IHARUANA KORINTO TAUDIA DEKENAI

1 Lau Paulo, Dirava ena ura dainai lau be Keriso Iesu ena aposetolo tauna ai lau lao, bona iseda tadikaka Timoteo+ ida inai revareva be Dirava ena kongrigeisen Korinto dekenai ai siaia. Akaia ena gabu ibounai dekenai idia noho helaga taudia ibounai dekenai ai siaia danu.+

2 Namona be Dirava iseda Tamana bona Lohiabada Iesu Keriso amo hebogahisi hereadaena bona maino umui abia.

3 Iseda Lohiabada Iesu Keriso ena Dirava bona Tamana do ita hanamoa.+ Ia be hebogahisi Tamana+ bona lalogoada ibounai ia henia Diravana.+ 4 Iseda hisihisi ibounai lalonai ia ese ita dekenai lalogoada ia henia noho,*+ vadaeni Dirava amo ita abia lalogoada amo+ hisihisi idauidau idia abia taudia ma haida ita hagoadaia diba.+ 5 Badina Keriso dainai iseda hisihisi be bada,+ unai hegeregerena Keriso amo ita abia goada danu be ia bada. 6 Unai dainai, bema ai be hisihisi ai davaria, unai be umui hagoadaia bona hamauria totona. Bona bema Dirava ese ai ia hagoadaia, unai be umui hagoadaia totona, unai amo do umui gini goada bona ai haheaukalaia hisihisi umui haheaukalaia diba. 7 Bona emai abidadama umui dekenai be ia goada, badina ai diba, umui be ai ida hisihisi ita abia hebou, unai hegeregerena Dirava ese umui bona ai do ia hagoadaia hebou.+

8 Tadikaka e, ai ura Asia provinsi dekenai ai davaria hisihisi umui diba.+ Ai be emai goada ia hereaia hisihisi bada ai davaria dainai, ai laloa emai mauri do ai haboioa.+ 9 Oibe, ai laloa ai be do ai mase. Unai bamona ia vara, ai sibona do ai abidadama henia lasi totona, to mase taudia ia hatorea isi lou Diravana do ai abidadama henia.+ 10 Unai nega dikana ai ia ese ai ia hamauria. Bona ai diba momokani, vaira nega ai danu, ai do ia hamauria.+ 11 Umui danu be emui guriguri goadagoada karana amo ai umui durua diba.+ Bema momo idia guriguri, heduru do ai abia diba, bona ai abia heduru dainai momo ese Dirava do idia tanikiu henia.+

12 Ai heagilaia gauna be inai, mai lalomamina goevana ida ai gwau diba, tanobada ai bona umui emui vairanai danu, ai be Dirava amo ia mai kara helagana bona kara momokani ai hahedinaraia, inai tanobada ena aonega amo lasi,+ to Dirava ena hebogahisi hereadaena amo unai ai karaia. 13 Badina ai be umui duahia diba gaudia* sibona ai torea. Bona lau ura unai gaudia do umui lalopararalaia namonamo noho.* 14 Umui diba vadaeni hegeregerena, umui haida be ai dainai umui heagi, unai hegeregerena iseda Lohiabada Iesu ena dina ai, ai danu be umui dainai do ai heagi.

15 Unai lau diba momokani dainai, lau ura umui dekenai nega iharuana lau mai, unai amo umui moale lou diba,* 16 badina Makedonia dekenai lau do lao lasi neganai, lau ura umui do lau vadivadi henia, bona Makedonia amo lau giroa mai neganai, lau ura umui dekenai lau mai. Bona lau do umui hakaua lao bona Iudea ia lao henia dalana dekenai lau umui rakatania.+ 17 Unai lalohadai lau abia neganai, unai lau laloa maragi lasi, ani? Lau ura karaia gaudia be lau sibona egu namo totona lau karaia lasi, vadaeni lau gwau “Oibe” bena lau gwau “Lasi,” a? 18 To Dirava umui abidadama henia dainai, emai hereva umui abia dae, umui dekenai ai gwau “oibe” neganai, gabeai “lasi” do ai gwauraia lasi. 19 Lau bona Silivanus* bona Timoteo+ ese Dirava ena Natuna, Iesu Keriso, be umui huanai ai harorolaia. Ia be ia gwau, “oibe” neganai, gabeai “lasi” ia gwauraia lasi, to iena “oibe” be “oibe” sibona. 20 Ena be Dirava ena gwauhamata be momo herea, to Iesu amo idia ibounai be “oibe.”+ Unai dainai, ia amo Dirava dekenai ita gwau “Amen,”+ unai amo Dirava ita hanamoa diba. 21 To Dirava ese ia hamomokania, umui bona ai be Keriso ena, bona ia ese ita ia horoa.+ 22 Ia ese ita dekenai iena maka ia atoa danu,+ bona lauma helaga ia henia,+ unai be iseda kudouna ai ia noho. Unai amo ia hamomokania, do idia mai hahenamo be ita dekenai do ia henia.

23 Dirava ese egu hereva ia hamomokania, lau be Korinto dekenai lau do mai lasi, badina lau ura lasi umui lalometau. 24 Ai be umui emui abidadama ai biagua lasi,+ to emui moale totona umui ida ai gaukara hebou, badina umui be emui abidadama dekenai umui gini goada noho.

2 Egu lalona lau hadaia, umui lau vadivadi henia lou neganai, emui lalona do lau hahisia lasi. 2 Badina bema lau ese emui lalona lau hahisia, daika ia noho egu lalona ia hamoalea totona? Ta lasi, to edia lalona ia hisihisi taudia sibona, ani? 3 Lau karaia gaudia lau torea, unai amo lau mai neganai, namo lasi lau do idia hamoalea taudia edia lalona lau hahisia, badina lau diba momokani, lau idia hamoalea gaudia ese umui ibounai idia hamoalea danu. 4 Umui dekenai revareva lau torea neganai, egu lalona ia hisihisi bona egu kudouna ia metau bona lau taitai, emui lalona lau hahisia totona lasi,+ to unai amo do umui diba umui lau lalokau henia bada.

