GINIGUNANA TIMOTEO DEKENAI

1 Lau Paulo be iseda Hamauria Tauna Dirava bona Keriso Iesu, iseda helaro havaraia tauna,+ edia oda dainai Keriso Iesu ena aposetolo tauna ai lau lao. 2 Bona lau ese oi, Timoteo,*+ abidadama lalonai egu natuna korikori unai,+ dekenai inai revareva lau torea:

Namona be Tamana Dirava bona iseda Lohiabada Keriso Iesu amo hebogahisi hereadaena bona maino oi abia.

3 Makedonia dekenai lau lao gwauraia neganai, oi lau hagoadaia Efeso dekenai do oi noho, hari danu oi lau hagoadaia lou haida do oi oda henia, unai amo hahediba hereva koikoi do idia hadibaia lasi, 4 bona sivarai koikoidia do idia kamonai lasi+ bona sene taudia edia ladadia edia lista do idia tahua lasi. Unai gaudia ese ta idia durua diba lasi,+ to daradara sibona idia havaraia bona idia be Dirava amo lasi bona abidadama idia hagoadaia lasi. 5 Momokani, inai oda ena badina be inai, namona be iseda lalokau+ be kudou goevana amo, lalomamina namona amo, bona abidadama momokanina+ amo ia vara. 6 To haida ese unai gaudia idia rakatania dainai anina lasi herevadia idia badinaia.+ 7 Idia ura Dirava ena taravatu idia hadibaia,*+ to idia herevalaia gaudia eiava idia abia dae momokani gaudia be idia lalopararalaia lasi.

8 Ita diba bema ta ese Taravatu* ia badinaia namonamo, vadaeni taravatu be ia namo, 9 bona inai ita diba, taravatu be kara maoromaoro tauna totona idia karaia lasi, to ia be taravatu utua taudia,+ gwau-edeede taudia, Dirava badinaia lasi taudia, kara dika taudia, lalokau idia hahedinaraia lasi taudia, helaga gaudia idia dadaraia taudia, bona tamadia, sinadia, eiava haida idia alaia mase taudia, 10 matabodaga taudia, tatau ida idia mahuta hebou tatau, taunimanima henaoa taudia, koikoi taudia, gwauhamata koikoi taudia, bona hereva momokani idia dadaraia gaudia ibounai totona taravatu idia karaia.+ 11 Unai hereva momokani be moale Diravana ena hairai sivarai namona hegeregerena, bona unai be lau dekenai ia henia.+

12 Lau be iseda Lohiabada Keriso Iesu lau tanikiu henia, ia ese lau dekenai siahu ia henia, badina ia diba lau be ia lau badinaia, vadaeni lau dekenai hesiai gaukara ia henia,+ 13 ena be guna Dirava ena ladana lau hadikaia, iena taunimanima lau dagedage henia, bona hemataurai karana lau hahedinaraia lasi.+ To ia ese lau dekenai hebogahisi ia hahedinaraia, badina lau diba lasi bona mai abidadama lasi ida lau kara. 14 Oibe, iseda Lohiabada amo hebogahisi hereadaena lau abia bona abidadama bona lalokau lau abia danu, unai lalokau be Keriso Iesu amo ia mai. 15 Inai hereva be momokani bona taunimanima ese idia abia dae be namo: Keriso Iesu be tanobada dekenai ia mai, kara dika taudia hamauria totona.+ Idia ibounai amo lau be dika momokani.+ 16 To ia ese lau dekenai hebogahisi ia hahedinaraia, unai amo Keriso Iesu ena haheauka karana be lau, dika momokani tauna dekenai ia hahedinaraia, vadaeni mauri hanaihanai abia totona ia idia abidadama henia taudia dekenai lau be haheitalai.+

17 Vadaeni noho hanaihanai King,+ ia be ia mase diba lasi,+ ita itaia diba lasi,+ ia sibona be Dirava,+ ia ese hemataurai bona hairai ia abia ela bona hanaihanai. Amen.

18 Egu natuna Timoteo e, inai hadibaia hereva be oi dekenai lau henia, oi totona idia perovetalaia herevadia hegeregerena, unai amo tuari namona lalonai do oi tuari noho,+ 19 bona abidadama bona lalomamina namona do oi dogoatao,+ unai be haida ese idia negea, unai dainai edia abidadama ia dika, bouti be nadi ia botaia bamona. 20 Humenaio+ bona Alesana dekenai unai bamona ia vara, bona idia be Satani dekenai lau henia,+ unai amo do idia diba Dirava ena ladana idia hadikaia be maoro lasi.

