese daba ena diari be dibura ai ia halaoa,+
Bona tanobada ena ataiai gabudia* edia latanai ia raka loaloa.+
Tuari oreadia edia Dirava, iena ladana be Iehova.”
5 “Israela besena e, lau gwauraia herevana mani oi kamonai, ia be lalohisihisi anena:*
2 ‘Rami hebou-kekenina, Israela, be ena tano ai ia moru vadaeni,
Ia gini lou diba lasi.
Taunimanima ese ia idia rakatania vadaeni,
Ta ese do ia haginia lou lasi.’
3 “Siahu Ibounai Lohiabadana Iehova be inai bamona ia gwau:
‘Bema siti ta amo tuari taudia 1,000 idia lao, 100 sibona do idia mauri,
Bona bema ta be tuari taudia 100 ida ia lao, 10 sibona do idia mauri. Israela dekenai unai bamona do ia vara.’+
4 “Iehova be Israela besena dekenai inai bamona ia gwau:
‘Lau dekenai umui giroa lou bona umui mauri noho.+
5 Betele dekenai umui lao loulou lasi,*+
Gilegala dekenai umui lao lasi+ eiava Bere-sieba dekenai umui hanaia lao lasi,+
Badina Gilegala taudia be tano ta dekenai do idia abia lao,+
Bona Betele be anina lasi gabuna ai do ia lao.*
6 Iehova dekenai umui giroa lou, bona umui mauri noho,+
Unai amo Iosepa ena bese taudia latanai ia be lahi bamona do ia diho lasi,
Betele do ia araia ore, ta ese do ia habodoa lasi.
7 Umui ese kota maoromaoro daladia umui hagagevaia. Unai dainai taunimanima edia mauri ia auka,
Bona kara maoromaoro umui dadaraia.+
8 Hisiu orea ladana Kima bona hisiu orea ladana Kesili ia havaraia Diravana,+
Dibura be daba ena diari ai ia halaoa Diravana,
Dina ia hadiburaia, hanuaboi bamona ia halaoa Diravana,+
Ia ese davara ena ranu ia oda henia
Bona tanobada latanai ia bubua diho,+
Iena ladana be Iehova.
9 Ia ese goada taudia do ia hadikaia ore,
Bona magu aukadia idia noho gabudia do ia hadikaia ore.
10 Siti ena geiti ai idia helai taudia edia sisiba idia ura henia lasi,
Bona hereva momokani idia gwauraia taudia idia inai henia.+
11 Umui be ogogami taudia ese idia birulaia tano ena davana be idia amo umui abia,
Bona idia amo witi umui abia noho dainai,+
Umui be nadi amo umui haginia ruma dekenai do umui noho daudau lasi,+
Bona emui vain uma namodia edia huahua amo umui karaia wain do umui inua lasi.+
12 Lau diba umui be kerere momo umui karaia,
Bona emui kara dika ena bada lau diba.
Umui ese kara maoromaoro taudia umui dagedage henia,
Laloani moni umui abia,
Bona siti ena geiti ai ogogami taudia totona kota maoromaoro umui karaia lasi.+
13 Unai dainai, mai edia laloa kehoa taudia be unai nega ai hereva ta do idia gwauraia lasi,
Badina unai be dika do ia vara negana.+
Bena tuari oreadia edia Dirava Iehova be umui ida do ia noho,
Emui hereva hegeregerena.+
15 Kara dika umui inai henia, bona kara namo umui ura henia,+
Namona be siti ena geiti ai kota maoromaoro umui karaia.+
Unai amo tuari oreadia edia Dirava Iehova ese
Iosepa ena bese oredia do ia lalonamo henia.’+
16 “Unai dainai Iehova, tuari oreadia edia Dirava Iehova, be inai bamona ia hereva, ia gwau:
‘Ariara gabudia dekenai do idia taitai,
Bona dala gabudia dekenai mai lalohisihisi ida do idia taitai!”
Bona biru taudia do idia hamaoroa idia taitai totona,
Bona taitai diba namonamo taudia do idia hamaoroa idia taitai totona.’