5 Bema ta ese lalohisihisi ia havaraia,+ ia ese egu lalona ia hahisia lasi, to umui ibounai emui lalona ia hahisia. To lau ura lasi unai gauna dainai umui lau hereva auka henia. 6 Umui momo ese unai bamona tauna dekenai umui henia matahakani be hegeregere. 7 To mai hebogahisi ida ia umui gwauatao bona umui hagoadaia be namo,+ vadaeni ia be ena lalohisihisi ese do ia hadikaia ore lasi.+ 8 Unai dainai umui lau hagoadaia, namona be ia dekenai umui hahedinaraia, ia umui lalokau henia.+ 9 Umui dekenai unai lau torea ena badina be inai, lau ura diba bema gau ibounai lalonai kamonai karana umui hahedinaraia eiava lasi. 10 Bema ta ena kerere umui gwauatao, lau danu be unai bamona do lau karaia. To kerere lau gwauatao neganai, unai lau karaia umui lau durua totona bona unai be Keriso vairanai lau karaia. 11 Unai amo Satani ese ita do ia koia bona hamorua lasi,+ badina ita be iena koikoi karadia* ita diba.+

12 Vadaeni Troa dekenai Keriso ena sivarai namona harorolaia totona lau ginidae neganai,+ Lohiabada ena gaukara lalonai dala ta be lau dekenai ia kehoa.* 13 To egu tadikaka Tito+ lau davaria lasi dainai, lau lalohekwarahi bada. Unai dainai idia lau bamahuta henia bona Makedonia dekenai lau lao.+

14 To Dirava ita tanikiu henia, badina ia ese hanaihanai ita be Keriso ida ia gunalaia, idia kwalimu taudia bamona. Bona iena diba be bonana namona bamona, bona iseda gaukara amo unai bonana namona be gabu ibounai dekenai ia lao! 15 Dirava ena vairanai ita be Keriso ena sivarai namona ena bonana namona, bona unai bonana be mauri ena dala ai idia raka taudia bona mase ena dala ai idia raka taudia dekenai ia lao. 16 Do idia mase taudia dekenai unai bonana ese mase ia havaraia,+ to hahemauri do idia abia taudia dekenai unai bonana ese mauri ia havaraia. Bona daika be unai gaudia totona ia hegeregere momokani? 17 Ai be ai hegeregere, badina ai be taunimanima momo bamona Dirava ena hereva ai hoihoilaia lasi,*+ to ai be Dirava vairanai Keriso ai badinaia dainai, mai momokani ida ai hereva bona ai be Dirava ese ia siaia taudia.

3 Ai be umui dekenai ai sibona do ai gwauraia hedinarai lou be namo, a? Eiava taunimanima haida bamona, umui amo hamomokania revareva do ai abia eiava umui dekenai hamomokania revareva do ai henia, a? 2 Umui be emai revareva+ bona unai revareva ena toretore be emai kudouna dekenai ia noho, bona taunimanima ibounai be unai idia diba bona idia duahia. 3 Badina ia hedinarai goevagoeva, umui be Keriso ena revareva,+ bona ai, hesiai taudia ese unai ai torea. Inai be inka amo ai torea lasi, to mauri Diravana ena lauma amo ai torea, nadi palakadia latanai lasi,+ to taunimanima edia kudouna dekenai ai torea.+

4 Keriso dainai ai be mai emai abidadama Dirava dekenai. 5 Ai gwau lasi emai goada amo ai hegeregere inai gaukara ai karaia totona, to Dirava dainai ai hegeregere inai gaukara ai karaia.+ 6 Bona ia dainai ai hegeregere gwauhamata matamata ena hesiai taudia ai do ai lao.+ Unai be idia torea taravatu amo ia vara lasi,+ to lauma helaga amo ia vara, badina idia torea taravatu ia gwau ta do ia mase,+ to Dirava ena lauma ese ta dekenai mauri ia henia.+

7 Ma danu, mase ia mailaia Taravatu, nadi latanai idia torea gauna unai,+ be mai hairai bada ida ia mai dainai, Israela taudia be Mose ena vairana idia itaia diba lasi, badina iena vairana be ia diaridiari,+ to unai hairai be ia ore. 8 Unai dainai, lauma helaga ese ia henia hairaina+ ese unai hairai ia hereaia be namo, ani?+ 9 Badina bema mase ia mailaia Taravatu+ be mai ena hairai,+ vadaeni kara maoromaoro ia havaraia gauna be mai ena hairai bada!+ 10 Oibe, guna ia hairai gauna ena hairai be idia kokia vadaeni, badina gabeai ia mai hairai ese unai hairai ia hereaia.+ 11 Bema do idia kokia gauna be mai hairai ida ia mai,+ vadaeni do ia noho gauna ena hairai be bada herea!+

12 Ita be mai iseda helaro dainai,+ mai gari lasi ida ita hereva. 13 Bona ita be Mose bamona ita karaia lasi, ia ese dabua amo ena vairana ia koua,+ unai amo Israela taudia ese do ia ore gauna ena dokona idia itaia lasi. 14 To edia lalona be idia dibura.+ Badina ema bona hari taravatu gunana idia duahia negadia ibounai, unai dabua tamona be ia do noho,+ badina Keriso sibona amo unai dabua do ia kokia.+ 15 Oibe, ema bona hari, Mose ena toretore idia duahia negadia ibounai,+ dabua ta ese edia lalona ia koua.+ 16 To ta be Iehova* dekenai ia giroa neganai, unai dabua ia kokia.+ 17 Iehova* be Lauma,+ bona Iehova* ena lauma helaga idia abia taudia be mai edia ura kwalimu.+ 18 Bona ita ibounai iseda vairana be dabua ese ia koua lasi, bona hevarivari bamona Iehova* ena hairai ita hahedinaraia, bona unai ese ita ia haidaua bona ita be iena toana hegeregerena, bona iseda hairai be ia bada ia lao noho. Iehova* be Lauma, bona ia ese unai ia karaia.*+

4 Dirava ese ai ia hebogahisi henia bona inai hesiai gaukara be ai dekenai ia henia, unai dainai ai hesiku lasi. 2 To ai ese hemarai karadia, taunimanima ese hehuni ai idia karaia gaudia unai, ai dadaraia vadaeni, bona koikoi dalanai ai raka noho lasi bona Dirava ena hereva ai hagagevaia lasi.+ To hereva momokani ai gwauraia hedinarai karana amo, Dirava vairanai ai hahedinaraia, ai be haheitalai namona taunimanima* ibounai dekenai.+ 3 Bema ai harorolaia sivarai namona be hunia gauna,* dika do idia davaria taudia dekenai unai be hunia gauna, 4 bona inai nega oromana* ena dirava+ ese unai taudia edia lalona ia hadiburaia,+ vadaeni Keriso, Dirava ena toana ia abia tauna unai,+ ena sivarai namona mai hairaina ena diari be idia dekenai ia hedinarai lasi.+ 5 Badina ai haroro neganai, ai be sibona ai herevalaia lasi, to ai herevalaia gauna be Iesu Keriso be Lohiabada bona ai gwauraia hedinarai ai be emui igui hesiai taudia Iesu dainai. 6 Dirava be inai hereva ia gwauraia: “Dibura amo diari do ia hedinarai be namo,”+ bona Keriso ena vairana amo, Dirava ese ena diari be iseda kudouna dekenai ia hahedinaraia,+ unai diari ese Dirava ena diba hereadaena ia henia.