2 Gau ginigunana be inai, umui ibounai lau hagoadaia, Dirava do umui noinoi henia, do umui guriguri henia, bona do umui tanikiu henia, taunimanima idauidau totona, 2 bona king bona dagi bada taudia totona danu,+ unai amo do ita noho namo mai maino ida, Dirava do ita badinaia momokani bona mai laloa namonamo ida do ita noho.+ 3 Iseda Hamauria Tauna, Dirava, ena matanai unai be namo bona ia moalelaia.+ 4 Iena ura be taunimanima idauidau do ia hamauria+ bona hereva momokani ena diba maoromaoro do idia abia. 5 Badina Dirava be tamona,+ bona Dirava bona taunimanima huanai+ medieita* be tamona,+ Keriso Iesu unai.+ 6 Ia be sibona ia henia, taunimanima ibounai edia mauri davana karaia totona,+ bona idia ese nega korikori ai unai do idia herevalaia. 7 Unai hamomokania totona+ Dirava ese lau ia abia hidi, haroro tauna bona aposetolo tauna ai lau lao totona.+ Lau be hereva momokani lau gwauraia noho, lau koikoi lasi, bese idauidau dekenai abidadama bona hereva momokani lau hadibaia.+

8 Unai dainai egu ura be inai, umui hebou gabudia ibounai dekenai tatau do idia guriguri noho, edia imana helagadia do idia abia isi,+ do idia badu lasi+ bona hepapahuahu lasi.+ 9 Bona lau ura hahine be mai hemataurai bona mai laloa maoromaoro ida dabua namona do idia karaia, namo lasi huina be sitaelo idauidau ai idia pania bona golo eiava pel nadi eiava dava bada dabua idia atoa.+ 10 To bema idia gwau idia be Dirava tomadiho henia hahinedia, sibodia idia hahairaia dalana amo unai do idia hamomokania.+ Namona be gaukara namodia idia karaia, bona unai be idia ia hahairaia gauna.

11 Namona be hahine ia hereva lasi to mai manau ida diba ia abia.+ 12 Lau ese hahine dekenai maoro lau henia lasi ia hadibaia eiava tau ta ia biagua totona, bona ia hereva lasi be namo.+ 13 Badina Dirava ese Adamu ia karaia guna, bena Heva ia karaia.+ 14 Danu, Satani ese Adamu ia koia lasi, to hahine ia koia+ bona hahine ia kara dika. 15 Bema hahine be sinana ai idia lao, unai ese idia ia gimaia,+ to namona be idia ese abidadama, lalokau, helaga karana bona laloa maoromaoro idia hahedinaraia noho.+

3 Inai hereva be momokani: Bema ta ia ura naria tauna ena maduna ia abia,+ ia be gaukara namona ia ura henia unai. 2 Naria tauna be kerere ta lasi, hahine tamona ena adavana, ena kara ia biagua, ia laloa namonamo,*+ dala maorona ia badinaia, heabidae tauna,+ ia hegeregere ia hadibaia totona,+ 3 ia be kekero tauna lasi,+ ia be dagedage tauna lasi, to ia laloa maoromaoro,+ ia hepapahuahu lasi,+ moni ia ura henia dikadika lasi,+ 4 dala maorona ai iena ruma bese ia naria, bona iena natudia be idia laloa namonamo bona ia henunai idia noho.+ 5 (Bema ta be ena ruma bese naria dalana ia diba lasi, edena bamona Dirava ena kongrigeisen do ia naria?) 6 Hahediba tauna matamatana ese unai maduna do ia abia lasi,+ dika ia hekokoroku bena Diabolo ese ia abia hahemaoro ia abia. 7 Danu, namona be murimuri taudia edia vairanai ia be ladana namona tauna,+ unai amo haida ese ia hadikaia herevadia do idia gwauraia lasi, bona Diabolo ese do ia tarapua lasi.

8 Namona be hesiai taudia danu be idia laloa namonamo, idia koikoi lasi, wain momo idia inua lasi, moni idia ura henia dikadika lasi bona sibona edia namo idia tahua lasi,+ 9 bona abidadama ena hunia hereva helagana be mai lalomamina goevana ida idia dogoatao.+

10 Danu, namona be idia umui tohoa bema idia hegeregere hesiai maduna idia abia totona, badina haida ese idia dekenai kerere ta idia davaria lasi.+

11 Unai hegeregerena, namona be hahine idia laloa namonamo, ta ena ladana idia hadikaia lasi,+ edia kara idia biagua, bona gau ibounai idia karaia namonamo.+

12 Namona be hesiai taudia edia adavana be tamona, bona dala maorona ai edia natudia bona edia ruma bese idia naria. 13 Badina dala maorona ai edia hesiai maduna idia huaia tatau be ladana namona idia abia noho bona mai gari lasi ida edia abidadama Keriso Iesu dekenai idia herevalaia.