17 ‘Vain umadia ibounai dekenai do idia taitai,+
Badina lau be emui huana amo do lau hanaia.’ Unai be Iehova ena hereva.
18 ‘Mai ura ida Iehova ena dina idia laloa noho taudia e, madi o!+
Iehova ena dina ai do ia vara gauna be umui laloa hegeregerena do ia vara, a?+
Ia be dibura dinana, bona do ia diari lasi.+
19 Dirava ena dina be hegeregere tau ta be laiona amo ia heau, to bea ta ese ia abia,
Bona ena ruma ia vareai bona haba ai ena imana ia atoa neganai, gaigai ese ia koria.
20 Iehova ena dina be dibura, bona diari lasi, ani?
Unai dina be do ia dibura momokani, ani?
21 Lau ese umui karaia ariadia lau inai henia,+
Bona emui hebou badadia ai umui henia bonana namo bouboudia lau moalelaia lasi.
22 Ena be gabua bouboudia bona harihari bouboudia umui henia,
To unai gaudia do lau abia dae lasi.+
Bona maino karaia totona umui henia animal bouboudia do lau abia dae lasi.+
23 Lau ura lasi mai regerege bada ida umui abia anedia lau kamonai,
Bona miusiki gaudia mai edia varo amo umui karaia rege bada miusiki lau ura lasi kamonai danu.+
24 Namona be kota maoromaoro be ranu bamona ia aru diho,+
Bona kara maoromaoro be sinavai bamona ia aru noho.
25 Israela besena e, lagani 40 tano kaukauna dekenai umui loaloa neganai,
Umui be lau dekenai boubou gaudia bona harihari bouboudia umui henia, a?+
26 To umui ese Sakutu bona Kaiwana umui abia lao,
Unai kaivakuku be umui sibona totona umui karaia, emui hisiu-diravana unai,
27 Bona lau ese umui do lau siaia lao Damaseko amo ia daudau tanona dekenai umui noho totona.’+ Unai be tuari oreadia edia Dirava ena hereva, iena ladana be Iehova.”+
6 “Siona Ororo ai umui noho taudia, sibona emui goada dekenai umui tabekau taudia unai,
Samaria ororo ai umui noho taudia, umui laloa umui noho namonamo taudia unai,+
Ladana bada besena ena gunalaia taudia,
Israela besena ese ia abidadama henia taudia unai, umui ibounai be dika do umui davaria!
2 Kalena dekenai umui hanaia lao bona umui itaia.
Bena unuseni amo hanua badana Hamata dekenai umui lao,+
Bena Filistia taudia edia hanua Gata dekenai umui diho lao.
Unai bese taudia be inai basileia rua* idia hereaia, a?
Eiava edia tano ena bada be emui tano ena bada ia hanaia, a?
3 Umui laloa umui dekenai do ia vara dika badana be do ia ginidae haraga lasi, a?+
Bona dagedage karadia umui habadaia noho, a?+
4 Idia be aivori amo idia karaia mahuta patana ai idia hekure+ bona helai patana ai idia laga-ani,+
Bona boromakau natudia bona mamoe oreana amo idia abia mamoe namodia idia ania noho.+
5 Idia ese hap* edia regena hegeregerena ane idia torea,+
Bona Davida ia karaia bamona, miusiki gadaralaia gaudia ma haida idia karaia.+
6 Kapusi badadia be wain amo idia hahonua bona idia inua+
Bona dehoro namo hereadia amo sibodia idia horoa.
To Iosepa ena bese dekenai do ia vara dika badana idia laloa lasi.+
7 Vadaeni tano ma ta dekenai do idia abidia lao taudia amo, idia do idia abia lao guna,+
Bona edia mahuta patana ai idia hekure noho taudia edia moale negana do ia ore.