7 To ai dekenai inai dava bada gauna+ be hodu* lalonai ia noho.+ Bona ia hedinarai goevagoeva, ai abia siahuna, taunimanima edia siahu ia hereaia gauna be Dirava amo ia mai, ai amo lasi.+ 8 Kahana ibounai amo metau idauidau ese ai idia koua noho, to ai idia koua momokani lasi, ai laloa daradara, to hanaia dalana ia noho.*+ 9 Ai idia dagedage henia, to Dirava ese ai ia rakatania lasi,+ hisihisi idauidau ese ai idia hametaua, to ai idia hadikaia ore lasi.+ 10 Hanaihanai ai ese hisihisi ai haheaukalaia, Iesu ese ia haheaukalaia hisihisi hegeregerena.+ Unai amo ai hahedinaraia, ai be Iesu ena mauri dalana ai badinaia. 11 Iesu dainai ai mauri noho taudia be nega momo kahirakahira emai mauri ai haboioa,+ unai amo ai hahedinaraia, ai be Iesu ena mauri dalana ai badinaia. 12 Unai dainai mase be ai dekenai ia noho, to mauri be umui dekenai ia noho.

13 Emai abidadama be tamona, Toretore Helagadia ia gwau bamona: “Abidadama lau hahedinaraia, unai dainai lau hereva.”+ Ai danu be abidadama ai hahedinaraia, unai dainai ai hereva, 14 ai diba Iesu ia hatorea isi Diravana ese ai danu be Iesu ida do ia hatorea isi bona Iesu vairanai ai bona umui do ia abia mai.+ 15 Unai ibounai be umui totona, vadaeni taunimanima momo ese Dirava idia tanikiu henia dainai, hebogahisi hereadaena do ia bada, bona unai amo Dirava be hanamoa do ia abia.+

16 Unai dainai ita hesiku lasi, ena be iseda tauanina be idia dika idia lao noho, to iseda lalona be dina ibounai goada matamata ia abia noho. 17 Ena be ita abia hisihisi be nega sisina gauna bona ia metau lasi, to ita dekenai hairai hereadaena do ia mailaia, unai hairai be do ia noho hanaihanai.+ 18 Unai dainai iseda matana dekenai ita itaia gaudia ita raraia noho lasi, to ita itaia lasi gaudia ita raraia noho.+ Badina ita itaia gaudia be idia noho daudau lasi, to ita itaia lasi gaudia be idia noho hanaihanai.

5 Ita diba bema iseda tanobada rumana, palai ruma unai, be ia dika,+ Dirava amo ruma ta do ita abia, unai ruma be taunimanima ese idia karaia lasi,+ to ia be guba ai ia noho hanaihanai gauna. 2 Tanobada rumana ai ita noho neganai ita taitai. Badina ita ura bada guba ai ia noho ruma ita abia, dabua bamona ita do ia koua,+ 3 unai ita atoa neganai, ita be kopina kavakava do ita noho lasi. 4 Momokani, unai palai rumana ai ita noho neganai ita taitai, bona ita lalometau, badina ita ura lasi unai palai ruma ita kokia, to ita ura noho gabuna ma ta ita abia,+ unai amo mauri ese mase diba gauna ena gabu ia abia.+ 5 Dirava ese unai gauna totona ita ia hegaegaelaia,+ ia ese ita dekenai lauma helaga ia henia. Unai amo ia hamomokania, do idia mai hahenamo be ita dekenai do ia henia.+

6 Unai dainai ita be hanaihanai iseda lalona ia goada bona ita diba, ita be tanobada tauanina ai ita do noho lalonai, ita be Lohiabada amo ita daudau,+ 7 bona unai ita diba badina ita be abidadama amo ita raka, to ita itaia gaudia amo lasi. 8 Iseda lalona ia goada bona ita moale iseda tanobada tauanina ai do ita noho lasi, to Lohiabada ida do ita noho.+ 9 Unai dainai herevana edeseni ita noho, ia ida ita noho eiava ia amo ita daudau, to iseda tahua gauna be ita ura hanaihanai ia ita hamoalea. 10 Badina ita ibounai be Keriso ena hahemaoro sea vairanai do ita gini, vadaeni ita ta ta ese tanobada tauanina ai ita noho neganai ita karaia karadia hegeregerena, ia ese davana do ia henia, herevana ia be namo eiava dika.+

11 Vadaeni ai be Lohiabada gari henia karana ai diba dainai, ai ese taunimanima ai hagoadaia ai idia kamonai henia totona, to Dirava be ai ia diba namonamo. To lau ura emui lalomamina ese umui ia durua, unai amo do umui diba ai be edena bamona taudia. 12 Ai be umui dekenai ai sibona do ai gwauraia hedinarai lou lasi, to unai ibounai ai gwauraia, unai amo umui ai hagoadaia ai umui heagilaia totona. Vadaeni taunimanima edia toana dainai idia heagi,+ to edia kudouna ai ia noho gauna idia heagilaia lasi taudia, umui haere henia diba. 13 Bema ai be kavakava taudia bamona ai laloa,+ unai be Dirava totona. To bema ai laloa maoromaoro, unai be umui totona. 14 Keriso ena lalokau ese ai ia hagoadaia, badina ai diba vadaeni, tau tamona be taunimanima ibounai dainai ia mase,+ badina taunimanima ibounai be idia mase vadaeni. 15 Bona ia be taunimanima ibounai dainai ia mase, unai amo idia mauri taudia be sibona totona do idia mauri lasi,+ to idia dainai ia mase bona ia toreisi lou tauna totona do idia mauri.

16 Unai dainai, hari amo ia lao, emai matana amo tau ta ai itaia hegeregerena ia ai laloa lasi.+ Ena be guna Keriso be matana amo ai itaia hegeregerena ai laloa, to hari unai bamona dala ai ia ai laloa lasi.+ 17 Unai dainai bema tau ta be Keriso ida ia hakapua, unai tau be Dirava ese ia havaraia tauna matamatana.+ Gau gunadia be idia ore vadaeni, bona gau matamatadia idia vara. 18 To gau ibounai be Dirava amo, ia be Keriso amo ita ida maino ia karaia,+ bona maino ena hesiai gaukara be ita dekenai ia henia.+ 19 Unai be, Keriso amo Dirava be tanobada ida maino ia karaia,+ bona edia kara dika ia laloa lasi,+ bona unai maino herevana harorolaia gaukarana be ai dekenai ia henia.+

20 Unai dainai, ai be gwaukau taudia+ bamona Keriso ena gabu ai abia,+ unai be hegeregere Dirava be ai amo taunimanima ia boiria. Ai be Keriso ena gabu ai abia dainai, ai noinoi: “Dirava ida maino umui karaia.” 21 Dirava ese kara dika ia diba lasi tauna+ be ita totona kara dika boubou bamona ia henia, unai amo Dirava vairanai ita be kara maoromaoro taudia ai ita lao diba.+

6 Ai be Dirava ida ai gaukara hebou dainai,+ umui ai noia danu, Dirava ena hebogahisi hereadaena umui abia dae bona ena badina umui laloaboio lasi.+ 2 Ia gwau: “Nega namodia ai oi lau kamonai henia, bona hahemauri dinana ai oi lau durua.”+ Itaia, hari be nega namodia. Itaia, hari be hahemauri dinana.