14 Ena be lau ura oi dekenai lau mai, to dika lau mai haraga lasi dainai, oi dekenai inai revareva lau torea, 15 unai amo do oi diba Dirava ena ruma bese lalonai edena bamona oi kara be namo.+ Unai be mauri Diravana ena kongrigeisen, ia be hereva momokani ena du bona hereva momokani ia durua. 16 Oibe, inai Dirava badinaia karana ena hunia hereva helagana be bada herea: ‘Iesu be tauanina ai ia hedinarai,+ lauma ai Dirava ese ia gwauraia maoromaoro,+ aneru edia vairanai ia hedinarai,+ bese idauidau huanai idia harorolaia,+ tanobada taudia ese idia abidadama henia,+ bona Dirava ese hairai lalonai ia abia daekau.’

4 To, lauma helaga amo idia mai herevadia be inai, nega gabedia lalonai haida be abidadama do idia rakatania bona lauma dikadia edia hereva bona demoni edia hadibaia hereva do idia kamonai,+ 2 badina koikoi taudia ese hereva koikoidia idia gwauraia,+ idia edia lalomamina be auri siahuna amo ia gabua bamona. 3 Idia ese headava idia taravatua,+ bona taunimanima idia oda henia aniani haida idia ania lasi totona.+ Dirava ese unai aniani be abidadama taudia bona hereva momokani idia diba maoromaoro taudia totona ia havaraia, tanikiu idia gwauraia murinai, idia abia diba.+ 4 Dirava ese ia havaraia gaudia ibounai be idia namo,+ bona idia ta umui dadaraia lasi,+ to tanikiu umui gwauraia murinai, umui abia, 5 badina unai gaudia be Dirava ena hereva bona guriguri amo idia hahelagaia vadaeni.

6 Tadikaka dekenai unai sisiba oi henia karana amo, oi be Keriso Iesu ena hesiai tauna namona ai do oi lao. Abidadama herevadia bona hadibaia hereva namodia amo oi sibona oi ubua, unai be oi badinaia namonamo herevadia.+ 7 To sivarai koikoidia, hegeregere hahine burukadia ese idia gwauraia sivaraidia, oi dadaraia.+ Bona oi sibona oi treinia Dirava oi badinaia totona, unai be emu tahua gauna. 8 Badina tauanina treinia karana be mai ena namo sisina, to Dirava badinaia karana ese gau ibounai dekenai oi do ia durua, hari inai nega bona vaira nega maurina ai, oi dekenai hahenamo do ia mailaia.+ 9 Unai hereva be momokani bona oi abia dae momokani be namo. 10 Unai dainai ita gaukara goada bona ita hekwarahi noho,+ badina mauri Diravana ita abidadama henia, ia be taunimanima idauidau ibounai, abidadama taudia unai, edia Hamauria Tauna.+

11 Idia dekenai unai oda herevadia oi henia noho bona idia oi hadibaia noho. 12 Namo lasi ta ese oi ia laloa maragi badina oi be mero matamata sibona. To, namona be abidadama taudia dekenai emu hereva, kara, lalokau, abidadama, bona kara goeva ai oi be haheitalai namona. 13 Namona be taunimanima vairanai oi duahiduahi,+ sisiba* oi henia, bona oi hadibaia, unai oi karaia noho ela bona lau mai. 14 Elda oreana ese edia imana be oi latanai idia atoa neganai, unai harihari gauna oi abia. Unai peroveta herevadia amo oi abia harihari gauna oi laloa bada.+ 15 Unai gaudia oi laloa dobu. Unai gaudia dekenai emu lalona ibounai oi henia, vadaeni taunimanima ibounai do idia itaia oi be oi goada noho. 16 Oi sibona bona emu hadibaia hereva dekenai oi naria namonamo.+ Unai gaudia oi badinaia noho, badina unai bamona oi karaia neganai, oi sibona bona oi idia kamonai henia taudia do oi hamauria.+

5 Tau badana do oi hereva auka henia lasi.+ To tamana bamona oi hereva henia. Memero matamata be tadikaka bamona oi hereva henia, 2 hahine badadia be sinana bamona oi hereva henia. Kekeni matamatadia be taihuna bamona oi hereva henia, mai kudou goevana ida.