8 Iehova, tuari oreadia edia Dirava ia gwau: ‘Lau, Siahu Ibounai Lohiabadana Iehova be inai hereva metauna lau gwauraia,’+
“‘Iakobo ena hekokoroku karana lau ura henia lasi,+
Ena kohoro aukadia lau ura henia lasi momokani,+
Bona lau ese siti bona ena lalonai ia noho gaudia ibounai be idau bese taudia dekenai do lau henia.+
9 “‘“Bona bema tatau 10 be ruma tamona lalonai idia rakatania, do idia mase danu. 10 Bena varavara ta* do ia mai bona idia ta ta edia mase tauanina do ia huaia lao bona do ia gabua. Ia ese edia turia be ruma amo do ia kokia, bena ruma ena lalona daiutu ai ia noho tauna do ia nanadaia: ‘Oi ida ma haida idia noho, a?’ Bona unai tauna do ia gwau: ‘Ta ia noho lasi.’ Bena varavara do ia gwau: ‘Hereva ta oi gwauraia lasi! Badina inai be nega maorona lasi Iehova ena ladana gwauraia totona.’”
11 Badina unai be Iehova ese ia henia oda,+
Bona ia ese inai ruma badana do ia hadikaia ore,
Bona ruma maragina be momoru ai do ia halaoa.+
12 Hosi be nadi badana latanai idia heau diba, a?
Eiava unuseniai ta be boromakau ida tano do ia geia, a?
To umui ese kota maoromaoro karana umui hadikaia, poisini ava bamona ai umui halaoa vadaeni,
Bona kara maoromaoro karadia umui hahedinaraia lasi.+
13 Umui be anina lasi gaudia umui moalelaia noho,
14 Iehova, tuari oreadia edia Dirava ia gwau: “Israela besena e, lau ese bese ta do lau siaia umui ia tuari henia totona,+
Bona unai bese ese Lebo-hamata*+ amo ia lao bona Arabaha ena koura dekenai umui do ia hadikaia.”’”
7 Siahu Ibounai Lohiabadana Iehova be matahanai ta amo lau dekenai inai ia hahedinaraia: Lau itaia, Dirava ese kwadi oreana ta ia siaia, unai be keru negana* ai idia hadoa uhe idia tubu matamaia neganai. Unai uhe be king ena uma ai rei idia utua murinai idia hadoa. 2 Kwadi oreana ese tano ena tubutubu gaudia ibounai idia ania ore murinai, lau gwau: “Siahu Ibounai Lohiabadana Iehova e, mani emu taunimanima edia dika oi gwauatao!+ Iakobo be edena bamona ia mauri diba? Badina ia be goada lasi!”+
3 Vadaeni Iehova be ena lalona ia haidaua.+ Bena Iehova ia gwau, “Unai do ia vara lasi.”
4 Siahu Ibounai Lohiabadana Iehova ese matahanai ta amo lau dekenai inai ia hahedinaraia: Itaia, Siahu Ibounai Lohiabadana Iehova ese lahi amo idia do ia panisia. Unai lahi ia araia noho ela bona davara ia kaukau, bona tano ena kahana ta ia hadikaia ore. 5 Bena lau gwau: “Siahu Ibounai Lohiabadana Iehova e, mani unai bamona oi karaia lasi.+ Iakobo be edena bamona ia mauri diba? Badina ia be goada lasi!”+