3 Dala ta dekenai ta ai hahekwakwanaia lasi, unai amo taunimanima ese emai hesiai gaukara do idia gwauraia dika lasi,+ 4 to dala ibounai lalonai ai hahedinaraia, ai be Dirava ena hesiai taudia.+ Hegeregere: Hahetoho idauidau ai haheaukalaia, hisihisi ai davaria, ai dabu, bona emai noho dalana ia auka,+ 5 ai idia dadabaia, dibura ruma dekenai ai idia atoa,+ dagedage ai davaria, ai hekwarahi bada, hanuaboi momo ai mahuta lasi, nega haida ai aniani lasi,+ 6 kara goeva ai hahedinaraia, ai diba gauna hegeregerena ai kara, ai haheauka,+ hebogahisi ai hahedinaraia,+ lauma helaga ai abia, ia koikoi lasi lalokauna ai hahedinaraia,+ 7 hereva momokani ai gwauraia, Dirava ena siahu+ dekenai ai tabekau, kara maoromaoro ena tuari gaudia+ be emai imana idibana bona laurina dekenai, 8 haida ese ai idia hanamoa bona haida ese ai idia hahemaraia, haida ese ai idia gwauraia dika, bona haida ese ai idia gwauraia namo. Haida ese ai idia gwauraia koikoi taudia, to ai hereva momokani, 9 ma haida idia laloa taunimanima be ai idia diba lasi, to momo be ai idia diba, idia laloa ai mase be namo, to ai mauri noho,+ ai idia panisia,* to unai ese ai ia hamasea lasi,+ 10 idia laloa ai lalohisihisi, to nega ibounai ai moale, idia laloa ai ogogami, to momo dekenai gau namodia momo ai henia, idia laloa ai dekenai gau ta ia noho lasi, to ai dekenai gau ibounai idia noho.+

11 Korinto tadikaka e, umui dekenai gau ibounai ai gwauraia hedinarai, gau ta ai hunia lasi, bona umui dekenai lalokau bada ai hahedinaraia.* 12 Ai ese umui dekenai lalokau ai hahedinaraia,+ to umui ese ai dekenai emui lalokau umui hahedinaraia lasi. 13 Vadaeni ai karaia bamona do umui karaia, umui be egu natudia bamona lau hereva henia, umui danu, emui lalokau umui habadaia.*+

14 Abidadama lasi taudia ida do umui hakapua tamona lasi.+ Badina edena bamona kara maoromaoro bona kara dika idia turana diba?+ Eiava edena bamona diari bona dibura idia noho hebou diba?+ 15 Danu, Keriso bona Beliala* be edena bamona idia lalotamona diba?+ Eiava abidadama tauna bona abidadama lasi tauna be edena bamona idia gaukara hebou diba?+ 16 Dirava ena dubu bona kaivakuku idauidau be edena bamona idia lalotamona diba?+ Badina ita be mauri Diravana ena dubu,+ Dirava ia hereva bamona, ia gwau: “Lau be edia huanai do lau noho,+ bona edia huanai do lau raka. Bona lau be edia Dirava ai do lau lao, bona idia be egu bese taudia ai do idia lao.”+ 17 “Iehova* ia gwau: ‘Unai dainai idia amo do umui raka siri, bona idia amo do umui parara, bona miro gauna do umui dogoatao lasi’”;+ “‘vadaeni lau ese umui do lau abia dae.’”+ 18 “Siahu Ibounai Diravana, Iehova,* ia gwau: ‘Lau be emui tamana ai do lau lao,+ bona umui be egu natudia memero bona kekeni ai do umui lao.’”+

7 Lauegu lalokau taudia e, unai gwauhamata herevadia ita abia dainai,+ namona be tauanina bona lalona hamiroa gaudia ibounai amo ita goeva,+ bona Dirava ita gari henia noho lalonai namona be ita helaga noho.

2 Namona be ai umui abia dae.+ Ai ese ta dekenai kerere ta ai karaia lasi, ta ai hadikaia lasi, bona sibona emai namo totona ta ai koia lasi.+ 3 Inai lau gwauraia lasi umui lau gwau henia totona. Badina guna lau hereva bamona, herevana dahaka ia vara, umui be emai kudouna ai umui noho. 4 Umui dekenai lau be mai gari lasi ida lau hereva. Lau be umui lau heagilaia bada. Lauegu lalona ai goada lau abia, bona emai hisihisi ibounai lalonai lau moale bada.+

5 Oibe, Makedonia dekenai ai ginidae neganai,+ ai laga-ani lasi, dala idauidau ai hisihisi ai davaria, hegeregere murimuri amo dagedage ai davaria bona kongrigeisen dainai ai laloa momo. 6 To lalometau taudia edia lalona ia hagoadaia Diravana ese ai ia hagoadaia,+ badina Tito ia mai bona ai ida ia noho. 7 Ai ida ia noho karana ese ai ia hagoadaia sibona lasi, to umui ese ia umui hagoadaia karana amo goada ai abia danu. Ia giroa mai neganai, ai ia hamaoroa, umui ura bada lau umui itaia, badina umui lalohisihisi bada, bona lau umui laloa bada, unai ese egu moale ia habadaia.

8 Unai dainai ena be egu revareva amo emui lalona lau hahisia,+ to unai lau lalohisihisilaia lasi. Ena be matamanai lau lalohisihisi (lau itaia unai revareva ese emui lalona ia hahisia, to unai be nega sisina sibona), 9 hari lau moale, emui lalona idia hisihisi dainai lasi, to badina umui lalohisihisi dainai umui helalo-kerehai. Emui lalohisihisi be Dirava ena ura hegeregerena, unai amo ai dainai gau ta do umui haboioa lasi. 10 Dirava ena ura hegeregerena ia lalohisihisi tauna be ia helalo-kerehai bona hahemauri ia abia, unai be lalohisihisi gauna lasi.+ To tanobada ena lalohisihisi ese mase ia havaraia. 11 Dirava ena ura hegeregerena emui lalohisihisi karana ese ia havaraia namo mani umui laloa: Umui ese emui ladana umui hanamoa lou, kerere umui inai henia, Dirava umui gari henia, mai ura bada ida umui helalo-kerehai, ura goadana umui hahedinaraia, bona kerere umui hamaoromaoroa!+ Gau ibounai lalonai umui hahedinaraia, unai gauna dekenai kara goeva umui hahedinaraia. 12 Ena be umui dekenai unai revareva lau torea, to unai kerere tauna+ eiava ia hahekwakwanaia tauna totona lau torea lasi, to unai lau torea unai amo umui huanai bona Dirava ena vairanai do umui hahedinaraia, ai umui ura henia bada. 13 Unai dainai umui ese emai lalona umui hagoadaia.