3 Idia dabu momokani vabu* do oi laloa bada bona naria.+ 4 To bema vabu ta be mai ena natudia eiava tubudia, namona be idia ese edia ruma bese lalonai Dirava badinaia karana idia hahedinaraia guna.+ Bona edia tama sina bona tubudia idia naria, unai be edia abitorehai idia haloua bamona,+ badina Dirava ena matanai unai be maoro.+ 5 Vadaeni ia dabu momokani bona ia dekenai gau ta ia noho lasi vabu ese Dirava ia abidadama henia+ bona dina bona hanuaboi ia guriguri bona ia noinoi goadagoada.+ 6 To tauanina hamoalea gaudia sibona ia tahua vabu be ia mase bamona, ena be ia do mauri noho. 7 Unai dainai unai hadibaia herevadia* oi henia noho, vadaeni idia be kerere ta lasi. 8 Momokani, bema tau ta be iena henari henunai idia noho taudia ia naria lasi, bona bema iena ruma bese taudia ia naria lasi, ia ese ena abidadama ia negea vadaeni bona iena dika ese abidadama lasi tauna ena dika ia hereaia.+

9 Namona be inai bamona vabu edia ladana be lista dekenai do umui torea, ena mauri lagani be 60 ia hanaia bona ia be tau tamona ena adavana, 10 ena kara namodia dainai ia be mai ena ladana namona,+ hegeregere ena natudia ia naria namonamo,+ heabidae karana ia hahedinaraia,+ helaga taudia edia aena ia huria,+ idia hisihisi taudia ia durua,+ bona kara namodia ibounai ia badinaia.

11 To vabu matamata edia ladana be lista dekenai do umui torea lasi, badina edia headava urana ia goada neganai, Keriso ena hesiai gaukara idia laloa lasi, to idia ura idia headava. 12 Idia be hahemaoro do idia abia, badina edia gwauhamata gunana idia laloa lasi. 13 Ma danu, lahedo karana idia manadalaia, ruma idauidau dekenai idia lao, idia udu mauri, ma haida edia mauri lalonai idia vara gaudia idia kikilaia,+ bona do idia herevalaia be maoro lasi gaudia idia herevalaia. 14 Unai dainai lau ura vabu matamata do idia headava,+ bona natudia idia havaraia,+ bona ruma bese idia naria. Unai amo edia inai tauna ese idia do ia gwauraia dika lasi. 15 Oibe, vabu haida be dala maorona idia rakatania vadaeni bona Satani idia badinaia. 16 Bema abidadama hahine ta ena ruma bese lalonai vabu idia noho, idia ia durua be namo, unai amo kongrigeisen ese unai maduna do ia huaia lasi. Bena kongrigeisen ese ia dabu momokani vabu* do ia naria.+

17 Dala maorona ai naria gaukara idia karaia elda taudia+ ita matauraia bada be namo.+ Idia be idia gaukara goada Dirava ena hereva idia herevalaia bona idia hadibaia.+ 18 Badina Toretore Helagadia ia gwau: “Boromakau tau be witi ia moia neganai, namo lasi ena uduna oi koua.”+ Danu, ia gwau: “Gaukara tauna ese ena gaukara davana ia abia be namo.”+ 19 Bema tau ta ese tau badana* ta ia samania, iena hereva do oi abia dae lasi. To bema taunimanima rua eiava toi ese unai hereva idia hamomokania, vadaeni ena hereva do oi abia dae.+ 20 Kara dika idia karaia noho taudia be ibounai vairanai idia do oi sisiba henia,+ unai amo ma haida danu be do idia gari. 21 Dirava bona Keriso Iesu bona Dirava ese ia abia hidi aneru vairanai oi lau oda henia, inai hadibaia hereva ibounai oi tahua namonamo, bena abia hidi oi karaia, bona maka tamona ai taunimanima ibounai oi kara henia.+

22 Namo lasi ta oi abia hidi haraga* maduna ta ia huaia totona,+ bona ma haida edia kara dika oi durua lasi, to oi kara goeva noho be namo.

23 Ranu sibona do oi inua lasi, to wain sisina do oi inua emu bogana hanamoa totona, badina nega momo oi gorere.

24 Taunimanima haida edia kara dika be taunimanima ibounai idia diba, vadaeni maoromaoro hahemaoro idia abia, to ma haida edia kara dika be gabeai idia hedinarai.+ 25 Unai hegeregerena, kara namodia be idia hedinarai,+ bona taunimanima idia itaia lasi kara namodia be idia hunia hanaihanai lasi.+

6 Igui hesiai taudia be inai bamona do idia laloa noho, edia biagudia ese hemataurai bada idia abia be namo,+ unai amo taunimanima ese Dirava ena ladana bona ena hadibaia herevadia idia gwauraia dika lasi.+ 2 Ma danu, bema haida edia biaguna be abidadama tamona tauna, namo lasi idia laloa edia biaguna be tadikaka dainai idia matauraia lasi. To namona be mai ura bada ida gaukara do idia karaia, badina abidadama taudia bona edia lalokau tadikakadia be idia edia gaukara namona amo, namo idia abia.