6 Vadaeni Iehova be ena lalona ia haidaua.+ Bena Siahu Ibounai Lohiabadana Iehova ia gwau, “Unai do ia vara lasi.”
7 Ia ese matahanai lalonai lau dekenai inai ia hahedinaraia: Itaia, Iehova be magu ta latanai ia gini, unai magu be hahetohoa varona* amo idia karaia, bona iena imana ai hahetohoa varona ia noho. 8 Bena Iehova be lau dekenai ia gwau: “Amosa e, oi be dahaka oi itaia?” Vadaeni lau gwau: “Hahetohoa varona lau itaia.” Bena Iehova ia gwau: “Lau ese egu taunimanima, Israela taudia be hahetohoa varona amo lau hahetohoa. Lau ese idia do lau gwauatao lou diba lasi.+ 9 Isako ese ia haginia ataiai gabudia*+ do idia dika, bona Israela taudia edia helaga gabudia be do idia dika,+ bona lau ese tuari kaia amo Ieroboama ena bese taudia ma haida do lau tuari henia.”+
10 Betele+ ena hahelaga tauna Amasaia ese Israela ena king, Ieroboama,+ dekenai inai revareva ia siaia, ia gwau: “Amosa be Israela besena huanai oi hadikaia totona palani ia karaia noho.+ Tano taudia be ia gwauraia herevadia idia ura henia lasi.+ 11 Badina Amosa be inai bamona ia hereva, ‘Ieroboama be tuari kaia amo do ia mase, bona Israela taudia be idau tano dekenai do idia abia lao.’”+
12 Bena Amasaia be Amosa dekenai ia gwau: “Matahanai itaia tauna e, Iuda tanona dekenai oi heau lao, unuseniai do oi noho, bona unuseniai peroveta gaukara oi karaia.+ 13 To Betele dekenai peroveta gaukara oi karaia lasi,+ badina iniseniai king ta ena dubu helaga ia noho+ bona basileia ena bese taudia idia noho.”
14 Bena Amosa be Amasaia dekenai ia gwau: “Lau be peroveta tauna lasi eiava peroveta tauna ena natuna lasi, to lau be mamoe naria tauna sibona,+ bona fig audia lau naria. 15 To mamoe oreana naria gaukarana amo Iehova ese lau ia boiria. Bona Iehova be lau dekenai ia gwau, ‘Oi lao, egu taunimanima, Israela taudia dekenai oi peroveta.’+ 16 Vadaeni hari Iehova ena hereva oi kamonai, ‘Oi be oi gwau, “Israela taudia dekenai oi peroveta lasi,+ bona Isako ena bese taudia dekenai hahemaoro herevana oi harorolaia lasi.”+ 17 Unai dainai Iehova be inai bamona ia hereva: “Siti lalonai emu adavana be ariara hahinena ai do ia lao, bona emu natudia memero bona natudia kekeni be tuari kaia amo do idia mase. Emu tano be hahetohoa varona amo do idia haria, bona oi be miro tanona ai do oi mase. Bona Israela taudia be edia tano amo do idia abia lao.”’”+
8 Siahu Ibounai Lohiabadana Iehova ese matahanai ta lalonai lau dekenai inai ia hahedinaraia: Bosea ta ena lalonai fig huahua idia noho. 2 Bena ia be lau dekenai ia gwau, “Amosa e, dahaka oi itaia?” Lau haere, “Bosea ta mai ena fig huahua.” Bena Iehova be lau dekenai ia gwau: “Egu taunimanima, Israela taudia edia dokona be ia ginidae vadaeni. Lau be edia dika do lau gwauatao noho lasi.+ 3 Siahu Ibounai Lohiabadana Iehova ia gwau, ‘Unai dina ai dubu helaga ai idia abia anedia do idia abia lasi, to do idia taitai.+ Ta ese mase tauanidia momo be gabu ibounai dekenai do ia negea,+ regerege lasi!’
4 Ogogami taudia umui ura hadikaia taudia
Bona manau taudia edia tano umui hadikaia ore taudia e, inai umui kamonai,+
5 Umui gwau, ‘Hua matamata ena aria be edena negai do ia ore+ bena aniani do ita hoihoilaia?
Bona Sabati dinana hahelagaia karana+ be edena negai do ia ore?
Bona ita ese ifa* mesament ita hamaragia,
Bona sikele ena metau do ita habadaia,
Unai amo sikele koikoi do ita gaukaralaia bona taunimanima ita koia.+
6 Vadaeni kohu momo lasi taudia ita hoia, siliva moni abia totona,
Bona ogogami taudia ita hoihoilaia, sandolo ita hoia totona,+
Bona witi momoru ita hoihoilaia.’