Oibe, emai lalona umui hagoadaia sibona lasi, to Tito ia moale dainai ai moale bada, badina umui ibounai ese iena lalona umui hagoadaia. 14 Bema guna Tito vairanai umui lau heagilaia, unai lau hemarailaia lasi. To Tito vairanai umui ai heagilaia karana be momokani, umui dekenai ai gwauraia gaudia ibounai idia momokani hegeregerena. 15 Danu, umui ibounai ese Tito umui kamonai henia, bona mai hemataurai bada ida ia umui abia dae, Tito ese unai ia laloa neganai,+ iena lalokau umui dekenai be ia bada. 16 Lau diba momokani* umui karaia gaudia ibounai be do umui karaia namonamo, unai dainai lau moale.

8 Tadikaka e, ai ura umui be Dirava ese Makedonia kongrigeisen ibounai dekenai ia hahedinaraia hebogahisi hereadaena umui diba.+ 2 Idia be hahetoho badana ta dainai hisihisi idia davaria neganai, idia moale bada bona hariharibada idia hahedinaraia, ena be idia ogogami momokani. 3 Badina idia henia diba hegeregerena idia henia,+ oibe, lau gwau diba, idia henia gauna be idia dekenai ia noho gauna ia hereaia.+ 4 Bona idia be sibona edia ura dainai ai idia noia loulou, edia harihari gauna do idia henia bona helaga taudia do idia durua.*+ 5 Ai laloa gaudia sibona idia karaia lasi, to gau momo idia karaia. Dirava ena ura hegeregerena idia ese Lohiabada idia hesiai henia guna bona ai idia durua. 6 Unai dainai Tito ai hagoadaia,+ umui huanai ia hamatamaia gaukarana do ia karaia haorea, unai gaukara be inai, mai moale ida umui henia harihari gaudia do ia gogoa. 7 Umui be inai kara umui hahedinaraia badabada hegeregerena, abidadama, hereva karana, diba, mai ura bada ida gau ibounai umui karaia, bona umui dekenai ai hahedinaraia lalokauna umui hahedinaraia. Unai hegeregerena, namona be emui harihari karana umui habadaia noho danu.+

8 Unai hereva be oda herevana ta bamona lau gwauraia lasi, to lau hereva badina ma haida be mai ura bada ida gau ibounai idia karaia, bona lau ura tohoa bema emui lalokau be momokani eiava lasi. 9 Badina umui be iseda Lohiabada Iesu Keriso ena hebogahisi hereadaena umui diba, ena be ia taga, to umui dainai ia be ogogami tauna ai ia lao,+ vadaeni iena ogogami karana amo umui be do umui taga.

10 Bona unai dainai egu lalohadai lau gwauraia:+ Unai durua gaukara be emui namo totona umui karaia, badina lau itaia lagani ta gunanai, unai gaukara umui karaia matamaia sibona lasi, to mai emui ura ida umui karaia. 11 Vadaeni namona be unai gaukara umui karaia haorea. Unai dala amo umui dekenai ia noho gauna hegeregerena, unai gaukara do umui karaia haorea, guna emui ura umui hahedinaraia hegeregerena. 12 Badina bema ta be mai ena ura ida gau ta ia henia, Dirava ese unai henia karana do ia abia dae. Ia dekenai ia noho gauna hegeregerena ia henia,+ to ia dekenai ia noho lasi gauna ia henia lasi. 13 Badina lau ura lasi umui dekenai metau lau henia, bona ma haida dekenai metau lau henia lasi, 14 to umui dekenai idia noho gau momo amo edia dabu gaudia do umui henia bona idia dekenai idia noho gau momo amo emui dabu gaudia do idia henia, vadaeni idia bona umui be do umui hegeregere. 15 Toretore Helagadia ia gwau bamona: “Mai ena gau momo tauna be gau momo herea ia abia lasi, bona gau haida ia abia tauna be gau haida sibona ia abia lasi.”+

16 Dirava ai tanikiu henia, badina Tito ese umui ia laloa bada, ai ese umui ai laloa bada hegeregerena,+ 17 badina ia ese emai hagoadaia herevana ia badinaia bona ia ura bada unai do ia karaia, vadaeni sibona ena ura hegeregerena umui dekenai ia lao. 18 To ai be ia ida tadikaka ta ai siaia, unai tadikaka be sivarai namona totona ia karaia gaudia dainai, kongrigeisen ibounai ese ia idia hanamoa. 19 Unai sibona lasi, to kongrigeisen ibounai ese ia idia abia hidi, emai laolao lalonai ai do ia bamoa inai harihari gauna ai henia totona. Lohiabada hanamoa totona, unai harihari gauna do ai haria, bona unai ese do ia hamomokania ai ura ma haida ai durua. 20 Unai bamona ai karaia neganai, inai harihari gaudia hariharilaia karana dekenai, ta ese ai dekenai kerere ta do ia davaria lasi.+ 21 Badina ai be ‘mai momokani ida unai gaudia ai naria, Iehova* ena vairanai sibona lasi, to taunimanima edia vairanai danu.’+

22 Danu, ai be idia ida iseda tadikaka ma ta ai siaia. Ai itaia ia be mai ena ura bada ida gau momo ia karaia, to hari iena ura be ia bada herea badina umui dekenai iena abidadama ia goada. 23 To bema ta be Tito dainai ia daradara, umui lau hamaoroa diba, ia be lau ia bamoa bona emui namo totona lau ida ia gaukara hebou tauna, eiava bema iseda tadikaka dainai idia daradara, umui lau hamaoroa diba, idia be kongrigeisen edia aposetolo taudia bona Keriso idia hanamoa taudia. 24 Unai dainai idia dekenai umui hahedinaraia emui lalokau be momokani,+ bona umui hahedinaraia ai be umui dainai ai heagi kava lasi, unai amo kongrigeisen taudia ibounai ese unai do idia itaia.

9 Helaga taudia durua* gaukarana totona+ umui lau tore henia be anina lasi, 2 badina lau diba umui ura unai umui karaia, unai dainai Makedonia taudia dekenai umui lau heagilaia. Lau gwau: “Lagani ta ia ore vadaeni, Akaia taudia be idia noho hegaegae heduru idia henia totona,” bona umui hahedinaraia ura goadana ese idia momo edia lalona ia hagoadaia. 3 To lau ese tadikaka lau siaia inai, unai amo umui ai heagilaia kava lasi, to idia lau hamaoroa hegeregerena, umui be momokani umui noho hegaegae. 4 Dika Makedonia taudia be lau ida idia mai bona ai davaria umui do hegaegae lasi, vadaeni ai gwauraia herevana dainai do ita hemarai. 5 Unai dainai lau laloa tadikaka lau hagoadaia umui dekenai do idia mai guna bona umui gwauhamatalaia harihari gauna do idia abia hegaegae. Vadaeni unai harihari gauna be umui ai doria dainai umui henia lasi, to emui hariharibada karana dainai umui henia, bona unai harihari gauna be ia noho vadaeni.