Unai gaudia oi hadibaia noho bona hagoadaia herevadia oi henia noho. 3 Bema ta be hahediba hereva idauna ia hadibaia, bona unai be iseda Lohiabada Iesu Keriso ena hadibaia hereva namodia+ bona Dirava badinaia karana ena hadibaia herevana ida ia hegeregere lasi,+ 4 ia be hekokoroku tauna bona gau ta ia lalopararalaia lasi.+ Ia be henanadai momo bona hepapahuahu herevadia sibona ia laloa bada.+ Unai gaudia dainai inai idia vara: Mama, heai, hadikaia herevadia, bona laloa dikadia. 5 Bona edia lalohadai ia dika+ bona hereva momokani idia laloa lasi taudia be hanaihanai anina lasi gaudia dainai idia hepapahuahu, idia laloa Dirava badinaia karana be gau haida abia dalana.+ 6 Oibe, bema Dirava ia badinaia tauna ia abia dae ia dekenai idia noho gaudia be hegeregere, unai tauna be hahenamo momo do ia abia.+ 7 Ita be tanobada dekenai gau ta ita abia mai lasi, bona gau ta do ita abia lao lasi.+ 8 Unai dainai, bema ita be mai iseda aniani, dabua bona noho gabuna, unai be hegeregere.+

9 To idia ura idia taga taudia be hedibagani do idia davaria, tarapu lalonai do idia moru,+ ura dikadia do idia abia bona kavakava karadia do idia karaia, unai ese dika bada ia havaraia.+ 10 Moni ura henia bada karana be dika idauidau ibounai edia badina, bona haida be unai idia ura henia bada dainai, abidadama idia rakatania bona hisihisi momo idia davaria.+

11 To oi, Dirava ena hesiai tauna e, unai gaudia amo oi heau siri. Bona oi hekwarahi kara maoromaoro, Dirava badinaia karana, abidadama, lalokau, haheauka, bona lalomanau oi tahua noho totona.+ 12 Abidadama ena tuari namona do oi tuarilaia. Mauri hanaihanai do oi dogoatao auka. Dirava ese unai mauri abia totona oi ia boiria bona taunimanima momo vairanai unai mauri oi gwauraia hedinarai.

13 Gau ibounai edia mauri ia naria Diravana bona Keriso Iesu, taunimanima vairanai Pontio Pilato dekenai ena abidadama ia gwauraia hedinarai tauna,+ edia vairanai oi lau oda henia, 14 namona be inai oda hereva be goeva bona kerere lasi dalanai oi badinaia, ela bona iseda Lohiabada Iesu Keriso ia hedinarai.+ 15 Moale bona Siahu Bada Tauna be abia hidi negana ai do ia hedinarai. Ia be king ibounai edia King bona lohia ibounai edia Lohia.+ 16 Ia sibona be ia mase diba lasi,+ ia be diari lalonai ia noho bona ta be unai diari kahirakahira ia lao diba lasi,+ guna ta ese ia itaia lasi bona hari danu ta ese ia itaia diba lasi.+ Ia dekenai hemataurai bona goada bada idia noho ela bona hanaihanai. Amen.

17 Inai nega oromana* ai idia taga taudia do oi hadibaia* idia hekokoroku lasi totona, bona idia dika haraga kohu do idia abidadama henia lasi,+ to Dirava do idia abidadama henia, ia ese ita dekenai gau momo herea ia henia ita moalelaia totona.+ 18 Idia umui hamaoroa kara namodia bona gaukara namodia momo do idia karaia, hariharibada karana do idia hahedinaraia bona idia dekenai idia noho gaudia do idia haria,+ 19 unai dala amo idia be vaira negana totona badina namona idia haginia, unai be dava bada kohu bamona idia haboua,+ unai amo mauri korikorina idia dogoatao auka.+

20 Timoteo e, oi abia gauna do oi naria namonamo,+ helaga gauna idia hadikaia anina lasi herevadia bona diba koikoina amo idia vara herevadia, hereva momokani idia hakoikoia herevadia unai, oi dadaraia.+ 21 Haida be unai diba idia heagilaia dainai, edia abidadama idia rakatania vadaeni.

Namona be hebogahisi hereadaena be umui dekenai ia noho.