7 Iakobo dekenai hairai ia henia Diravana Iehova ia gwauhamata ia gwau,+
‘Idia karaia karadia ibounai do lau laloaboio lasi.+
8 Unai dainai tano do ia heudeheude,
Bona tano dekenai idia noho taudia ibounai do idia taitai.+
Unai tano ibounai do ia daekau, Naila Sinavai bamona,
Bona do ia mareremarere bada bona mutu, Aigupito ena Naila Sinavai bamona.’+
9 Siahu Ibounai Lohiabadana Iehova ia gwau, ‘Unai dina ai
Lau ese dina tubua ai dina do lau hadihoa,
Bona dina ai tano dekenai dibura do lau mailaia.+
10 Lau ese emui aria dinadia be taitai negana ai do lau halaoa+
Bona emui tomadiho anedia be lalohisihisi anedia* ai do idia lao.
Lau ese emui gabana ai puse dabua do lau kwatua bona emui kwarana ibounai do idia kebere.
Emui taitai ena regena be natuna mero tamona sibona ia mase negana ena taitai regena bamona,
Bona unai gau ibounai edia dokona ena mamina be dika herea.’
11 Siahu Ibounai Lohiabadana Iehova ia gwau, ‘Itaia! Unai dinadia idia mai noho,
Unai nega ai lau ese tano dekenai hitolo bada do lau havaraia,
Do idia hitolo, paraoa dainai lasi eiava do idia ranu mase, ranu dainai lasi,
To Iehova ena hereva kamonai totona.+
12 Idia be do idia marere davara ena kahana ta amo ela bona davara ena kahana ma ta
Bona not kahana amo ela bona ist* kahana.
Idia be gabu ibounai dekenai Iehova ena hereva do idia tahua, to do idia davaria lasi.
13 Unai dina ai rami-hebou kekenidia mai edia hairai
Bona tau matamatadia be ranu mase dainai do idia maserea.
14 Idia be Samaria ena dirava koikoidia edia ladanai idia gwauhamata,+ idia gwau,
“Dano e, emu dirava be momokani ia noho!”+
Bona “Bere-sieba+ ena dala be momokani ia noho!
To idia be do idia moru bona do idia gini lou lasi.’”+
9 Lau itaia Iehova+ be boubou patana ena badinai ia gini, bona ia gwau: “Du ena kwarana oi botaia, bona vareai gabuna do ia marere. Du edia kwarana oi utua oho, bona lau ese taunimanima oredia be tuari kaia amo do lau hamasea. Ia heau tauna be do ia mauri lasi, bona ia ura heau tauna be do ia kwalimu lasi.+
2 Bema guri idia geia diho lao Mase Gurina* ai idia hunia totona,
Unuseniai egu imana amo idia do lau abia,
Bona bema guba dekenai idia daekau lao,
Unuseni amo idia do lau veria diho.
3 Bona bema idia be Karamele ororona ena ataiai idia hunia,
Unuseniai idia do lau tahua bona abidia.+
Bona bema davara ena dobu kahana ai egu vairana amo idia hunia,
Unuseniai lau ese davara ena gaigai do lau oda henia idia ia koria totona.
4 Bema idia be edia inai taudia edia tano dekenai idia abia lao,
Unuseniai lau ese tuari kaia do lau oda henia, idia do ia hamasea totona,+
Egu matana be idia do ia itaia, dika lau havaraia totona, bona namo havaraia totona lasi.+
5 Siahu Ibounai Lohiabadana, tuari oreadia edia Iehova,* be tano* latanai ena imana ia atoa,
Unai amo ia veve,+ bona tano ai idia noho taudia ibounai do idia taitai.+
Bona unai tano do ia daekau, Naila Sinavai bamona,
Bona do ia mutu, Aigupito ena Naila Sinavai bamona.+
6 ‘Ia ese vadavada ia haginia daekau lao guba dekenai
Bona tanobada ena ataiai guhi ia atoa.
Ia ese davara ranu ia boiridia,
Bena tanobada ena latanai ia bubua diho,+
Oibe, iena ladana be Iehova.’+
7 Iehova ia gwau, ‘Israela taudia e, lau dekenai umui be Kusu taudia edia natudia memero bamona, ani?’
Lau ese Israela taudia be Aigupito tanona amo lau ruhadia, ani?+
Bona Filistia taudia be Kerete tanona amo lau ruhadia,+ bona Suria taudia be Kiri tanona amo lau ruhadia, ani?’+
8 ‘Itaia! Siahu Ibounai Lohiabadana Iehova ena matana be kara dika basileiana ia itaia noho,
Bona ia ese tano amo unai basileia do ia hadikaia ore.+
To lau ese Iakobo ena bese taudia ibounai do lau hadikaia ore momokani lasi.’+ Unai be Iehova ena hereva.