6 To inai umui laloa: Uhe haida sibona ia hadoa tauna be anina haida sibona do ia gogoa, bona uhe momo ia hadoa tauna be anina momo do ia gogoa.+ 7 Namona be ta ta ese edia kudouna ai idia laloa vadaeni gauna hegeregerena do idia henia. Namo lasi mai lalohisihisi ida eiava ta ese ia doria dainai idia henia,+ badina mai moale ida ia henia tauna be Dirava ese ia lalokau henia.+

8 Danu, Dirava ia hegeregere umui dekenai ena hebogahisi hereadaena ia hahedinaraia badabada totona. Unai dainai hanaihanai umui dabu gaudia ibounai dekenai do umui hegeregere, bona gau momo do umui abia, vadaeni gaukara namodia ibounai umui karaia diba.+ 9 Toretore Helagadia lalonai idia torea hegeregerena: “Ia ese harihari gaudia momo ia henia, ogogami taudia dekenai gau momo ia henia vadaeni, bona iena kara maoromaoro be ia noho hanaihanai.”+ 10 Hadohado tauna dekenai uhe momo ia henia bona aniani totona paraoa ia henia Diravana ese umui dekenai uhe momo do ia henia umui hadoa totona, bona emui kara maoromaoro ese do ia havaraia huahua momo be ia ese do ia habadaia. 11 Dirava ese dala idauidau ai umui ia hanamoa, unai amo dala idauidau dekenai hariharibada karana umui hahedinaraia. Bona emai hekwarahi amo, unai bamona hariharibada karana ese taunimanima edia lalona ia veria, Dirava idia tanikiu henia totona. 12 Umui karaia durua gaukarana amo helaga taudia edia dabu gaudia umui henia sibona lasi,+ to unai gaukara dainai taunimanima momo ese Dirava idia tanikiu henia bada. 13 Unai durua gaukara ese emui kara ia hahedinaraia, bona idia ese Dirava idia hanamoa badina umui ese Keriso ena sivarai namona umui badinaia bona taunimanima vairanai unai umui gwauraia hedinarai, bona badina idia bona ma haida dekenai hariharibada karana umui hahedinaraia.+ 14 Bona umui totona Dirava idia guriguri henia bona umui idia lalokau henia, badina Dirava ese umui dekenai hebogahisi hereadaena ia hahedinaraia.

15 Dirava ena davana lasi harihari gauna hereadaena dainai ia ita tanikiu henia.

10 Umui ida lau noho neganai umui laloa lau be goada lasi, to lau noho lasi neganai, mai lalogoada ida umui lau sisiba henia.+ Lau Paulo ese Keriso ena manau bona ena hebogahisi dainai umui lau noia,+ lau ura momokani umui dekenai lau herevalaia gaudia umui badinaia.+ 2 Haida idia laloa ai be tanobada taudia edia lalohadai hegeregerena ai raka, to umui dekenai lau mai neganai, lau ura lasi unai bamona taudia lau kara auka henia. 3 Ena be inai tanobada lalonai ai noho, to ai be tanobada taudia bamona ai tuari lasi. 4 Badina aiemai tuari gaudia be inai tanobada taudia ese idia gaukaralaia gaudia lasi,+ to Dirava ese ia henia gaudia, idia be mai edia siahu,+ goada momokani gaudia idia koua totona. 5 Ai ese Dirava ena diba ida idia hegeregere lasi lalohadai kereredia bona hekokoroku lalohadai ibounai, ai koua noho.+ Bona ai ese lalohadai ibounai ai biagua noho, Keriso badinaia totona. 6 Umui ese kamonai karana umui hahedinaraia momokani murinai, ai be ai noho hegaegae idia kamonai lasi taudia ibounai ai panisia totona.+

7 Umui ese taunimanima be edia toana hegeregerena umui hahemaoro henia. Bema ta ia abia dae ia be Keriso ena, namona be inai ia laloa, ia be Keriso ena hegeregerena, ai danu be Keriso ena. 8 Lohiabada ese ai dekenai siahu ia henia umui ai hagoadaia totona, to umui hamanokaia totona lasi.+ Bema lau be unai lau heagilaia, do lau hemarai lasi, 9 to unai lau gwauraia badina lau ura lasi umui laloa egu revareva amo lau ura umui lau hagaria. 10 Badina haida idia gwau: “Iena revareva ai hereva metaudia bona hereva goadadia ia gwauraia, to ita ida ia noho neganai, iena toana be manoka bona ena hereva be mamina lasi.” 11 Unai bamona ia hereva tauna ese inai ia laloa be namo, ai ginidae neganai, emai revareva dekenai ai torea gaudia hegeregerena do ai karaia.+ 12 Badina ai ura lasi sibodia idia abia isi taudia ida do ai hegeregere eiava idia ida emai kara ai hahegeregerea.+ To, unai taudia be sibodia edia lalohadai hegeregerena sibodia idia tahua bona ta ta ida sibodia idia hahegeregerea neganai, idia hahedinaraia idia dekenai laloparara be lasi.+

13 Ai be do ai heagi, to unai do ai karaia neganai, emai maka ai hanaia lasi, to Dirava ese ai dekenai ia henia gaukara lalonai ai hagugurua diba gaudia sibona do ai heagilaia. Bona umui danu be unai gaukara lalonai umui noho.+ 14 Ai be umui dekenai ai mai neganai, emai gaukara ena maka ai hanaia lasi, oibe, Keriso ena sivarai namona harorolaia gaukarana lalonai, ai be umui dekenai ai mai taudia ginigunadia.+ 15 Ai be emai gaukara ena maka ai hanaia lasi bona ma haida edia hekwarahi dainai ai heagi lasi. To emui abidadama ia bada ia lao neganai, emui teritori dekenai ai karaia gaukara do umui laloa bada. Vadaeni emai gaukara do ai habadaia, 16 bona tano ma haida dekenai sivarai namona do ai gwauraia, unai amo ma haida edia gaukara lalonai idia karaia vadaeni gaudia do ai heagilaia lasi. 17 “To ia heagi tauna be Iehova* dainai ia heagi be namo.”+ 18 Badina Iehova* ese ia hanamoa tauna be iena lalonamo ia abia,+ to sibona ia hanamoa tauna be Dirava ena lalonamo ia abia lasi.+

11 Lau ura egu hereva kavakava sisina do umui haheaukalaia. To momokani, umui be egu kara umui haheaukalaia noho! 2 Lau ese umui lau laloa bada, Dirava ese umui ia laloa bada hegeregerena, badina lau ese tau tamona, Keriso unai, dekenai emui maoheni lau karaia vadaeni, bona umui be ia kara goeva rami-hebou kekeni bamona ia dekenai lau henia.+ 3 To lau gari, dika gaigai ese ena koikoi herevadia amo Heva ena lalona ia veria hegeregerena,+ emui lalona ia hamiroa bona Keriso dekenai umui hahedinaraia kara momokani bona kara goeva umui haboioa.+ 4 Bema tau ta ia mai bona ai ese ai harorolaia tauna, Iesu, ia harorolaia lasi, to tau idauna ia harorolaia, eiava bema siahu ta ese emui lalona ia hakaua, unai be guna emui lalona ia hakaua siahuna amo ia idau, eiava ta ia mai bona guna umui abia dae sivarai namona amo ia idau sivaraina ia harorolaia,+ iena kara umui haheaukalaia. 5 Badina lau laloa emui aposetolo taudia namo hereadia ese gau ta dekenai lau idia hereaia lasi.+ 6 Ena be egu hereva be mamina lasi,+ to lau be mai egu diba, bona dala idauidau ai bona gau ibounai dekenai ai ese unai diba be umui dekenai ai hahedinaraia.

7 Eiava mai moale ida Dirava ena sivarai namona be davana lasi umui dekenai lau harorolaia bona sibona lau hamanaua, vadaeni umui do idia abia isi. Unai dala amo lau be kara dika lau karaia, a?+ 8 Kongrigeisen ma haida amo tauanina durua gaudia lau abia, unai amo umui lau hesiai henia diba, unai be idia amo lau henaoa bamona.+ 9 Umui ida lau noho neganai lau dabu, to umui ta lau hametaua lasi, badina Makedonia amo idia mai tadikaka ese egu dabu gaudia momo idia henia.+ Oibe, dala ibounai lalonai lau ese umui lau hametaua lasi, bona unai bamona do lau karaia noho.+ 10 Keriso ena hereva momokani be egu lalona dekenai ia noho dainai, Akaia ena kahana ibounai dekenai do lau heagi noho, unai do lau hadokoa lasi.+ 11 Dahaka dainai umui lau hametaua lasi? Umui lau lalokau henia lasi dainai, a? Dirava ia diba umui lau lalokau henia.

12 To lau karaia noho gauna do lau karaia noho,+ unai amo edia dagi idia heagilaia taudia edia kara lau koua. Idia ese badina koikoina idia tahua ai ida idia hegeregere totona. 13 Unai bamona taudia be aposetolo koikoidia, gaukara koikoi taudia, bona idia be sibona Keriso ena aposetolo taudia ai idia halaoa.+ 14 Bona unai kara dekenai lau hoa lasi, badina Satani be diari aneruna ai sibona ia halaoa noho.+ 15 Unai dainai, lau hoa lasi bema iena hesiai taudia danu be kara maoromaoro taudia ai sibodia idia halaoa noho. To dokonai idia dekenai do ia vara gauna be edia kara hegeregerena.+

16 Ma lau hereva lou, namo lasi tau ta ia laloa lau be hereva kava tauna. To momokani bema lau be unai bamona umui laloa, namona be egu kara umui haheaukalaia, unai amo lau danu do lau heagi sisina. 17 Inai heagi karana lalonai, lau herevalaia gauna lau herevalaia, Lohiabada ena haheitalai lau tohotohoa lasi, to idia hereva kava taudia bamona lau hereva. 18 Taunimanima momo ese inai tanobada gaudia idia heagilaia dainai, lau danu be do lau heagi. 19 Umui laloa umui be laloa maoromaoro taudia dainai, mai moale ida idia hereva kava taudia edia kara umui haheaukalaia. 20 To momokani, bema ta ese umui be igui hesiai taudia ai ia halaoa, eiava emui kohu ia haorea, eiava emui gaudia ia abia, eiava umui huanai sibona ia abia isi, bona emui vairana ia botaia, vadaeni unai tauna ena kara umui haheaukalaia.

21 Ai hemarai inai hereva ai gwauraia totona, badina haida idia laloa emai siahu ai gaukaralaia namonamo lasi.

To bema haida be mai lalogoada ida idia kara, vadaeni lau danu be mai lalogoada ida lau kara, ena be haida idia laloa lau hereva kava. 22 Idia be Heberu taudia, a? Lau danu be idia ta.+ Idia be Israela taudia, a? Lau danu be idia ta. Idia be Aberahamo ena bese amo, a? Lau danu.+ 23 Idia be Keriso ena hesiai taudia, a? Lau be kava tauna ta bamona lau haere, lau ese idia ibounai lau hereaia: Lau ese gaukara bada lau karaia,+ nega momo dibura ruma lalonai lau idia atoa,+ nega momo lau idia kwadia, bona nega momo kahirakahira lau mase.+ 24 Iuda taudia ese nega 39 lau idia kwadia, bona nega 5 lalonai unai idia karaia.+ 25 Nega toi au amo lau idia kwadia,+ nega ta nadi amo lau idia hodoa,+ nega toi davara dekenai bouti ia dika,+ bona hanuaboi ta bona dina ta lau be davara dekenai lau hure kava. 26 Laolao momo lalonai dika lau davaria, sinavai ai kahirakahira lau mase, henaohenao taudia amo dika lau davaria, egu bese taudia amo dika lau davaria,+ idau bese taudia danu idia ura lau idia hadikaia,+ siti ai bona taunimanima lasi gabuna ai kahirakahira dika lau davaria,+ davara dekenai kahirakahira lau mase, tadikaka koikoidia idia ura lau idia hadikaia, 27 lau hekwarahi bada, hanuaboi momo lau mahuta lasi,+ lau hitolo bona lau ranu mase,+ nega momo lau aniani lasi,+ lau keru bona egu dabua be hegeregere lasi.

28 Bona unai gaudia sibona lasi, to danu dina ta ta ai kongrigeisen iboudiai dainai lau lalohekwarahi.+ 29 Daika ia manoka bona lau manoka lasi? Daika idia hakaua kerere bona lau badu lasi?

30 Bema lau heagi be namo, vadaeni lau ese egu manoka idia hahedinaraia gaudia do lau heagilaia. 31 Lohiabada Iesu ena Tamana bona Dirava, hanamoa ita henia hanaihanai Tauna, ia diba lau be lau koikoi lasi. 32 Damaseko ai, King Areta ena lohia henunai ia noho gavana be Damaseko siti ia gimaia, bona ia ura lau ia dogoatao, 33 to tadikaka ese lau be bosea ta lalonai idia atoa bona siti ena magu ena matu amo lau idia hadihoa,+ bena unai gavana amo lau heau mauri.

12 Lau heagi be namo. Unai ese namo ta ia havaraia lasi, to hari lau ura Lohiabada amo lau abia matahanai+ bona hadibaia herevadia lau herevalaia.+ 2 Keriso ida ia hakapua tauna ta lau diba. Lagani 14 gunana ai, Lohiabada ese ia be guba ihatoina dekenai ia abia lao. Lau diba lasi bema unai be tauanina korikorina ai eiava lasi, to Dirava ia diba. 3 Oibe, unai tauna lau diba. Lau diba lasi tauanina korikorina ai eiava lasi, to Dirava ia diba, 4 unai tauna be Lohiabada ese paradaiso dekenai ia abia lao bona taunimanima ese idia gwauraia diba lasi herevadia ia kamonai, tau ta be maoro lasi unai hereva ia gwauraia totona. 5 Unai bamona tauna dainai do lau heagi, to lau sibona do lau heagilaia lasi. Egu manoka gaudia sibona do lau heagilaia. 6 Badina bema lau ura lau heagi, hereva kava do lau gwauraia lasi, to hereva momokani do lau gwauraia. To do lau heagi lasi, dika lau dekenai oi itaia bona oi kamonai gaudia dainai, lau sibona oi hanamoa. 7 Lohiabada amo lau abia hadibaia herevadia momo dainai, namo lasi ta ese lau ia hanamoa.