9 ‘Itaia, lau ese oda lau henia,
Bona bese idauidau huanai lau ese Israela besena do lau hamarerea,+
Unai be hegeregere ta ese streina ia hamarerea,
To streina amo nadi maragina ta be tano dekenai ia moru lasi.
10 Egu taunimanima, kara dika taudia ibounai unai, be tuari kaia amo do idia mase,
Idia hereva noho, idia gwau, “Dika be ai kahirakahira do ia mai lasi bona dika do ai davaria lasi.”’
11 ‘Unai dina ai lau ese Davida ena ruma, ia moru vadaeni gauna, do lau haginia lou,+
Lau ese idia makohia haba do lau hanamoa lou,
Bona dika gaudia do lau hanamoa lou.
Gunaguna negadia ai ia noho hegeregerena do lau haginia lou,+
12 Unai amo egu taunimanima ese Edoma tano ibounai do idia abia,
Bona egu ladana ai idia boiboi bese idauidau taudia ibounai danu.’+ Unai be Iehova ena hereva, ia ese unai ia karaia noho.
13 Iehova ia gwau, ‘Itaia, dina idia mai noho,
Uma aniani momo herea idia do geia lasi neganai, hadohado negana do ia ginidae,
Bona greips momo herea idia do utua lasi neganai, gogoa negana do ia ginidae,+
Bona wain namo herea be ororo gabudia+
Bona ororo maragidia amo do ia aru diho.+
14 Lau ese egu taunimanima, idia abia lao Israela taudia unai, do lau haboua lou,+
Bona idia noho kava siti do idia hanamodia lou bona do idia noholaia,+
Idia ese vain umadia do idia karaia bona edia wain do idia inua,+
Bona uma do idia karaia bona edia huahua do idia ania.’+
15 ‘Lau ese edia tano ai idia do lau atoa,
Bona ta ese idia do ia kokia lou lasi,
Oibe, idia dekenai lau henia tano amo ta ese idia do ia kokia lou lasi.’+ Unai be Iehova, emui Dirava, ena hereva.”
Anina be “Ia be Metau Ta” eiava “Metau ta Ia Huaia.”
Heb., “kepata ia dogoatao tauna.”
Heb., “kepata ia dogoatao tauna.”
Heb., “hahemaoro tauna.”
Eiava reana, “king ena natudia memero.”
Eiava “hadibaia herevana.”
Diksenari ai, “Ne′phesh; Psy·khe′” itaia.
Diksenari ai, “Ne′phesh; Psy·khe′” itaia.
Eiava reana, “ia lalonai guma ia noho lasi neganai?”
Eiava reana, “Bona ruma momo.”
Eiava “biagudia.”
Eiava “gwau-edeede.”
Diksenari itaia.
Eiava “mase negana ai idia abia anena.”
Heb., “Betele umui tahua lasi.”
Eiava reana, “meamea gabuna ai do ia lao.”
Inai be Iuda bona Israela ena basileia ia herevalaia.
Miusiki gauna ta mai ena varo, gita bamona, to ena toana be idau.
Heb., “Iena tamana ena tadikaka.”
Heb., “Ita sibona totona doana ita abia vadaeni.”
Eiava “Hamata hanua ena vareai gabuna.”
Unai be, January bona February.
Inai varo ena dokona ai metau gauna ta ia noho, bona idia gaukaralaia idia haginia gauna idia sekea, bema ia gini maoromaoro eiava lasi. Eng., plummet.
Diksenari itaia.
Ap. B14 itaia.
Eiava “mase negana ai idia abia anena.”
Eiava “dina daekau.”
Eiava “Sheol,” unai be, mase taudia guria gabuna. Diksenari itaia.
Diksenari ai, “Tuari oreadia edia Iehova” itaia.
Eiava “tanobada.”