Lau hekokoroku lasi totona, gau ta ese lau ia hahekwarahia noho, ginigini ta ese egu tauanina ia gwadaia bamona,+ ia be Satani ena gaukara tauna bamona lau ia hahisia* noho, vadaeni do lau hekokoroku lasi. 8 Unai dainai nega toi Lohiabada lau noia unai ginigini ia kokia totona. 9 To lau dekenai ia gwau: “Oi dekenai lau hahedinaraia hebogahisi hereadaena be ia hegeregere momokani. Badina oi manoka neganai, egu siahu be oi amo ia hedinarai goevagoeva.”+ Vadaeni mai moale ida egu manoka gaudia do lau heagilaia, unai amo Keriso ena siahu be palai ta bamona lau do ia koua. 10 Keriso dainai lau moale, ena be lau manoka, lau idia hadikaia, lau dabu, bona dagedage bona metau lau davaria. Badina lau manoka neganai, goada bada lau abia.+

11 Lau be hereva kava tauna ai lau lao. Umui ese lau umui doria unai bamona lau karaia totona, badina umui ese lau karaia gau namodia umui herevalaia lasi. Emui aposetolo taudia namo hereadia ese gau ta dekenai lau idia hereaia lasi, ena be lau be anina lasi.+ 12 Oibe, umui ese egu aposetolo gaukara ia hamomokania gaudia umui itaia, unai gaudia be, haheauka bada karana,+ toa idauidau, hoa karadia bona siahu karadia.+ 13 Bona inai dala tamona ai umui be kongrigeisen ma haida amo umui idau, badina lau ese umui lau hametaua lasi. Kerere ta lau karaia, a?+ Bema unai bamona, mani egu kerere umui gwauatao.

14 Inai be nega ihatoina, lau hegaegae umui dekenai lau mai totona, bona umui do lau hametaua lasi. Lau be emui kohu lau tahua lasi,+ to umui lau tahua, badina natudia+ ese kohu do idia haboua lasi edia tama sina totona, to tama sina ese natudia totona kohu do idia haboua. 15 Lau be mai moale ida umui totona gau ibounai do lau henia bona egu goada ibounai do lau henia.+ Bema umui lau lalokau henia bada, lau do umui lalokau henia bada lasi, a? 16 To herevana dahaka ia vara, umui lau hametaua lasi.+ To umui gwau, lau koikoi, bona koikoi karadia amo umui lau abia. 17 Umui dekenai lau siaia taudia amo, lau be sibona egu namo lau tahua lasi, ani? 18 Tito lau hagoadaia umui dekenai do ia mai bona ia ida tadikaka ta lau siaia. Tito be umui amo, ia sibona ena namo ia tahua lasi, ani?+ Ai be mai lalotamona ida ai raka, ani? Bona ai be dala tamona dekenai ai raka, ani?

19 Inai revareva umui duahia lalonai, umui laloa ai ese emui samania herevadia ai haerelaia, a? Ai be Keriso ida ai lalotamona bona Dirava vairanai ai hereva. To lalokau taudia e, gau ibounai ai karaia umui ai hagoadaia totona. 20 Lau gari, dika lau ginidae neganai, lau davaria umui be egu ura hegeregerena umui noho lasi bona lau be emui ura hegeregerena lau noho lasi. To hepapahuahu, mama, badu, heai, ladana hadikaia herevadia, udu mauri, hekokoroku, bona heiriheiri idia noho garina. 21 Danu lau laloa umui dekenai lau giroa neganai, egu Dirava ese umui vairanai lau ia hahemaraia garina, bona guna idia kara dika taudia momo dainai reana lau lalohisihisi, badina idia be edia kara mirodia, matabodaga karadia,* bona gwau-edeede hemarai karadia* amo idia helalo-kerehai lasi.

13 Inai be nega ihatoina lau hegaegae umui dekenai lau mai totona. “Hereva hamomokania taudia rua eiava toi edia hereva amo gau ibounai do umui hamomokania.”+ 2 Ena be hari lau be umui amo lau daudau, to egu hereva umui abia dae, hegeregere lau be nega iharuana umui ida lau noho bamona. Lau ese guna idia kara dika taudia bona ma haida lau hadibaia lou, bema lau giroa mai, idia kerere taudia do lau matahakani henia. 3 Unai dala amo do lau hamomokania Keriso be lau amo ia hereva. Umui dekenai Keriso be ia manoka lasi, to umui huanai ia be ia goada. 4 Momokani, ia be ia manoka dainai au dekenai idia kokoa kau, to Dirava ena siahu dainai ia be ia mauri noho.+ Momokani, guna ia manoka hegeregerena, hari ai danu ai manoka, to umui dekenai Dirava ese ena siahu ia hahedinaraia dainai,+ ai be ia ida do ai noho hebou.+

5 Umui tahua noho bema umui be emui abidadama umui dogoatao noho eiava lasi, bona do umui hamomokania noho umui be edena bamona taudia.+ Eiava Iesu Keriso be umui ida ia hakapua karana umui lalopararalaia, a? Bema lasi, Dirava ese umui do ia abia dae lasi. 6 Lau ura momokani do umui diba Dirava ese ai ia abia dae.

7 Vadaeni umui kerere lasi totona, Dirava ai guriguri henia noho. Unai lau karaia ena badina be Dirava ese ai ia abia dae totona lasi, to unai amo kara namo do umui karaia noho, herevana haida idia laloa Dirava ese ai ia abia dae lasi. 8 Gau ta ai karaia diba lasi hereva momokani ai hadikaia totona, to hereva momokani durua gaudia sibona ai karaia. 9 Ai be ai manoka to umui be umui goada neganai, ai moale. Bona ai gurigurilaia noho gauna be inai, emui lalona do umui hamaoromaoroa lou. 10 Unai dainai umui ida lau noho lasi neganai, unai gaudia lau torea, vadaeni umui ida lau noho neganai, Lohiabada ese lau dekenai ia henia siahu do lau gaukaralaia+ umui lau hagoadaia totona, to umui hamanokaia totona lasi.

11 Tadikaka e, egu hereva orena be inai, do umui moale noho, emui lalona do umui hamaoromaoroa noho, emui lalona do umui hagoadaia noho,+ do umui lalotamona noho,+ maino ai do umui noho.+ Bona lalokau bona maino Diravana+ be umui ida do ia noho. 12 Ta ta do umui hanamoa mai kisi helagana ida. 13 Helaga taudia ibounai be umui dekenai edia hanamoa hereva idia siaia.

14 Lohiabada Iesu Keriso ena hebogahisi hereadaena, Dirava ena lalokau, bona lauma helaga amo umui abia heduru be umui ibounai ida do ia noho.